ದೊಡ್ಡಣ್ಣ ಶೆಟ್ರೆನ “ಮೊಡಂಗ್ ಮದ್ಮಲ್ ಅಬ್ರೊಣಿ ಮದ್ಮಯೆ ದಿಬ್ಬಣ ಪೋವ್ನಗ” ಪದೊಟು “ಇಜಾರ್ ಪೋಲಿಸ್” ಪಂದ್ ಉಂಡು. ಇಜಾರ್ ಪಂಡ ಕನ್ನಡದ ಇಜಾರು, ಪಂಡ ಚಡ್ಡಿ (Trousers). ತೆಂಕು ತಿಟ್ಟು ಯಕ್ಷಗಾನೊಡು ಮೊರಂಪುದ ಗಂಟ್ ಗ್ ಬರ್ಪಿನ ಇಜಾರ್ ಪಾಡುವ. ಅಂಚೆನೆ ಪತ್ತೈವ ವರ್ಸ ದುಂಬು ನಮ್ಮ ಮೈಸೂರು (1971 ಡ್ ಕರ್ನಾಟಕ ಆಂಡ್)ದ ಪೋಲಿಸ್ ಮಲ್ಲ ಕಾಕಿ ಚಡ್ಡಿ ಪಾಡೊಂದು ಇತಿನಿ. ಅಂಚ ಮುಲ್ಪ ದೊಡ್ಡಣ್ಣ ಶೆಟ್ರು ಇಜಾರ್ ಪೋಲಿಸ್ ಪಂಡಿನೇ? ಅತ್ತ್, ಇಜಾರ್ ಪೋಲಿಸ್ ಪಂಡ ರಿಜರ್ವ್ ಪೋಲಿಸ್. ಇಂಗ್ಲೀಷ್ ದ reserve ತುಲುಟು ಇಜಾರ್ ಆತಿನಿ. ಅಂಚ ಇಂಗ್ಲೀಸ್ ಪಾತೆರುನಗಲೆನ್ ಇಂಗ್ರೀಟ್ ಬಿಂಗ್ರೀಟ್ ಪಾತೆರುನು ಪನೊಂದು ಇತ್ತೆರ್. ಇಂಚಿನ ಕೆಲವು ಇಂಗ್ಲೀಷ್ ಪದೊಕುಲೆನ್ ತುಲುಟು ಎಂಚ ಪನೊಂದು ಇತ್ತೆರ್ ಪಂದ್ ಕೇಂಡರ್ ಡ, ಇನಿ ಕೂಲಿ ಬುಡ್ದು ತೆಲಿಪರ್. ಆ ಕಾಲೊಡು, ಓದು ಬರವು ದಾಂತಿನಗಲೆಗ್ ಅವು ಕರ್ಬದ ಕಡ್ಲೆ.
ದಾಕ್ ದಾರ್ಲು ಪಂಡ ಡಾಕ್ಟರ್. ಇಂಚಪದ ಕೆಲವು ದಾಕ್ ದಾರ್ಲು ಪೀ ಪಟಿಕೆ ಟೇಸ್ಟ್ (taste?) ಮಲ್ತ್ ದ್ ತೀಪೆ ಪಟಿಕೆ ಉಂಡಾ ಇಜ್ಜಾ ಪನ್ಪೆರ್. ಕೆಲವೆರೆಗ್ ಟೆಸ್ಟ್ (test) ಬೊಕ್ಕ ಟೇಸ್ಟ್ (taste) ಎತುವಾಸಿ ತೋಜುಜಿ. ಕೆಲವೆರೆಗ್ ಬ್ರೆಡ್ ಪ್ಲೆಷರ್ (bread pleasure) ಇಪ್ಪುಂಡು. ನಮನೇ ಅರ್ತ ಮಲ್ತೊನೊಡು ಅವು ಬ್ಲಡ್ ಪ್ರೆಶರ್ (blood pressure) ಪಂದ್. ಆಯಗ್ ಹಾರ್ಟ್ (heart) ಉಂಡು ಪಂಡೆರ್ ಡ, ಉಡಲ್ ಗ್ ಸಂಬಂಧ ಪಟಿನ ತೊಂದರೆ ಉಂಡು ಪಂದ್ ಎನ್ನೊನ್ಲೆ. ಹಾರ್ಟ್ ನಂಕ್ ಮಾತೆರೆಗ್ಲಾ ಉಂಡು. ಇನಾಸ್ ಪಟ್ಲೇರ್ ಪಂಡ ಇನ್ಸ್ಪೆಕ್ಟರ್ (Inspector). ಇನಾಸ್ ಪಟ್ಲೇರ್ ಪಂಡ ಅವು ಪೋಲಿಸ್ ದನೇ ಪಂದ್ ತೆರಿಯೊನೊಡು. ಸಾಲೆಗ್ ಇನ್ಸ್ಪೆಕ್ಟರ್ ಬೈದೆರ್ ಪಂಡಿನೈಕ್ ಮುತ್ತಜ್ಜೆರ್ “ದಾಯೆಗ್ ಮಾಸ್ಟ್ರೆನ್ ಜೈಲ್ ಗ್ ಪಾಡರೆನಾ?” ಪಂದ್ ಕೇಂದೆರ್. Inspection (ಪರೀಕ್ಷಣೆ, ತನಿಖೆ, ಪರಿಶೀಲನೆ) ಮಲ್ಪುನಗುಲು ಮಾತೆರ್ಲಾ ಇನಾಸ್ ಪಟ್ಲೇರ್ ನಗುಲು ಪಂದ್ ದುಂಬುದ ತುಲುವೆರ್ ಪಿನಯೆರ್. ಒಂಜಿ ಡರ್ಜನ್ ಪರ್ಂದ್ ಕೊರ್ಲೆ ಪನ್ಪಿನ ಏತೋ ಸರ್ತಿ ಕೇಂಡ್ ದೆ. ಅವು ಡಜನ್ (dozen) ಅವೊಡು ಅತ್ತೇ?. “ಪೊನ್ನುಲು ಕಲ್ತ್ ದ್ ದಾನೆ ಕಲ್ಲೆಕಟ್ರು ಆವರೆ ಉಂಡಾ, ದಿಕ್ಕೆದ ಬೊಂಞ ಗೆಪ್ಪರೆ ಸಾಲೆಗ್ ಪೋದು ಕಲ್ಪೊಡಾ?” ಉಂದು ಒಂಜೈವ ವರ್ಸ ದುಂಬು, ಊರ್ಯ ಪೊನ್ನುಲೆಗ್ ಪನೊಂದು ಇತ್ತೆರ್ ಊರ್ದ ಪೊಂಜೋವು. ಅಗುಲು ಸಾಲೆದ ಮುಟ್ಟುಕಡಿ ತೂತುಜೆರ್, ಬಾಕಿದ ಪೊನ್ನುಲು ಸಾಲೆಗ್ ಪೋಪಿನ ತೂವರೆ ಆಪುಜಿ ಅಗಲೆಡ. ಅವು ಸೈಯ್ಯಡ್, ಕಲ್ಲೆಕಟ್ರು ಏರ್, ದಾದ ಪಂದ್ ತೆರಿಯೊನರೆ ಮಸ್ತ್ ವರ್ಸ ಬೋಡಾಂಡ್, ಅವು (District) ಕಲೆಕ್ಟರ್ (Collector) ಪಂದ್ ಅರ್ತ ಆನಗ ಪೊರ್ತು ಆಂಡ್.
ಆಯನ ಕುರೇಪು ದಾದ, ಪೇಸನ್ ದಾದ ಪನೊಂದು ಇತ್ತೆರ್. ಕುರೇಪು ಪಂಡ ಕ್ರಾಪ್ (crop) ಕತ್ತೆರುನು ಅತ್ತ್ ಡ ಕೆತ್ತುನು ಪಂದ್ ಅರ್ತ ಅತೇ? ದುಂಬು ಅಂಜೋವುಲಾ ಜೊಟ್ಟು ಬುಡೊಂದು ಇತ್ತೆರ್, ಎನ್ನ ಮಲ್ಲ ತಮ್ಮಲೆಗ್ ಎಲ್ಲಿ ಇಪ್ಪುನಗ ಜೊಟ್ಟು ಇತ್ಂಡ್ ಗೆ. ಬೊಕ್ಕ ಜೊಟ್ಟು ಕತ್ತೆರ್ಪದ್ ಫ್ರೆಂಚ್ ಕಟ್ ಮಲ್ತೆರ್. ಇತ್ತೆ ಪೇಸನ್ (fashion)ಗ್ ಜೊಟ್ಟು ಬುಡ್ಪೆರ್ ಅನ್ ಅಂಜೋವು. ಪೊವುಡರ್ ಪಂಡ ಪೌಡರ್ (powder) ಪಂಡ ಪೊಡಿ ಪಂದ್ ಸಾಮಾನ್ಯ ಅರ್ತ ಅತ್ತ್ ತುಲುಟು. ಫೇಸ್ ಪೌಡರ್ ಅತ್ತ್ ಡ ಟಾಲ್ಕಂ ಪೌಡರ್ ಪಂದ್ ಮಾತ್ರ ಅರ್ತ (ದುಂಬುಡು). ಬೊಕ್ಕ ಸುನೊವು (snow) ಪಂಡ ಮೋನೆಗ್ ಪಾಡುನ ಕ್ರೀಂ ಪಂದೇ ಅರ್ತ ಕಟೊಂದು ಇತ್ತೆರ್. ದುಂಬೊಂಜಿ ಸ್ನೋ (Snow) ಪುದರ್ ದ (brand name) ಕ್ರೀಂ ಇತ್ಂಡ್. ಅಂಚ ಮೋನೆಗ್ ಪಾಡುನ ಕ್ರೀಂಗ್ ಮಾತ್ರ ಸುನೊವು ಪಂದ್ ಲೆತ್ತೆರ್. ಕೂಲಿ ದೆಕ್ಕುನ ಒವ್ವೇ ಲೇಪ (paste)ದ ಪುದರ್ ಕೋಲ್ಗೇಟ್ (Colgate) ಪಂಡಿಲೆಕ್ಕ. ಟೀಚರ್ (teacher) ಪಂಡ ಅವು ಪೊಂಜೊವು ಶಿಕ್ಷಕಿ ಮಾತ್ರ. ಅಂಜೊವು teacher ನಗುಲು ಮಾಸ್ಟರ್ ನಗುಲು.
ಪೆಪ್ಪರ್ ಮಿಂಟ್ (Peppermint) ಬವುಸ ಕನ್ನಡೊಡು ಪೆಪ್ಪರ್ ಮಿಠಾಯಿ ಆಂಡ ದಾನ್ನಾ, ತುಲುಟು ಅವು ಪೆಪ್ಪರ್ ಮುಟಾಯಿ ಆದ್ ಇತ್ಂಡ್. ಐಟ್ pepper (ಎಡ್ಡೆಮುಂಚಿ) ಆವಡ್ mint (ಪುದಿನ) ಆವಡ್ ಇಪ್ಪರೆನೇ ಇಜ್ಜಿ, ಆ ಇಸಯ ಬೇತೆ. “ಇ ನ್ಯಾಲ ಕುಂಪಿನಿ ದೊರೆನಾ?” ಪಂದ್ ನೆರೊಂದು ಇತ್ತೆರ್ ಎನ್ನಜ್ಜಿ, (ಆರೆನ ಮಗಕ್, ಎಂಕತ್ತ್). ಏರಾ ಒರಿ ದುಂಬುದ ಕಾಲದ ಕುಂಪಿನಿ ಪನ್ಪಿ ರಾಜ್ಯದ ದೊರೆ (ಕನ್ನಡ) ಆದ್ ಇಪ್ಪೊಡು ಪಂದ್ ಗಿರೆತ್ ದ್ ಇತ್ತೆ. ಅರಸು ಸವುದದ ಬದಲ್ ಗ್ “ದೊರೆ” ಸವುದ ತುಲುಟು ಗಲಸುನು ಬಾರಿ ಕಮ್ಮಿ. ಅಪಗಂಡಾ ಇ “ಕುಂಪಿನಿ ದೊರೆ” ಏರ್? ಅವು ಕುಂಪಿನಿ ಪಂಡ ಕಂಪನಿ (Company), ಇಂಗ್ಲೀಷೆರೆನ್ ದೊರೆಕುಲು ಪನೊಂದು ಇತ್ತೆರ್. ಅಗುಲು (British) ಸುರುಟು East India Company ದ ದೊರೆಕುಲು ಅತೇ? ಬೊಕ್ಕ ಇಡೀ ದೇಸದ.
ಬರವು : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ.
