ಪಿರಾಕ್ ದ ಕಾಲೋಡು ಪ್ರಾಯ ದಂಗ್ ದ್ ಸೈಪಿನ ಜನಕುಲೆ ಜಾಸ್ತಿ. ಅಂಚತ್ತಂದೆ ಸೀಕ್ ಸಂಕಡೊಡುಲ ಇಲ್ಲಡೆ ಜೀವ ಬುಡೊಂದಿತ್ತೆರ್. ನರಮಾನಿನ ಉಸುಲ್ ಪೋಯಿ ಗಳಿಗೆಗ್ ಜೀವ ಕಡಿಂಡ್ ಪನ್ಪಿನ ಹಿರಿಯೆರ್ನ ಪಾತೆರೊನು ಅರ್ಥ ಮಲ್ತೊಂದು, ಸುರುಕ್ಕು ಪುಣೊನು ಮಣ್ಣ್ ಡ್ ಪಾಡುನ ಕ್ರಮ ಮಲ್ಪುವೆರ್. ಅಂಚೆನೆ ಸೈತಿನ ಸುದ್ದಿ ಊರ್ದ ಜನಕ್ಲೆಗ್ ತೆರಿಯೆರೆ ಆದಿವಾಸಿ ಜನಾಂಗದಕುಲು ಬತ್ತ್ ದುಃಖದ ತಾಳೊಡು ಡೋಲು ಬೊಟ್ಟುವೆರ್. ಮಣ್ಣ್ ಡ್ ಪಾಡುನ ಪಂಡ, ಪಜೆಟ್ಟಿತ್ತಿನ ಪುನೊನು ತೆನ್ಕಾಯಿ ತರೆ ಮಲ್ತ್ ಬಡಕಾಯಿ ಕಾರ್ ಪಾರ್ದ್ ಜೆಪುಡಾರ್ವೆ. ಅಲ್ತ್ ಬೊಕ್ಕ ತರೆಮಿತ್ತ್ ಅರಿ ಪಾರ್ದ್, ಕಾರ ತಿರ್ತ್ ಬಾರ್ ಪಾರ್ದ್, ಇಲ್ಲದ ತಡ್ಯಗೊಂಜಿ ಇಡಿ ತಾರಾಯಿ ದರ್ತ್ ರಡ್ಡ್ ಗಡಿ ಮಲ್ತ್, ಒಂಜಿ ಗಡಿ ತರೆತ್ತ ಮಿತ್ತ್, ಒಂಜಿ ಗಡಿ ಕಾರ ತಿರ್ತ್ ದೀದ್ ಐಟ್ ತುಡರ್ ಪೊತ್ತಾವೆರ್. ಅಲ್ತ್ ಬೊಕ್ಕ ಕುಟುಂಬ ಸಂಸಾರದಕುಲು ಊರ್ದಕುಲು ಸೇರ್ದ್ ಕಾಟಗೂರ್ರೆ ತಯಾರಾಪೆರ್. ಕುಕ್ಕುದ ಮರಕ್ಕ್ ಮಗೆ ಗಡಿ ದೀದ್ ಮರ ಕಡ್ಪುವೆರ್. ಐತ ಮೂಜಿ ಕೆತ್ತೆ ಇಲ್ಲಡೆ ಕನತ್ ದ್ ಐವೆನ್ ಬೆಂದ್ ರ್ದ ಮಂಡೆದ ಉಲಾಯಿ ಪಾರ್ದ್ ಐಕ್ ಮೂಜಿ ಕೊಡಪಾನ ನೀರ್ ಕೂಟುದು ಮಂಡೆಗ್ ಬಾಯಿ ಮುಚ್ಚಂದೆ ಬೆಂದ್ ರ್ ಕಾಯ್ಪುವೆರ್. ಅಂಚೆನೆ ಕಾಟಗೂರುನಲ್ಪ ಒಂಜಿ ಲೆಕ್ಕಾಚಾರೊಡು ಗುರಿದೆತ್ತ್ ಐಕ್ ಅಂಚಿ ಇಂಚಿ ಕುಕ್ಕುದ ದಡೆಮರ ದೀಪೆರ್. ಐತ ಮಿತ್ತ್ ಬೇತೆ ನುಂಗೆಲ್ ಕನಕ್, ಮಡಲ್ ತೆಪ್ಪು ಅಟ್ಟಿ ದೀವೊಂದು ಒಂಜಿ ಎತ್ತರದ ಲೆಕ್ಕಾಚಾರೊಡು ಕಾಟ ಗೂರುವೆರ್.
ಅಲ್ಪ ಕಾಟ ತಯಾರಾವೊಂದು ಬನ್ನಗ ಇಲ್ಲಡ್ ಪುನ ಮೀಪಾವುನ ಕ್ರಮ ಸುರು ಮಲ್ಪುವೆರ್. ಬೆಂಚ್ ಡ್ ಪುನ ಜೆಪ್ಪಾಡ್ ಮಂಜಲ್ದ ಪೊಡಿಕ್ಕ್ ತಾರೆದೆಣ್ಣೆ ಬೆರಕೆ ಮಲ್ತ್ ತರೆರ್ದ್ ಕಾರ್ ಮುಟ್ಟ ಪೂಜಿದ್ ಪುನ ಮೀಪಾವೆಟ್. ಪೊದ್ದೆರ್ ಇಪ್ಪೆರ್, ಕುಟುಂಬ ಸಂಸಾರ, ಮನಸ್ಸಿತ್ತಿನ ಊರ್ದಕುಲು ಮಾತೆರ್ಲಾ ಪುನ ಮೀಪಾದ್ ಆಯಿ ಬೊಕ್ಕ ಕಡೆಕ್ಕ್ ಮಗೆ ಪುನ ಮೀಪಾದ್ ಬೆಂದ್ ರ್ದ ಕರನ್ ಕಂಕನೆ ಪಾರ್ದ್, ಪುನ ಮೀಪಾಯೆರೆ ಜೆಪುಡಾದಿನ ಬೆಂಚಿನ್ ಅಡ್ಡ ಪಾಡುವೆ. ಮೀಪಾದಾಯಿನ ಪುನೊನು ಇಲ್ಲದುಲಾಯಿ ಕನತ್ ದ್ ( ಮುತ್ತೈಸಿ ಪೊಂಜೊವು ಆಂಡ ಮದಿಮಾಲೆ ಸಿಂಗಾರ ಅತ್ತ್ಂಡ ಊರ್ದ ದೈವ ದೇವೆರ್ನ ಚಾಕಿರಿ ಮುಲ್ಪುನ ಅಂಜೊವು ಗಡಿಕಾರೆರ್, ದೈವದ ಎಣ್ಣೆ ದೆತೊಂದಿನಕುಲಾಂಡ, ಗುತ್ತುಗು ಸಂಬಂಧ ಪಟ್ಟಿನಕುಲಾಂಡ ಅಕ್ಲೆನ್ ಕುರ್ಸುಡು ಕುಲ್ಲಾದ್ ಮದಿಮಾಯ ಐತ ಮಲ್ಪುವೆರ್). ಅಲ್ತ್ ಬೊಕ್ಕ ಒಂಜಿ ಇಡೀ ಬಾರೆದ ಇರೆ ಕನತ್ ದ್ ಅವೆನ್ ನೆಲತ್ತ ಮಿತ್ತ್ ಪಾರ್ದ್, ತೆನ್ಕಾಯಿ ತರೆ ಪಾರ್ದ್ ಬಡಕಾಯಿ ಕಾರ್ ಪಾರ್ದ್ ಜೆಪುಡಾವೆರ್, ಅಲ್ತ್ ಬೊಕ್ಕ ಸುರು ಇತ್ತಿನ ತರೆಮಿತ್ತ ಅರಿನ್ ಕಾರ ತಿರ್ತ್ ಪಾರ್ದ್, ಕಾರ ತಿರ್ತ ಬಾರ್ ನ್ ತರೆಮಿತ್ತ್ ಪಾರ್ದ್ ತಾರಾಯಿದ ಗಡಿಟ್ಟ್ ಪೊತ್ತುನ ತುಡರ್ ಅಂಚೆನೆ ದೀಪೆರ್. ಅಲ್ತ್ ಬೊಕ್ಕ ಸುರುಕ್ಕಾದ್ ಪೊದ್ದೆರಿಪ್ಪೆರ್ ಪುನೊಕ್ಕು ಕೋರದ ಕುಂಟು ಪೊದೆಪುವೆರ್. ಅಲ್ತ್ ಬೊಕ್ಕ ಕುಟುಂಬ ಸಂಸಾರದಕುಲು ಕುಂಟು ಪೊದೆತ್ ಬೊಕ್ಕ ಬಾಕಿದಕುಲು ಕುಂಟು ಪೊದೆಪುವೆರ್. ಅಲ್ತ್ ಬೊಕ್ಕ ಬಚ್ಚಿರೆ ಬಜ್ಜೆಯಿ ಗುದ್ದುದು, ಸೀರೆದ ಸೆರಂಗ್ ಅತ್ತ್ಂಡ ಪುನತ್ತ ಮಿತ್ತ್ ಪೊದೆತಿ ಕುಂಟುದ ಕೊಡಿಟ್ಟ್ ಕಟ್ಟುವೆರ್. ಅಂಚೆನೆ ಒಂಜಿ ರೂಪಾಯಿದ ಪಾವೊಲಿಲ ಕಟ್ಟುವೆರ್. ಅಂಚೆನೆ ಒಂಜಿ ರೂಪಾಯಿದ ಪಾವೊಲಿಲ ಕಟ್ಟುವೆರ್. ಅಂಚೆನೆ ಒಂಜಿ ಎಲ್ಯ ತುಂಡು ಬಂಗಾರ್ ಪುನತ್ತ ನಾಲಾಯಿದ ಅಡಿಕ್ಕ್ ಪಾಡುವೆರ್. ಅಂಜೊವು ಸೈದಿನಾಂಡ ಬೊಡೆದಿಗ್ ಕುಂಕುಮ ಪಾರ್ದ್ ಅವೆನ್ ಮಾಜಾದ್, ತರೆಕ್ಕ್ ಮಲ್ಲಿಗೆ ದೀದ್, ಕೈ ನಿಲಿಕೆ ಕಾಜಿ ದೀದ್, ಕಾಜಿ ದರ್ತ್ ದ್, ಮಲ್ಲಿಗೆನ್ ತರೆರ್ದ್ ದೆತ್ತ್, ಅಂಚೆನೆ ಕರಿಯಮಣಿ, ಮೂಂಕುದ ಬೊಟ್ಟ, ಕಾರ್ದ ಕಾರುಂಗಿಲ ಪೂರ ದೆತ್ತ್ ಪುನತ್ತ ಡಿಗಲೆಡ್ ಪಾಡುವೆರ್, ಅಂಚೆನೆ ಕೋರದ ಕುಂಟುದ ಬಲ್ಲ್ ಮಲ್ತ್ ಕಾರ್ದ ರಡ್ಡ್ ಕೊಂಬ ಬಿರೆಲ್ ನ್ ಜೋಡ್ಯಾದ್ ಕಟ್ಟುವೆರ್, ಅಂಚೆನೆ ಒಂಜಿ ಮಣ್ಣ್ ಡ್ ಕೂಚಿಡ್ ನೀರ್ ಪಾರ್ದ್ ತುಳಸಿ ಕೊಡಿತ್ತ ಕಟ್ಟ್ ಮುರ್ಕಾದ್ ಪುನತ್ತ ಬಾಯಿಗ್ ನೀರ್ ಕೊರ್ಪೆರ್ ಕ್ರಮಪ್ರಕಾರ. ಕಾಟದಡೆ ಬರ್ರೆ ಆವಂದಿನಕುಲು ಪೂರ ಇಲ್ಲಡ್ ನೀರ್ ಕೊರ್ದಾಯಿ ಬೊಕ್ಕ ಪುನೊನು ಕಾರ್ ದುಂಬು ತರೆ ಪಿರ ಮಲ್ತ್ ಇಲ್ಲದುಲಾಯಿರ್ದ್ ಪಿದಾಯಿ ಕನತ್ ದ್ ಕುಕ್ಕುದ ಪಲಾಯಿಡ್ ಜೆಪ್ಪಾದ್, ಐಕ್ ಪುಗೆಲ್ ಕೊರ್ದು ಮಣ್ಣ್ ದ ಕರಟ್ ತೂ ಪತೊಂದು ಪುನೊನು ಕಾಟದಡೆ ಕನಪೆರ್. ಅಲ್ಪ ಪುನೊನು ಪತೊಂದು ಕಾಟೊಗು ಮೂಜಿ ಪೆದಂಬು ಸುತ್ತು ಬತ್ತ್, ಪುನೊನು ಕಾಟದ ಮಿತ್ತ್ ಜೆಪುಡಾದ್, ಕುಕ್ಕುದ ಪಲಾಯಿ ಅಡೆಗೆ ಜಾರದ್ ಪಿರದಕ್ಕ್ ದ್ ಆವೆನ್ ರಡ್ಡ್ ಭಾಗ ಮಲ್ತ್ ಪಾಡುವೆರ್. ಅಲ್ತ್ ಬೊಕ್ಕ ಇಲ್ಲಡ್ ನೀರ್ ಕೊರಂದಿನಕುಲು (ಪೊದ್ದೆರ್, ಕುಟುಂಬ ಸಂಸಾರ, ಊರ್ದಕುಲು) ನೀರ್ ಕೊರ್ಪೆರ್. ಅಲ್ತ್ ಬೊಕ್ಕ ಊರುದ ಭಂಡಾರಿ (ಕ್ಷರಿಕ) ಪೊತ್ತಾದ್ ಕೊರಿನ ತೂಟೆಡ್ ಪೆದಂಬು ಉಂತುದು ಮಗೆ ಕಾಟೊಗು ತೂ ಕೊರ್ಪೆ. ಪುನ ಪೊತ್ತೆರೆ ಸುರು ಆಪುಂಡು. ಈ ಪೊರ್ತುಡು ಕಾಟದ ಕನಕ್ ಕರಿಪತ್ತಂದೆ ಸರಿ ಪೊತ್ತುಲೆಕ ಕಲ್ಲುಪ್ಪು ಸುತ್ತಲ ದಕ್ಕುರ್ವೆ. ಪುನ ಅರ್ಧ ಪೊತೊಂದು ಬನ್ನಗ ಇಲ್ಲಡೆ ಬರ್ಪಿನ ಮಗೆ ಇಲ್ಲಡ್ ತಯಾರ್ ಮಲ್ತ್ ದೀತಿನ ಪಡಿಕೆದಡಿ (ಪುನತ್ತ ತರೆ ಮಿತ್ತ್ ಕಾರ ತಿರ್ತ್ ಪಾರ್ದಿನ ಅರಿ, ತಾರಾಯಿದ ಗಡಿ, ಕಾಜಿದ ಒಟ್ಟೆ, ಪೂ, ಒರಿದಿನ ಊದುಬತ್ತಿ ) ತಡ್ಪೆಡ್ ದೀದ್ ಇಲ್ಲಗ್ ಬೆರಿಪಾರ್ದ್ ಉಂತುದಿನ ಮಗನ ಮಂಡೆಗ್ ಅಪ್ಪೆ ಕನತ್ ದೀಪಲ್. ಅವೆನ್ ಕಾಟದಡೆಗ್ ತರೆಟ್ ತುಂಬೊಂದು ಬತ್ತ್ ತಡ್ಪೆ ಸಮೇತ ಕಾಟೊಗು ಪಾರ್ದ್ ಪೊತ್ತಾವೆರ್. ಅಲ್ತ್ ಬೊಕ್ಕ ಮಾತೆರ್ಲಾ ಇಲ್ಲಗ್ ಬತ್ತ್ ತುತೊಂದಿನ ಕುಂಟುಡೆ ಮೀದ್ ಶುದ್ಧ ಆದ್ ತಾರಾಯಿದ ಚಟ್ನಿಲ, ಗಂಜಿಲ ಮಲ್ತ್ ಕುಟುಂಬ ಸಂಸಾರದಕುಲು ವನಸ್ ಮಲ್ಪುವೆರ್. ಈ ವನಸ್ ಗ್ ದುಃಖದ ಗಂಜಿ ಪನ್ಪೆರ್.
ಕಿಶೋರ್ ಎಕ್ಕಾರ್
