ದುಂಬುದ ಎಚ್ಚಿನ ಮಾಮಿಯಲ್ಲು ಬಾರಿ ಜೋರುದಗುಲು. ಅಪಗಾಂಡ ಇತ್ತೆದ ‘ಮರ್ಮಲಲ್ಲು’ ಜೋರಾ? ಪಂದ್ ಕೇನಡೆ. ಈ ಜೋರ್ದ ಮಾಮಿಯಲ್ಲೆನ ಮಾಮಿಯಲ್ಲುಲಾ ಜೋರ್ ಇತ್ತೆರ್, ಅಂಚ ಪರಪೋಕು (ಪರಂಪರೆ) ಮುಂದ್ರ್ತೊಂದು ಇತ್ತೆರ್. ಮಾಮಿಯಾಯಿನಾಲ್ ತಾನ್ಲಾ ಮರ್ಮಲ್ ಆದ್ ಇತ್ತೆ ಪನ್ಪಿನವ್ವೆನ್ ಮದಪುವೊಲು. ಮಗಕ್ ಮದಿಮೆ ಆದ್ ಮರ್ಮಲ್ ಬರೆ ಆನಗ, ಮಾಮಿಯಲ್ಲೆಗ್ ಇಸತ ಎಂಚಿನವ ಮೂಡುಂಡುಗೆ. ‘ಮಗೆ ಸೈತೆಡಲಾ ಮಲ್ಲೆತ್ತ್, ಮರ್ಮಲ್ ಮುಂಡೆ ಮುಚ್ಚುನ ಪೊರ್ಲು ತೂವೊಡು’ ಪಂತೊಲುಗೆ ದುಂಬೊರ್ತಿ ಜೋರುದ ಮಾಮಿ. ಅಂಚ ಒರ್ತಿ ಪೊಸ ಮರ್ಮಲ್ ಬತ್ತೊಲು ಇಲ್ಲಗ್. ಮಾಮಿ ದಿನಾಲ ಮಯಿಪು ಸೂಡಿಡ್ ರಡ್ಡ್ ರಡ್ಡ್ ಬೆರಿಕ್ ನೋತೊಂದು ಇತ್ತೊಲುಗೆ. ಬೊಕ್ಕ ಅಂಚ ಕೆಲವು ತಿಂಗೊಲು ಕರಿದ್, ಬವುಸ ಆಟಿ ಕುಲ್ಲರೆ ಲೆಸೊಂದು ಪೋವರೆ ಮೆಗ್ಯೆ ಬತ್ತೆಗೆ. ಬತ್ತಿನ ಮರ್ಮಲೆನ ಮೆಗ್ಯೆ ರಡ್ಡ್ ಉಂಡಿಯೆ, ಮರ್ಮಲ್ಲಾ ಉಂಡೊಲು. ಆಲ್ ಕಯಿ ಕಾರ್ ಮೋನೆ ಗರಕ್ಕನೆ ದೆಕ್ದ್, ತರೆನ್ ಬಾರಿದ್ ಸೂಡಿ ಪಾಡ್ದ್, ಇತ್ತಿನ ಒಂಜಿ ಪಿದಾಯಿ ಪೋನಗ ತುತ್ತುನ ಸೀರೆ ತುತುದು ಪಿದಾಡಿಯೊಲು. ಮೆಗ್ಯೆ ಪಿದಾಡ್ದ್ ಮುಂದಿಲ್ಗ್ ಜತ್ತೆ. ಮರ್ಮಲ್ ತಡ್ಯದ ಪಿದಾಯಿ ಗೋಡೆಗ್ ಒರ್ಗುದು ಉಂತೊಂದು, ಮಾಮಿನ ಮೋನೆ ಮೋನೆ ತೂವೊಂದು ಉಲ್ಲೊಲುಗೆ. ಮಾಮಿ ಕೆಂಡೊಲು ‘ದಾದ ಆಂಡ್?’ ಪಂದ್. ಆಪಿನ ಮರ್ಯೆದಿ ಆವಡ್ ಮಾಮಿಯೇ, ಯಾನ್ ಬರ್ಪೆ ಪಂಡೊಲುಗೆ. ಪಂಡ ಅಲೆಗ್ ನಿಚ್ಚ ಆವೊಂದು ಇತ್ತಿನ ಮಯಿಪು ಸೂಡಿದ ಪೂಜೆ ಆವಡ್ ಪಂದ್ ಕೇಂಡಿನಿ. ಪಾಪದಲೆಗ್ ಸಡ್ಡ್ ಆತ್ಂಡ್.
ಅಂಚೆನೆ ಬೊಕ್ಕೊರ್ತಿ ಮರ್ಮಲೆನ ಮೆಗ್ಯೆಲಾ ಆಲೆನ ಮಾಮಿಲ್ಲಗ್ ಬಿನ್ನೆ ಬತ್ತೆಗೆ. ಮಾಮಿ ಆಯಗ್ ಬಟ್ಟಲ್ಡ್ ಗಂಜಿ, ಗಿನ್ನಲ್ಡ್ ನುಂಗೆಲ್ (ಮೀನ್)ದ ಬಜ್ಜಿ ಬಲಸಿಯೊಲು. ಅಪೂರ್ಪೊಡು ಕಂಡ್ಯಾನ ಇಲ್ಲಗ್ ಬತ್ತಿನ ಮೆಗ್ಯಗ್ ತಮ್ಮನ ಮಲ್ಪೊಡು ಪಂದ್ ಆಸೆ ಆಂಡ್ ಪಲ್ದಿಗ್. ಬಲಟ್ ಅಲೆ, ಪೇರ್, ಬೆಂಜನ, ಅರಿಯೊಡು ನೆಯಿ ಉಂಡು. ಉಂದೆನ್ ಮಾತ ಮರ್ಮಲ್ ಮುಟ್ಟುಲೆಕ್ಕ ಇಜ್ಜಿ. ‘ಅಡ್ಪಿಲ್ಲಡ್ ಎಂಕ್ ಬೇತೆದಾಲ ಮುಟ್ಟರೆ ಬಿನ್ನಯ (ಅನುಮತಿ) ಇಜ್ಜಿ ಮಗ, ಉಪ್ಪುದ ಕರಕ್ ಮಾತ್ರ ಕಯಿ ಪಾಡೊಲಿ’ ಪಂದ್, ಉಪ್ಪುದ ಕರಡ್ದ್ ಒಂಜಿ ಪುಂಡಿ ಉಪ್ಪು ಕನತ್, ಉನೊಂದು ಇತಿನ ಗಂಜಿಗ್ ಪಾಡಿಯೊಲುಗೆ. ಉನ್ಪಿ ಗಂಜಿನ್ಲಾ ಉನಂದಿಲೆಕ್ಕ ಮಲ್ತೊಲು. ಅಂಚ ಒರ್ತಿ ಮಾಮಿ ಬೊಲ್ಲೊಡು ಪೋನಗ ‘ಕಾಲ್ತೆಗೇತರಿ ಮಾಲ್ತೆಗೇತರಿ?’ ಪಂದ್ ಕೇಂಡೊಲುಗೆ ಮರ್ಮಲ್. ಪಂಡ ಬೊಲ್ಲೊಡು ಪೋಪಿನ ಮಾಮಿನ ಮಿತ್ತ್ ಒಯಿತ್ ಪಾಡರೆ ಪೋಯಿಜೊಲು, ಕಾಂಡೆದ ಉನಸ್ಗ್ ಏತ್ ಸೇರ್ ಅರಿ ಪಾಡೊಡು, ರಾತ್ರೆದ ಉನಸ್ಗ್ ಏತ್ ಸೇರ್ ಪಾಡೊಡು ಪಂದ್ ಕೇಂಡೊಲು. ಮಾಮಿ ಪೋಯಿ ಬೊಕ್ಕ ಅಟ್ಟಿಲ್ದ ಗುರ್ಕಾರ್ಮೆ ಮರ್ಮಲ್ನದೇ?
ಬರವು : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ
