ಇತ್ತಿಚೆಗ್ ಒಂಜಿ ಹಿರಿಯಾರೆಡ ಪಾತೆರ್ನಗ ಪಂಡೆರ್ ನಮ್ಮ ದೈವಾರಾಧನೆ ಜೋಕುಲು ಗೊಬ್ಬು ದಕ್ಕಿನ ಗೊಂಬೆದಲೆಕ ಅತಿಂದ್ ಪಂಡ್ದು! ಅಂಡ ಈ ಸರಿಕಟ್ಟು ಮೀಸೆ ಬರಂದಿನ ಜವಾನೆರ್ ದೈವೋಲೆಗ್ ಮದಿಪುನ ತೂನಗ ಅನ್ನಿಸಾಂಡ್ ಜೋಕುಲು ಗೊಬ್ಬುದಕ್ಕಿನ ಗೊಂಬೆ ಅತಿಜಿ, ಜೋಕುಲು ಗೊಬ್ಬುನ ಮೈದಾನ ಅತಿಂಡ್ ದೈವದ ಕಲ ಪಂಡ್ದು. ಕಾರಣ, ಯೂಟ್ಯೂಬ್ ತೂದು ಬೈಪಾಟ ಮಾಲ್ತ್ ಮದಿಪುನ, ನಿಮಿಷಗಟ್ಲೆ ದೈವದ ಕಥೆ ಪಂನ್ಪುನ, ಮದಿಪು ಪಂನ್ಪುನವು ದೈವನ್ ಮಾನವುನವು ಅಂಡ ದೈವ ನುಡಿ ಕೊರ್ಪೂನ ಧಾಟಿಡ್, ಯಕ್ಷಗಾನದ ಧಾಟಿಡ್ ಮದಿಪುನ! ಉಂದೆತ ಅಗತ್ಯ ಉಂಡ?!
ನನಲ ಪರಶುರಾಮ ಸೃಷ್ಟಿ, ಪರಶುರಾಮ ಸೃಷ್ಟಿ ಪನೊಂದು ತಿರ್ಗೊಂದುಲ್ಲೆರ್, ನಮನ್ ಬರೆತಿ ಬೆಮ್ಮೆರೆನ ನೆಂಪೆ ಇಜ್ಜಿ ಮೊಕ್ಲೆಗ್! ಕುಡ ಮೊಕ್ಲೆಗ್ ಕ್ಯಾಮೆರಾ ಮ್ಯಾನ್, ಆವೆನ್ ಎಡಿಟ್ ಮಲ್ಪರೆ ನನೊರಿ! ಈ ವಿಡಿಯೋಗ್ರಾಫಿದ ಶೋಕಿ ಇಪ್ಪುನಕ್ಲೆನ್ ಲೆಪ್ಪುನಗ ನಮ ಯೋಚನೆ ಮಲ್ಪೊಡ್!
ಆಂಕರಿಂಗ್ ಮಲ್ಪುನಕುಲು ಮದಿಪುನ ಖಂಡಿತ ತಪ್ಪತ್ತು, ಅಂಡ ದೈವಗು ಮದಿಪುಣ ಕೆಲವು ವಿಚಾರನು ಬಾಕಿದ ವೇದಿಕೆಡ್ ಪಂನ್ಪುನ ಸರಿಯಾ ಪನ್ಪುನೆನ್ ನಮ ವಿಚಾರ ಮಲ್ಪೊಡಾಪುಂಡ್!? ಮೊಕ್ಲೆಗ್ ದೈವದ ಕಣ್ಣ ಸನ್ನೆ, ಕೈತ ಭಾಷೆ ನಿಜವಾದ್ಲ ಅರ್ಥ ಅಪುನ ಅಂದ!? ದೈವ ನುಡಿ ಕೊರ್ನೆಕ್ಕೂ ಪೂರ ಸರಿ ಸರಿ ಪಂಡುದು, ಕುಡ ಕುಡ ದೈವೋಲೆನ್ ನಂಬವುನೆಕ್ಕೂ ಒಂಜಿಲೆಕ್ಕಾಡ್ ಮೊಕುಲ್ಲ ಕಾರಣ ಅಪೆರತ!? ದೈವದ ನುಡಿಕ್ ನಮ್ಮ ಹಿರಿಯಕುಳು ಪ್ರತಿ ಉತ್ತರ ಕೊರೊಂದಿತ್ತೇರ್, ಮುಲ್ಪ ಅವು ದಾಳ ಇಜ್ಜಿ, ಆ ಫಣಸ್ತಿಗೆ ನಮ್ಮ ಹಿರಿಯಕ್ಲೆಡ ಇತ್ತಿಂಡ್!
ಲೆಕ್ಕೆಸಿರಿಗ್- ರಕ್ತೇಶ್ವರಿನ ಕತೆ, ಜುಮಾದಿಗ್- ದೂಮಾವತಿನ ಕಥೆ, ಪಿಲಿಚಂಡಿಗ್- ಚಾಮುಂಡಿನ ಕಥೆ, ಪಂಜುರ್ಲಿಗ್- ವರಾಹ ರೂಪದ ಕಥೆ, ಚೌಂಡಿಗ್- ಮೈಸೂರುದ ಚಾಮುಂಡಿನ ಕಥೆ…! ದೈವೊಳೆನು ಪೂರ ದೇವರೆನ ಸೇವಕೆರ್ಲೆಕ ಮದಿಪುಣ ವಿಚಾರ ಭಾರೀ ಬೇಚಾರ್ದ ಸಂಗತಿ! ನಮ್ಮ ಇಲ್ಲದ ಹಿರಿಯಾರ್ “ಸ್ವಾಮಿ ಸತ್ಯೋನೆ” ಪಂಡುದ್ ಒಂಜಿ ಪುಂಡಿ ಕೇಪುಳ ದಕ್ಕುಂಡ ದೈವ ಪದಿನಾಜಿ ಕಲೆ ಪತಿವಾಸ ಅಪುಂಡು. ಈ ಜವಾನೆರ್ನ ಕತೆತ್ತ ಅಗತ್ಯ ಉಂಡ!?
ಮದಿಪುನೆಟ್ಟ್ ಇನಿಮುಟ್ಟಲ ಒಂಜಿ ವಿಡಿಯೋ ಮಲ್ಪಂದಿನ ಶ್ರೇಷ್ಟ ಮದ್ಯಸ್ಥೆರ್ ನಮ್ಮ ನಡುವೆ ಉಲ್ಲೆರ್! ಆಕ್ಲೆಗ್ ತರೆ ತಗ್ಗಾಗ. ಕುದುರೆ ತಿರ್ಗುನ ಕಡಿವಾಣದ ಬಲಟ್ಟು, ಆನೆ ತಿರ್ಗುಣ ಅಂಕುಶದ ಬಲಟ್ಟು, ಮಾಯ ತಿರ್ಗುಣ ಯಜಮಾನ/ಸತ್ತು ಗುತ್ತುದ ಮದಿಪುದ ಬಲಟ್ಟು ಸತ್ಯ ಬರೆನಾಗ ಒಂಜಿ ವರ್ಗಗ್ ಬೇಜಾರ್ ಆವು. ಅವು ಸಹಜ!
ಸತ್ಯದ ಆರಾಧನೆ ಸತ್ಯೋಡೇ ಇಪ್ಪಡ್!
ನಂಬಿಕೆ ಒರಿಪಾಲೆ
ಬರಹ : ಧನುಷ್ ಶೆಟ್ಟಿ
