ತುಳುನಾಡ ತುಳುಜನೊ ಬದ್ಕ್ಡ್ ನಾಗೆ ವಿಶೇಷವಾದ್ ತಾನೊ ಪಡೆಯಿನೆಟ್ ಮುಲ್ಪ ನಾಗಾರಾಧನೆಗ್ ಮಾಮಲ್ಲ ತಾನೊ. ದೈವೊ ದೇವೆರೆಡ್ದ್ ದುಂಬು ನಾಗನ್ ಸುಗಿತ್, ತನು ತಂಬಿಲೊ, ಪನಿಯಾರೊ ಬಲಸ್ದ್ ದುಂಬು ಪೋಪಿನಕ್ಲ್ ತುಳುವೆರ್. ಪುಡೆಮಿಯಪ್ಪೆನ ಮಟ್ಟೆಲ್ಡ್ ಕಣ್ಣ್ಗ್ ತೋಜುನ, ಪರಪುನ ನಾಗೆನೇ ಜೂವೊದ ದೇವೆರ್ ಪನ್ಪಿ ನಂಬೊಲಿಗೆ ಆನಿಡ್ದ್ ಇನಿಮುಟ್ಟಲಾ ಒರಿದ್ ಬೈದಿನೊಟ್ಟು ಬನೊ, ಕಲ್ಲ್, ಕಾಡ್, ನೀರ್ಲೆಡ್ ನಾಗನ ನಿಲೆ ತೂದು ನಾಗನ ಆರಾಧನೆ ನಡಪಾವೊಂದು ಬೈದೆರ್. ನಾಗನ್ ಬಜೀ ಉಚ್ಚುದ ಒರುಟು ತೂವಂದೆ ಬೂಮಿ, ಬರ್ಸೊ, ಫಲವಂತಿಕೆ, ಬೆನ್ನಿ ಬದ್ಕ್ದ ಒಂಬುಗೆ ಬೊಕ್ಕ ಪ್ರಕೃತಿದ ರಚ್ಚನೆದ ಸಂಕೇತವಾದ್ ತೂಪುನ ಪರಂಪರೆ ನಮ್ಮವು. ಶ್ರಾವಣ ಮಾಸದ ಶುಕ್ಲ ಪಕ್ಷದ ಪಂಚೆಮಿಗ್ ಅತಂಡ ಆಟಿದ ಅಮಾಸೆ ಕರಿದ್ ಐನನೇ ದಿನ ಆಚರಿಪುನ ಪರ್ಬನೇ ನಾಗರ ಪಂಚಮಿ. ಉಂದು ಬಜೀ ನಾಗಗ್ ಪೂಜೆ ಮಲ್ಪುನ ಪರ್ಬೊ ಆವಂದೆ ತುಳುವೆರೆ ಪಾಲ್ಗ್ ಫಲವಂತಿಕೆಗ್, ಜೋಕುಲೆ ಆರೋಗ್ಯಗ್, ಕುಟುಮೊದ ಒಂಬುಗೆದ ಎಡ್ಡೆಪುಗು, ಸಂತಾನೊದ ಒರಿಪುಗು ನಾಗನ್ ಪ್ರಾರ್ಥಿಪುನ, ಸುಗಿತ್ ಆರಾಧಿಪುನ ಪರಂಪರೆ ಆದುಂಡು. ನಾಗರ ಪಂಚೆಮಿದ ಇಸೇಸ ಬೊಕ್ಕ ಬಾರೀ ಪೊರ್ಲುದ ಅಂಶ ಪಂಡ ಮರಿತ್ತ ಬೆನ್ನಿ ಬದ್ಕ್ ಬೊಕ್ಕ ಪಸಂದ್ರದೊಟ್ಟುದ ಸಮ್ಮಂದೊ. ಉಚ್ಚು, ಕೇರಿಲ್ ಕಂಡೊ, ಬೈಲ್ಡ್ ಇಪ್ಪುನ ಎಲಿ ಪೆರ್ಗುಡೆಲೆನ್ ನಿಯಂತ್ರಿಪುನ ಒರುಟು ಬೆನ್ನಿಗ್ ಪರೋಕ್ಷವಾದ್ ಬೆರಿಬಲೊ ಆದ್ ಸಕಾಯೊ ಮಲ್ಪುವೊ. ಅಂಚನೆ ಬೆನ್ನಿದಾಯಗ್ ಪ್ರಕೃತಿದ ಸಮತೋಲನದ ಒಂಜಿ ಭಾಗ ಆದ್ ನೆಗಪುನ ಜೂವೊರಾಸಿನ್ ಗೌರವಿಪುನ ಬಾಮೊ ಮುಲ್ಪ ನೆಗಪುಂಡು. ಮಣ್ಣ್ದೊಟ್ಟಿಗೆ ಒಂಬುಗೆದ ಬದ್ಕ್ ನಡಪಾವೊಂದು ಇಪ್ಪುನ ಉಚ್ಚು ಬಜೀ ಪೋಡಿಗೆದ ಒರುವಾದ್ ಮಾತ್ರ ತೋಜುನ ಜೀವಿ ಅತ್ತ್, ಅವು ಜೂವೊ ವೈವಿದ್ಯತೆದ ಒಂಜಿ ಪಾಲ್ ಪನ್ಪಿನವು ಈ ಆಚರಿಪುದ ಪಿರವುದ ನಂಬುಗೆದೊಂಬಗೆ.
ಪುರಾಣೊದ ಒರುಟು ತೂಪುನಾಂಡ ನಾಗನ್ ವಿಶೇಷ ತಾಣಮಾನ ಕೊರ್ದ್ ದೇವೆರಾದ್ ತೂವೊಂದು ಬೈದೆರ್. ಆದಿಶೇಸೆ, ಅನಂತೆ, ವಾಸುಕಿ, ತಕ್ಷಕೆ, ಕಾರ್ಕೋಟಕೆ ದುಂಬಾಯಿ ನಾಗೆರೆ ಉಲ್ಲೇಕೊ ಪುರಾಣೊಲೆಡ್ ಉಂಡು. ನಾರಾಯಿನ ದೇವೆರೆ ಶೇಷಮಂಚ, ಈಸರನ ಮೆಯಿತ ನಾಗೆರ್, ಸಮುದ್ರಮಥನಡ್ ವಾಸುಕಿನ ಪಾಲ್ ಉಂದು ಮಾತ ನಾಗಗ್ ಭಾರತೀಯ ಧಾರ್ಮಿಕ ಪರಂಪರೆಡ್ ತಿಕಿನ ಮಲ್ಲ ಪಾಲ್ನ್ ನೆಗಪಾವುನ ಒಟ್ಟುಡು ತುಳುನಾಡ್ದ ಉದಿಪುದ ಒಟ್ಟುಡುಲಾ ನಾಗನ ಪುದರ್ ನೆಗಪುಂಡು. ಕೆಲವೊಂಜಿ ವಿದ್ವಾಂಸೆರೆನ ಅಧ್ಯಯನದ ಪಿರ್ಕಾರ ನಾಗೆ ಪನ್ಪಿನ ಪದೊ ನೀರ್, ನೀರ್ದ ಮೂಲ, ನೀರ್ದ ಒಸರ್, ನೀರ ಪರಿಪು, ನೀರ ಸೆಳೆ ಪನ್ಪಿನ ಸಮ್ಮಂದ ಕೋಪುಂಡು. ಅಂಚಾದ್ ನಾಗಗ್ಲಾ ನೀರ್ಗ್ಲಾ ಇಪ್ಪುನ ಸಮ್ಮಂದೊ ಎಚ್ಚಾದ್ ಪೌರಾಣಿಕ, ಸಾಂಸ್ಕೃತಿಕ, ಜಾನಪದೀಯ ಬೊಕ್ಕ ಸಂಕೇತಾತ್ಮಕ ಪರಂಪರೆದ ಒರುಟು ನೆಗಪುಂಡು. ಭಾರತೀಯ ಪರಂಪರೆಡ್ ನಾಗನ್ ಸಾಮಾನ್ಯವಾದ್ ಭೂಗರ್ಬೊಡಿಪ್ಪುನ ನೀರ್ದ ಸೆಳೆತ ಕಾಪಡೆರ್ ಪನ್ಪಿನೊಟ್ಟುಡು ನೀರ ನಿಧಿ ಇಪ್ಪುನ ಜಾಗೆಲೆಡ್ ಒಂದೊಂದಿ ನಾಗರಾಧನೆಗ್ ಎಚ್ಚ ಮಹತ್ವ ಉಂಡು. ನೆಕ್ಕ್ ಕಾರಣ ಉಚ್ಚುಲು ಎಚ್ಚ ನಸೆ ಇಪ್ಪುನಲ್ಪ, ಪಸೆ ದಿಂಜಿ ಪುಂಚೊಡು, ಕಾಡ್ ಬಲ್ಲೆಲ್ ಇಪ್ಪುನಲ್ಪ, ಮರತ್ತ ಬೇರ್ದ ಅಡಿ, ಮಾಟೆ, ಬಾಂಡಿಲ್ ಪಂದ್ ನೀರ್ದ ಬರಿಟ್ ಇಪ್ಪುನವು. ನಾಗೆ ಬೂಮಿದುಲಾಯಿ ಸಂಚರಿಪುನ ಜೀವಿ. ಅಯಿಕ್ಕ್ ಇಂಬು ಕೊರ್ಪಿಲೆಕೊ ಪುರಾಣೊದ ಪಿರ್ಕಾರ ನಾಗಲೋಕೊ ನೀರ ಅಡಿಮೆಯಿಟ್ ಉಂಡು ಪನ್ಪಿನೊಟ್ಟು ಪೇರ ಕಡಲ ನಡುಟು ಆದಿಶೇಷೆ, ಯಮುನಾ ಸುದೆ ಮಡುಟು ಕಾಳಿಂಗೆ ಇತ್ತಿನ ನೆಕ್ಕ್ ಬಲೊ ಕೊರ್ಪುಂಡು.
ತುಳುಟ್ಟು ನಾಗನ್ ‘ಮರಿ’ ಪಂದ್ ಪನ್ಪೆರ್, ಬರ್ಸೊದ ಕಾಲೊನು ‘ಮರಿಯಾಲೊ’ ಪಂದ್ ಪನ್ಪೆರ್. ಕೆಲವು ಅಧ್ಯಯನಕಾರೆರೆ ಪಿರ್ಕಾರ ‘ಮರಿ’ ಬೊಕ್ಕ ‘ಮರಿಯಾಲೊ’ ಪದೊ ಪರಂಪರೆಡ್ ನೀರ್, ಪಸೆ ಕಲ್ಪನೆದೊಟ್ಟುಡು ಸಮ್ಮಂದೊ ಉಂಡು ಪಂದ್ ಪನ್ಪುಂಡು. ನೆಕ್ಕ್ ಕಾರಣ ಮರಿ ಸಂಪು ಮೆಯಿತ ಸೀತೊ ನೆತ್ತೆರ ಜೀವಿ ಪಂದ್, ಅಂಚನೆ ಮರಿಯಾಲೊ ಪುಡೆಮಿನ್ ನಾಗನ ಮೆಯಿತಂಚ ಸಂಪು ಮಲ್ಪುಂಡು ಪನ್ಪಿ ಅರ್ತೊಡು ಗೋಡಿಪುವೆರ್. ಅವೆಕ್ ಇಂಬು ಕೊರ್ಪಿಲೆಕ ಕಾಡ ಜನೊಕುಲು ನಾಗಗ್ ಮೂರಿಲೆಡ್ ನೀರ್ ದೀದ್ ಪೂಜಿಪುವೆರ್. ತುಳುವೆರೆ ನಾಗಬೀದಿ, ನಾಗನಿಧಿ, ನಾಗನಿಲೆ, ನಾಗಬನೊ, ನಾಗನಡೆ ಮಾತಲಾ ಉಚ್ಚು ಅತಂಡ ಮರಿಕ್ ಸಮ್ಮಂದಪಟ್ಟಿನ ಒರುಟು ತೋಜಂಡಲಾ ಉಂದು ಪುಡೆಮಿದ ಉಲಮರ್ಗಿಲ ನೀರ ಪರಿಪು ಒರಿಪುದ ಚಿಂತನೆಲ್ ಆದ್ ಹಿರಿಯೆರೆ ಗೇನೊಡು ಮೂಡ್ದ್ ನಮ್ಮಾಡೆಮುಟ್ಟ ಪರತೊಂದು, ಪರಿತೊಂದು ಬತ್ತ್ನೆಡೇ ಇನಿ ತುಳುನಾಡೊರ್ಮೆ ಅಲ್ಪಲ್ಪ ತೋಡು, ತಾರ್, ಸುದೆಕ್ಲೆನಂಚಿ ನೀರ ಪರಿಪುಲು ಒರಿದುಲ್ಲ ಪಂಡಲಾ ತಪ್ಪಾವಂದ್. ಅಂಚಾದ್ ನಾಗೆ, ಬೂಮಿ, ನೀರ್, ಬರ್ಸ, ಫಲವಂತಿಕೆ ಪನ್ಪಿನ ಒಂಜಿ ಸಾಂಸ್ಕೃತಿಕ ಸರಪ್ಪೊಲಿ ಉಟಾರ್ನೆ ಆತ್ಂಡ್ ಪಂದ್ ಪನೊಲಿ..!
ಪರಿಸರ ಸಂರಕ್ಷಣೆದ ಪಾಟೊನು ನಮ್ಮ ಹಿರಿಯೆರ್ ಬಾಯಿಡ್ ಪನೊಂದು ಕುಲ್ಲಂದೆ ಆಚರಿಪುಡು ತೋಜಯೆರ್. ನಾಗ ಪೂಜನೆದ ಒರುಟು ನಾಗನ್ ಒರಿತೆರ್, ನಾಗ ಬನೊನು ಉಂಡು ಮಲ್ತೆರ್, ಮರ ಬುಲೆಪ್ಪಾಯೆರ್, ಮಣ್ಣ ಪಸೆ ಕಾತೆರ್, ನೀರ ಒಸರ್ ಸೆಳೆ ಒರಿತ್ ಪಸಂದ್ರದ ಕಾಪುದಂಚಿ ಪಜ್ಜೆ ಪಾಡಿಯೆರ್. ಇತ್ತೆದ ಕಾಲೊದ ನಾಗಾರಾಧನೆ ಕಲ್ಲ ನಾಗಗ್ ಪೇರ್ ಮೈತ್ ಪೂಜಿಪುವೆರ್, ನಿಜೊತ ಮರಿನ್ ತೂಂಡ ಕಡ್ಪು, ಹಾಕ್, ನೋಪು ಕೆರ್ ಪನ್ಪೆರ್ ಪನ್ಪಿ ಕಬಿನುಡಿತಂಚನೇ ಆತ್ಂಡ್. ಕಲ್ಲ ನಾಗಗ್ ಪೂಜಿಪುನ ಸಂಸ್ಕೃತಿ ತುಳುವ ಬನೊ, ಕಾಡ ನಾಗಾರಾಧನೆನ್ ನಿಂಗ್ದ್ ನೀರ್ ಪರ್ತ್ಂಡ್ ಪಂಡಲಾ ತಪ್ಪಾವಂದ್. ನಾಗನ್ ಪೂಜಿಪೆರೆ ದುಂಬು ನಾಗ ಸಂತತಿನ್ ಒರಿಪುನ ಮಾಮಲ್ಲ ಜಬದರಿ ನಮ್ಮವು. ಉಚ್ಚು ತೋಜಿನ್ನೇ ಕೆರ್ಪುನ ಬದಲ್ ಅಯಿನ್ನ್ ಕಾತ್ದ್, ಜೋಕೆಡ್ ಬದ್ಕುನ ಜಾಗೆಡ್ ಬುಡೊಡು. ನಾಗಬನ ಒರಿತ್, ಕಾಡ್ದಂಚಿ ನೈಸರ್ಗಿಕ ನಾಗನಿಲೆನ್ ಒರಿಪೊಡು. ಉಂದುವೇ ನಾಗರಾಧನೆದ ಆಶಯೊದ ನಿಜವಾಯಿನ ಪಜ್ಜೆ. ಪಂಡ ನಾಗರ ಪಂಚಮಿ ನಮಕ್ ಪ್ರಕೃತಿನ್ ಪೂಜಿಪುನ ಸಂಸ್ಕೃತಿಡ್ದ್ ಪಸಂದ್ರೊನು ಒರಿಪುನ ಪರತಿರಿತಂಚಿ ಪಜ್ಜೆ ಪಾಡುನ ಒಸಗೆ ಕೊರ್ಪುಂಡು. ನಮ್ಮ ಪೆರಿಯಕ್ಲ್ ನಮಕ್ಕ್ ನಾಗನ್ ಪೂಜಿಪು ಪಂದ್ ಮಾತ್ರ ಪನ್ತ್ಜೆರ್. ನಾಗ ಬನೊ ಒರಿಪು, ನಾಗೆ ಇಪ್ಪಿ ನೆಲನ್ ಒರಿಪು, ನೀರ ಒಸರ್ ಒರಿಪು, ಅಪಗನೇ ನಿನ್ನ ಬದ್ಕ್ದ ಪರಿಪು ಒರಿಯುಂಡು ಪಂದ್ ಒಂಜೇ ಆಚರಿಪುಡು ತೋಜದ್ ಕೊರಿಯೆರ್. ಪರಿಸರ ರಚ್ಚನೆದ ಪಾತೆರೊಡು ಪೊರ್ತು ಕಳೆವಂದೆ ಇಂಚಿನ ಆಚರಿಪುಡು ಬದ್ಕ್ ಕರಿತ್, ಪೊರ್ಲುದ ಪಸಂದ್ರನ್ ಒರಿತಿ ನಮ್ಮ ಪೆರಿಯ ತರೆಕ್ಲೆಗ್ ಸೊಲ್ಮೆ ಸಂದಾವು ನಿಲೆಟಾಂಡಲಾ ನಮ ಬನೊ ಒರಿಂಡ ಮರ ಒರಿಯುಂಡು, ಮರ ಒರಿಂಡ ಮಣ್ಣ್ ಒರಿಯುಂಡು, ಮಣ್ಣ್ ಒರಿಂಡ ನೀರ್ ಒರಿಯುಂಡು, ನೀರ್ ಒರಿಂಡ ಜೂವೊರಾಸಿಲ್ ಒರಿಯುಂಡು, ಜೂವೊರಾಸಿಲ್ ಒರಿಂಡ ಪಸಂದ್ರದ ಸಮತೂಕೊ ಒರಿಯುಂಡು, ಪಸಂದ್ರದ ಸಮತೂಕೊ ಒರಿಂಡ ನಮ್ಮ ಬದ್ಕ್ ಒರಿಯುಂಡು, ಬಲ್ಕಟ್ಟ್ ಪೊರ್ಲುಡು ಕರಿಯುಂಡು ಪಂದ್ ತೆರಿದ್ ನಡತ್ನಾಡೆ ನಾಗಾರಾಧನೆದ, ನಾಗರ ಪಂಚೆಮಿದ ಆಚರಿಪುಗು ನಿಜ ಅರ್ತೊದ ತಿರಿ ಗೋಡಿದ್ ಬದ್ಕ್ ಬಂಗಾರಾಪುನ ಒಟ್ಟುಡು ನಾಡ್ ಪೊರ್ಲುಡು ಬೆಳಗು. ತುಳುನಾಡ ಐಸಿರೊ ಒರಿಯು.
ಬರವು : ಶ್ರೀಶಾವಾಸವಿ ತುಳುನಾಡ್
