ಎಚ್ಚಿನಗುಲು ಪಿನಯೆರ್, ಬೊಂದೆ ಪಂಡ ದಾದ ಪಂದ್. ಬೂತಾಯಿದ ನನಾತ್ ಸಸಾರದ ಪುದರೇ ಬೊಂದೆ. ಜೋರ್ದ ಪೊನ್ನುಲೆಗ್ ‘ನಿನನ್ ಆಲ್ ಒಂಜಿ ಬೊಂದೆಗ್ ಅಡವು ದೀವೊಲು’ ಇಂಚ ಪನುವೆರ್ ಪೊಂಜೋವುಲು ತನ್ಕ್ಲೆನ (ಪಾಪದ) ಆನ್ ಜೋಕುಲೆಗ್. ಒವುಲ ಒಂಜಿ ಪಿರಿಯದ ವಸ್ತುನು ಸರಿಟ್ ತೂವಂದೆ ಪತ್ತಂದೆ ಕನತಡ, ಆ ವಸ್ತ್ ಬಿಲೆಕ್ ತಕ್ಕಂತಿನ ಅತ್ತ್ಡ, ‘ಪೋಯೆರ್, ಬೂತಾಯಿ ಕಂತಿಲಕ್ಕ ಕನತೆರ್’ ಪಂದ್ ಇಲ್ಲದ ಬಾಕಿದಗುಲು (ಎಚ್ಚಾದ್ ಬುಡೆದಿ) ಅಂಗ್ಸಾವೆರ್. ಪಂಡ ಬೊಂದೆಗ್ ದಾಲ ಬಿಲೆನೇ ಇಜ್ಜಿ. ದುಂಬು ನಮ್ಮೂರ್ದ ಕಡಲ್ಡ್ ಬಾರಿ ಬೂತಾಯಿದ ಚೊಪ್ಪ. ಸಂತೆಡ್ ಪಲ್ಲಾಯಿಡ್ ಗೋರುದು ಮಾರುನು ಬೂತಾಯಿ, ಚಕ್ರೊಗು (25 ನಯಾ ಪೈಸೆ) ಒಂಜಿ ಪಲ್ಲಾಯಿ ನಿಲ್ಕೆ. ಲೆಕ್ಕ ಮಲ್ತ್ ಏರ್ ಕುಲ್ಲುನು, ರಡ್ಡ್ ರಡ್ಡ್ ನಾಲ್, ನಾಲ್ ನಾಲ್ ಆಜಿ, ಆಜಿ ಆಜಿ.. ಪನೊಂದು. ಒರೊರಾ ರಂಪೊನಿಗ್ ಮಸ್ತ್ ಬೂತಾಯಿ ಬೂರ್ದು, ಮಾರ್ದ್ ಪೋವಂದೆ, ಮರಿಯೊಲೊಡು ನುಂಗಾವರೆಲಾ ಆವಂದೆ, ಕಡೆಕ್ ಕುಟ್ಟೆ ಮಲ್ಪುನು. ಪಂಡ ಲಾರಿಗಟ್ಟಲೆ ಬೊಂದೆನ್ ಮನ್ನ ಅಡಿಕ್ ಪಾಡ್ದ್, ಕುರಿಪಾದ್ ಮಲ್ತಿನ ಗೊಬ್ಬರೊಗು ಕುಟ್ಟೆ ಗೊಬ್ಬರ ಪನ್ಪೆರ್. ಬೊಂದೆ ಪಂಡ ಏತ್ ಸಸಾರ ಪಂಡ, ‘ಅಂಬಡೆ ಬುಲೆದ್ ಕುಂಬುಡ ಆವಾ, ಬೂತಾಯಿ ಬುಲೆಂಡ ಬಂಗುಡೆ ಆವಾ?’ ಪಂದ್ ಒಂಜಿ ಗಾದೆ ಉಂಡು. ಅಪಗಾ ಬಂಗುಡೆಗ್ ಎಡ್ಡೇನೆ ಮರ್ಯೆದಿ ಉಂಡು. ಎಲ್ಯ ಜೋಕುಲು ಲಡಾಯಿ ಮಲ್ತೊಂದು ಪೆಟ್ಟ್ ಕೊರೊನ್ನಗ, ಐಟ್ ಪಾಪದ ಬಾಲೆಗ್ ಪನುವೆರ್ ಪೆರಿಯಾಕ್ಲು ‘ನನ ಬೂತಾಯಿ ಕೊರ್ದು ಬಂಗುಡೆ ಗೆತೊನಡ’. ಪಂಡ ಪಾಪದ ಬಾಲೆ ಸುರುಕು ಮೆಲ್ಲ ಮುಟ್ಟಾಂಡ (ಪೆಟ್ಟ್), ಆ ಜೋರುದ ಬಾಲೆ ಕಯಿತ್ (ಜೋರುಡು) ಹಾಕುಂಡು ಪಂದ್ ಪನ್ಪಿನಿ.
ಮರಿಯಾಲೊಡು ಮರಕಾಲ್ದಿ ಬೂತಾಯಿ ಕನತ್ದ್, ಗೆತೊನಿ ಗೆತೊನಿ ಪಂದ್ ರಂದುನ ಇತ್ಂಡ್. ಅಪಗ, ಮೀನ್ಗ್ ಪಾಡರೆ ಪುಲಿ ಇಜ್ಜಿ ಪನುವೆರ್ ಇಲ್ಲಡ್. ಮೀನ್ದ, ತೆತ್ತಿದ ರಸತ ಕಯಿಪುಗು ಪುದರೇ ‘ಪುಲಿ’. ಮೀನ್ದ ಪುಲಿ, ತೆತ್ತಿದ ಪುಲಿ. ಬೆರನೆರ್ ಕಾಚಿ ಕುಂಬುಡ, ತೌತೆದ ‘ಹುಳಿ’ ಮಲ್ಪುವೆರ್. ನಮ ಅವ್ವೆನ್ ಪುಲಿ ಕೊದ್ದೆಲ್ ಪನ್ಪ. ಅಂಚ ಬೂತಾಯಿಗ್ಲಾ ಮಸ್ತ್ ಪುಲಿ ಬೋಡು, ಪುನ್ಕೆದ ಪುಲಿ ಎಡ್ಡೆ, ಇಜ್ಜಿಡ ಕಡೆಕ್ ಕರ್ಂಡೆ ಪುಲಿಲಾ ಆಪುಂಡು. ಕರ್ಂಡೆದ ಕೊಡಿ (ತೆಗ್ಲೆ ಇರೆ) ಪಾಡ್ದ್ಲಾ ಬೂತಾಯಿದ ಪುಲಿ ಮಲ್ತೊಂದು ಇತ್ತೆರ್. ಮೀನ್ಗ್ ಪುಲಿ ಮುಂಚಿ ಕೊಡಕ್ಕೆನೆ ಆವೊಡು, ತಾರಾಯಿ ಒಂತೆ ಇಯಾವುಂಡು. ಮೀನ್ಲೆಡ್ ಬೂತಾಯಿ ಮಹಾ ಪುರಲ್. ತಿಂದಿನ ಮನದಾನಿ ಮೆಯಿ ಬೆಗತ್ಂಡ, ಬೆಗರ್ಲಾ ಪುರಲ್ ಬರ್ಪುಂಡು. ಇ ಹೋಟೆಲ್ಲೆಡ್ ನಿಗಲೆಗ್ ಬುತಾಯಿದ ಪುಲಿ ತಿಕ್ಕಂದ್. ಒಂಜೈವ ವರ್ಸ ದುಂಬು, ಎಂಕಲೆ ಊರುದ ಕಲಿತ ಗಡಂಗ್ಡ್ ಮೋಂಟನ್ನನ ಬೂತಾಯಿ ಪ್ರೈ ಪುದರ್ ಪೋತಿನ. ಯಾನ್ ಏತೋ ವರ್ಸೊಡು ಬೂತಾಯಿ ತಿನೊಂದು ಇತುಜಿ. ಅಂಚ ಕೋಡೆ ಬೊಂದೆ ಕಂತಿನಿ. ಮೂಲು ಕಡಲ್ದ ಬೂತಾಯಿಲಾ ತಿಕ್ಕುಂಡು, ಕೆದುತ (ಚಪ್ಪೆ ನೀರ್ದ) ಲಾ ತಿಕ್ಕುಂಡು. ಚೂರೇ ಚೂರು ಪುರಾಲ್ ಇಜ್ಜಿ. ಪಟೊಟು ಪಾಡ್ದಿನ ಆ ಬೂತಾಯಿಲು ದಾನೆ ಬಂಗುಡೆಡ್ದ್ ಮಸ್ತ್ ಎಲ್ಲಿ ಉಲ್ಲನಾ? ಒಂಜೊಂಜಿ 75 /80 ಗ್ರಾಂ ಉಲ್ಲ. ಐನ್ ಬೂತಾಯಿಗ್ 160 ರುಪಾಯಿ ಕೊರಿಯೆ. ಚಡ್ತೆ ಮಲ್ಪುಲೆಕ್ಕ ಇಜ್ಜಿದೇ ಮೂಲು.
ಮುಲ್ತ ಮನ್ನ ಬಿಸಲೆಡ್, ನಮ್ಮೂರುದ ಪುಲಿ, ಮುಂಚಿ ಪಾಡ್ದ್ ಕೊಡಕ್ಕೆನದ ಪುಲಿ ಮಲ್ತೊಲು ಮೋಲು. ರಡ್ಡ್ ಬಾಯಿ ನುಪ್ಪು ಎಚ್ಚ ಸೇರ್ಂಡ್ ಪನ್ಕ. ಬೂತಾಯಿ ಒಂಜಿ ಸೂಪರ್ ಫುಡ್ಗೆ. ಕೊಲೆಸ್ಟ್ರಾಲ್ ಬೊಕ್ಕ ಟ್ರೈಗ್ಲಿಸರೈಡ್ಲೆನ್ ಕಡಿಮೆ ಮಲ್ಪುನ ಒಮೆಗಾ-3 ಮಸ್ತ್ ಉಂಡುಗೆ. ಅಂಚೆನೆ ಎಲು ಬೊಕ್ಕ ನರೊಕುಲೆಗ್ ಅಗತ್ಯ ಬೋಡಾಪಿನ ವಿಟಾಮಿನ್ ಡಿ, ಬಿ12 ಬೂತಾಯಿಡ್ ಉಂಡುಗೆ. ಸುಲಬೊಡು ಜೀರ್ನ ಆಪಿನ ಪ್ರೋಟೀನ್ ಅತ್ತಾವಂದೆ ರಂಜಕ, ಕ್ಯಾಲ್ಸಿಯಂ, ಕರ್ಬ ಇಂಚಿತ್ತಿನ ಕನಿಜೊಲು ಬೊಂದೆಡ್ ದಿಂಜಿದ್ ಉಂಡುಗೆ. ಶುಭ ಮಂಗಲದ ಸಿನಿಮಾದ ‘ಸೂರ್ಯಂಗು ಚಂದ್ರಂಗೂ ಬಂದಾರೆ ಮುನಿಸು, ನಗ್ತಾದ ಬೂತಾಯಿ ಮನಸ್ಸು….’ ಪದ ಕೇಂಡಿನಾತ್ ಸರ್ತಿ ಬೂತಾಯಿಲಾ ನಿನೆಪಾಪುಂಡು, ಭೂ ತಾಯಿ ದಾಯೆಗ್ ತೆಲುಪುವೊಲು ಪಂದ್ ಸೋದ್ಯಲಾ ಆಪುಂಡು. ಆಂಡ ಮುಲ್ಪ ‘ನಗ್’ ಪನ್ನಗ ತೆಲಿಪುನು ಪಂದ್ ಅರ್ತನಾ, ನಗ್ಗು (ಞಗ್ಗ್) ಪಂಡ ನಲ್ಲಿಯುನು ಪಂದ್ ಅರ್ತನಾ? ಮನಸ್ ಮುದ್ಯುನು (ತುಂಡಾಪಿನಿ) ಪನ್ಪಿನ ಕೇಂದ್ ಇಪ್ಪರ್.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
