ನಮ್ಮ ತುಳುನಾಡ್ದ ಜನೊಕ್ಕುಲೆನ ಸಂಪ್ರದಾಯೊಡು, ಕ್ರಿಷಿ, ದೈವ ದೇವತಾರಾಧನೆ, ಆಟ ಕೂಟ, ಕಂಬುಳ, ಕೋರ್ದಟ್ಟ ಇಂಚಿನ ಮಾತ ಒಂಜೊಂಜಿ ಜನ ಮೆಚ್ಚಿಗೆದ ಕ್ಷೇತ್ರೊಲಾದುಂಡು. ಒಂಜಿ ಕಾಲೊಡು ನಮ್ಮಕುಲು ಬೆನ್ನಿ ಬೆಂದ್ ದ್ ವರ್ಷೊಗು ೧೦೦/೨೦೦ ಮುಡಿ ಗೇಣಿ ಕೊರೊಂದಿತ್ತಿನ ಇಲ್ಲುಲ್ಲಾ ಇತ್ತ್ಂಡ್. ೧೯೭೦ ದ ಸಮಯೊಡು ಭೂ ಮಸೂದೆ ಬತ್ತಿನೆಡ್ದಾವರ, ಸಾಗೋಲಿ ಮಲ್ತ್ ದ್ ದಿನದೆಪ್ಪೆರೆ ಬಂಙಂದ್ ತೆರೀದ್ ಜೋಕುಲೆನ್ ಬೊಂಬಾಯಿಗ್ ದೇರಿಯೆರ್. ನಮ್ಮ ಜೋಕುಲು ಜುವ್ವ ಗಟ್ಟಿತ್ತ್ ದ್ ಚುರುಕಾದಿತ್ತಿನೆಟ್ಟಾತ್ರ ಒಲ್ಪಾ ಪೋಂಡಲಾ ನೀಂದೊಂದಿತ್ತೆರ್. ಊರುಡು ಅಂಚಿನ ವಾತಾವರಣೊಡು, ಮಸ್ತ್ ಜನೊಕ್ಕುಲ್ಡಪ್ಪ ಮಲ್ಲ್ಯಾತಿನೆಟ್ಟಾತ್ರ ಸಮಾಜೊಡು ಬದುಕುನೆಂಚಾಂದ್ ತೆರಿಯೊಂದೆರ್. ಎಚ್ಚಿನಕುಲು ಕೋಟೆಡೆ ಕೆಲಸ ಬೊಕ್ಕ ಅಲ್ಪಲ್ಪನೆ ಉಂತೆರೆಲಾ ಇತ್ತಿನೆಟ್ಟಾತ್ರ, ಬಯ್ಯದ ೫/೬ ಗಂಟೆಡ್ದ್ ಬೊಕ್ಕ ದಾಲ ಕೆಲಸ ಇಜ್ಜಿ, ಇಲ್ಲಡೆ ಪೊಯೆರೆ ಇಜ್ಜಿ, ಅಲ್ಪನೆ ಮುಟ್ಟೊಡೇ ನಮ್ಮ ಹಿರಿಯೆರ್ ಅಕಲ್ನ ದೂರ ದೃಷ್ಟಿಡ್ ಮಲ್ದಿನ, ಕನ್ನಡ ಮಾಧ್ಯಮದ ರಾತ್ರೆ ಶಾಲೆ ಏರ್ಪಾಡ್ ಮಲ್ತಿತ್ತಿನೆಟ್ಟಾತ್ರ, ಕೆಲವೆರ್ ರಾತ್ರೆ ಶಾಲೆಗ್ ಪೋಯೆರ್, ಕೆಲವೆರ್ ಚೆಂಡ್ ಗೊಬ್ಬೆರೆ ಅಲ್ಪದ ಅದಗದ ಮಂಗಳೂರು ಮೈದಾನ್, ಕ್ರಾಸ್ ಮೈದಾನ್, ಆಝಾದ್ ಮೈದಾನ್ಗ್ ಪೋಯೆರ್. ಈ ರಡ್ಡ್ ಕ್ಷೇತ್ರೊಡ್ಲಾ ನಮ್ಮ ಜೋಕುಲು ಬಾರಿ ಉಷಾರಾಯೆರ್. ಅಂಚಾದ್ ಚೆಂಡ್ ಗೊಬ್ಬಿನಕಲೆಗ್ಲಾ, ಕಲ್ತಿನಕಲೆಗ್ಲಾ ಟಾಟ, ಮಫತ್ಲಾಲ್, ಮಹೀಂದ್ರ, ಓರ್ಕೆ, ರೈಲ್ವೆ, ಬ್ಯಾಂಕ್ಲೆಡ್ ಮಾತ ಕೆಲಸ ತಿಕ್ಂಡ್. ಕೆಲವೆರ್ ಹೋಟೆಲ್, ಕ್ಯಾಂಟಿನ್ ಡ್ ಕೆಲಸ ಮಲ್ತೆರ್, ಈ ಕ್ಷೇತ್ರದಕುಲ್ಲಾ ಎಡ್ಡೆ ಉಷಾರಾಯೆರ್. ಇತ್ತೆ ಎಚ್ಚಿನಕಲ್ನ ಜೋಕುಲು ಎಡ್ಡೆ ಕಲ್ತ್ ದ್, ಎಡೆಡ್ಡೆ ಕಂಪನಿಲೆಡ್ ಕೆಲಸಾಂಡ್. ಕೆಲವೆರ್ ಊರುಗು ಪೋಯೆರ್. ಕೆಲವೆರ್ ಹೋಟೇಲ್, ಬಾರ್ ಮಾತ ಮಲ್ತೆರ್. ಚೆಂಡ್ ಗೊಬ್ಬುದಿನಕಲ್ನಲಾ ಜೀವನ ಪ್ರಗತಿಯಾಂಡ್, ನಮ್ಮ ದೇಶಲ ಪ್ರಗತಿಯಾಂಡ್.
ಇತ್ತೆದ ಕಾಲೊಡು ನಮ್ಮ ಊರುಡು ಫಿರಾಕ್ ಡ್ದಿಂಚಿ ಬೈದಿನ ಅಂಕ ಆಯನೊಡು ನಡತೊಂದಿತ್ತಿನ ಚೆಂಡ್ ದ ಪೊರ್ಲು ಉಂತೊಂದು ಬರೊಂದಿತ್ತಿಲೆಕ ತೋಜುಂಡು. ನಮ್ಮ ಈ ಪೊರ್ಲುದ ಚೆಂಡಾಟೊನು ಉಂತಾವಂದೆ, ನಮ್ಮ ಜೋಕುಲೆನ್ ಒಟ್ಟುಪಾಡ್ದ್ ಇತ್ತೆದ ನಿಜವಾಯಿನ ಅಂತರ್ರಾಷ್ಟೀಯ ಮಟ್ಟದ ಚೆಂಡಾಟೊಗು ಪರಿವರ್ತನೆ ಮಲ್ತ್ ದ್, ಪರಿವರ್ತನೆನೆ ಪ್ರಗತಿದ ಮೂಲ ಪಂಡಿಲೆಕ, ಆ ಆ ದೈವ ದೇವಸ್ಥಾನೊಗು ತಾಗುನ ಊರುದ ಟೀಮ್ ಮಲ್ತ್ ದ್ ಅಕಲ್ನ ಮದ್ಯೊಡು, ೧೦ ದಿನೊಡ್ದುಂಬುವೇ ಒಂಜಿ ಟೂರ್ನಮೆಂಟ್ ದೀದ್ ಐತ್ತ ಫೈನಲ್ ಮ್ಯಾಚಿನ್ ಜಾತ್ರೆದಾನಿ ದೀಂಡ ನಮ್ಮ ಊರ್ದಕಲ್ಡ ಒಂಜಿ ಪೊಸ ಉಲ್ಲಾಸ ಪೊಸ ಒಗ್ಗಟ್ಟ್ ಸುರುವಾಯೆರೆ ಸಾದ್ಯ ಉಂಡು. ಪಿರಾಕ್ ಡ್ದಿಂಚಿ ಈ ದೈವ ದೇವಸ್ಥಾನೊಲೆಡ್ ಈ ಚೆಂಡ್ ದ ಸಂಪ್ರದಾಯ ನಡತೊಂದುಂಡು. ಅಂಚಿನೆಟ್ಟ್ ಪೊಳಲಿ, ಜಂತೊಟ್ಟು, ತೋಕೂರು, ಕಂಡೇವು, ಪಡ್ರೆ, ಬಪ್ಪನಾಡ್ ಇಂಚ ಮಾತ ಮಸ್ತ್ ಕಡೆಟ್ಟಾಪುಂಡು. ಈ ರೀತಿ ಆಂಡ ನಮ್ಮ ಜಾತ್ರೆಲೆಗ್ ಮಸ್ತ್ ಜವನೇರ್ಲ, ಜನೊಕ್ಕಲ್ಲಾ ಸೇರೆರ್. ಅತ್ತಾವಂದೆ ನಮ್ಮ ಹಿರಿಯೆರ್ ಮಲ್ದಿನ ಕಟ್ಟು ಕಟ್ಟಲೆಲಾ ಒರಿವು ಪಂಡ್ದ್ ಎನ್ನ ಅನಿಸಿಕೆ.
ಈ ವಿಷಯೊನು ಬರೆವೊಡ್ಡ ದುಂಬು ನೆತ್ತ ವಿಷಯೊನು ನಮ್ಮ ತೋಕೂರು ಗುತ್ತಿನಾರಾಯಿನ ದಿವಾಕರ್ ಆಳ್ವೆರ್ಡಲಾ ತೆರಿವೊಂದು ಆರ್ನ ಆಶೀರ್ವಾದಲಾ ಗೆತೊಂಡೆ. ಅಂಚೆನೆ ನಮ್ಮ ತಡಂಬೈಲ್ದ ನಿರಂಜನ್ ಶೆಟ್ಟಿ, ಮೇರ್ ಯೇರ್ ಇಂಡಿಯ ಫುಟ್ಬಾಲ್ ಟೀಮ್ದ ಮುಖ್ಯ ಸದಸ್ಯೆರಾದಿತ್ತ್ ದ್ ಅತ್ತಾವಂದೆ ಮಹಾರಾಷ್ಟ್ರ ರಾಜ್ಯೊಗುಲಾ ಗೊಬ್ಬುದು ನಮ್ಮ ತುಳುವೆರೆಗೊಂಜಿ ಕೀರ್ತಿ ಕನದ್ದಿನ ಆಟಗಾರೆರೆಡ್ ಮೇರ್ಲ ಒರಿಯಾದುಲ್ಲೆರ್ ಇಂದ್ ಪನೆರೆ ಬಾರಿ ಅಭಿಮಾನಾಪುಂಡು. ಅತ್ತಾವಂದೆ ನಮ್ಮ ಪಡ್ರೆದ ಪದ್ಮನಾಭ ನರ್ಸಣ್ಣ ಶೆಟ್ಟಿ ಮೇರ್ ಎಲ್ಯ ಪ್ರಾಯೊಡು ಮುಂಬಯಿಗ್ ಪೋದು, ಅಲ್ಪ ಕ್ಯಾಂಟೀನ್ಡ್ ಕೆಲಸ ಮಲ್ತ್ ದ್ ಅಂಚೆನೆ ಶ್ರೀ ಗುರುನಾರಾಯಣ ರಾತ್ರಿ ಶಾಲೆಗ್ ಪೋವೊಂದಿತ್ತಿಲೆಕಾನೆ ಫುಟ್ಬಾಲ್ಲ ಎಡ್ಡೆ ಗೊಬ್ಬೊಂದಿತ್ತಿನೆಟ್ಟಾತ್ರ, ಐತ್ತ ಬಲೋಟ್ಟೆ ಯೂನಿಯನ್ ಬ್ಯಾಂಕ್ ಡ್ ಕೆಲಸಾದ್, ಅಲ್ಪದ ಫುಟ್ಬಾಲ್ ಟೀಮ್ದ ಎಡ್ಡೆ ಆಟಗಾರೆ ಆದಿತ್ತ್ ದ್ ಸದ್ಯೊಗು ಈ ಕ್ಷೇತ್ರೊಡೆ ಸುಖ ಸಂಸಾರ ಮಲ್ತೊಂದುಲ್ಲೆರ್. ಈ ವಿಷಯೊಗು ಅಕಲ್ನಲ ಸಂಪೂರ್ಣ ಸಮರ್ಥನೆ ಬೊಕ್ಕ ಬೆಂಬಲ ಉಂಡುಂದು ಬಾರಿ ಖುಷಿಯಾಯೆರ್. ನಮ್ಮ ಈ ಚೆಂಡಾಟ ಸದಾ ಸೂರ್ಯೆ ಚಂದ್ರೆ ಉಪ್ಪುನೆಟ್ಟ ಮೆರೆಯೊಂದುಪ್ಪಡುಂದು ಆಶೆಡ್.
ಬರವು : ಡಿ.ಕೆ ಶೆಟ್ಟಿ ಸೂರಿಂಜೆ
