ಒಂಜಿ ಪೆರಿಯೆರ್ನ ಬಾಯಿಡ್ ಕೇಂಡಿನ ಸಾಧಾರಣ ಸೊನ್ಪ ಸೊನ್ಪತ್ತೈನ್ ವರ್ಸೊರ್ದುಲ ದುಂಬು ನಡತಿನ ಕತೆ. ತುಲುನಾಡ್ಡ್ ಅವ್ವೊಂಜಿ ಕಾಲೊಡು ಸತ್ಯದ ಜೂವೊಲು ಧರ್ಮದ ನರಮಾನಿಲು ಬದ್ಕ್ ಬಾರೊಂದು ಇತ್ತಿನ ಕಾಲೊಗೆ.. ಆನಿದ ಕಾಲೊಡು ಧರ್ಮ ಮೀರಿನಾಯಗ್ ಮೂಜಿ ದಿನೊತ ಔಸ ಧರ್ಮೊಡ್ ನಡತಿನಾಯಗ್ ಸಾರ ದಿನೊತ ಔಸಗೆ.. ಆ ಕಾಲೊಡು ತುಲುನಾಡ ಮಣ್ಣ ಸತ್ಯ ಎಂಚ ಇತ್ತುಂಡು ಪಂಡ ಕಾಂಡೆ ಪಂಡಿನವು ಮಧ್ಯಾಹ್ನದ ದೊಂಬು ನೆತ್ತಿಗ್ ಬೂರೊಡ್ಡ ದುಂಬು ಪಂಡಿ ನಾಲಯಿ ದೊಂಡೆಡ್ ಕುಲ್ಲೊಡ್ಡ ದುಂಬು ಪಲಿತ್ ಬರೊಂದು ಇತ್ತುಂಡುಗೆ.. ಅಂಚಿನ ಒಂಜಿ ಕಾಲೊಡು ಒಂಜಿ ಪೊರ್ತುದ ಬಂಜಿ ದಿಂಜೊಡಾಂಡ ಕೋಲು ಕಾರ್ ಮುರ್ಕುನ ಕೆಸರ್ ದಿಂಜಿನ ತಾರುನ ಕಂಡೊಗು ಜಪ್ಪೊಡುಗೆ.. ಕಾಯುನ ದೊಂಬುಡು ನುಂಗೊಂದು ಬೂರುನ ಬರ್ಸೊಡು ಬೊದುಲೊಡುಗೆ.. ಅಲ್ಪ ನೆತ್ತೆರ್ ಬೆಗರ್ ಆವೊಡುಗೆ.. ಬೆಗರ್ ಬಾರ್ ಆವೊಡುಗೆ.. ಬಾರ್ ಬೆಯಿತ್ ಬೆಯಿತಿನೆ ಬರಕಲೊಡು ಉಜ್ಜೆರ್ಡ್ ಗುದು ಗುದುದು ಮಡಿ ಆದ್ ಅರಿ ಆವೊಡುಗೆ.. ಅರಿ ಮಣ್ಣ ಕರೊಟು ಅರ್ಲುನ ಸೂಟ್ ಕೊದ್ದಿ ಕೊದ್ದಿದ್ ನುಪ್ಪಾವೊಡುಗೆ ಆ ನುಪ್ಪು ಆನಿ ನಮ್ಮ ಪೆರಿಯಾಕ್ಲೆ ಬಂಜಿ ದಿಂಜೊಡುಗೆ ಅಂಚಿನ ಬಂಗೊದ ಪಿರವುಡೆ ಧರ್ಮ ಇತ್ತಿನಿ ಸತ್ಯ ಇತ್ತಿನಿ ಪಂಡಲ ತಪ್ಪಾವಂದ್.
ಅಂಚಿತ್ತಿ ಕಾಲೊಡು ಒಂಜಿ ಊರುಡು ಒಂಜಿ ಕುಟುಮೊಡು ಪಂಜುರ್ಲಿನ ವರ್ಸೊದ ಭೋಗೊಗು ದಿನಮಾನ ಆತುಂಡುಗೆ ಅವ್ವೊಂಜಿ ದಿನ ಆ ಕುಟುಮೊದ ಒರ್ತಿ ಪೊಣ್ಣು ಮಗಲ್ ಕೋರಿ ಕೆಲೆಪೊಡ್ಡ ದುಂಬು ಲಕ್ಕುದಲ್ಗೆ ಕಿದೆಟ್ ಇತ್ತಿ ಪೆತ್ತಗ್ ಬೈ ಪಾರ್ದ್ ದುಂಬುನಾನಿ ನಟ್ಟಿ ನಡಿನ ಬೇಲೆಡ್ ತಿಕ್ಕುದಿನ ಒಂಜಿ ಸೇರ್ ಪಡಿ ಅರಿನ್ ಬೆಯಿಪಾದ್ ಗಂಜಿ ಜಾದ್ ದೀಯಲ್ಗೆ, ಆನಿದ ದಿನ ಏತ್ ತುರ್ತುದ ಬೇಲೆ ಇತ್ತುಂಡಲ ಪೊರ್ತು ಕಡೆಸೊಡ್ಡ ದುಂಬು ಆವೊಡು ಪನ್ಪಿನ ಲೆಕ್ಕ ದೀವೊಂಡಲ್ಗೆ, ತನ್ನ ಪೊಡಿ ಜೋಕ್ಲೆನ್ ಲಕ್ಕಾದ್ ಗಂಜಿ ತೆಲಿ ಕೊರ್ದು ಕಂಡನಿ ಕೊಟ್ಟು ಪುಗೆಲ್ಡ್ ದೀವೊಂದು ಕಂಡದ ಬರಿಕ್ ಪೋಯಿನೆ ತಾನ್ ತರೆಕ್ಕ್ ಮುಟ್ಟಾಲೆ ದೀವೊಂದು ನಟ್ಟಿ ನಡಿಯರೆ ಜತ್ತ್ ಬತ್ತುದು ಕೊಟ್ಟ ಗೋರಿ ದೊಂಬುಡು ನಟ್ಟಿ ನಡುದು ಬೇಲೆ ಮುಗಿತುದು ಪಾರೊಂದು ಬೂರೊಂದು ಗುತ್ತುಗು ಪಾರ್ ಪೋದು ಅಬ್ಬೆ ಪೊಂಜೊವುಡ ಪಡಿ ಕೇಂಡಲ್ಗೆ ಆರ್ ಲತ್ತಿನ ಪಡಿ ತನ್ನ ಸೆರಂಗ್ದ ಕೊಡಿಕ್ ಬೂರುನಗ ಪೊಣ್ಣನ ಕಣ್ಣ್ ದಿಂಜಿದ್ ಬತ್ತುಂಡು ಇನಿ ಎನ್ನ ಪಂಜುರ್ಲಿನ ಭೋಗೊಗು ಬೋಡಾಯಿ ಪಡಿ ತಿಕ್ಕಿಲೆಕ್ಕ ಆಂಡ್ ಪಂಡಲ್ ಇಲ್ಲಗ್ ಬತ್ತಲ್ ತರೆಕ ಮೈಕ ಮೀಯಲ್ ಪೊಡಿ ಜೋಕ್ಲೆನ್ ಕಂಡನಿ ಮುದೆಲ್ಡ್ ಬುಡಿಯಲ್ ತಾನ್ ಬೆಂದಿನ ಒಂಜಿ ಸೇರ್ ಅರಿನ್ ಒಂಜಿ ತಾರಯಿದೊಟ್ಟಿಗೆ ಪೊದಿಕೆ ಕಟ್ಟಿಯಲ್ ತರೆಟ್ಟ್ ತುಂಬಿಯಲ್ ಒಂಜಿ ಕೋರಿನ್ ನೇಲಾದ್ ಪತೊಂಡಲ್ ಕಂಡನಿ ಇಲ್ಲ ಬುರ್ದು ಪಿದರಿಯಲ್ ಬಸ್ಸ್ ಕಾರ್ ಇಜ್ಜಂದಿ ಆ ಕಾಲೊಡು ಒಂಜಿ ಕಂಡೊಡು ಉಂತುದು ತೂನಗ ಕಣ್ಣ ದಿಟ್ಟಿಗ್ ಎಕ್ಕಂದಿನಾತ್ ಕಂಡ ಬೈಲ್ ತೋಜೊಂದು ಇತ್ತುಂಡುಗೆ ಇಂಚ ನಡತ್ ನಡತ್ ಒಂಜಿ ಬೈಲ್ ಒಂಜಿ ಗುಡ್ಡೆ ಒಂಜಿ ಪಾಡಿ ಮೈಲ್ ಗಟ್ಟಲೆ ಸಾದಿನ್ ಜೋಡು ಪಾಡಂದಿ ಕಾಲಿ ಕಾರ್ ಡ್ ಕಡತಲ್ಗೆ ಏತ್ ದೂರ ನಡತುಂಡಲ ತರೆಟ್ಟ್ ಜಪ್ಪುನ ಬೆಗರ್ ಬಚ್ಚುನ ಬಚ್ಚೆಲ್ ನಾಟೊಂದು ಇಜ್ಜಿ ಇನಿ ಎನ್ನ ಪಂಜುರ್ಲಿನ ಭೋಗೊನ್ ತೂವೊಡು ಪನ್ಪಿ ಉರ್ಕು ಉಲ್ಲಾಸೊ ಪೊಣ್ಣನ ತಿಗಲೆಡ್ ಎರ್ಕೊಂದು ಉಂಡುಗೆ ಸೂರ್ಯ ದೇವೆರ್ ಪಡ್ಡಾಯಿಗ್ ಮುರ್ಕೊಂದು ಬನ್ನಗ ನನ ಮುಟ್ಟೊಗು ಮುಟ್ಟ ಆಂಡ್ ಪಂಜುರ್ಲಿನ ಮುದೆಲ್ ಪೋದು ಪೋದುಲ ಎತ್ತಿಯಲ್ ಪೊಣ್ಣು ಮಗಲ್. ದೂರೊಡು ಬನ್ನಗ ತೂಪಲ್ ಪುದರ್ಗ್ ಬಾರಿ ಮಲ್ಲ ಕುಟುಮ ಆಂಡ ಒಂಜಿ ಮಾನಿ ಪುರಿ ತೋಜೊಂದು ಇಜ್ಜಿ ಅತ್ತ ಪಂಡಲ್.. ಪಂಜುರ್ಲಿನ ಕಲ್ಲ ಮುದೆಲ್ಗ್ ಬನ್ನಗ ತೆಡಿಲ್ ಆಕಿಲೆಕ್ಕ ಆಂಡ್ ಪೊಣ್ಣು ಮಗಲೆಗ್ ಅಂಬಿ ಪೂಜಿದುಂಡು ನೆಲಕ್. ಕೇಪುಲದ ಪೂ ಬೂರ್ದುಂಡು ಕಲ್ಲ್,ಗ್. ಮಣ್ಣ ತಿಪಿಲೊಡು ತುಡರ್ ಅರ್ಲೊಂದು ಉಂಡು. ಪಂಜುರ್ಲಿನ ಭೋಗ ಕರಿತುದು ಕುಟುಮದಕ್ಲು ಅಗತ್ ಪೋದುಲ ಆತುಂಡು. ತರೆಟ್ಟ್ ಇತ್ತಿ ಅರಿ ತಾರಾಯಿನ್ ಜಾಯಲ್ ತಿಗಲೆಡ್ ಇತ್ತಿ ಉರ್ಕು ಉಲ್ಲಾಸೊ ಕರಾದ್ ನೀರಾದ್ ಪೋಂಡು ದುಣ್ಣದ ದುಃಖ ದಿಂಜೊಂದು ಬತ್ತುಂಡು. ಓ ತಮ್ಮಲೆ ಪಂಜುರ್ಲಿ ನಿನ್ನ ಭೋಗದ ಪೊರ್ಲುನ್ ತೂವೊಡು ಪಂದ್ ಬಾಸೆ ಕಟೊಂದು ಆಸೆ ದೀವೊಂದು ಒಂಜಿ ಪುಲ್ಯಕೊಲಗ್ ಲಕ್ಕುದು ನೆತ್ತೆರ್ನ್ ಬೆಗರಾದ್ ಜಪುಡಾದ್ ಬೆಂದ್ ಸೊಂದುದು ಎನ್ನ ಜೋಕ್ಲೆನ ಬಂಜಿ ದಿಂಜಾವುನ ಪಡಿತ ಅರಿನ್ ತುಂಬೊಂದು ನಿನ್ನ ಮುದೆಲ್ಗ್ ಬತ್ತೆನ. ಇನಿ ಎಂಕ್ ನಿನ್ನ ಭೋಗ ತೂಪಿನ ಯೋಗ ದಾಂತೆ ಪೋಂಡತ್ತ ಪಂಜುರ್ಲಿ. ಎನ್ನ ಪೊಡಿ ಜೋಕುಲೆಗಾಂಡಲ ನಿನ್ನ ಗಂಧ ಕೊನೊದು ಪಾಡುವೆ ಪಂಡ ಒಂಜಿ ಇರೆ ಗಂಧಲ ಒರಿಪಾವಂದೆ ಪೋತೆರತ್ತ ಪಂಜುರ್ಲಿ ಪಂದ್ ತರೆಕ್ಕ್ ತರೆ ಆಕೊಂದು ಬುಲ್ತಲ್ಗೆ ಆ ಪೊರ್ತುಡು ಅಲೆನ ಕಣ್ಣ ನೀರ್ ಮಣ್ಣ್ ಸೇರೊಂದು ಬನ್ನಗ “ಎಂಕ್ ಎನ್ನ ಜೋಕುಲೆಗ್ ನಿನ್ನ ಮುದೆಲ್ದ ಒಂಜಿ ಪುಂಡಿ ಮಣ್ಣೆ ಗಂಧ” ಪಂಡಲ್ ಮಣ್ಣ್,ನ್ ಸೆರಂಗ್ದ ಕೊಡಿಟ್ ಅರ್ಕಲ್ ಪಾರ್ದ್ ಕಟೊಂದು ಬೆರಿ ಪಾರ್ದ್ ದುಂಬು ಜತ್ತ್ ಬತ್ತಲ್ಗೆ. ಪೊರ್ತು ಕರಿದ್ ಊರು ಕತ್ತಲೆ ದಿಂಜೊಂದು ಬೈದುಂಡು ಕಾರ ನಡಕೆಡ್ ದುಂಬು ದುಂಬು ಬತ್ತುದು ಒಂಜಿ ಬೈಲ್ ಕಡಪುನ ಪೊರ್ತು ಪಿರವುಡು ಏರ ನಡತ್ ಬರ್ಪಿ ಪಜ್ಜೆದ ಅಜನೆ ಕೇನುಂಡು. ನಡು ಕಂಡೊದ ಪುನಿಟೆ ಬನ್ನಗ ತೆಡಿಲ್ ಬರ್ಸ ದೊರಿಯುಂಡು ಪೊಣ್ಣ ಸೆರಂಗ್ದ ಕೊಡಿಟ್ ಕಟ್ಟ ಪಾರ್ದ್ ಇತ್ತಿ ಮಣ್ಣ ಗಂಟ್ ಗಿದುರುದು ಬೂರುಂಡು. ಪಿರವುಡು ಉಂದು ಏರಪ್ಪ ಪಂದ್ ಪೊಣ್ಣು ಮಗಲ್ ಪಿರ ತಿರ್ಗುದು ತೂನಗ. ಪೊಣ್ಣ ಕಣ್ಣ ಎದುರುಡು ಬೂಮಿ ಲಪ್ಪುನ ಅಗೆಲದಾತ್. ಅಕ್ಕಸ ಲಪ್ಪುನ ಉದ್ದದಾತ್ ಮಲ್ಲ ಜೂವ ತೋಜುಂಡು.. “ಪೊಣ್ಣ ಕಣ್ಣ ನೀರ ಬೆರಿಯೆ ಪಂಜುರ್ಲಿ” ಬೈದುಂಡು ತೂಯಿನ ಪೊಣ್ಣು ಮಗಲೆನ ಸತ್ಯ ಗೆಂದುದ್ ಬೈದುಂಡು. ಪೊಣ್ಣ ಸೆರಂಗುದ ಮಣ್ಣ್ ಬೂರಿನ ಜಾಗೆಡ್ ಪಂಜುರ್ಲಿ ನೆಲೆ ಊರ್ದುಂಡು.
ಉಂದುವೆ ಆ ಕಾಲೊದ ಸತ್ಯ ಉಂದುವೆ ಆ ಕಾಲೊದ ಧರ್ಮ ಉಂದುವೆ ಆ ಕಾಲೊದ ಪೆರಿಯಾಕ್ಲೆ ನಾಲಯಿ. ಉಂದು ತುಲುನಾಡ ಪೊಣ್ಣ ಸಂತಾನೊಗುಲ ದೈವ ಪಂಜುರ್ಲಿಗ್ಲ ಇಪ್ಪುನ ಶ್ರೇಷ್ಠ ಸಂಬಂಧೊನು ತೋಜಾವುಂಡು. ಇಂಚಿತ್ತಿನ ಅವೇತೊ ಲೆಕ್ಕೊಗು ತಿಕ್ಕಂದಿನಾತ್ ಮಾಯೊದ ಸತ್ಯ ಚರಿತ್ರೆಲೆನ್ ತುಲುವಪ್ಪೆ ತನ್ನ ಮಟ್ಟೆಲ್ಡ್ ದೀವೊಂದಲ್ ಪನೊಂದು ಉಂದು ಒಂಜಿ ಕತೆಕ್ ಮುಗಿತಲ ಚುಕ್ಕಿ ದೀವೊಂದುಲ್ಲೆ.
-ವಜ್ರದಾರಗೆ.
