ಮಂಗಳೂರಿನ ಹೊಟೇಲೊಂದರಲ್ಲಿ ಕೂತು ಊಟ ಮಾಡುತ್ತಿದ್ದೆವು. ಅಲ್ಲಿ ರಘು ದೀಕ್ಷಿತ್ ಹಾಡು ಹಚ್ಚಿದ್ದರು! ನಮ್ಮ ಮುಂದೆ ಕೂತಿದ್ದ ವ್ಯಕ್ತಿ ವೈಟರನ್ನ ಕರೆದು ’ಪ್ಲೀಸ್ ಆ ಹಾಡು ಬಿಟ್ಟು ಬೇರೆ ಯಾರದ್ದಾದ್ರೂ ಹಾಕಿ, ಕಿರಿ ಕಿರಿ ಆಗೊತ್ತೆ’ ಎಂದರು. ಅಸಲಿಗೆ ಅವತ್ತು ನಮ್ಮ ಮುಂದೆ ಕೂತಿದ್ದ ವ್ಯಕ್ತಿ ರಘು ದೀಕ್ಷಿತ್ ! ನಾನು ಎಲ್ಲೇ ಹೋಗಲಿ ನನಗೆ ಖುಶಿ ಆಗೊತ್ತೆ ಅಂತ ನನ್ನದೇ ಹಾಡು ಹಾಕ್ತಾರೆ, ಹೀಗಾದ್ರೆ ಬೇರೆಯವರ ಹಾಡು ಕೇಳುವ ಸುಖವೆಲ್ಲಿ? ಎನ್ನುವುದು ರಘು ದೀಕ್ಷಿತ್ ಪ್ರಶ್ನೆ! ಹೀಗೆ ಮಾತಿನ ನಡುವೆ ಅಭಿಮತದ ಹಿಂದಿನ ಕಾರ್ಯಕ್ರಮದ ಬಗ್ಗೆ ಮಾತಾಡುತ್ತಾ ಜರ್ನಿಥೇಟರ್ ಟೀಮಿನ ಹಾಡಿನ ಅದರಲ್ಲೂ ಮೇಘನ ಕುಂದಾಪುರ ಹಾಡಿನ ಬಗ್ಗೆ ಅವರು ಪ್ರಸ್ತಾಪಿಸುತ್ತಾರೆ. ’ಏನ್ ಸಕ್ಕತ್ತಾಗಿ ಹಾಡ್ತಾಳಲ್ಲ ಆ ಹುಡ್ಗಿ’ ಅಂತ! ಚಕ್ ಅಂತ ಮೇಘನಾಗೆ ಕಾಲ್ ಹಚ್ಚಿ ಯಾರೋ ನಿನ್ನ ಹಾಡಿನ ಬಗ್ಗೆ ಮಾತಾಡ್ತಾ ಇದ್ದಾರೆ ಕೇಳು ಎಂದು ಕೊಟ್ಟೆ! ’ನಾನು ನಿಮ್ಮ ಹಾಡಿಗೆ ಫ಼್ಯಾನ್ ಎಂದರು ದೀಕ್ಷಿತ್! ಆ ಕಡೆ ಮಾತಾಡುತ್ತಿದ್ದ ಮೇಘನಾಗೆ ಹೇಗಾಗಿರಬೇಡ! ಈತ ಸುಮ್ಮನೆ ದೊಡ್ಡವನಾಗಿಲ್ಲ ಅನ್ನಿಸಿತು.
ಕನ್ನಡದ ನೆಲದ ದಾಸ ಪದಗಳು ಪ್ಯಾರಿಸ್ ಒಲಂಪಿಕ್ಕಿನ ಅಂಗಳದಲ್ಲಿ ಅನುರಣಿಸಿತ್ತು, ರಘು ದೀಕ್ಷಿತ್ ಎಂದರೆ ಕಾರ್ಪೊರೇಟ್ ಜಗತ್ತು ಹುಚ್ಚೆದ್ದು ಕುಣಿಯುತ್ತದೆ. ರಘು ದೀಕ್ಷಿತ್ ಮಾಂತ್ರಿಕ ದನಿಗೆ ಲಕ್ಷಾಂತರ ಟೆಕ್ಕಿಗಳು ಹುಚ್ಚು ಅಭಿಮಾನಿಗಳು, ಜಗತ್ತಿನ ನೂರಾರು ದೇಶದ ಕೋಟ್ಯಾಂತರ ಜನರನ್ನ ಪ್ರತೀ ವರ್ಷವೂ ತನ್ನ ವರ್ಣರಂಜಿತ ದಿರಿಸು ಮತ್ತು ಕೊರಳ ಹಾರದೊಂದಿಗೆ ಹುಚ್ಚೆಬ್ಬಿಸುವ ದನಿಯೊಂದಿಗೆ ರಘು ದೀಕ್ಷಿತ್ ತಲುಪುತ್ತಲೇ ಇರುತ್ತಾರೆ. ರಘು ದೀಕ್ಷಿತ್ ಕನ್ನಡದ ನೆಲದ ಹೆಮ್ಮೆ! ಆದರೂ ಆ ಮನುಷ್ಯ ಅತ್ಯಂತ ಸರಳ ಮತ್ತು ಸಲಿಲ ಜೊತೆಗೆ ಸುಶೀಲ.
ಎರಡು ದಶಕಗಳ ಕಾಲ ಭರತನಾಟ್ಯ ಅಭ್ಯಾಸ ಮಾಡಿ ಅದರಲ್ಲಿ ಮಾಸ್ಟರ್ ಅನ್ನಿಸಿಕೊಂಡಿದ್ದ ರಘು ದೀಕ್ಷಿತ್ ಅದೊಂದು ದಿವ್ಯಕಾಲದಲ್ಲಿ ಅದು ಹೇಗೋ ಗಿಟಾರ್ ಮೇಲೆ ಕೈ ಇಟ್ಟು ಬಿಟ್ಟರು! ತಾನೇ ಕಬೀರನಾದರು, ಶಿಶುನಾಳ ಶರೀಫನಾದರು! ಗುಡುಗುಡಿ ಸೇದಿದರೆ ಅದಾವ ಅಮಲೋ ಗೊತ್ತಿಲ್ಲ! ಹಾಡು ರಘು ದೀಕ್ಷಿತರ ವ್ಯಸನವಾಯಿತು. ಕೊನೆಗೆ ಅದೇ ಅಶನವೂ! ಬಣ್ಣದ ಅಂಗಿ ಮತ್ತು ಡಾಳ ಲುಂಗಿವಾಲ ರಘು ದೀಕ್ಷಿತ್ ಕೊರಳ ಹಾರದಂತೆ ಗಿಟಾರ್ ಸಿಕ್ಕಿಸಿಕೊಂಡು ಅದರ ಚಿನ್ನದ ಹೆರಳ ಮೇಲೆ ಬೆರಳಾಡಿಸಿದರೆ ತರುಣ ತರುಣಿಯರ ಕಾಲು ನೆಲದ ಮೇಲೆ ನಿಲ್ಲಲು ಸಾಧ್ಯವೇ ಇಲ್ಲ! ನಿಂತರೆ ಮುಂದೆ ಹಾಡುತ್ತಿರುವುದು ರಘು ದೀಕ್ಷಿತ್ತೇ ಅಲ್ಲ! ಆ ಮಟ್ಟಿಗೆ ಈ ಮನುಷ್ಯನಿಗೆ ಅದೇನೋ ಜನಾಕರ್ಷಣೆ. ಅವರ ಬಗ್ಗೆ ಬರೆಯಲಿಕ್ಕೆ ಸಾಕಷ್ಟು ವಿಷಯಗಳಿವೆ. ಮೈಸೂರಿನ ರಾಜಬೀದಿಯಲ್ಲಿ ಓಡಾಡಿಕೊಂಡಿದ್ದ ರಘು ದೀಕ್ಷಿತ್ ಶ್ರೀಮಂತ, ಸುಶಿಕ್ಷಿತ ಮತ್ತು ಸಂಸ್ಕಾರವಂತ ಐಯ್ಯಂಗಾರಿ ಕುಟುಂಬ ಮೂಲದವರು. ಮೈಕ್ರೋಬಯಾಲಜಿಯಲ್ಲಿ ಮಾಸ್ಟರ್ಸ್ ಮಾಡಿದ ದೀಕ್ಷಿತ್ ನಾಲ್ಕು ಗೋಲ್ಡ್ ಮೆಡಲ್ಲುಗಳ ಜೊತೆಗೆ ಕ್ಯಾಂಪಸ್ಸಿನಿಂದ ಈಚೆ ಬಂದವರು, ಎಂ.ಎನ್.ಸಿ. ಕಂಪೆನಿಯಲ್ಲಿ ದೊಡ್ಡ ಹುದ್ದೆಗೇರಿದರೂ ಅದೊಂದು ದಿವಸ ಹಾಡಿಗಾಗಿಯೇ ಇದ್ದ ಕೆಲಸವನ್ನೂ ಬಿಟ್ಟು ಮುಂಬೈ ನಗರಿಗೆ ಬಂದು ಅವಕಾಶಕ್ಕಾಗಿ ಕೈ ಚಾಚಿದವರು! ಈ ಜಗತ್ತು ನನ್ನ ತಿರಸ್ಕರಿಸುತ್ತಿದೆಯಲ್ಲ? ಎಂದು ವೇದನೆಯಲ್ಲೆ ಕಿಸೆಗೆ ಕೈ ಹಾಕಿದರೆ ಆ ಕಾಲಕ್ಕದು ಕಾಲಿ ಜೇಬು. ಅಂತಹ ಹೊತ್ತಿನಲ್ಲಿಯೂ ಸೋತೆ ಎಂದು ರಘು ಕನಲಿ ಕೂರಲಿಲ್ಲ, ಮತ್ತೆ ಮರಳಲೂ ಇಲ್ಲ, ಸೋತರೂ ಇಲ್ಲೇ ಸತ್ತರೂ ಇಲ್ಲೇ ಸಂಗೀತ ಬಿಟ್ಟು ಬದುಕಲೊಲ್ಲೆ ಎಂದು ಬಲವಾಗಿ ಬಡಿದಾಡಿದ ಕಾರಣಕ್ಕೇ ದೀಕ್ಷಿತ್ ಬದುಕು ಜಗಮಗಿಸಿತು! ಇವತ್ತು ಈ ಮನುಷ್ಯ ಹೊಸ ಇತಿಹಾಸ ಬರೆದಿದ್ದಾರೆ, ಬರೆಯುತ್ತಿದ್ದಾರೆ.
ರಘು ದೀಕ್ಷಿತ್ ಹುಟ್ಟಿದ್ದು ಕುಂಭಮೇಳ ನಡೆಯುತ್ತಿದ ಸಮಯದಲ್ಲಿ ನಾಸಿಕ್ಕಿನಲ್ಲಿ! ಈ ವರ್ಷ ಕುಂಭಮೇಳವಿದೆ ಎನ್ನುವುದು ಗೊತ್ತೇ ಇಲ್ಲದೇ ನಮ್ಮ ಉದಯ್ ಶೆಟ್ಟರು ಕಳೆದ ವರ್ಷವೇ ಈ ವರ್ಷದ ಅಭಿಮತ ಸಂಭ್ರಮಕ್ಕೆ ’ಕನಸುಗಳ ಕುಂಭಮೇಳ’ ಎನ್ನುವ ಟ್ಯಾಗ್ ಲೈನ್ ಕೊಟ್ಟಿದ್ದರು! ಅದೇನು ಲಿಂಕೋ ಗೊತ್ತಿಲ್ಲ. ಅಲ್ಲಿ ಪ್ರಯಾಗ್ ರಾಜ್ ನಲ್ಲಿ ಮಹಾಕುಂಭಮೇಳ ನಡೆಯುತ್ತಿರುವಾಗಲೇ ಬ್ರಹ್ಮಾವರದಲ್ಲಿ ರಘು ದೀಕ್ಷಿತ್ ಮತ್ತು ಟೀಮ್ ನಮ್ಮನ್ನ ಹುಚ್ಚೆಬ್ಬಿಸಲಿದೆ,. ಈ ವರ್ಷದ ಅಭಿಮತ ಸಂಭ್ರಮ ಕಾರ್ಯಕ್ರಮವನ್ನ ನವ ಜಮಾನದ ತರುಣ ತರುಣಿಯರಿಗೆ ಅಂತಲೇ ಆಯೋಜಿಸಲಿದ್ದೇವೆ. ನಿಮ್ಮ ಕಾಲೇಜು ಕ್ಯಾಂಪಸ್ಸಿಗೆ ತಲುಪಲು ಪೋಸ್ಟರುಗಳಾಗಲೇ ತಯಾರಾಗಿವೆ. ನೋಟೀಸ್ ಬೋರ್ಡಿನಲ್ಲಿ ಅದನ್ನ ನೀವೇ ಅಂಟಿಸಬೇಕಿದೆ. ಫ಼ೆಬ್ರವರಿ ಹದಿನೈದಕ್ಕೆ ನೀವುಂಟು ಮತ್ತೆ ರಘು ದೀಕ್ಷಿತ್ ಉಂಟು. ದಿನವಿರುವುದು ಇನ್ನು ಕೇವಲ ಹದಿನೆಂಟು!
ಬರಹ : ವಸಂತ ಗಿಳಿಯಾರ್
