ಹೊರೆ ಕಾಣಿಕೆ ಸ್ವೀಕರಿಸುವುದಿಲ್ಲ.

ಸೈತಿನಕಲೆನ ಪುನೊಕು ಕುಟುಂಬದಕುಲು, ಪೊದ್ದರೆ ಇಷ್ಟೆರ್ ಕುಂಟು ಪಾಡುನ ಒಂಜಿ ಸಂಪ್ರದಾಯ.
ದುಂಬು ಪುನೊಕು ಪಾಡುನ ಪನ್ದ್ ತೆಲ್ಪುದ ಕುಂಟು ತಿಕೊಂದು ಇತ್ತಿಂಡ್. ಮಲ್ಲಕುಲು ಬೊಕ್ಕ ಪಾಪದಕುಲು ಪನ್ಪಿನ ಭೇಧ ದಾಂತೆ ಮಾತೆರ್ಲಾ ಅಂಚಿನ ಕುಂಟುನೇ ಪುನೊಕು ಪಾಡೊಂದಿತ್ತಿನಿ.
ಕಾಲ ಪೋಯಿಲೆಕ ಪುನೊಕು ಕುಂಟು ಪಾಡುನ ಪದ್ಧತಿ ಮಲ್ಲಾ ಮಟ್ಟ್ ಆಂಡ್. ವೇಷ್ಟಿ, ಎಡ್ಡೆ ಕಿರಾಯಿದ ಮುಂಡು. ಪೊಂಜೋವುನ ಪುನೊಕು 3-4 ಸಾವಿರ ರೂಪಾಯಿದ ಸೀರೆ ಪಾಡ್ದ್ ಮಲ್ಲಾದಿಗೆ ತೊಜಾಪುನ ಸುರು ಆಂಡ್.
ಬೊಜ್ಜೊಗು ಹೊರೆ ಕಾಣಿಕೆ ಸ್ವೀಕರಿಸುವುದಿಲ್ಲ ಪನ್ಪಿನ ಹೇಳಿಕೆ ದಾಯೆಗ್ ಪಂಡ್ಡಾ ಇತ್ತೆ ಇಲ್ಲಡೇ ಬೊಜ್ಜದ ಅಟಿಲ್ ಮಲ್ಪಂದೆ ಕ್ಯಾಟರಿಂಗಿದಕಲೆಗ್ ಕೊರ್ಪಿನೆಟ್ಟಾತ್ರ.
ಬೊಜ್ಜದಾನಿ ಕಿಲೆಸಿ (ಕ್ಷೌರಿಕ) ಬರ್ರೇ ಇತ್ತಿಂಡ್, ಪುನೊಕು ಪಾಡ್ದಿನ ಎಡ್ಡೆಂತಿನ ವೇಷ್ಟಿ, ಮುಂಡು ಆಯೆ ಕೊನೊಂದಿತ್ತೆ. ನಮ ಕುಚ್ಚಿ ದೆಪ್ಪರೆ ಪೋಯಡಾ ನಂಕ್ ಪೊದುಪುನು ಆಯೆ ಕೊನೊತಿನ ಪುನೊಕು ಪಾಡ್ದಿನ ಕುಂಟುನೇ 😃 ಕಿಲೆಸಿ ದೆತ್ತಿನೆರ್ದ್ ಬೊಕ್ಕ ಒರಿನ ಕುಂಟುಲೆನ್ ಡೋಲು ಬೊಟ್ಟುನ ಕೊರಗೆರ್ ಕೊನೊಂದಿತ್ತೆರ್.
ಇತ್ತೆ ಕಿಲೆಸಿ ಬೊಕ್ಕ ಕೊರಗೆರೆ ಅನುಕೂಲದಕುಲು ಆಯಿನೆಟ್ಟಾತ್ರ ಪುನೊಕು ಪಾಡ್ದಿನ ಕುಂಟು ಅಕುಲು ಕೊನೊಪುಜೆರ್ ಅಯಿಡ್ದಾತ್ರ ನೀರ್ಗ್ ಅತ್ತಿಡಾ ಬೇಲಿಗ್ ದಕ್ಕೊಡಾಪುಂಡು.
ಇತ್ತೆ ಕುಡೊಂಜಿ ಪದ್ಧತಿ ಸುರು ಆತಿಂಡ್. ಪುನೊಕು ಮಲ್ಲ ಮಲ್ಲಾ ಪೂತ ಮಾಲೆ ಪಾಡುನ.
ಇತ್ತೆ ಪುನ ತುಂಬುನಕಲೆಗ್ ಪುನೊರ್ದು ಹೆಚ್ಚ ಮಣ ಭಾರ ದುನ್ನಾ ಪೂತ ರಾಶಿಯೇ ಆಪುಂಡು. 😃
” ಹೆಣಕ್ಕೆ ಎಷ್ಟೇ ಶೃಂಗಾರ ಮಾಡಿದರೂ ಮರಳಿ ಜೀವ ಆಗುವುದೇ?” ಪನ್ಪಿನ ವಚನ ಸಾಹಿತ್ಯ ಎಂಕ್ ನೆನೆಪು ಆಪುಂಡು.
ನನ ಒಂಜಿ ವಿಷಯ ಭಾರೀ ಗಮ್ಮತ್ತಿದ ಅಂಚೆನೇ ಗಂಭೀರವಾಯಿನ.
ಬೊಜ್ಜದ ವನಸ್ಗ್ ಪಂತೆಡ್ ಕುಲ್ದಿನಡೆ ಬಲಸುನೇ ಅತ್ತಾಂದೆ ಪ್ಲಾಸ್ಟಿಕ್ ದ ಬಾಕ್ಸಡ್ ಪಾಡ್ದ್ ನಾಲೈನ್ ಬಗೆತ ಭಕ್ಷ ಪಾರ್ಸಲ್ ಕೊರ್ಪಿನ. ” ಉಂಡೂ ಹೋದ, ಕೊಂಡು ಹೋದ ” ಪನ್ಪಿನ ಗಾದೆ ಎಂಕ್ ನೆನೆಪು ಆಪುಂಡು.
ಬೊಜ್ಜದ ಕಾಕಜಿನ್ ಓದುದು ಇಲ್ಲಡ್ ದೀಪಿನ ಅಪ ಶಕುನ ಪನ್ದ್ ಪರ್ತ್ ಪಾಡುನ ಕ್ರಮ ಉಪ್ಪುನಗ, ಭಕ್ಷ ಪಾರ್ಸಲ್ ಕೊರ್ಪಿನ ಪದ್ಧತಿ ದಾಯೆಗ್.?
ಭಕ್ಷ ಪಾರ್ಸಲ್ದ್ ವಿಷಯೊಡಾತ್ರ ನನ ಮಿತ್ತಿಗ್ ತನ್ನ ಇಲ್ಲಡ್ ಏರ್ಲಾ ಸೈತೆರ್ಡ ಅಕಲೆಗ್ ಬೊಜ್ಜ ಮಲ್ಪರೆಲಾ ಪಾಪದಕಲೆಗ್ ಕಷ್ಟ ಆಪಿನ ಸಾಧ್ಯತೆ ಉಂಡ್ಡು.