ಮೆಯಿಕ್ ಪಾಡಿ ಕುಂಟುಲಾ, ಬೇಲಿಗ್ ಪಾಡಿ ಮುಲ್ಲುಲಾ ಒಂಜೇ ಪಂದ್ ಒಂಜಿ ಗಾದೆ ಉಂಡು. ಮುಲ್ಪ ಕುಂಟು ಪಂಡ ತುತ್ತೈತ, ಕನ್ನಡದ ಉಡುಪು (Dress). ಅವು ಸೀರೆ, ಮುಂಡು, ಅಂಗಿ, ಚಲ್ಲನ ಒವುಲಾ ಆದಿಪ್ಪು. ಈ ಕುಂಟುಗುಲಾ, ಬೇಲಿಗ್ ಪಾಡುನ ಮುಲ್ಲುಗುಲಾ ದಾದೆ ಸಾಜ (ಸಾಮ್ಯ) ಉಂಡು? ನಮ ಮೆಯಿಕ್ ಪಾಡರೆ ಸುರು ಮಲ್ತಿನ ಕುಂಟು, ದರಿದರಿ (gradually) ತರೆವುಂಡು, ಬೊಕ್ಕ ಪರಿವುಂಡು. ಅಂಚಾದ್ ಪರತ್ ಕುಂಟುನು ಬದಲ್ ಮಲ್ಪೊಡು. ನಮ ಬೆನ್ತಿನ ಕಂಡೊಲೆಗ್ ಕಯಿಕಂಜಿ, ಪಂಜಿ ಬರಂದಿಲೆಕ್ಕ ಸುತ್ತ ಬೇಲಿ ಪಾಡುವ. ಬೇಲಿಡ್ ಎಲ್ಯ ಮಲ್ಲ ಇಡೆ ತೂದು ಕಯಿಕಂಜಿ ಬೇಲಿ ನುರ್ತುದು ಕಡಿ ಮಲ್ಪುವ. ಆ ಕಡಿನ್ ಮುಚ್ಚರೆ ಕರ್ಂಡೆದ, ಚೂರಿ ಮುಲ್ಲುದ ಅತ್ತ್ಡ ಸೀಗೆದ ಮುಲ್ಲು ಕಡ್ತ್ದ್, ಕಬೆಕೋಲುಡು ಕಂತ್ ಪಾಡುವ. ಎಚ್ಚಾದ್ ಕಾರ್ತೆಲ್ (ಏನೆಲ್)ದ ಬೆನ್ನಿ ಮುಗ್ಗಿದಾಕಿನ, ಬೊಟ್ಟು ಕಂಡೊಲೆನ ಬೇಲಿಲೆನ ಪೂರ ಒರ ಕಡಿಕ್ಲೆನ್ ನಾಡ್ ತೂದು, ಐಕ್ ಪೊಸತಾದ್ ಮುಲ್ಲು ಪತ್ತಾವೆರ್. ಅಂಚ ಬೇಲಿಗ್ ಇಯೊಡು ಪತ್ತಾಯಿನ ಪಜ್ಜಿ ಮುಲ್ಲು, ದುಂಬಗಾನಗ ನುಂಗುದು, ಕುಂಬಾದ್ ಪೊಡಿ ಆಪುಂಡು. ಮಗ್ರ್ನೆ ವರ್ಸ (ಮರು ವರ್ಷ) ಪೊಸತಾದ್ ಬೇತೆನೇ ಪಜ್ಜಿ ಮುಲ್ಲು ಪತ್ತಾವೊಡು. ಮೆಯಿಕ್ ಪಾಡಿನ ಕುಂಟು ಆವಡ್, ಬೇಲಿಗ್ ಪಾಡಿನ ಮುಲ್ಲು ಆವಡ್, ಎಚ್ಚ ಬಾಲ್ತರ ಬರ್ಪುಜ. ಅಪಗಪಗ (periodically) ಬದಲ್ ಮಲ್ತೊಂದು ಇಪ್ಪೊಡು. ಕುಂಟು ನಮ್ಮ ಅಂಙ್ಙ (ಅಂಗ)ನ್ ಪೊದ್ಯುಂಡು (covers), ಬೇಲಿ ನಮ್ಮ ಬುಲೆನ್.
ಅಂಚ ಇ ಕುಂಟು ಬೊಕ್ಕ ಮುಲ್ಲುತ ಬಗೆಟ್ ಕುಡೊಂಜಿ ಗಾದೆ ಉಂಡು. ಕುಂಟುಗು ಮುಲ್ಲು ಬರಿಯಡ್ (ಗೀರು), ಮುಲ್ಲುಗು ಕುಂಟು ಬರಿಯಡ್, ಪರಿಯುನು ಕುಂಟುವೆ. ಮನ್ನ ಕರಕ್ ಕಲ್ಲ್ ಬೂರಡ್, ಕಲ್ಲ್ಗ್ ಕರ ಬೂರಡ್ ದರಿಯುನು ಕರನೇ.
ಬರವು : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ
