ದೈವ ಪಂಜುರ್ಲಿ ನಮ್ಮ ತುಳುನಾಡ್ ನ್ ಮಿತ್ತ ಲೋಕಡ್ ಸೂರ್ಯ ದೇವೆರ್ ಉಂಡಾನಗ ತಿರ್ತ್ ಭೂಮಿ ಉಂಡಾದ್ ಏಳ್ ಕಡಲ್ದ ನಡುಟು ಉಂಡಾಯಿನ ಬೆರ್ಮೆರ್ ಸೃಷ್ಟಿ ಮಲ್ತೆರ್ ಪಂದ್ ಕೆಲವು ಪರ ಸಂಧಿ ಪಾರ್ದನೊಲು ಪನ್ಪುಂಡು. ಈ ಸಂಧಿ ಪಾರ್ದನೊಲೆ ತುಳುನಾಡ್ಡ್ ನಡತಿನ ಸತ್ಯ ಚರಿತ್ರೆಲೆಗ್ ಪತ್ತಿನ ಕೈ ಕನ್ನಡಿ. ಇಂಚ ಭೂಮಿ ಉಂಡಾನಗ ಉಂಡಾಯಿನ ಬೆರ್ಮೆರ್ ತಾನ್ ಉಂಡಾನಗ ತನ್ನ ಒಟ್ಟಿಗೆ ನಾಗನಕ್ಲೆನ್, ಸರ್ಪನಕ್ಲೆನ್, ಎಳ್ವೆರ್ ಸಿರಿಕುಲು ಒರಿ ಕುಮಾರೆರೆನ್, ನಾಲ್ ಕಾರ ನಂದಿ ಗೋಣನ್, ಭೂಮಿ ಬಾರಗೆ ಬಾಲೆ ಕನ್ಯಾವು ಲೆಕ್ಕಿಸಿರಿನ್, ಅಂಚನೆ ಕದಿಕೆ ಉಂಡಾನಗ ಪಂಜುರ್ಲಿ, ಪಿಲಿ ಚಂಡಿ, ಜುಮಾದಿ, ಉಲ್ಲಾಯ ಉಳ್ಳಾಲ್ದಿನ್ ಉಂಡು ಮಲ್ತೆರ್ ಪಂದ್ ಪಾರ್ದನ ಪನ್ಪುಂಡು. ಆ ಪ್ರಕಾರ ಬೆರ್ಮೆರೆ ನಿರ್ಧಾರಡ್ ಪಂಜುರ್ಲಿ ಕದಿಕೆ ಉಂಡಾನಗ ಉಂಡಾದ್ ಕಾಡ್ ಪೊಗ್ಗುದು ಮುರ್ಗಂದ್ ಪನ್ಪಾವುಂಡು ಊರುಗು ಜತ್ತುದ್ ದೈವಂದ್ ಪನ್ಪಾವುಂಡು.
ಇಂಚೆನೆ ದೈವ ಪಂಜುರ್ಲಿ ತುಳುನಾಡ್ ಒರ್ಮೆಲಾ ಅವೆತೋ ಬೇತೆ ಬೇತೆ ಚರಿತ್ರೆಲೆನ್ ಉಂಡು ಮಲ್ತೊಂದು ಬೇತೆ ಬೇತೆ ಪುದರ್ ಪುರಾಪುಲೆನ್ ಪಡೆಯೊಂದು ಅವೆತೋ ಕೂಡು ಕುಟುಮ, ಚಾವಡಿ, ಗುತ್ತು, ಬೂಡು, ಪರಾಡಿ, ಬರ್ಕೆ ಇಂಚೆನೆ ಸುಮಾರ್ ಜಾಗೆಲೆಗ್ ಪೊಗ್ಗುದು ಆರಾಧನೆ ದೆತೊನುವೆ. ಉಂದೆಕ್ಕ್ ಸರಿಯಾದ್ ತುಳುವೆರೆ ಪೆರಿಯಾಕ್ಲು ಪಂತಿನ ಪಾತೆರ “ಪಕ್ಕಿ ಕುಲ್ಲಂದಿ ಮರ ಇಜ್ಜಿ ತುಳುನಾಡ್ಡ್ ಪಂಜುರ್ಲಿ ಇಜ್ಜಂದಿ ಕುಟುಮೊ ಇಜ್ಜಿ” ಉಂದು ಪಂಜುರ್ಲಿಗ್ಲ ತುಳುವೆರೆ ಕುಟುಮೊಗ್ಲ ಇಪ್ಪುನ ಶ್ರೇಷ್ಟ ಸಂಬಂಧೊನ್ ತೋಜಾವುಂಡು. ಆ ಪ್ರಕಾರ ಸತ್ಯ ಪಂಜುರ್ಲಿ ಘಟ್ಟದ ಪುಡೆರ್ದ್ ಕಡಲ ಬರಿ ಮುಟ್ಟ ತುಳುನಾಡೊರ್ಮೆಲ ಪಟ್ಟ ಆಳುನ ಮಲ್ಲಾಯರ್ದ್ ಪತ್ತುದ್ ಮುಟ್ಟಾಳೆ ದೀದ್ ಬೆನ್ಪುನ ಬಲ್ಲಿ ಬಡವೆರೆ ಮುಟ್ಟ “ಕುಟುಮೊಗು ಗೂಂಟ, ಪೊಣ್ಣಗ್ ತಮೆರಿ, ಆನಗ್ ತಮ್ಮಲೆ” ಪಂದ್ ಪನ್ಪಾವೊಂದು ಮೆರೆಪುನ ಮಾಮಲ್ಲ ಕಾರನಿಕದ ಸತ್ಯ ಮಾಯಗಾರೆ ಪಂಜುರ್ಲಿ.
ಈ ವರಾಹ ಅವತಾರ ಪನ್ಪುನವು ಮಹಾವಿಷ್ಣುನ ದಶವತಾರೊಳೆಡ್ ಒಂಜಿ. ವಿಷ್ಣು ಪುರಾಣದ ಪ್ರಕಾರ ವೈಕುಂಠಾಧಿಪತಿ ಆಯಿನ ಶ್ರೀ ಮನ್ನಾರಾಯನ ದೇವೆರ್ ಹಿರಣ್ಯಾಕ್ಷ ಪನ್ಪುನ ಅಸುರನ್ ಕೆರಿಯರೆ ಬೋಡಾದ್ ದೆತ್ತಿನ ಅವತಾರಗೆ ಆ ಪ್ರಕಾರ ವಿಷ್ಣು ವರಾಹ ಅವತಾರೊಡು ಹಿರಣ್ಯಾಕ್ಷನ್ ವಧೆ ಮಲ್ಪುವೆರ್. ಈ ವರಾಹ ಅವತಾರೊಗು ಸಂಬಂಧ ಪಟುದು ನಮ್ಮ ವೈದಿಕ ಗ್ರಂಥೊಲೆಡು ಬೋಡಾಯಿನಾತ್ ಮಾಹಿತಿ ಬೊಕ್ಕ ಶ್ಲೋಕ ಮಂತ್ರೊಲು ಉಲ್ಲ.
ಆಂಡ ಇನಿ ತುಳುನಾಡ ಸತ್ಯ ಚರಿತ್ರೆಗ್ ಕೈ ಕನ್ನಡಿ ಆಯಿನ ಪಾರ್ದನರ್ದ್ ಪತ್ತುದು ಪಾರಿ ಮದಿಪುಲು ಪೂರ ವೈದಿಕ ಮಿಶ್ರಿತ ಆದ್ ಪಂಜುರ್ಲಿ ವಿಷ್ಣುನ ಅವತಾರನ ಅತ್ತ್ ನಮ್ಮ ಮೂಲ ತುಳುವೆರ್ನ ದೈವನ ಪಂದ್ ಗೊತ್ತಾಪುಜಿ. ಕೆಲವೆರ್ ಪಾರಿ ಮದಿಪುಡು ಪಂಜುರ್ಲಿ ಪಂದ್ ಪನ್ಪುನ ಬದಲ್ ವರಾಹ ಮೂರ್ತಿ ಪಂದ್ ಉಲ್ಲೇಖ ಮಲ್ಪುವೆರ್. ಉಂದೆತ ಅಗತ್ಯ ದಾದ ಉಂಡು? ವರಾಹ ಅವತಾರದ ಪುರಾಣಡ್ ಒಲ್ಪ ನಮ್ಮ ದೈವ ಪಂಜುರ್ಲಿ ತೋಜಿದ್ ಬೈದೆ ಮೊಕ್ಲೆಗ್ ತೋಜಾದ್ ಕೊರೊಲಿಯ? ಪಾರಿ ಮದಿಪುದ ಪೊರ್ಲು ಜಾಸ್ತಿ ಮಲ್ಪೆರೆ ಪೋದು ನಮ್ಮ ಪಂಜುರ್ಲಿನ ಮೂಲ ಚರಿತ್ರೆಗ್ ಕುಡರಿದ ಪೆಟ್ಟ್ ಪಾಡುನವು ಬಾರಿ ಬೇಜಾರ್ದ ಸಂಗತಿ. “ಪರತೆನ್ ನಿಗುಪುಜ ಪೊಸತೆನ್ ತೋಡುಜ” ಉಂದು ನಮ್ಮ ದೈವೊಲೆನ ಪಾತೆರ ಆಂಡ ನಮ ಕೆಲವೆರ್ ಉಂದೆಕ್ಕ್ ವಿರುದ್ಧವಾದ್ ಪೋವೊಂದುಲ್ಲ ಉಂದು ಒಂಜತ್ತ್ ಒಂಜಿ ದಿನ ತುಳುನಾಡ ಸತ್ಯೊಲೆನ ಉರಿ ದಿಟ್ಟಿಗ್ ಕಾರಣ ಆವು. ಕಡೆಕ್ ಒಂಜಿ ದಿನ ತುಳುನಾಡುಗ್ಲ ಘಟ್ಟರ್ದ್ ಅಂಚಿದ ಊರುಗ್ಲ ದಾಲ ವ್ಯತ್ಯಾಸ ದಾಂತಿಲೆಕ ಆದ್ ಪೋವು.
