ಒರಿ ಅಮ್ಮೆ ತನ್ನ ಮಗಕ್ ಪಟ್ಟೆ ಪಚ್ಚಡ (ರೇಷ್ಮೆ ಶಾಲು) ಉಡ್ಗಿರ ಮಲ್ತೆ. ಮಗೆ ತನ್ನ ಸಂಪಾದೆನದ ದೊಡ್ಡುಡು ಒಂಜಿ ಜೋಡು ಜೋಡು ಕಟ್ಟಾಯೆ. ಸಾಲ್ ಪುಗ್ಗೆಲ್ಗ್, ಮುಟ್ಟು ಕಾರ್ಗ್ ಪಾಡೊಂದು, ಒಂಜಿ ಸುತ್ತು ಪೋದು ಬತ್ತಿನ ಮಗೆ, ಮುಟ್ಟುದ ದೂಲುನು ಸಾಲ್ಡ್ ಗಟ್ಟಿಯೆಗೆ. ಪಚ್ಚಡೊಗು ಅಮ್ಮೆ ನೂದು ಕೊರ್ತೆಡ, ಜೋಡುಗು ಮಗೆ ಪತ್ತ್ ಕೊರ್ದಿಪ್ಪೆ. ಅತ್ತಾವಂದೆ ಮೆಯಿಕ್ ಪಾಡುನ ಸಾಲ್ಡ್, ಕುರ್ತೆಲ್ ದೊಕೊಂದು ಬಯಿದಿನ ಕಾರ್ದ ಜೋಡುನು ಒಚ್ಚಿಯೆ. ನರಮಾನಿಗ್ ತಾನ್ ಬೆಂದಿನ ದೊಡ್ಡುದ ಬಿಲೆ ಮಲ್ಲೆ (ಎಚ್ಚ), ನನೊರಿಯನ ದೊಡ್ಡುಗು ಬಿಲೆನೇ ಇಜ್ಜಿ. ಅಂಚ ಬೊಕ್ಕೊರಿ ಅಮ್ಮೆ ಮಗಕ್ ಬುದ್ದಿದ ಪಾತೆರ ಪಂಡೆಡ ಮಗೆ ಉಡಾಫೆ ಪಾತೆರೊಂದು ಇತ್ತೆಗೆ. ‘ಗುರು ಹೆರಿಯೆರ್ ತಗ್ಗ್ದ್ ಬಗ್ಗ್ದ್ ನಡಪೊಡು’ ಪಂದ್ ಅಮ್ಮೆ ಪಂಡೆಡ ‘ನಡತ್ಜಿಡ ದಾದ ಆಪುಂಡು?’ ಪನ್ವೆ. ‘ನಾಲ್ ಜನೊಕು ಬೋಡಾದ್ ಇಪ್ಪೊಡು, ಜನೊಕುಲೆನ ಮುರಿಯೊಗು ಬೂರಿಯೆರೆ ಬಲ್ಲಿ’ ಪಂಡಿನಯಿಕ್ ‘ದಾದ ಆಪುಂಡು?’ ಪಂದ್ ಪೆದಂಬು ಪಾತೆರುವೆ. ‘ಪಯ್ಯೆರು (ಕುದುರೆ)ತ ಪಿರ ಕಾರ್ ಏಪಲಾ ಪತ್ತರೆ ಪೋವಡ ಮಗಾ’ ಪಂಡಿನಯಿಕ್ ‘ಪತ್ಂಡ ದಾದ ಆಪುಂಡು?’ ಕೇಂಡೆ ಮಗೆ. ‘ಅಪಗ ಒರ ಪತ್ತ್ದ್ ತೂಲ’ ಇಂದ್ ಪಂಡೆ ಅಮ್ಮೆ. ಮಗೆ ಪತ್ತರೆ ಪೋಯೆ ಲಾಲ್ ಕಟ್ದಿನ ಕಾರ್. ಕುದುರೆ ಸಟಕ್ಕ ತೊರ್ಪುಂಡು, ಮಗನ ಎದುರುದ ರಡ್ಡ್ ಪರು ಪಟಕ್ಕ ತಾಲುಂಡು.
‘ಅಮ್ಮೆ ಪೀ ತಿಂದೆಡ ಮಗೆ ಪೀಂಕನ್ ಆಂಡಲಾ ಮೂಸೆ’ ಪಂದೊಂಜಿ ಗಾದೆ ಉಂಡು. ಪಂಡ ಅಮ್ಮನ ಗುನ (ನಡತೆ) ಒಂತೆ ಆಂಡಲಾ ಮಗಕ್ ಬರು ಪಂದ್. ಅವು ಎಡ್ಡೆ ಗುನಲಾ ಆದಿಪ್ಪು ಹಾಲ್ ಗುನಲಾ ಆದಿಪ್ಪು. ಅಮ್ಮೆ ಕಂದೆಲ್ ಕಲಿ ಒಡ್ಡಾವೊಂದು ಇತ್ತೆಡ, ಮಗೆ ಮುಗಾಯಿ ಆಂಡಲಾ ದಂಗಾವಂದೆ ಇಪ್ಪಯೆ ಪಂದ್ ಅರ್ತ. ಗವಾಸ್ಕರ್, ಸಚಿನ್ ಮೊಗಲೆನ ಮಗನಗುಲು ಅಮ್ಮನಾತ್ ಮಲ್ಲ ಪುದರ್ ಮಲ್ತ್ಜೆರ್ಡಲಾ, ಗೊಬ್ಬುದ ಕಲಕ್ ಜಾದೆರ್ ಅತೇ? ಬೊಕ್ಕ ಕೆಲವು ಮಗ ಮಗಂದ್, ನುಗ ಪೊಲಿಪುನಲಾ ಉಲ್ಲಾ. ಬರ್ಸ ಬತ್ದ್ ಹಾಲ್ ಆತ್ಜಿಗೆ, ಮಗೆ ಉಂಡುದು ಸಾಲ ಆತುಜಿಗೆ. ಇಂಚಪ ಕೆಲವು ವರ್ಸೊಡ್ದಿಂಚಿ ಈ ಗಾದೆ ಸುಲ್ಲು ಆವೊಂದು ಉಂಡು.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ.
