ಫೆಬ್ರವರಿ 21 ನ್ “ವಿಶ್ವ ಮಾತೃ ಭಾಷೆ”ದ ದಿನ ಆದ್ ಜಗತ್ತೊರ್ಮೆ ಆಚರಿತೊಂದುಲ್ಲೆರ್. ನಮ್ಮ ದೇಶದ ಸುಮಾರ್ ಭಾಷೆ ಬೊಕ್ಕ ಆ ಭಾಷೆಲೆ ಒಟ್ಟಿಗೆ ಉಪ್ಪುನ ಬೇತೆ ಬೇತೆ ಸಂಸ್ಕೃತಿನ್ ಒರಿಪೊಡ್ ಬೊಕ್ಕ ಐಕ್ ಉಮೇದ್ ತಿಕ್ಕೊಡು ಪನ್ಪಿ ದೃಷ್ಠಿಡ್ 1999 ಡು ಸುರುಕಾದ್ ‘ಯುನೆಸ್ಕೊ ಸಂಸ್ಥೆ’ ಈ ದಿನೊನು ಘೋಷಣೆ ಮಲ್ತ್ ನ್ಡ್. ಇಂದೆತ ಮುಂದುವರಿನ ಭಾಗವಾದ್ ವಿಶ್ವಸಂಸ್ಥೆ 2008 ನು ವಿಶ್ವ ಭಾಷೆಲೆನ ವರ್ಷ ಪಂದ್ ಲಾ ಆಚರಿಪೆರೆ ಸುರು ಮಲ್ತ್ ನ್ಡ್. ಅಂಚ 2000 ಇಸವಿರ್ದ್ ಇನಿವರೆಗ್ಲಾ ಪ್ರತೀ ವರ್ಷ ಈ ದಿನೊನು ಪಂಡ ಫೆಬ್ರವರಿ 21 ನ್ “ವಿಶ್ವ ಮಾತೃ ಭಾಷೆ”ದ ದಿನ ಆದ್ ಆಚರಿತೊಂದು ಉಲ್ಲೆರ್. ಇಂದೆತ್ತ ಪಿನ್ನೆಲೆ ತೆರಿವೊಂದು ಪೊಂಡ ಇಂದೆಟ್ಟ್ ಲಾ ಪಾಕಿಸ್ಥಾನದ ವಿಷಯೋಲು ಉಲ್ಲ!. 1952 ಟ್ಟ್ ಆನಿದ ಪಾಕಿಸ್ತಾನದ ಭಾಗ ಆದಿತ್ತಿ ಬಾಂಗ್ಲಾ ದೇಶದ ಕಾಲೇಜ್ ಕಲ್ಪು ಕಲ್ಪಾರ್ತಿಲು ಬಾಂಗ್ಲಾ ಭಾಷೆನ್ ಅಧಿಕೃತ ಭಾಷೆ ಮಲ್ಪೊಡು ಪಂದ್ ಪಾಕಿಸ್ತಾನ ಸರಕಾರೊನು ಒತ್ತಾಯ ಮಲ್ಪುವೆರ್ ಆಂಡ ಸರಕಾರ ಅಕ್ಲೆನ ಪಾತೆರೆಗೂ ಪನೀತ್ ಲಾ ಬಿಲೆ ಕೊರಾಂದೆ ಅಕ್ಲೆ ಮಿತ್ತ್ ಲಾಠಿ ಚಾರ್ಜ್ ಮಲ್ಪುಂಡು. ಮಾತ್ರ ಅತ್ತ್ ಗೋಲಿಬಾರ್ ಲಾ ಮಲ್ಪುನ್ಡು. ಆ ಪೊರ್ತುಡು ಸುಮಾರ್ ಶಾಲೆ ಜೋಕುಲು ಗುಂಡುಗು ತಿಗಲೆ ಕೊರ್ಪೆರ್. ಇಂಚ ಪ್ರಾಣ ಕೊರಿನ ಜೋಕುಲೆನ ನೆಂಪುಗಾದ್ ವಿಶ್ವ ಸಂಸ್ಥೆದ ಭಾಗವಾಯಿನ ಯುನೇಸ್ಕೊ ಆ ದಿನೊನು ‘ವಿಶ್ವ ಮಾತೃ ಭಾಷೆದ ದಿನ’ ಆದ್ ಆಚರಿಪೆರೆ ನಿಘಂಟ್ ಮಲ್ಪುನ್ಡು. ಡಾಕಾ ವಿಶ್ವವಿದ್ಯಾನಿಲಯೊಡು ಕಲ್ಪುನ ಜೋಕುಲು ಬೊಕ್ಕಲಾ ಬೆರಿಬುಡಂದೆ ಜೋರು ಪೊನೆಚಾಟ ಮಲ್ತಿನ ಫಲವಾದ್ 29- 02- 1956 ಟ್ಟ್ ಪಾಕಿಸ್ತಾನ ಬಂಗಾಳಿ ಭಾಷೆನ್ ಅಧಿಕೃತ ಭಾಷೆ ಆದ್ ಘೋಷಣೆ ಮಲ್ತ್ ನ್ಡ್.
ಉಂದು ಬಂಗಾಳಿ ಭಾಸೆದ ಒಂಜಿ ಕತೆ ಆಂಡ ನಮ ಆಲೋಚನೆ ಮಳ್ಪೋಡಾಯಿನಿ ನಮ್ಮ ಸಾರ ಎಸಲ್ದ ತಾಮರೆದ ಪೊರ್ಲು ಜಿಂಜಿನ ತುಳು ಭಾಷೆದ ಬಗೆಟ್. ನಮ್ಮ ಪೊರ್ಲ ಭಾಷೆ ತುಳುಕು ರಾಜ್ಯೋಡು ಅಧಿಕೃತ ತಾನಮಾನ ತಿಕ್ಕೊಡು ಬೊಕ್ಕ ನಮ್ಮ ಸಂವಿಧಾನದ ಎನ್ಮನೇ ಪರಿಚ್ಛೇದೊಡು ಅವೆನ್ ಸೇರ್ಸವೊಡು ಪನ್ಪಿ ಅಂಗ್ ಡ್ ಏತೋ ಸಮಯೋರ್ದಿಂಚ ಏತೇತೋ ಸಂಘ ಸಂಸ್ಥೆಲು, ಬೇತೆ ಬೇತೆ ದೇಶೊಡು ಇತ್ತಿ ತುಳುವೆರ್ ನಾನಾ ನಮೂನೆದ ಬಿನ್ನಯ, ಒತ್ತಾಯ, ಓಲೆ ಮಾತಲಾ ನಮ್ಮ ರಾಜ್ಯ ಸರಕಾರೊಗು ಕೊರ್ದು ಆಂಡ್. ಕೆಲವಾತ್ ಅನುಭವಿನಕ್ಲೆಡ ಆ ಬಗೆಟ್ ಸರ್ವೇ ಮಲ್ತ್ ವರದಿ ದೆತೊಂದುಲಾ ಆಂಡ್. ಅಂಚೆನೇ ಸರಕಾರ ಅಡೆಗ್ ಇಡೆಗ್ ನೆತ್ತ ಬಗ್ಗೆ ಮಾಯಿತಿ ತೆರಿಯೋನಿಯೆರೆ ಪಂದ್ ಲಾ ಸಮಿತಿ ಮಲ್ತ್ ಜನೋಕ್ಲೆನ್ ಕಡಪುರ್ದು ಲಾ ಆಂಡ್. ಇತ್ತೆ ನಮ್ಮ ಕುಡ್ಲದಾರೆ ಆಯಿ ಸಭಾಪತಿಕ್ಲು ಖಾದರ್ ಸಾಹೇಬ್ರ್ ಆತೇ ಅತ್ತನ್ದೆ ನಮ್ಮ ಕುಡ್ಲದ, ಒಡಿಪುದ, ಪುತ್ತೂರುದ ಮಾತ ತುಳುತ ಶಾಸಕೆರ್ ನಕುಲು ವಿಧಾನ ಸಭೆಟ್ ಆ ಬಗೆಟ್ ತುಳುಟೇ ಪಾತೆರ್ದ್ಲಾ ಆಂಡ್. ಆಂಡ ಪರಿಣಾಮ ಸೊನ್ನೆ!. ಪೊಕ್ಕಡೆ ಇನಿ ಎಲ್ಲೆ ಪಂದ್ ದಿನ ದುಂಬು ನೂಕೊಂದು ಉಲ್ಲೆರ್. ನಿಜವಾದ್ ಉಂದು ಒಂಜಿ ಮಲ್ಲ ಸಂಗತಿದ ನಿರ್ಧಾರ ಅತ್ತೇ ಅತ್ತ್. ಆಂಡ ಕನ್ನಡ ಪಾತೆರುನ ಶಾಸಕೆರ್ ಎಚ್ಚ ಉಪ್ಪುನ ನಮ್ಮ ಸರಕಾರೊಡು ಈ ಬಗೆಟ್ ಗಟ್ಟಿಡ್ ಪಾತೆರುನ ಮಲ್ಲ ಇಚ್ಚಾಶಕ್ತಿದ ನಮ್ಮ ತುಳುವನ ಕೊರತೆ ಉಂಡು ಪಂದ್ ಪನೊಲಿ ಅತ್ತನ್ದೆ ಬೇತೆ ಕಾರಣನೇ ಇಜ್ಜಿ. ಉಂದೆನ್ ಅಕುಲು ಒಂಜಿ ಕುಸಾಲ್ದ ಗೊಬ್ಬುದ ಲೆಕ್ಕ ತೂಪೆರ್ ಪಂದ್ ಆಪುಂಡು!. ಬೆಂಗಳೂರುರ್ದು ಬೊಕ್ಕ ನಮ ಕುಡ್ಲ, ಉಡುಪಿ, ಪುತ್ತೂರು ಸೇರ್ದ್ ನಮ್ಮ ಸರಕಾರೊಗು ನಮ ತುಳುವೆರ್ ಕಟ್ಟುನ ತೆರಿಗೆ ಮಾಮಲ್ಲವು. ಅವು ಇಡೀ ಕರ್ನಾಟಕ ರಾಜ್ಯೋಡೇ ರಡ್ಡನೇ ತಾನೊಡು ಉಂಡು. ಆಂಡಲಾ ನಮ್ಮ ತುಳುವೆರೆ ಭಾಸೆಗೊಂಜಿ ಮಲ್ಲಾದಿಗೆದ ತಾನ ಕೊರಿಯೆರೆ ದುಂಬುಪಿರ ದಾಯೆ ತೂಪೆರ್ ಪಂಡ್ದೇ ಅರ್ಥ ಆಪುಜಿ. ಅಕ್ಲೆಗ್ ನಾಮೂಸ್ ಲಾ ಉಂಡು ಬೊಕ್ಕ ಒಂಜಿ ನಮುನೆದ ಪೋಡಿಗೆಲಾ ಉಂಡು.
ನನೊಂಜಿ ಕಾರಣ ದಾದ ಪಂಡ, ನಂಕ್ ತುಳುವೆರೆಗ್ ನಮ್ಮ ಮಾತೃ ಭಾಷೆ ತುಳುತ ಮಿತ್ತ್ ಪ್ರೀತಿ ಅಭಿಮಾನ ಕಮ್ಮಿ ಆತ್ ನ್ಡ್. ಇಲ್ಲಡ್ ತುಳು ಪಾತೆರುನ ನಮ್ಮನೇ ಜೋಕುಲು ಅಂಗಡಿದ ಉಲಯಿ ಪೊಗ್ಗಿನೇ, ದೋಸ್ತಿಯಲ್ಲು ತಿಕ್ಕಿನೇ ಇಂಗ್ಲಿಷ್ ಡ್ ಟಸ್ಕ್ ಪುಸ್ಕ್ ಪಾತೆರ್ದ್ ಮಲ್ಲ ಸಂಗತಿ ಪಂಡ್ದ್ ಎನ್ಯುವೆರ್. ಇಂಗ್ಲಿಷ್, ಹಿಂದಿ ಅತ್ಡ ಬಾಕಿ ಬಾಸೆ ಏಪಲಾ ಕಲ್ಪೊಲಿ ಅವು ಮಲ್ಲ ಸಂಗತಿ ಅತ್ತ್ ಪನ್ಪಿ ಇಚಾರ ಅಕ್ಲೆಗ್ ತೆರಿದೇ ಇಜ್ಜಿ. ಬೊಕ್ಕ ನಮಲಾ ನಮ್ಮ ಜೋಕ್ಲೆಗ್ ನಮ ಕಾಲಿ ಇಂಗ್ಲೀಷ್ ಕಲ್ಪವುನ ಆಸೆಡೇ ಉಲ್ಲ ಅತ್ತಾಂದೆ ನಮ್ಮ ಅಪ್ಪೆ ಭಾಸೆ ತುಳುತ ಬಗೆಟ್ ನಂಕೇ ಸಸಾರ ಭಾವನೆ ಉಂಡು. ಅವು ಕಲ್ಪೊಡೇ ಪನ್ಪಿ ಗೇಣನೇ ನಂಕ್ ಬೈಜ್ಜಿ. ಉಂದು ಬೇಜರ್ದ ಸಂಗತಿ. ಒಂಜಿ ಭಾಸೆ ಪಂಡ ಅವು ಕಾಲಿ ಬಾಯಿಡ್ ಪಾತೆರುನ ಭಾಸೆ ಮಾತ್ರ ಅತ್ತಂದೆ ಐತ ಒಟ್ಟಿಗೆನೇ ನಮ್ಮ ಸಂಸ್ಕೃತಿ, ಆಚಾರ ವಿಚಾರ, ಕೂಡುಕಟ್ಟ್, ನಂಬಿಕೆ ನಡಾವಳಿ ಪ್ರತಿ ಒಂಜಿಲಾ ದೆಂಗ್ ದ. ಅವೆತ ಪ್ರತೀ ಶಬ್ದಲಾ ಅವು ತುಳುತ ಒಟ್ಟಿಗೆ ಅವಿನಾಭಾವ ಸಂಬಂಧ ಹೊಂದುದುಲ್ಲ. ನಮ್ಮ ಭಾಸೆ ಅಲಿಂಡ ಅವೆತ್ತ ಒಟ್ಟಿಗೆ ಉಂದು ಪೂರಲಾ ಅಲಿಯಾಂತರ ಆವು ಪನ್ಪಿ ಗೇನ ನಂಕ್ ಇಜ್ಜಂದೆ ಪೋಂಡು. ಅಂಚಾದ್ ನಮ ಮಾತಾ ಈ ಬಗೆಟ್ ಮನಿಪ್ಪಂದೆ ಕುಲ್ದ. ಬಾಂಗ್ಲಾದ ಜೋಕುಲು ಜೀವದ ಹಂಗ್ ಇಜ್ಜಂದೆ ಪೊನೆಯಿನ ಫಲವಾದ್ ಅಕ್ಲೆಗ್ ಅಕ್ಲೆ ಅಪ್ಪೆ ಭಾಸೆ ‘ಬಂಗಾಳಿ’ಗ್ ಅಧಿಕೃತ ತಾನಮಾನ ಕೊರ್ಪಯೆರೆ ಸಾಧ್ಯ ಆಂಡ್. ನಮ ತುಳುತಕುಲು ಸಾಧನೆ ಮಲ್ಪಂದಿ ಕ್ಷೇತ್ರನೇ ಇಜ್ಜಿ. ನಮ್ಮ ಬಿರ್ಸಾದಿಗೆಗ್ ಸರಿಸಾಟಿಯೇ ಇಜ್ಜಿ ಪಂದೇ ಪನೊಲಿ. ಆ ಬಗೆಟ್ ನಮ ನಿಜವಾದ್ಲ ನಾಗನ ಊರುದ ಸರ್ಪನಕುಲೇ!. ಆಂಡ ನಮ ನನಲಾ ಕಾಲಿ ಸೊಯಿಂತೊಂದೇ ಇತ್ತಡ ನಮನ್ ಈ ಕನ್ನಡದ ಜನೊಕುಲು ಲೆಕ್ಕೊಗು ದೆಪ್ಪುಲೆಕ್ಕ ತೋಜ್ಜಿ. ನಮ ಜಿಡೆ ದೆರ್ತ್ ಕೊಡಪ್ಪು ಕಾಲ ಮುಟ್ಟ ಬರಡಾತ್ತ್ಂಡ್. ನನ ನಮ್ಮ ದುಂಬುದ ಹೋರಾಟದ ತಾದಿ ಅವ್ವೆ ಆಂಡ ಮಾತ್ರ ನಮ್ಮ ಭಾಸೆಗ್ಲ ಒಂಜಿ ತಾನಮಾನ ತಿಕ್ಕೆರೆ ಸಾಧ್ಯ.
ಬರವು : ಶರತ್ ಶೆಟ್ಟಿ ಪಡುಪಳ್ಳಿ
