ತುಳುವ ತಿರಿತ ಸಿರಿ ಪಜಿತೊಂದು ಪೋಯಿಲೆಕೊನೇ ಒಂಜೆತ ಬೆರಿಕ್ಕೊಂಜಿ ದಿಂಜಿ ಪೊಸತನ ಅರಲೊಂದು ನೆಗತೊಂದು ಬರ್ಪುಂಡು. ಅರಲಿ ಸಿರಿಮುಡಿತುಲಯಿಡ್ದ್ ಪಸರು ಕಮ್ಮೆನ ನಾಲೂರ ಮೂಂಕುಗೆಡ್ತ್‌ದ್, ಕೆಬಿ ಅರಲಾದ್, ತುಳುವ ಸೀಮೆದಂಚೊರ ಕಣ್ಣ್ ಹಾಸ್‌ದ್, ಕಾರ್ ಒಯ್ತೊಂದು ಬರ್ಪಿಲೆಕ ಮಲ್ಪುಂಡು. ಅತ್ತಂದೆ ಮರಪಂದಿ ನೆಂಪುದ ಮಾಲೆನ್ ಕೋತ್ ಕಡಪುಡುಂಡು ಪನ್ಪಿನೆಕ್ ಸಾಕ್ಷಿಯಾದ್ ಪಿದಯಿ ಊರುದಕ್ಲ್ ನಮ್ಮಾಡೆ ಬಿನ್ನೆರಾದ್ ಬತ್ತ್, ಬಿಕ್ಕೆರಾದ್ ಇತ್ತ್, ಮುಲ್ತ ಸಿರಿ ಸೊಬಗ್‌ನ್ ಅನುಭವಿತ್, ನೆಲಮೂಲೊದ ಐಸ್ರೊನು ತೆರಿದ್, ಅಕ್ಲೆಕ್ಲೆನ ದೇಸೊಡು, ಅಕ್ಲಕ್ಲೆನ ಬಾಸೆಡ್ ಮುಲ್ತ ಐಸಿರಿ ಐಭೋಗೊನು ಪುಗರ್‌ದ್ ವರ್ಣಿತ್‌ದ್ ಬರೆದ್ ಒರಿತ್‌ನವೇ ನೆಗತ್ ತೋಜುಂಡು.
ಪರದೇಸೊ ಪರ ಊರುದಕ್ಲೆನ್ ಮರ್ಲ್ ಮಲ್ಪಿ ತುಳುವ ಪೋಕುಡು ಒಂಜಾತ್ ಆಚರಿಪುಲು, ಒಂಜಾತ್ ಪರ್ಬೊಲುಲಾ ಉಲ್ಲೊ. ಪಗ್ಗುದ ಬಿಸುಕಣಿಡ್ದ್ ಸುಗ್ಗಿದ ಕಡೆಮುಟ್ಟ ಒಂಜೆಕ್ಕೊಂಜಿ ಒತ್ತು ಕೊರೊಂದು ಬರ್ಪಿ ಪರ್ಬೊಲೆನ ಆಚರಿಪುದೊಟ್ಟು ಅಯಿಕ್ಕ್ ಸರಿಯಾಯಿ ತೆನಸಮಾಲಿಕೆಲಾ ಉಂಡು. ಪತ್ತನಾಜೆ ಪರ್ಬೊಲೆಗ್ ಗಿಡ್ಕ್ ಅಡೆತ್ತ್ ಬೆನ್ನಿ ಬೇಲೆದಂಚಿ ಮೋನೆ ಪಾಡ್ದ್ ಬೆನ್ನಿದ ಒಂಜಿ ಮೊಟ್ಟುದ ಬೇಲೆ ಮುಗಿತ್ ಸೌಕಸೊಡು ಕುಲ್ಲುನ ಪೊರ್ತು ಪಂಡ ಅವು ಆಟಿ ತಿಂಗೊಲು. ಬೇಲೆ ದಾಂತಿ ಪೊರ್ತು ತಿಂದಿ ತೆನಸ್ ಕರಪೆರೆಗ್ ಆವಂದೆ ಕಾಡ್ ಬೈಲ್ ಅಲೆವೊಂದು ಚೇವು, ತಜಂಕ್, ಕೇನೆ, ಕೆರೆಂಗ್, ನರೆ, ಈಯ್ಯೆರ್‌ದಂಚಿ ಕಾಡಸೊತ್ತುಲೆನ್ ಪಜಿಯೋ, ಅಡ್‌ದೋ ತಿಂದ್‌ದ್ ಬದ್ಕಿ ಪೆರಿಯತರೆಮುಂದೆಲ್ ಆಟಿ ಕರಿನಗ ಪರ್ಬೊಲೆ ಸಾಲ್‌ಗ್ ಅಡಿ ದೀಪಿ ಅಟ್ಟಣೆ ಮಲ್ತ್‌ದ್ ದೀತೆರ್. ಅವೆನ್ನ್ ನಮ್ಮ ಕಾಲೊದ ತರೆ ಮುಟ್ಟಲಾ ಒರಿತೊಂದು ಬೈದೆರ್.
ತುಳುವೆರೆಗ್ ಬಿಸುಡ್ದು ಬೊಕ್ಕ ಪೊಸ ಒರ್ಸ ಸುರು ಆಪುಂಡು. ಪಗ್ಗುದ ದೊಂಬು, ಬೇಸ್ಯದ ಬೆಪ್ಪು, ಕಾರ್ತ್ಯೊಲುದ ಬರ್ಸನ್ ಮುಗಿತ್‌ದ್ ಕಾರ್ ದೀಪುನ ತಿಂಗೊಲು ಬರ್ಸ ದೊಂಬುದ ಬೆರಕೆಡ್ ಬತ್ತಿ, ಸೀಕ್ ಸಂಕಟೊಲೆಗ್ ಜನೊಕುಲು ತನ್ಕುಲೆ ಸರ‍್ರೊನು ಒಡ್ಡೊನುನ ತಿಂಗೊಲು. ಅವ್ವೇ ಆಟಿ. ತುಳುವ ಕಾಲಕೊಂದೆಡ್ ತೂಂಡ ತೆರಿಯು ಆಟಿಡ್ ಒಂಜಿ ರಡ್ಡ್ ದಿನ ಜಾಸ್ತಿಯೇ ಉಪ್ಪುಂಡು.
ಈ ಪೊರ್ತುಡು ಬೆನ್ನಿದ ಬುಲೆ ಕೈಕ್ ಬತ್ತುಪ್ಪುಜಿ, ಅಂಚ ಉಪ್ಪುನಗ ಒಗ್ಗರಣೆ ಸಾಗರ ಇತ್ತ್ಂಡ ಒಂಜೊಂಜಿ ಮುಡಿ ಅರಿತ ನುಪ್ಪು ರಡ್ಡ್ ಮೂಜಿ ಜನ ಉನ್ಪುನ ತಾಕತ್‌ದ ಜನಮಾನಿಲು ಉಪ್ಪುನಗ ಪರ್ಬ ಪಂದ್ ಎಣ್ಣೆದ ತೆನಸ್, ಸಾಗರದ ಒನಸ್ ಮಲ್ತ್ಂಡ ಬಂಙೊಡು ಬಂಙ ಆವು ಅತ್ತಂದೆ ಬೊಕ್ಕದ ದಿನೊಕುಲೆಗ್ ದಾಲ ಉಪ್ಪಂದ್ ಪನ್ಪಿ ನಿಲೆಟ್ಟ್ ಆಟಿಡ್ ಅಟ್ಟಿಲ್‌ಗ್ ಬಙ ಬೂರ್ನಗ ಪ್ರಕೃತಿಡ್ ಸುಲಭಡ್ ತಿಕ್ಕುನ ಸರ‍್ರೊಗು ಬೆಪ್ಪು ಬೊಕ್ಕ ತಾಕತ್ ಕೊರ್ಪುನ ಅಂಚನೆ ಒಂಜಿವೇಳೆ ಬಙ ಇಜ್ಜಂಡಲ ಬೇಲೆ ಇಜ್ಜಂದಿನೆಡ್ ಬೆಂದ್ ತಿಂದ್ ಜೀರ್ಣ ಮಲ್ಪುನ ಜೀವೊಲೆಗ್ ಅಜೀರ್ಣ ಆಯೆರೆ ಬಲ್ಲಿ ಪಂದ್ ಅರಿ, ರಾಗಿ, ಗೋಧಿತ ತೆನಸ್ ಒಂತೆ ಕಮ್ಮಿ ಮಲ್ತ್ ಬೇಗ ಜೀರ್ಣ ಆಪುನ ತೆನಸ್‌ಲೆನ್ ಅಟ್ಟಿಲ್ ಮಲ್ತ್ ತಿನ್ಪೆರ್. ಅವು ಪಂಡ ನರೆ, ಕೇನೆ, ಕಣಿಲೆ, ಚೇವು, ನೀರ್ ಕುಕ್ಕು, ಪೆಲಕಾಯಿದ ಕೂಂಜಿ, ಪೆಲತರಿ, ಕೆರೆಂಗ್, ತಜಂಕ್, ನುರ್ಗೆ ಸೊಪ್ಪು, ಈಯೆರ್‌ದ ಕಾಯಿ, ಲಾಂಬು, ಉಪ್ಪಡ್‌ಪಚ್ಚಿಲ್, ಪುಂಡಿ ಕೇನೆ, ಮರಚೇವು ಪಂದ್ ಕನತ್‌ದ್ ಕಜಿಪು, ಅಡ್ಯೆ ಮಲ್ಪುನು, ಉದುರಿ ಬೂರುದ ಕಂಡೆ, ಅರ್ತಿದ ಕೆತ್ತೆ, ಬೇಂಗದ ಕೆತ್ತೆ, ಇರ್ಪೆದ ಕೆತ್ತೆ, ತಾರಾಯಿದ, ಕೊತ್ತಂಬರಿ, ಮೆತ್ತೆ, ದಾಸಿಮಿದ ಗಂಜಿ ಮಲ್ತ್ ತಿನ್ಪುನು ತುಳುವೆರೆಗ್ ಈ ತಿಂಗೊಲುಡು ಅನಿವಾರ್ಯ ಬೊಕ್ಕ ಅಭ್ಯಾಸಲ ಆದ್ ಪೋಪುಂಡು.
ಆಟಿಡ್ ಪೋಂಜೋವುಲೆನನೇ ಕಾರ್‌ಬಾರ್. ಬಾಕಿದ ತಿಂಗೊಲು ತುಳುವೆರ್ ಆಂಜೊವುನಕ್ಲ್ ಬೆನ್ನಿ ಮಲ್ಪುನಗ ಅಕ್ಲೆಗ್ ಬೋಡಾಯಿ ಅಟಿಲ್ ಮಲ್ತ್, ಇಲ್ಲ್ ಬಾಕಿಲ್ ಮನಾರ ಮಲ್ತ್, ಪೆತ್ತ ಕೈಕಂಜಿಲೆನ ಬಂಜಿ ದಿಂಜದ್, ಚಾಕಿರಿ ಮಲ್ತೊಂದು ಒಟ್ಟುಗು ಬೆನ್ನಿಲ ಮಲ್ತೊಂದುಪ್ಪಿ ಪೊಂಜೊವುಲೆಗ್ ಆಟಿಡ್ ಒಂತೆ ಉಸುಲು ಬುಡಿಯರೆ ಸಮಯ ತಿಕುಂಡು. ಆಟಿ ಅರಂಟ್ ತಿನ್ಪಿ ತಿಂಗೊಳು ಪನ್ಪಿನಂಚ ಬಾಕಿದ ೧೧ ತಿಂಗೊಲು ಬುಡು ಕೈಟ್ ಮಲ್ತೊಂದಿತ್ತಿ ತೆನಸ್ ಕಮ್ಮಿ ಮಲ್ತ್ ಪೊಂಜೋವುಲು ಕಾಡ್ ಬಲ್ಲೆ, ತೋಡು ಕಂಡ ನಾಡೊಂದು ಪೋಪೆರ್. ಸಾರ ಬಗೆತ ಸೀಕ್‌ಗೆ, ಸಾರತ್ತೊಂಜಿ ಬಗೆತ ಮರ್ದ್ಗೆ ಪನ್ಪಿನಂಚ ಅರಿ ಕಮ್ಮಿ ಗಲಸುನ, ತೆನಸ್ ಒನಸ್‌ಲ ಆದ್, ಮರ್ದ್ಲ ಆಪುನ ಸಪ್ಪು, ಕಂಡೆ, ಬೇರ್, ನಾರ್ ಕನತ್ ಪತ್ರೊಡೆ, ತೇಟ್ಲ, ಗಂಜಿ, ಕಸಾಯ, ಅಡ್ಯೆ, ಅಂಬೆಲಿ ಅಡ್‌ದ್ ಬಂಜಿ ಬೊಕ್ಕ ಆರೋಗ್ಯ ದಿಂಜವೊಂದು ಇತ್ತೆರ್. ತಿಮರೆ ಆಟಿಡ್ ಕೈಪೆ ಪಂದ್ ಅಡೊಂದಿಜ್ಜಂಡ್. .
ಆಟಿಡ್ ವೊವ್ವೇ ಎಡ್ಡೆ ಲೇಸ್‌ಲಾಯಿನ ಮದಿಮೆ ಮಾಚಿರ ಇಲ್ಲೊಕ್ಕೆಲ್ ನಡಪುಜಿ. ಕಾರಣ ಆಟಿ ಅನಿಷ್ಠ ತಿಂಗೊಲು ಪನ್ಪಿನಾಂಡಲ ಉಲಾರ್ಥ ಆಟಿದ ಜಡಿ ಬೊಲ್ಲ, ಉರಿದೊಂಬು, ಸೀತ ಉಷ್ಣಗ್ ಲೇಸ್ ಗೆಪ್ಪುನು ಒಂತೆ ಕಷ್ಟ. ಅತ್ತಂದೆ ಬೆನ್ನಿದ ಬೇಲೆಲೆ ನಡುಟು ಅಟ್ಟಣೆಗ್‌ಲ ಪುರ್ಸೊತುಪ್ಪುಜಿ ಪನ್ಪುನ ಆದಿತ್ತ್ಂಡ್. ಆಟಿ ಪಂಡ ಒಂತೆ ಬಂಙದ ತಿಂಗೊಲುಲ ಅಂದ್. ಅಂಚನೆ ಬರ್ಸ ದೊರಿಂಡ ಉಂತಂದಿ ಬರ್ಸ, ದೊಂಬು ಕಾಯಿಂಡ ಭೂಮಿ ಕಾಯುನ ಖಾರ ದೊಂಬು. ಒಟ್ಟುಗು ಬೆನ್ನಿ ಬೇಸಾಯದ ಬೇಲೆಲ ಇಜ್ಜಿ. ಸೀಕ್ ಸಂಕಟಲೆಗ್ ಕಮ್ಮಿ ಇಜ್ಜಿ. ಅಂಚಾದ್ ಆಟಿ ಅನಿಷ್ಟ ತಿಂಗೊಲು ಪನ್ಪಿ ನಂಬೊಲಿಗೆಲಾ ಉಂಡು.
ತುಳುನಾಡ್‌ದ ಸೋಜಿಗದ ಇಚಾರೊಲೆನ ಸಂಚಿ ಬುಡ್ಪನಗ ನೆಗತ್ ತೋಜುನ ಆಚರಣೆ ಆಟಿಡ್ ಬಾಕಿ ದಿನೊಡ್ದುಲಾ ಜಾಸ್ತಿ ವಿಶೇಷತೆದ ದಿನ ಆಯಿನ ಆಟಿ ಅಮಾಸೆ. ಆನಿ ಕಾಂಡೆ ತೋಡು ಅತಂಡ ಸುಧೆಟ್ ಮೀದ್ ಬಾರೆದ ಕೊಡಿ ಇರೆಟ್ ನವದಾನ್ಯ, ಪಂಚ ಪುಷ್ಪಲಾಯಿನ ತೇರ್ ಪುರ್ಪ, ನಂಜಿ ಬಟ್ಟಲ್, ಸಂಕಪುಷ್ಪ, ಕಮಲ ಪೂ, ಬೇಲಿ ದಾಸನ್, ತರೆಯಿನ ಪಣವು, ಬಚ್ಚಿರೆ ಬಜ್ಜೆಯಿ ದೀದ್, ಇರೆತ್ತ ಕೊಡಿಟ್ ನಿನೆ ಪೊತ್ತದ್ ದೀದ್ ನೀರ್‌ಡ್ ದಾನ ಬುಡ್ಪೆರ್. ಅವೆನ್ನ್ ಪಕ್ಕಿ ಪಾರಣೆಲ್ ತಿಂದ್ ಬಂಜಿ ದಿಂಜದ್ ಪೋವಡ್ ಪಂದ್ ಪೆರಿಯೆರೆ ಮಲ್ಲಮನಸ್ಆದುಪ್ಪು. ಆನಿ ಪಾಲೆದ ಮರಟ್ಟ್ ಬೂಮಿದೇವಿ ತನ್ನುಡಲ್‌ಡ್ ಇತ್ತಿ ಸರ್ವ ಮರ್ದ್‌ದ ಸತ್ವೊನುಲಾ ಅಯಿಟ್ಟ್ ದಿಂಜದುಪ್ಪುವಲ್ ಪನ್ಪಿ ನಂಬಿಕೆ ತುಳುವ ಹಿರಿಯೆರೆನವು. ಅಮಾಸೆದ ದುಂಬುನಾನಿ ಪೊರ್ತು ಕಂತ್‌ನೆಡ್ದ್ ಬೊಕ್ಕ ಪಾಲೆದ ಮರತಡಿಕ್ಕ್ ಪೋದು ‘ಎಲ್ಲೆ ಮರ್ದ್ ಕೊನೊಯೆರೆ ಬರ್ಪೆ. ನಿನ್ನ ಪೇರ್‌ಡ್ ಮರ್ದಾಯಿ ಮರ್ದ್ ದಿಂಜದ್ ದೀಲ’ ಪಂದ್ ಮರತ ಮುದೆಲ್‌ಡ್ ಬೊಲ್ಲು ಕಲ್ಲ್ ದೀದ್ ಬತ್ತ್, ಪುಲ್ಯ ಕಾಂಡೆ ಇಲ್ಲದಕುಲು ಲಕ್ಕೆರೆ ದುಂಬು ಕಲ್ಲ್ ದೀದ್ ಬತ್ತಿ ಆಂಜೊವು ಬತ್ತಲೆ ಪೋದು ದುಂಬುನಾನಿ ಗುರ್ತಗಾದ್ ದೀನ ಕಲ್ಲ್‌ಡ್ ಗುದ್ದ್‌ದ್ ಮರತ ಕೆತ್ತೆ ಕನಪೆರ್. ಮರಕ್ಕ್ ಕರ್ಬ ತಾಗಯೆರೆ ಬಲ್ಲಿ ಪನ್ಪಿ ನಂಬಿಕೆ ಉಂಡು. ಕೆಲವು ಕೋಡಿಡ್ ಕೂಲಿಡ್ ತುಚ್ಚಿದ್ ಪೇರ್ ಕೆತ್ತೆ ಕನಪುನವುಲ ಉಂಡು. ಮರ್ದ್ ಕನಯೆರೆ ಪೋನಗ ಮೈಟ್ ಕುಂಟು ಇತ್ತ್ಂಡ ಮರ್ದ್ ಆಜುಂಡು ಅತ್ತಂದೆ ಮರಟ್ ಉಪ್ಪುನ ಕುಲೆ, ಪಿಶಾಚಿಲ್ ತೊಂದರೆ ಕೊರ್ಪ ಪನ್ಪಿನವು ನಂಬಿಕೆಲಾ ಅಂದ್, ಪೊಡಿಗೆಲಾ ಅಂದ್. ಪೇರ್ ಕೊರ್ಪಿನ ಮರಕ್ಕ್‌ಲ್ ಪಕ್ಕಿದ ಸೊರ ಲಕ್ಕುನ, ನೇಸರ್ ಉದಿಪುಗು ದುಂಬುದ ಪೊರ್ತು ಜಾಸ್ತಿ ಪೇರ್ ಕೊರ್ಪುಂಡು. ಬೊಕ್ಕ ಅಯಿತ್ತ ಪೇರ್ ಆಜುಂಡು ಪಂದ್ ತೆರಿದ್ ಇತ್ತಿ ಹಿರಿಯಕುಲು ಪುಲ್ಯ ಕಾಂಡೆ ನೇಸರುದಿಪೆರೆ ದುಂಬು ಪಾಲೆದ ಪೇರ್ ಕನಯೆರೆ ಪೋವೊಂದಿತ್ತೆರ್. ಆಂಜೋವು ಕನತಿ ಪಾಲೆದ ಕೆತ್ತೆಗ್ ಇಲ್ಲದ ಪೊಂಜೊವು ಎಡ್ಡೆ ಮುಂಚಿ, ಓಮ, ಶುಂಟಿ, ಬೊಳ್ಳುಳ್ಳಿ, ಜೀರಿಗೆ ಪಾಡ್ದ್ ಕಡೆದ್ ರಸ ಗೆತ್ತ್, ಅಯಿಕ್ಕ್ ತೊಡ್ಡೆದ ನೈ ಪಾಡ್ದ್ ಬೆರೆಪುವೆರ್. ಅಯಿಟಿತ್ತಿ ನಂಜಿನ್ ಗೆಪ್ಪೆರೆ ಬೊಲ್ಲು ಕಲ್ಲ್ ಅತಂಡ ಕರ್ಬದ ತುಂಡು ಕಾಯಿತ್‌ದ್ ಪಾಡ್ದ್ ನೇಸರ್ ಮೂಡಿಯೆರೆ ದುಂಬೆ ಮಾತೆರೆಗ್ಲಾ ಬಜಿ ಬಂಜಿಗ್ ಪರ್ಯರೆ ಕೊರ್ಪೆರ್. ಪಾಲೆದ ಪೇರ್‌ದ ಕೈಪೆಗ್ ಓಲೆ ಬೆಲ್ಲದ ಚೀಪೆ ಮಲ್ಪುವೆರ್. ಮರ್ದ್ ಪರ್ದಾಯಿನ್ನೇ ಮೆತ್ತೆದ ಅತ್ತಂಡ ತಾರಾಯಿದ ಗಂಜಿ ಮಲ್ತ್ ಉನ್ಯರೆ ಕೊರ್ಪೆರ್. ಈ ಮರ್ದ್ ಪರ್‌ಂಡ ಒರ್ಸೊ ಇಡೀ ಸೀಕ್ ಬರ್ಪುಜಿ ಪನ್ಪಿ ನಂಬಿಕೆ ನಮ್ಮ ಪೆರಿಯೆರೆನ.
ಕಂಡಡ್ ಪೊರ್ಲು ತೆಲಿತೊಂದುಪ್ಪಿ ನೇಜಿಗ್ ದೃಷ್ಟಿ ಆಯೆರೆ ಬಲ್ಲಿ, ಕಂಡೊದ ನಂಜಿ ಪೋವೊಡು ಪಂದ್ ಆಟಿ ಅಮಾಸೆದಾನಿ ಕಾಯೆರ್‌ದ ಕನೆ ಅತಂಡ ಗೆಲ್ಲ್ ಕುತ್ವೆರ್. ಮೂಜಿ ಕಬರ್‌ದ ಕೋಲುಗು ಕಾಪು ಪಂತಿ, ಬೈ ಕಟ್ಟ್‌ದ್ ಮಿತ್ತ್ ಬೆದ್‌ರ್‌ದ ಅಂಡೆಡ್ ಕಳ್ಳಿ ನಡ್ಪೆರ್. ಅಯಿಕ್ಕ್ ಕಳ್ಳಿ ಕಾಪು ಮಲ್ಪುನು ಪನ್ಪೆರ್.
ಪುಣಿದಾಂತಿ ಕಂಡತ್ತ್, ತಮೆರಿಜ್ಜಂದಿ ಪೊಣ್ಣತ್ತ್, ಮನಸ್‌ದಾಂತಿ ಒನಸತ್ತ್ ಪನ್ಪಿ ಗಾದೆದಂಚ ಮದಿಮೆ ಆಯಿ ಪೊಣ್ಣು ಜೀವೊಗು ತಮೆರಿ ಏತ್ ತಲ್ಮೆನ ಕೊರ್ಪುಂಡು ಪನ್ಪುನೆನ್ ತೆರಿಯೊಡಾಂಡ ಆಟಿ ಬರೊಡು. ಆಟಿಡ್ ಬೇಲೆಲೆಗ್ ಒಂತೆ ಪುರ್ಸೊತುಪ್ಪುನೆಡ್ ಮದಿಮೆ ಆದ್ ಬತ್ತಿ ಪೊಣ್ಣನ್ ಅಪ್ಪೆ ಇಲ್ಲಗ್ ಕಡಪುಡುನು ವಾಡಿಕೆ. ಮಾಮಿ ಇಲ್ಲದ ಬೆಪ್ಪು ಮಗಲೆಗ್ ಮುಟ್ಟೆರೆ ಬಲ್ಲಿ. ಅಂಚನೆ ಬೆನ್ನಿದ ಬೇಲೆಲೆಗ್ ಪುರ್ಸೊತು ಇಪ್ಪುನಗ ಇಲ್ಲಡ್ ಮಗಲಿತ್ತ್ಂಡ ಕೊಸಿ ಇಪ್ಪುಂಡು, ಆಲೆನ ಬೇನೆ ಬೇಸರ್, ಕೊಸಿ, ಕೊಂಡಾಟ ತೆರಿಯೊನೊಲಿ ಪನ್ಪಿ ಉದ್ದೇಸೊಡು ಅತ್ತಂದೆ ಆಟಿಡ್ ಬಂಜೊತ್ತ್ಂಡ ಗರ್ಬೊಗು ಕುಲೆತ ಚಾಯೆ ಬೂರುಂಡು, ಅತ್ತಂದೆ ನಟ್ಟ ಅರೆಗಾಲೊಡು ಪೆದುವೆರ್. ಆ ಪೊರ್ತುಡು ಜೋಕುಲೆಗ್ ಬೊಕ್ಕ ಪೆದ್ಮೆದಿಗ್ ಬಙ ಆಪುಂಡು ಪಂದ್ ಪೊಸತಾದ್ ಮದಿಮೆ ಆಯಿನ ಪೊಣ್ಣನ್ ತಮೆರಿಗ್ ಲೆತೊ ಬರ್ಪುನ ಕೆರಮ್ಮೊ ತುಳುವೆರೆಡ ಉಂಡು. ಈ ಕ್ರಮೊಕ್ಕು ಆಟಿ ಕುಲ್ಲುನು ಪಂದೇ ಪನ್ಪೆರ್.
ಆಟಿ ತಿಂಗೊಲ್ದ ಬಙೊನು ದುಂಬೊರ್ತಿ ಇಂಚ ತನ್ನಪ್ಪೆಗ್ ತೆರಿಪಾದಲ್‌ಗೆ, ಬಟ್ಟಲ್‌ಡ್ ಮಾಡಗರು, ತಡ್ಯಡ್ ಕಂಚಲದ ದೊಂಪ, ಸೊಂಟೊಡು ಆಟಿ ಕಳೆಂಜೆ. ಪಂಡ ಬಂಜಿಗ್ ನುಪ್ಪುದಾಂತೆ ಬಟ್ಟಲ್‌ಡಿತ್ತಿ ತೆಲಿನ್ ಪರ್ಕ ಪಂದ್ ತೂನಗ ಅಯಿಟ್ಟ್ ಅಟ್ಟೊ ಖಾಲಿಯಾದ್ ಮಾಡ್‌ದ ಪಕ್ಕಾಸ್ ತೋಜೊಂದುಂಡು. ಅಡ್ಯೆರೆ ದಾಲ ಉಂಡಾ ತೂನಗ ಒಯಿಲ್‌ಗ್ ನಿನೆ ಇರೆಲ ತಾಲ್ದಿನ ಕಂಚಲದ ಬೂರುದಂಚ ಪಂಡ ತಡ್ಯದಡಿಯೆ ಕಟ್ಟೊಂದಿತ್ತಿ ತೌತೆ ತೆಕ್ಕರೆ ಕಾಲಿಯಾದ್ ಅಯಿನ್ನ್ ಕಟ್ಟ್‌ದಿತ್ತಿ ಒಲಿ ಬಲ್ಲ್ ಕಡಿದ್ ನೇಲೊಂದುಂಡು. ಮಾನ ಮದೆ ಮಲ್ಪೆರೆ ಇತ್ತಿ ಕುಂಟುಲಾ ಪರಿದ್ ಆಟಿ ಕಳೆಂಜೆ ತಿರಿ ಒಲಿನ್ ತುತ್ತೈತ ಮಲ್ತೊಂದಿಲೆಕ ತಾನುಲ್ಲೆ ಪಂದ್ ಈ ಪಾತೆರದ ಅರ್ಥ.
ಆಟಿ ಕಳೆಂಜೆ ತುಳುನಾಡ ಆಟಿದ ಇಸೇಸ ಆರಾಧನೆ ಬೊಕ್ಕ ಆಕರ್ಷಣೆ. ಕಳೆಂಜೆ ಆಟಿದ ಮಾರಿನ್ ಗಿಡರೆರೆ ಇಲ್ಲಿಲ್ಲಗ್ ಬತ್ತ್ ನಲಿತ್ ಅರಿ ತಾರಾಯಿ ಕಾಣಿಗೆ ಪಡೆದ್ ಪೋಂಡ ಇಲ್ಲಡ್ ಪೊಲಿ ಉರ್ಕರುಂಡು ಪನ್ಪಿ ನಂಬಿಕೆ ನಮ್ಮವು. ಆಟಿಡ್ ಪೊಣ್ಣು ಬಾಲೆ ಮದಿಮಾಲಾಂಡ ಅನಿಷ್ಠ ಪನ್ಪಿ ನಂಬೊಲಿಗೆ ಕೆಲವು ಕಡೆಟಿತ್ತ್‌ದ್, ಆಟಿಡ್ ಮದಿಮಲಾಯಿನ ಪೊಣ್ಣಗ್, ಸೀಕ್‌ದ ಜೋಕುಲೆಗ್, ಗೊಡ್ಡು ಪೆತ್ತಗ್, ಫಲಕೊರಂದಿ ತಾರೆಗ್ ಬೊಕ್ಕ ಸಂತತಿ ಆವಂದಿ ಪೊಂಜೋವುಲೆಗ್ ಆಟಿ ಕಳೆಂಜಡ ತರೆಕ್ಕ್ ನೀರ್ ಮೈಪದ್ ಕಳೆಂಜಗ್ ದಾನೊ ಕೊರ್‌ಂಡ ಆ ಅನಿಷ್ಠ ಕಳೆಯುಂಡು, ಜೋಕುಲಾಪುಂಡು ಫಲ ದಿಂಜಿದ್ ಉರ್ಕರುಂಡು ಪನ್ಪಿ ನಂಬಿಕೆಲ ತುಳುನಾಡ್‌ಡ್ ಉಂಡು.
ತಿರಿ ಕಟ್ಟೊಂದು, ಅರದಲ ಪೂಜಿದ್, ಪನೊಲಿದ ತತ್ರ ಪತೊಂದು ಸಂಧಿ ಪನ್ಪಿ ಪೊಂಜೋವುನೊಟ್ಟುಗು ಬರ್ಪಿ ಕಳೆಂಜೆ ನಮ್ಮ ಇಲ್ಲದ ಮಾರಿ ಗಿಡರುವೆ ಪನ್ಪಿ ನಂಬಿಕೆಡ್ದ್‌ಲ ಮೂಲು ನೆಗಪುನು ಮರಿಯಲಡ್ ಬೆನ್ನಿ ಸಾಗೊಲಿದ ಪುರ್ಸೊತುಡು ಉನೆರೆ ಇಜ್ಜಂದೆ ಇಪ್ಪುನಗ ಇತ್ತಿನಕ್ಲ್ ದಾನ ಮಲ್ತೆರ್‌ಂಡ ಇಲ್ಲ್ ಕರಿಯು ಪಂದ್ ತಿರಿ ಕಟ್ಟ್‌ದ್ ಕಲೆಕ್ಕಾದೆ ಜೀವನ ದೀತಿ ಜನಾಂಗ ಬೊಕ್ಕ ಬೆನ್ನಿದ ಬೇಲೆನೇ ನಂಬಿ ಬೂಮಿಪುತ್ರೆರ್. ಮಾರಿ ಪೋವಡ್ ಪಂದ್ ಪಂಡಲ ಕಾರಣ ಅವ್ವತ್ತ್ ಆಯನ ಇಲ್ಲಗ್ ಇಪ್ಪುನ ತೊಂದರೆಲ್ ಪಂದ್ ತೆರಿಯೊಂದು ಅರಿ ಬಾರ್ ದಾನೊ ಮಲ್ತ್ ಪಾಪದಾಯಗ್‌ಲ ಆಟಿದ ಬಙ ಆಯೆರೆ ಬಲ್ಲಿ ಪನ್ಪಿ ತುಳುವೆರೆನ ಸಂಪ್ರದಾಯ ನೆಗತ್ ತೋಜುಂಡು.
ಆಟಿ ಪಿದಯಿ ಪಾಡುನು ತುಳುನಾಡ್‌ದ ಇಸೇಸ ಆಚರಣೆ. ಅಟ್ಟೊಡಿತ್ತಿ ಅರಿತ ಮುಡಿ ಕಾಲಿ ಆದ್ ಅಟ್ಟೊ ಅಡಿಪುನ ತಿಂಗೊಲು ಆಟಿ. ದಾಯೆ ಪಂಡ ಬಾಕಿ ತಿಂಗೊಲುಡು ದಿಂಜಿದುಪ್ಪುನ ಅಟ್ಟ, ಕದಿಕೆಲ್ ಕಾಲಿ ಆದಿಪ್ಪುನೆಡ್, ಅಟ್ಟಡಿತ್ತಿ ಬಿತ್ತ್‌ದ ಮುಡಿಲಾ ಬಿತ್ತ್‌ದ್ ಆದಿಪ್ಪುನೆಡ್ದಾದ್ ಮಾಯಿಪು ಪಾಡ್ದ್ ಕಜವು ದೆಪ್ಪೆರೆ ಸುಲಭ ಆಪುಂಡು. ಅಯಿನ್ನ್ ಮಾತ ಅಡಿತ್ತ್ ಪಿದಯಿ ಪಾಡ್ದ್ ಸೊಚ್ಚ ಮಲ್ಪುನ ಬೇಲೆ ಪೊಂಜೋವುಲೆಗ್ ಉಪ್ಪುಂಡು. ಈ ಕಜವು ಪಿದಯಿ ಪಾಡುನ ಕ್ರಮೊಕ್ಕು ಆಟಿ ಪಿದಯಿ ಪಾಡುನು ಪಂದ್ ಪನ್ಪೆರ್. ಇತ್ತೆ ಅಟ್ಟದಾಂತಿ ಇಲ್ಲ್, ಪುಗೆದಾಂತಿ ಅಟ್ಟಿಲ್ ಆಯಿನೆರ್ದಾರ ಆಟಿ ಪಿದಯಿ ಪಾಡುನ ಕೆರಮೊ ತೋಜೊಂದು ಇಜ್ಜಿ.
ಇಲ್ಲಡಿತ್ತಿನಕ್ಲ್ ಕಾಲ ಕಳೆಯೆರೆ ಅಟ್ಟೊಡಿತ್ತಿ ಚೆನ್ನೆಮಣೆ ತಿರ್ತ್ ಬರ್ಪುಂಡು. ಪೊರ್ತು ಕಳೆಯೆರೆ ಚೆನ್ನೆ ಗೊಬ್ಬುವೆರ್. ಅಯಿಟ್ಟ್ ಕಂಡನಿ ಬೊಡೆದಿ, ತಗೆ ತಂಗಡಿ, ಅಮರು ಜೋಕುಲು ಗೊಬ್ಬೆರೆ ಬಲ್ಲಿ ಪನ್ಪಿನ ನಂಬೊಲಿಗೆ ಉಂಡು. ಅಯಿಕ್ಕ್ ಇಂಬು ಕೊರ್ಪುನ ಕೆಲವು ಕತೆಕ್ಕ್‌ಲಾ ಉಂಡು. ಆಟಿದ ಬೇಸರ್ಪು ಕರಿಪೆರೆ ಚೆನ್ನೆ ಗೊಬ್ಬೆರೆ ಕುಲ್ಲಿನ ಕತೆ ದುಂಬರಿದ್ ಲಡಾಯಿಗ್ ತಿರ್ಗುಂಡು. ಕಡೆಕ್ಕ್ ಮಣೆಟ್ಟೇ ಹಾಕೊಂದು ಒರಿ ಸೈಪುನಾಡೆ ಮುಟ್ಟ ಎತ್ತುಂಡು ಪನ್ಪಿನೆಕ್ ಅಬ್ಬಗ ದಾರಗನ ಕತೆ ಇಂಬು ಕೊರ್ಪುಂಡು. ಬಾಲೆಜೇವು ಮಾಣಿಗೊ ಪಾಡ್ದನಡ್, ಚೆನ್ನೆಗೊಬ್ಬುಡು ಸೋಲು ನಿಘಂಟ್ ಆನಗ ಬೊಡೆದಿನ್ ಪೇರ್ ಕನಯೆರೆ ಕಡಪುಡ್ದ್ ಮಣೆ ತಿರ್ಗದ್ ದೀನೆನ್ ಅಯಿನ್ನ್ ತೆರಿನ ಮಾನಿಗೊ ದತ್ತ ಕಾರ್‌ಡ್ ಚೆನ್ನೆಮಣೆ ದೊಂಕ್‌ದ್ ಬಲ್ಲಾಲ್ರೆ ಮೋಸೊಗು ಸಡಿಪುವಲ್. ಅಯಿನ್ನ್ ತಡೆವಂದಿ ಬಲ್ಲಾಲ್ರ್ “ಚೆನ್ನೆ ಮಣೆ ದೊಂಕಿನ ಪೊಣ್ಣು ಈ ಎನ್ನ ಬೂಡು ಒರಿಪವನಾ?” ಪಂದ್ ಹಾಕುವೆರ್. ಈ ಉದಾರ್ಮೆ ದಾಯೆ ಮೂಲು ಕೊರ್ಯೆ ಪಂಡ ಉಂದು ದುಂಬುದಕುಲು ಆ ಕಾಲೊಡು ಚೆನ್ನೆ ಮಣೆಕ್ಕ್ ಏತ್ ಮರ್ಯಾದಿ ಕೊರೊಂದಿತ್ತೆರ್ ಪನ್ಪಿನೆನ್ ತೆರಿಪಾವೊಡು ಪಂದ್. ಬೂಡುದ ಘನತೆ ಗೌರವಗ್ ಸಮಾನಾಯಿನ ಘನತೆ ಚೆನ್ನೆಮಣೆಕ್ಕ್ ಅಂಚನೆ ಮಾನಾದಿಗೆ ಚೆನ್ನೆ ಗೊಬ್ಬುಗು ಇತ್ತ್ಂಡ್.
ತುಳುವೆರೆನ ಪಾಲ್‌ಗ್ ಆಟಿ ಅಮಾಸೆ ಏತ್ ವಿಶೇಷನಾ ತಮಿಲೆರೆನ ಬೊಕ್ಕ ಕೊಡವೆರೆನ ಪಾಲ್‌ಗ್ ಆಟಿ ೧೮ ಆತೇ ವಿಶೇಷ.
ಆಟಿಡ್ ಊರುಡು ಬಡಪತ್ತ್ ಪಂದ್ ಬರ್ಸ ದೊಂಬುಡ್ದಾದ್ ದೈವೊಲೆಗ್ ಪೂ ನೀರ್ ದೀಯರಾವಂದೆ, ನೇಮ ಕೋಲ ನಡಪಯೆರಾಪುಜಿ. ಅಂಚಾದ್ ಆಟಿ ಕಳೆಂಜೆ ತುಳುನಾಡ್‌ಗ್ ಜಪ್ಪುನಗ ಸಾರತ್ತೊಂಜೆಡ್ ಕಲ್ಲುರ್ಟಿ ಗುಳಿಗನ್ ಬುಡ್ದ್ ಒಂಜಿ ಕಮ್ಮಿ ಸಾರ ದೈವೊಲು ಮಲೆ ಏರುವೆರ್ ಪಂದ್ ಸಾನ ಮಾಡೊಲೆಗ್ ಬಾಕಿಲ್ ಪಾಡುನ ಕೆರಮ್ಮೊಲ ತುಳುನಾಡ್‌ಡ್ ಉಂಡು. ಕಲ್ಲುರ್ಟಿ, ಗುಳಿಗಗ್, ಕರಿದ್ ಪೋಯಿನಕ್ಲೆಗ್ ಅಗೆಲ್ ತಮ್ಮನ ಬಲಸುವೆರ್. ತೀರ್ ಪೋಯಿನಕ್ಲೆನ್ ೧೬ಗ್ ಸೇರವುನ ಪರಿಪಾಡ್‌ಲ ಆಟಿಡ್ ಉಂಡು. ಆಟಿಡ್ ಕುಲೆಕ್ಕ್‌ಲೆಗ್ ಮದ್ಮೆ ಮಲ್ಪುನ ಇಸೇಸ ಆಚರಣೆ ತುಳುನಾಡ್‌ಡ್ ಇತ್ತ್‌ದ್ ಮದಿಮೆ ಆವಂದೆ ಕರಿಪೋಯಿನ ಆಣ್ ಪೊಣ್ಣು ಕುಲೆಕ್ಕ್ ಸಂಬಂಧ ತೂದು ಮದಿಮೆ ಮಲ್ಪುವೆರ್. ಅಗೆಲ್ ತಮ್ಮನ ಬಲಸುವೆರ್.
ಆಟಿದ ಬಗೆಟ್ ಕೆಲವೊಂಜಿ ಗಾದೆಲು ಉಂಡು. ಅವು ಇಂಚ ಉಂಡು. ಆಟಿಡ್ದ್ ಬೊಕ್ಕ ಅರೆಗಾಲ, ಮಾಯಿಡ್ದ್ ಬೊಕ್ಕ ಮರಿಯಾಲ ಪಂಡ ಆಟಿಡ್ದ್ ಅರೆಗಾಲೊದ ಅಟ್ಟನೆ ಸುರು ಆಪುಂಡು. ಮಾಯಿಡ್ದ್ ಮರಿಯಾಲೊದ ಅಟ್ಟನೆ ಸುರು ಆಪುಂಡು. ಆಟಿ ಆಡೊಂದು ಪೋಪುಂಡು ಸೋನೊ ಓಡೊಂದು ಪೋಪುಂಡು, ಅತಂಡ ಆಟಿ ಆನೆದಲೆಕ ಪೋಪುಂಡು ಸೋನೊ ಕುದ್‌ರೆದಲೆಕ ಪೋಪುಂಡು. ಕನಿಕರೊದಾಯಗ್ ಆಟಿ ಸುಖೊತಾಯಗ್ ಸುಗ್ಗಿ. ಆಟಿಡ್ ತೆಡಿಲ್ ಮೊಟ್ಟ್ಂಡ ಅಟ್ಟೊ ಪೊಲಿಯು, ಸೋನೊಡು ತೆಡಿಲ್ ಮೊಟ್ಟ್ಂಡ ಸೊಂಟೊ ಪೊಲಿಯು ಪಂಡ ಆಟಿದ ತೆಡಿಲ್‌ಗ್ ಬೂಮಿ ಅದ್‌ರ್‌ದ್ ನೇಜಿಡ್ ಕನೆ ಪುಡಯೆರೆ ಆಂಡ ಸೋನದ ತೆಡಿಲ್ ಕನೆ ಪುಡತಿನ ನೇಜಿನ್ ದಡ್ಡ್ ಮಲ್ಪುಂಡು ಬೆಂದಿನಾಯನ ಶ್ರಮ ನೀರಾವು ಪಂದ್ ಅರ್ಥೋ. ಆಟಿಡ್ ಬರ್ಸ ಬತ್ತ್ಂಡ ಅರಿ ಬುಲೆವು, ಮಾಯಿಡ್ ಬರ್ಸ ಬತ್ತ್ಂಡ ಮಲೆ ಬುಲೆವು. ಆಟಿದ ದೊಂಬುಗು ಆನೆದ ಬೆರಿ ಪುಡವು. ಆಟಿದ ಪೆಲಕಾಯಿ ನಂಜಿ ಮಗಾ, ಅಮ್ಮೆ ಬತ್ತೆನಾ ತೂಲ ಮಗಾ ಇಂಚಿನ ಏತೇತೋ ಗಾದೆಲ್ ಉಲ್ಲ.
ಆಟಿ ತಿಂಗೊಲುದ ಕಡೆಕ್ ಬರ್ಪಿ ನಾಗರ ಪಂಚೆಮಿ ಆಚರಣೆಲ ಪ್ರಕೃತಿ ಆರಾಧನೆಗ್ ಇಂಬು ಕೊರ್ಪಿನ ಪರ್ಬ. ಆನಿ ಎಣ್ಣೆದ ತೆನಸ್ ತಿನೆರೆ ಇಜ್ಜಿ. ಸರ‍್ರೊಗು ಆ್ಯಂಟಿ ಬಯೋಟಿಕ್ ಕೊರ್ಪಿ ಮಂಜೊಲ್ದ ಇರೆತ ಗಟ್ಟಿ ಮಲ್ತ್ ತಿನ್ಪುನ ಸಂಪ್ರದಾಯ ತುಳುವೆರೆನ.
ತುಳುವೆರ್ ಕರಿನ ಕೆಲವು ಒರ್ಸೊದ ಪಿರವು ಬದ್ಕೊಂದಿತ್ತಿ ರೀತಿ, ಮಲ್ತೊಂದಿತ್ತಿ ಆಚರಣೆ ಆರಾಧನೆಲೆನ್ ದಾದವು ಪಂದ್ ತೆರಿಯೊಂದು ಪೊಸ ತರೆಮಾರ್‌ಗ್ ಪೊಲಬು ಮಲ್ತ್ ಕೊರ್ಪುನ ಬೇಲೆಲ್ ಮಲ್ಪೊಡು. ಅಂಚಾಂದ್ ಅವೆಕ್ಕ್ ಮಲ್ಲ ಮಲ್ಲ ಗ್ರಂಥೊಲೆನ್ ಬರೆದ್ ದೀವೊಡು ಪಂದ್ ಇಜ್ಜಿ. ನಮ್ಮ ಆಚರಣೆಡ್ ಆಚರಿತ್‌ದ್, ಬಾಷಣೊಲೆಡ್ ಮದಿತ್‌ದ್, ಎಲ್ಯ ಎಲ್ಯ ಪುಸ್ತಕಲೆಡ್ ಲೇಖನ ಅತಂಡ ಪೊಲಬು ಅಚ್ಚಿ ಮಲ್ತ್ ಜೋಕ್ಲೆಗ್ ಓದೆರೆ ಕೊರೊಡು. ಜೋಕ್ಲೆಗ್ ದಾಲ ಸಂಶಯ ಅತಂಡ ತೆರಿಯೊನುನ ಆಸಕ್ತಿ ಪುಟ್ಟ್ಂಡ ಅವೆಕ್ಕ್ ಸರಿಯಾಯಿನ ಉತ್ತರ ಕೊರ್‌ದ್ ತೆರಿಪಾದ್ ಕೊರ್ಪಿ ಜಬದಾರಿ ಹಿರಿಯೆರಾಯಿನ ನಮ್ಮವು ಆದುಂಡು. ತುಳುತ ಕೂಟೊಲೆಡ್ ಪತ್ತೆರ್ ಸೇರಿನಲ್ಪ ದುಂಬುದ ಆಚರಣೆಲೆನ ಬಗೆಟ್ ಇಸಯೊ ದೆತ್ತ್ ಪಾಡ್ದ್ ತುಲಿಪು ಮಲ್ಪುನವುಲ ಪರಪೋಕುನು ಪೊಸಬೆರೆಗ್ ಪೊಲಬು ಮಲ್ತ್ ಕೊರ್ಪುನ ಒಂಜಿ ಪ್ರಬಾವಶಾಲಿ ಮಾರ್ಗ ಆದುಂಡು.
ನೆಲಮೂಲದ ಸಂಸ್ಕೃತಿದ ಬೇರ್ ಆಯಿನ ಕೃಷಿ ಬೊಕ್ಕ ಬೆನ್ನಿ ಬೇಸಾಯ ಅಳಿದ್ ಪೋದು ನಗರೀಕರಣ, ಆಧುನೀಕರಣ, ಆಧುನಿಕ ಶಿಕ್ಷಣದ ಪ್ರಭಾವೊಡು ಇನಿ ಸಂಪ್ರದಾಯ ಒರಿಯೆರೆ ಸಾಧ್ಯ ಇಜ್ಜಂದಿ ಸ್ಥಿತಿ ನಿರ್ಮಾಣ ಆತ್‌ಂಡ್. ಆಧುನಿಕ ಆಹಾರ ಪದ್ಧತಿ, ಫಾಸ್ಟ್ ಫುಡ್, ಜಂಕ್ ಫುಡ್ ನಮ್ಮ ಹಳ್ಳಿದ ಸಂಪ್ರದಾಯಬದ್ಧ ತೆನಸ್‌ಗ್ ಕತ್ತೆರಿ ಪಾಡ್ದ್ ಆಟಿದ ಮಾತ್ರ ಅತ್ತ್ ನಮ್ಮ ನಾಡ ತೆನಸ್, ನಾಟಿ ಬೈದ್ಯನ್ ಮದೆ ಮಲ್ತ್ ಬುಡ್ತ್ಂಡ್. ತುಳುಟ್ಟೊಂಜಿ ಗಾದೆ ಉಂಡು ಬೆಚ್ಚ ಚೀಯನಡ್ ಕೈ ಪೊತ್ತವೊನ್ನ ಬಾಲೆ ಚೌಲಿ ಬೆಞನೊನು ಉರಿತ್ ಪರ್‌ಂಡ್. ಪಂಡ ಆಧುನಿಕ ತೆನಸ್ಡ್ ಆರೋಗ್ಯ ಕೆಟ್ಟವೊನ್ನ ನಮ ಆರೋಗ್ಯಪೂರ್ಣ ಸಂಪ್ರದಾಯಿಕ ತೆನಸ್‌ನ್ ತಿಂಡ ದಾದ ಆವಾ ಪಂದ್ ಆಲಚನೆ ಮಲ್ತ್ ತಿನಂದೆ ಕುಲ್ಲುವ. ಅತಂಡ ಕೊಡಿ ಕೊಡಿ ತಿನ್ಪ.
ಜನೊಕುಲು ಪಾಶ್ಚಾತ್ಯ ಸಂಸ್ಕೃತಿಗ್ ಒಗ್ಗ್‌ದ್ ಪೋವೊಂದುಲ್ಲೆರ್. ಏರೆಗ್ಲ ಹಳ್ಳಿ ಜೀವನ ಇಷ್ಟ ಆವೊಂದಿಜ್ಜಿ. ಜೋಕುಲು ಆಚರಣೆಡ್ದ್ ದೂರ ಆತೆರ್. ವಿಜ್ಞಾನ ಯುಗ ಆಯಿನ ಈ ಕಾಲಡ್ ಜನಪದ ವಿಚಾರೊಲು ವೊವ್ವುಲಾ ಗೆತೊನೆರೆ ಆಪುಜಿ. ವೈಜ್ಞಾನಿಕ ಚಿಂತನೆ ಮಲ್ಪುನ ಕಾರಣಡ್ ನಂಬಿಕೆಲು ಮೂಢನಂಬಿಕೆಲಾದ್ ಬದಲಾವೊಂದುಲ್ಲ. ಹಳ್ಳಿದ ಬಡಪತ್ತ್, ಆಚರಣೆ ತೆರಿದಿಜ್ಜಿ. ಅವೆತ ಜ್ಞಾನಲ ಇಜ್ಜಿ. ಬೊಕ್ಕ ಅಯಿನ್ನ್ ಒತ್ತೊನೆರೆಲ ಆವೊಂದಿಜ್ಜಿ. ಅವು ದುಂಬು ಏಪನೋ ಆದ್ ಪೋತಿನ, ನಡತ್‌ದ್ ಪೋತಿನ ಇಚಾರೊಲು ಉಂದು ಮಾತ ಪನ್ಪಿನಂಚಾತ್‌ಂಡ್, ಅಂಚಾದ್ ಇತ್ತೆ ಅವೆನ್ನ್ ಮಾತ ಮಲ್ಪೊಡು ಪಂದ್ ಇಜ್ಜಿ ಪನ್ಪಿನ ಜೋಕ್ಲೆನ ಮನಸ್‌ಡ್‌ಲ ದಿಂಜಿದ್‌ಂಡ್. ಇಂಚಿನ ಮನಸ್ಥಿತಿಡ್ದ್ ಜೋಕ್ಲೆನ್ ಪಿದಯಿ ಕನತ್ ಅಕ್ಲೆಗ್ ನಮ್ಮತನ ದಾದ ಪಂದ್ ತೆರಿಪಾವುನ ಜಬದಾರಿ ಅಪ್ಪೆನ ಆದುಂಡು.
ಆಟಿ ಆಚರಣೆನ್, ಆಟಿ ಅಮಾಸೆನ್ ಜಾಗೃತೆಡ್ ಮಲ್ತ್‌ದ್ ನಾನ ದುಂಬುದ ಜನಾಂಗಗ್ ಒರಿಪುನ ಬೇಲೆ ತುಳುವೆರೆಡ್ದ್ ಆವಡ್. ಒಟ್ಟಾರೆ ಹಿರಿಯೆರೆನ ಪಜ್ಜೆ ನಮಕ್ಕ್ ಮಾರ್ಗದರ್ಶನ ಆದ್ ದುಂಬು ಕೊನೊಪುನ ತಾದಿ ತುಡರ್. ಅವೆನ್ನ್ ಪ್ರಶ್ನೆ ಮಲ್ಪಂದೆ ತರ್ಕೊಂದು ದುಂಬು ಕೊನೊಪುನ ಬಾಧ್ಯತೆ ನಮಕ್ಕುಂಡು. ಅಂಚನೆ ನಮ್ಮ ನಾಗರೀಕತೆಗ್ ನಿಧಿಯಾದ್ ಇಂಚಿನ ಆಚರಣೆಲು ನಮ್ಮ ದುಂಬುದ ಜನಾಂಗಗ್ ಮುಟ್ಟವುನ ನಮ್ಮ ಕರ್ತವ್ಯ ಪಂದ್ ಎನ್ನಿದ್ ಪಾಲಿಪೊಡು. ತುಳುವ ಆಚರಣೆಲು ಕಾಲಿ ಕಾಲಕೊಂದೆಗ್ ಬೊಕ್ಕ ಹಳ್ಳಿದ ಬದ್‌ಕ್‌ಗ್ ಮಾತ್ರ ಆಚರಣೆ ಆವಂದೆ ತುಳುವೆರೆನ ಪಾಲ್‌ಗ್ ಭೂಮ್ಯಪ್ಪೆನ ವರ ಪಡೆಪುನ, ಆರೋಗ್ಯ ಕಾತೊನುನ ಆರಾಧನೆ ಆವಡ್. ತುಳು ಪರಪೋಕು ಪರತಿರಿ ಒರಿಪುದ ನಿರೆಲಾವಡ್.
“ಜೈ ತುಳುನಾಡ್”
“ಜೈ ತುಳುವಪ್ಪೆ”
ಶ್ರೀಶಾ ವಾಸವಿ
