ಇತ್ತೆದ ಕಾಲೊಡು ಮದ್ಮೆದ ಆಮಂತ್ರಣ ಪತ್ರೊಡು ” ಆಶೀರ್ವಾದವೇ ಉಡುಗೊರೆ ” ಅತ್ತಿಡಾ “ಉಡುಗೊರೆ ಸ್ವೀಕರಿಸುವುದಿಲ್ಲ” ಪನ್ಪಿನ ಒಂಜಿ ವಾಕ್ಯ ಉಪ್ಪೊಂಡೇ. ಅಂಚಾದುಪ್ಪುನಗ ಉಡುಗೊರೆದ ಬಗ್ಗೆ ಒಂತೆ ಅಜಕೆ ಪಾತೆರುವೆ.
ದುಂಬುದ ಬಂಗದ ಕಾಲೊಡು ಪೊಣ್ಣಗ್ ಆವಾಡ್ ಆಣಗ್ ಆವಡ್ ಮದ್ಮೆ ಮಲ್ಪರೆ ಭಾರೀ ಬಂಗ ಪಂಡ್ಡಾ ದೊಡ್ಡುದ ಸಮಸ್ಯೆ ಇತ್ತಿಂಡ್. ಅಯಿಡ್ದಾತ್ರ” ಹನಿಗೂಡಿ ಹಳ್ಳ” ಪನ್ಪಿನ ಗಾದೆದಲೆಕ ಮದ್ಮೆದ ಲೇಸ್ ದೆಪ್ಪುನಕಲೆಗ್ ಎಂಕಲೆರ್ದಿಲಾ ಒಂತೆ ಸಹಾಯ ಆವಾಡ್ ಪನ್ದ್ ಮದ್ಮೆಮೆದ ಮಂಟಪೊಡು ಮದ್ಮೆಯೆ, ಮದ್ಮಲೆಗ್ ದೊಡ್ಡು ಕೊರ್ಪಿನ ಪದ್ಧತಿ ಜಾರಿಡ್ ಬೈದಿಂಡ್. ದುಂಬು ದೊಡ್ಡು ಎಂಚಾ ಕೊರೊಂದಿತ್ತಿನಿ ಪಂಡ್ಡಾ ” ಕಂಚಿ ದೀಪಿನಿ ” ಪಂಡ್ದ್ ಹರಿವಾಣ ದೀದ್ ಅಯಿತ ಕೈತಲ್ ರಡ್ಡ್ ಜನ ಕುಲ್ಲುನು. ದೊಡ್ಡು ದೀಪನಕುಲು ಒರಿಯಡ ದೊಡ್ಡು ಕೊರ್ಪಿನಿ, ಆಯೆ ಮಾತೆರ್ಗ್ಲಾ ಕೇನುಲೆಕ ಜೋರುಡು ಲೆತ್ತಿದ್ ಪನ್ಪಿನಿ. ( ಉದಾಹರಣೆಗೆ- ಪಂಜ-ಮೊಗಪಾಡಿ ಶಿವಪ್ಪ ಶೆಟ್ರೆನ ರಡ್ಡ್ ರೂಪಾಯಿ😃) ಅವೊನು ಬೊಕ್ಕೊರಿ ಬೂಕುಡು ಬರೆಪಿನಿ. ಏರ್ ದೊಡ್ಡು ದೀಯೆರಾ ಆ ದೊಡ್ಡುನು ಅಕಲೆನ ಜೋಕುಲೆಗ್ ಮದ್ಮೆ ಆನಗ ಪಿರ ದೀಯೆರೇ ಇತ್ತಿಂಡ್.
ಹರಿವಾಣದ ಕೈತಲ್ ಕುಲ್ದು ದೊಡ್ಡು ದೆತುನುನಾಯೆ ಭಾರೀ ಜೋರುಡು ದೊಡ್ಡು ದೀಯಿನಕಲೆನ ಪುದಾರ್ ಪನೊಂದು ಇತ್ತಿನೆಟ್ಟಾತ್ರ ಕಡಿಮೆ ದೊಡ್ಡು ದೀಪಿನಕಲೆಗ್ ಮದ್ಮೆಗ್ ಪೋರೆನೇ ನಾಚಿಕೆ ಆಪಿನ ಪರಿಸ್ಥಿತಿ ಬತ್ತಿನೆಟ್ಟಾತ್ರನೇ ಕಂಚಿ ದೀಪಿನ ಪದ್ಧತಿ ಪೋದು ಕವರ್ಡ್ ದೊಡ್ಡು ಪಾಡ್ದ್ ಮದ್ಮೆಯನ ಮದ್ಮಲೆನ ಕೈಟ್ ಕೊರ್ಪಿನ ಪದ್ಧತಿ ಜಾರಿಡ್ ಬತ್ತಿಂಡ್.
ಮದ್ಮೆಲೆಗ್ ಪೊಂಜೋವು ಸೀರೆ ಉಡುಗೊರೆ ಕೊರ್ಪಿನಲಾ ಇತ್ತಿಂಡ್.
ಇತ್ತೆ ನಮ್ಮ ಸಮಾಜದಕುಲು ಅನುಕೂಲಲಾ ಆತ ಅವ್ವೇ ಅತ್ತಾವಂದೆ ಉಡುಗೊರೆ ಕೊರ್ತಿನಕಲೆನ ಜೋಕುಲೆನ ಮದ್ಮೆಗ್ ಪೋದು ಉಡುಗೊರೆ ಪಿರ ಕೊರ್ರೇ ಪುರುಸೊತ್ತುಲಾ ಉಪ್ಪುಜಿ. ಅಯಿಡ್ದಾತ್ರ ಉಡುಗೊರೆ ಕೊರ್ಪಿನ ಪದ್ಧತಿ ರದ್ದ್ ಆದ್ ಆಶೀರ್ವಾದವೇ ಉಡುಗೊರೆ🙏 ಜಾರಿಡ್ ಬತ್ತಿಂಡ್ಡಲಾ ಬೊಕ್ಕೊಂಜಿ ವಸ್ತು ಇಡೆಟೇ ನೂರ್ದುಂಡು.
ಅವು ದಾದಾ ಪಂಡ್ಡಾ 300- 500 ರೂಪಾಯಿರ್ದಿಲಾ ಹೆಚ್ಚ ಕಿರಾಯಿದ “ಪುಷ್ಪ ಗುಚ್ಛ” ಕೊರ್ಪಿನ.
ಮದ್ಮೆಯೆ ಮದ್ಮೆಲೆನ ಅಭಿನಂದನೆ ಮಲ್ಪರೆ ಕೈ ಕುರುಕುಂಡಲಾ ಇಯಾವು ಅತ್ತಿಡಾ ಗುಲಾಬಿದಂಚಿನ ಒಂಜಿ ಪೂ ಕೊರುಂಡಲಾ ಇಯಾವು. ಆತ್ ಕಿರಾಯಿದ ಪುಷ್ಪಗುಚ್ಛ ಮದ್ಮೆದ ಮನದಾನಿ ತಾರೆದ ಕಟ್ಟೆಗ್ ಬೂರ್ದು ಗೊಬ್ಬರ ಆಪಿನಿ.😃
ಮದ್ಮೆಯಗ್ ಇಜಿಡಾ ಮದ್ಮೆಲೆಗ್ ದೊಡ್ಡು ಅತ್ತಿಡಾ ಇತರ ರೂಪೊಡು ಸಹಾಯ ಮಲ್ಪರೆ ಮನಸ್ಸ್ ಇತ್ತಿನಕುಲು ಮದ್ಮೆರ್ದ್ ದುಂಬೇ ಇಲ್ಲಡೆ ಪೋದು ಕೊರೋಲಿ.
