ಬಂಟೆರೆಂಕುಲು…ಬಂಟೆರ್.. ಉಡಲ್ ಡ್ ಪರಪುಂಡ್ ಕ್ಷತ್ರಿಯ ನೆತ್ತೆರ್… ಗುತ್ತು, ಗರಡಿ, ಬಾವ, ಬೂಡ್, ಬರ್ಕೆದ ಗುರ್ಕ್ರಾರ್ಲೆಂಕುಲ್.. ಬಗ್ಗ್ ದ್ ಜ ಏರೆಗ್ಲಾ.. ಬಗ್ಗಯ ದುಂಬಗೊಲಾ ತಂಕೊಗ್ ನನೊಂಜಿ ಪುದರ್ಬಂಟೆರೆಂಕುಲು… ಬಂಟೆರ್..
ಪಿರಾಕ್ ದ ಕಾಲೋಡಿಂಚಿ ಗತ್ತ್ ಡ್ ಮೆರೆಯಿನವು ನಮ್ಮ ಬಂಟ ಸಮುದಾಯ. ಸಾಮಾಜೊಡ್ ನಾಲ್ ಜನತ್ತ ಎದುರ್ ದೆರ್ತ್ ತೋಜುನಾಯೆ ಬಂಟೆ. ಪೊಕ್ಕಡೆಗ್ ನಮನ್ ಬಂಟೆರ್ ಪಂದ್ ಪನ್ಪುಜೆರ್. ನಮನ ಆಚಾರ ವಿಚಾರೊಲೆನ್ ತೂನಗನೇ ಗೊತ್ತಾವು ನಮ್ಮ ಛಾತಿ ದಾದ ಪಂಡ್ದ್. ಬಂಟೆರೆನ್ ಕ್ಷತ್ರಿಯೆ ಪಂದ್ ಪನ್ಪೆರ್. ಬಂಟಡ ಕ್ಷಾತ್ರ ತೇಜ ಮಾತ್ರ ಅತ್ತ್ ಗುಣಲಾ ಉಂಡು. ಒರಿ ಕ್ಷತ್ರಿಯೆ ಏಪೊಗುಲಾ ಏರೆಗ್ಲಾ ಪೋಡ್ಯುಜೆ ಅಂಚನೆ ತನ್ನ ಕೈತಲ್ ಸಹಾಯ ನಟ್ಟೊಂದು ಬತ್ತಿನಕ್ಲೆನ್ ಬರಿಕೈಟ್ ಕಡಪುಡುಜೆ. ಗುರು ಹಿರಿಯೆರೆಗ್, ದೈವ ದೇವೆರೆಗ್ ತರೆ ತಗ್ಗಾದ್ ನಡಪುನಾಯೆನೆ ಕ್ಷತ್ರಿಯೆ. ಈ ಗುಣಕುಲ್ ಬಂಟಡ ಇತ್ತಿನವೆಡಾತ್ರನೆ ಆಯನ್ ಕ್ಷತ್ರಿಯೆ ಪನ್ಪಿನಿ.
ಗುತ್ತು-ಬರಿಕೆ, ಬಾವ-ಬೂಡುಲೆಡ್ ಗುರ್ಕಾರ್ಮೆ ಮಲ್ತೋಂದು ಸಮಾಜೋದ ಮಾತ ಸಮುದಾಯೊಲೆನ್ ಸಮಾನವಾದ್ ತೂದ್ ಮಾತೆರೆಗ್ಲಾ ನ್ಯಾಯ ಕೊರ್ಪಾವುನ ಸಮುದಾಯ ಅವು ನಮ್ಮನೆ. ಭೂಗತಡ್ ಪತ್ತಿನ ಭೋಲೋಕ ಮುಟ್ಟ ನಮ್ಮ ಕಾರ್ಬಾರ್ ಉಂಡು. ಏಡ್ ಮುಟ್ಟಂದಿ ಸೊಪ್ಪು ಇಜ್ಜಿ. ಅಂಚೆನೆ ಬಂಟೆ ಮಲ್ಪಂದಿ ಬೇಲೆ ಇಜ್ಜಿ. ಇನಿತ ದಿನೊಟ್ ವಾ ಊರುಡು ವಾ ಬೇಲೆಡೇ ತೂಲೆ ಅವುಲು ಬಂಟೆರ್ನನೇ ಕರ್ಬಾರ್. ದುಂಬುದ ಕಾಲೋಡ್ ರಾಜ್ಯೋಲೆನ್ ಆಲ್ದ್, ನುಗ-ನಾಯೆರ್ ಪತ್ತ್ ದ್ ಬೆಂದ್, ಇನಿ ಅಕ್ಕಸೊಡ್ದ್ ಪಾತಾಲೋ ಮುಟ್ಟ ನಮನೇ ಉಲ್ಲ. ತ್ರಿವಿಕ್ರಮಲೆಕ ಬಾನ-ಭೂಮಿ-ಪಾತಲೊಗ್ ಕಾರ್ ದೀದ್ ಮೆರೆವೊಂದುಲ್ಲ.
ಆಂಡ ಉಂದು ಪೂರಾ ಕುಲ್ದಿನಡೆ ಬಟ್ಟಲ್ಗ್ ಬತ್ತಿ ಬೂರಿನತ್ತ್. ಬೇತೆ ಏರ್ಲಾ ನಮ ಕಾರ ಮುದೆಲ್ಗ್ ಕಂತ್ ಪಾಡ್ದಿನ್ಲಾ ಅತ್ತ್. ನಿಕ್ಲೆಗ್ಲಾ ಗೊತ್ತುಂಡು ತಲತಲಾಂತರೊಡ್ದ್ ಬೈದಿ ಬಂಗಾರ್ದ ಭೂಮಿ ಗಲ್ಗೆದುಲೈ ಕೈ ಬುದ್ಡ್ ಪೋಂಡ್. ಆಂಡ ನಮ ಬುಲ್ತು ಕುಲ್ಲುಜ. ಕಲ್ಲ್ ದಕ್ಕಿಜ. ಇಲ್ಲ್-ಬಿತ್ತ್ ಲ್ ಗ್ ತೂ ಕೊರ್ತಿಜ. ಬದಲಾದ್, ಕೈಟಿತ್ತಿ ಮೂಜಿ ಮುಕ್ಕಾಲ್ ನ್ ಪತೊಂದ್ ಪರವೂರ್ ಪೋಯ. ಅವುಲು ರಾತ್ರೆ-ಪಗೆಲ್ ಬೆಂದ್ ದ್ ಮಿತ್ತ್ ಬತ್ತ. ಪಗೆಲ್ಡ್ ಅವುಲು ಮೂಲು ಬೆಂದ್ ದ್ ರಾತ್ರೆಡ್ ಬರವು ಕಲ್ತ್ ದ್ ನಮ್ಮ ಕಾರ್ದ ಮಿತ್ತ್ ನಮ ಉಂತಿಯ. ಅತ್ತಂದೆ ನಾಲ್ ಜನಕ್ಕ್ ನುಪ್ಪು ಕೊರ್ಪಿನ ತಾಕತ್ತ್ ನ್ ಪಡೆಯೊಂಡ. ಇನಿತ ದಿನೊಟ್ ವೊವ್ವೇ ಕ್ಷೇತ್ರಡ್ ಮೆರೆಪಿನ ಬಂಟೆರ್ ಅವೆನ್ ಅಕುಲಾದೆ ಸಂಪೊಲ್ತಿದಿನಿ. ನೆಕ್ಕೆ ಅತ್ತಾ ನಮನ್ ಕ್ಷತ್ರಿಯೆ ಪನ್ಪಿನಿ? ಒರಿ ಬಂಟೆ ಸೈವೆ ಆಂಡ ಏಪೊಗುಲಾ ಸೋಪಯೆ.
ಬಂಟೆರ್ ಸಮಾಜೋಡ್ ಒಂಜಿ ನಾಯಕಲೆಕ್ಕ ಮೆರೆಯೊಂದು ಬೈದಿನಕುಲು. ನಮನ್ ತೂದ್ ಬೇತೆಕುಲ್ ಕಲ್ತೊನ್ದಿತ್ತೆರ್. ಅಂಚ ಇತ್ತಿನ ನಮ ಇನಿ ನಮ್ಮತನೋನ್ ಕಲೆವೊಂದ. ಗುರು ದಾಂತಿ ಬಂಟೆರೆಗ್ ಮಾತೆರ್ಲಾ ಗುರು. ಇನಿ ನಮ್ಮ ಕಟ್ಟ್ ಕಟ್ಟಲೆನ್ ಬುಡ್ದ್ ಬೇತೆ ಸಮುದಾಯದಕ್ಲೆನ ಆಚರೆಣೆಲೆನ್ ಮಲ್ತೊದುಂಲ್ಲ. ಉಂದು ಮುಖ್ಯವಾದ್ ನಮ್ಮ ಮದಿಮೆಡ್ ತೋಜಿದ್ ಬರ್ಪುಂಡ್. ಬಂಟಧಾರೆ ಪನ್ಪಿ ವಿಶಯನೇ ಮಾಜಿದ್ ಪೋತುಂಡ್. ಅಂಚೆನೇ ಅಲಿಯಕಟ್ಟ್ ದ ನಮ್ಮ ಪರಂಪರೆಲಾ ಅಲಿದ್ ಪೊಂಡ್. ದ್ರಾವಿಡೆರಾಯಿನ ಬಂಟೆರ್ ನಮ್ಮ ಕಟ್ಟಲೆನ್ ಬುಡುದ್ ನಮ್ಮತ್ತಂದಿನ ಕಟ್ಟಲೆಡ್ ನೇಲೋಂದುಲ್ಲ. ನಮ್ಮ ಹೆಡ್ಡತನೊನ್ ಬೇತೆಕುಲ್ ತನ್ನ ಉಪಯೋಗಗ್ ದೆತೊನೊಂದುಲ್ಲೆರ್. ನಮ ನಮನೇ, ನಮ್ಮ ನಮ್ಮುಲಾಯಿ ಕಂಟ್ಯೊನ್ನೊಂದುಲ್ಲ. ಬೇತೆಕುಲ್ ನಮನ್ ತೂದ್ ತೆಲ್ತೊಂದುಲ್ಲೆರ್. ಆನಿ ಸಮಾಜೊಗ್ ಸಾದಿ ತೋಜಾದಿ ಒಂಜಿ ಸಮುದಾಯ ಇನಿ ಸಾದಿ ತತ್ತ್ ನಡತ್ ದ್ ದಂಟ್ ದ್ ಬೂರ್ದ್ಂಡ್ ಪನ್ಪಿನ ಗುಟ್ಟಾದ್ ಒರಿದಿಜಿ.
ಬಂಟೆರ್ನ ಕಟ್ಟ್-ಕಟ್ಟಲೆ ಮಾತ್ರ ಅತ್ತ್ ಬಂಟ ಸಮುದಾಯನೇ ನನ ಮಾಜಿದ್ ಪೋಪುಂಡ್. ದಿನ ಪೋಯಿಲೆಕ್ಕ ಬಂಟೆರ್ನ ಜವನೆರ್ ಬೇತೆ ಸಮುದಾಯದ ಜವನೆರೆನ್ ಮದ್ಮೆ ಆಪಿನ ಎಚ್ಚ ಎಚ್ಚ ಆವೋಂದುಂಡು. ಇಂಚೆನೆ ಆಂಡ ನಿಜವಾಯಿನ ಬಂಟೆರೆನ್ ಬೊಲ್ಪು ಪಾಡ್ದ್ ನಾಡುನ ಕಾಲ ಬರು. ಗುತ್ತು-ಬರಿಕೆಲು ಬಂಗಾರ್ದ ಬುಲೆತ ಕಂಡೊಲು ಪಾರ್ ಪಡಿಲ್ ಬೂರ್ದ್ ಅಕ್ಕಸೊನ್ಲಾ ನೆಲನ್ಲಾ ತೂವೊಂದುಲ್ಲ. ಇಲ್ಲದ ದೈವೊಲೆಗ್ ಬೊಲ್ಪು ಪೊತ್ತಾವುನ ಗತಿ ದಾಂತೆ ಪರಬೆರೆನ್ ಆಶ್ರಮಡ್ ಬುಡಿಲೆಕ್ಕ ಓಲಾ ಕೊನೊದ್ ಬುಡ್ಪಿಲೆಕ ಆತ್ಂಡ್. ಕಾಲ ಬದಲಾಪುಂಡ್ ನಿಜ ಆಂಡ ನಮ್ಮ ಬೇರ್ಲೆನೆ ಕಡ್ತೊಂದು ಬೇತೆ ಬೇರ್ ತಿಕಾವೊನ್ನಾತ್ ಬದಲಾಯೆರೆ ಬಲ್ಲಿ. ದುಡ್ಡು-ಪನವು ಶಾಶಿತ ಅತ್ತ್ ನರಮನ್ಯನ ಪಿರ್ತಿ-ಒಗ್ಗಟ್ಟ್ ಮಾತ್ರ ಕಡೆಮುಟ್ಟ ಒರಿಯುನವು. ಉಂದೆನ್ ನಮ ಅರ್ಥ ಮಲ್ತೊನೊಡ್.
ದುಂಬುದಕುಲ್ ದಾದ ತಪ್ಪು ಮಲ್ತೆರಾ ಅವೆನ್ ಸಮ ಮಲ್ತ್ ಸಮುದಾಯದ ಒಗ್ಗಟ್ಟ್ ನ್ ಒರಿಪಾವುನ ಜಬದಾರಿ ನಮ ಜವನೆರ್ನ ಮಿತ್ತ್ ಉಂಡು. ಬಂಟೆರ್ನ ಒಗ್ಗಟ್ಟ್ ಲೋಕೋಗೆ ಉದಾರ್ಮೆ ಆವೊಡ್. ನಮ್ಮ ಕಟ್ಟ್-ಕಟ್ಟಲೆಲ್ ಒರಿಯೊಡು. ನಮ್ಮ ಸಮುದಾಯ ಒರಿಯೊಡ್. ಅಲಿಯ ಸಂತಾನದ ಅಲಿಯಕಟ್ಟ್ ಪೋಂಡಾಲಾ ಮಲ್ಲೆಜ್ಜಿ ಬಂಟೆರ್ ಮಾತ್ರ ಏಪೋಗುಲಾ ಅಲಿಯೆರೆ ಬಲ್ಲಿ. ನಮ್ಮ ಜೋಕುಲೆಗ್ ನಮ್ಮ ಬಂಟ ಸಮುದಾಯದ ನಂಬೊಲಿಗೆ, ಆಚರಣೆಲೆನ್ ತೆರಿಪಾದ್ ಬಂಟೆರ್ನ ಅಬ್ಬರೊನ್ ಒರಿಪಾವೊಡ್ ಪನ್ಪಿನ ಉಡಲ್ ದ ಆಸೆಗ್ ನಿಕುಲ್ ಮಾತ ಬೆರಿಸಾಯ ಕೊರೊಡ್. ಕೊರ್ಪರತ್ತೆ…?
✍ ಶ್ರೀಮತಿ ಶರೋನ್ ಶೆಟ್ಟಿ ಐಕಳ
