ನಮ ಮಾತೆರ್ಲ ಒಂಜಿ ನೆಂಪು ದೀವೊಡಾಯಿ ವಿಷಯ ಪಂಡ, ಈ ಭೂಮಿದ ಮಿತ್ತ್ ದ ದೇವೆರೆ ಸೃಷ್ಟಿದ 84 ಲಕ್ಷ ಜೀವರಾಶಿಲೆಡ್ ಶ್ರೇಷ್ಠವಾಯಿನ ಜಂತು ಪಂಡ ನಮ ನರಮಾನಿಲು. ನಮಲಾ ಜಂತುವಾದೇ ಪುಟ್ಟಿಯಡಲಾ, ನಂಕ್ ದೇವೆರ್ ಬಾರ್ಯಾತ್ ಮಂಡೆ ಖರ್ಚಿ ಮಲ್ಪು ಬೊಂಡು ಕೊರಿಯೆರ್. ನಮಲಾ ತೀರ್ನ್ಯಾತ್ ಮಟ್ಟ್ ಗ್ ಅವೆನ್ ಗಳಸೊಂದ್ ಉಲ್ಲಲಾ. ಆಂಡ ಇನಿಕೋಡೆಡ್ ನಮ್ಮ ಬುದ್ದಿವಂತಿಗೆ ಹೆಚ್ಚಾದ್ ಬದ್ಕ್ ಡ್ ಕುಸಿ ಕುಸೆಲ್ ಕಮ್ಮಿ ಆವೊಂದುಂಡು. ನಮ ತೆಲಿಪೆರೆಗಾದೇ ನಾಟಕ, ಪಿಚ್ಚರ್ ಗ್ ಪೋವೊಡಾತ್ತ್ಂಡ್. ದಾಯೆ ಪಂಡ ಒಂಜಿ ಇಲ್ಲಡ್ ನಮ ಅಪ್ಪೆ ಜೋಕುಲು, ಬಿನ್ನೆರ್ ಬಿಚ್ಚೆರ್ ಕುಲ್ದ್ ಕುಸಲರ್ತಿ ಪಾತೆರು ದಿನೊಕುಲು ಮದತೇ ಪೋತುಂಡು!. ಅವೆನ್ ನಮ್ಮ ಟಿವಿ, ಮೊಬೈಲ್ಲು ತಿಂದೇ ಬುಡ್ತ!. ಅಂಚ ಮನಸ್ಸ್ ಬುರ್ದು ಒರಿಯಕ್ಕೊರಿ ಪಾತೆರಂದೆ ವರ್ಸೊಲೇ ಕರಿದಿ ಅವ್ವೆತೋ ಇಲ್ಲುಲು ಉಲ್ಲ. ಇನಿಕಾನಗ ಅಪ್ಪೆ ಅಮ್ಮಗ್ ಕಾಲಿ ಜೋಕುಲೆನ್ ಮಲ ಮಲ್ಲ ಸಾಲೆಗ್ ಕಡಪುರ್ದು ಮಲ್ಲ ಜನ ಮಲ್ಪುನ ಮರ್ಲ್!. ಅವ್ವೇ ಜೋಕುಲೆಗ್ ಬೊಕ್ಕೊರಿಯನ್ ತೂದು ಯಾನ್ ದಾನೆ ಕಮ್ಮಿ ಪನ್ಪಿ ಮದ ಅಂಕಾರ ಬೈದ್ಂಡ್. ತನ್ನ ಅಪ್ಪೆ ಅಮ್ಮೆ ಎಂಕ್ಲೆಗ್ ಬೋಡಾದ್ ಬಂಗ ಬರ್ಪೆರ್ ಪನ್ಪಿ ಗೇಣನೇ ಇಜ್ಜಿ. ಈ ಜಂಜಾಟದ ಬದ್ಕ್ ಡ್ ಎಲ್ಯ ಒಪ್ಪುನಗ ಎಂಚಲಾ ಗೊಬ್ಬುನೆಕ್ಕ್, ತಿನಿಯೆರೆಗ್, ಸೈಕಲ್ ಗ್ ಇಂಚ ಅಪ್ಪೆ ಅಮ್ಮನ್ ಬೊಡಿದೆತ್ತ್ ಆಂಡ್. ಅಪ್ಪೆ ಅಮ್ಮೆಲಾ ಇತ್ತಿನ ಒಂಜಿ ರಡ್ಡ್ ಜೋಕುಲೆನ್ ತಿರ್ತ್ ದೀಂಡ ಪಿಜಿನ್ ಕೊನೊವಾ, ಮಿತ್ತ್ ದೀಂಡ ಕಕ್ಕೆ ಕೊನೊವಾ ಪಂದ್ ಲೆಕ್ಕೊರ್ದೆಚ್ಚ ಒಮ್ಮ ಒಮ್ಮ ಒಪ್ಪ ಒಪ್ಪ ಮಲ್ತ್ ಕೊಂಡಾಟೊಡೇ ಸಾಂಕುವೆರ್. ಯಾನ್ ಸೊರ್ಗದ ದೇವೆಂದ್ರನ ಮಗೆನೇ ಪಂಡ್ದ್ ಎನ್ನಿದ್ ಇನಿತ ಜೋಕುಲ್ಲಾ ಜರ್ಬಿಡೇ ಬುಲೆವ. ಬೊಕ್ಕ ಶಾಲೆಲೆಡ್ ಲಾ ವಾ ಟೀಚರ್ ಮಾಸ್ಟ್ರ್ ಲಾ ಪೆಟ್ಟ್ ಪಾಡುನ ಬುಡಿ, ಗಟ್ಟಿ ನೆರ್ಂಡ… ಎಚ್ಚ ಬೊರ್ಚಿ ಕಣ್ಣ್ ಮರಪ್ಪೆರೆಲಾ ಪೋಡ್ಯುನ ಕಾನೂನುದ ಅಡಿಟ್ ನಮ ಉಲ್ಲ!. ಅಂಚಾದ್ ಇತ್ತೆದ ಜೋಕುಲೆನ್ ಎಲ್ಲಿದ ಬದ್ಕ್ ಸೊರ್ಕುದು ಪೋಯಿ ಕೈಯಿತ ಲೆಕ್ಕ ಆದ್ ಪೋತುಂಡು. ಅವು ಜೋರು ಸೊರ್ಕುನೇ ತತ್ತ್ ದ್ ಅವು ಪಾಯಾಂಡ್ ತಿಕ್ಕುನು ಬಜೀ ದಡ್ಡ್ !. ಇನಿತ ಜೋಕುಲು ಏತ್ ಮಲ ಮಲ್ಲ ಸಂಗತಿನ್ ಶಾಲೆ ಕಾಲೇಜ್ ಡ್ ಕಲ್ತೆರ್ಡಲಾ ಜೀವನದ ಇಂಚಿ ಸೂಕ್ಷ್ಮ ವಿಚಾರೊಲೆಡ್ ಒಯಿಕ್ಲಾ ಪೆರಜನ ಇಜ್ಜಿ. ಶರ್ರ ಮಲ್ಲವೇ ತತ್ತ್ ದ್ ಬಂಗ ದಾದ?, ಏರೆಡ, ಓಲು, ಏತ್, ಎಂಚ ಪಾತೆರೊಡು ಈ ಗೇಣನೇ ಕಮ್ಮಿ ಆತ್ತ್ಂಡ್. ಜೋಕುಲಾಟಿಗೆ ಕರಿದ್ ಆಣ್ ಜೋಕುಲೆಗ್ ಮೀಸೆ ಪುಟ್ಟೊಡ್ಡ ದುಂಬು,ಅವ್ವೇ ಪೊಣ್ಣು ಪೋದು ಪೊಂಜೊವಾವೊಡ್ಡ ದುಂಬೇ ಒಂಜಿ ದಂಬ್ “ಲವ್” ಗೆ!. ಎಂಚಿ ಕರ್ಮಯೇ?. ಏರಾ ದಾನ್ನ ಕೆಲವ್ದ ಕಣ್ಣ್ ಗ್ ತೂಯೆರೆ ಪೊರ್ಲು ಬೋಡು ಪಂಡ್ದ್ ಲಾ ಇಜ್ಜಿ ಆಂಡಲಾ ಒರಿಯಕ್ಕೊರಿಯಡ್ “ಲವ್ವ್” ಗೆ “ಲವ್ವ್”!?. ಎಲ್ಲೆದ ಬದ್ಕ್ ದಾದ ಪಂದೇ ಗೊತ್ತಿಜ್ಜಿ. ಈ ಮೊಬೈಲ್ಡ್ ಪುರ್ಸೋತ್ತು ತಿಕ್ನಗ ಮಾತಾ ಪುಂಡಿ ಬೈಪಾವುನು. ಪಗೆಲ್ಡ್ ಇಲ್ಲದಕ್ಲೆಗ್ ಪನೀತ್ ಪೋಡಿದ್ ದೆಂಗ್ ದೆಂಗ್ ದ್ ಪಾತೆರ್ಂಡ, ರಾತ್ರೆ ಮಾತೆರ್ ಜೆತ್ತಿ ಬೊಕ್ಕ ಮಂದಿರಿದ ಉಲಾಯಿಡೇ ಮೊಕ್ಲೆ ಮೆಸೇಜ್ ಗೆ ಬೊಕ್ಕ. ಮೆಲ್ಲ ಲಕ್ದ್ ಕುಡು ವೀಡಿಯೋ ಕಾಲ್ ಡ್ ದಾದಾ ಮಾತಾ ಗೊಬ್ಬುಲು!. ಎಂಚಿ ಕಲ್ಜಿಗದ ಕಾಲೊಡು ನಮ ಮಾತಾ ಉಲ್ಲ ಪನಿ?!. ಉಂದು ಈತೆಟ್ಟೇ ಉಂತುಜಿ ನಾಲ್ ದಿನತ ಈ ಮೋಕೆ ತನನ್ ಬಂಜಿ ಬಾಯಿ ಕಟ್ದ್ ಸಾಂಕಿ ಅಪ್ಪೆ ಅಮ್ಮೆರೆನ್ ಮರತ್ತ್ ಕೇವಲ ಒಂಜಿ ಆಣನನ, ಅತ್ಡ ಪೊಣ್ಣನನಾ ಒಟ್ಟಿಗೆ ಬಲಿಪುನ ಮುಟ್ಟ ಎತ್ತ್ ದ್ಂಡ್. ಒಂಜಿ ವೇಳೆಗ್ ಇಲ್ಲದಕ್ಕೆಗ್ ಮೊಕ್ಲೆ ಈ ಕಲ್ವ ಗೊಬ್ಬು ಗೊತ್ತಾದ್ ಅಕುಲು ಮಿನಿ ಅಡ್ಡಿ ಮಲ್ತೆರ್ಡ ಬೊಕ್ಕ ಮೊಕ್ಲೆಗ್ ತೋಜುನ ಸಾದಿ ಒಲ್ಲಾ ಬಲಿಪುನ ಅತ್ಡ ಎಂಚಾಂಡಲಾ ಜೀವ ದೆತ್ತೊನ್ನ. ಈ ನಿರ್ಧಾರ ದೆತೊನ್ನಗ ಅಕ್ಲೆಗ್ ಒವ್ಲಾ ಆಲೋಚನೆನೇ ಬರ್ಪುಜಿ ಪಂಡ ಏತ್ ಮಲ್ಲ ಸೋದ್ಯ ತೂಲೆ!.
ಈ ರೀತಿದ ವಿಪುರ್ತಿಗ್ ಕಾರಣ ದಾನೆ ಪಂಡ ನಮನೇ ಅಪ್ಪೆ ಅಮ್ಮೆ ಬೊಕ್ಕ ನಮ್ಮ ಶಿಕ್ಷಣ ವ್ಯವಸ್ಥೆ. ಬೊಕ್ಕ ಮಾತೆರ್ದ ಮಲ್ಲ ನಮ್ಮ ಸಾಮಾಜಿಕ ವ್ಯವಸ್ಥೆ ನೇ ಮಾಮಲ್ಲ ಕಾರಣ. ಒರ ಆಲೋಚನೆ ಮಲ್ಪಿ ಒಂತೆ ಪಿರ ತಿರ್ಗ್ದ್ ತೂಯಡ, ನಮ ಮಾತಾ ಒಂಜಿ ಅಪ್ಪೆ ಅಮ್ಮಗ್ ಆಜಾ ಪದ್ರಾಡಾ ಜೋಕುಲು ಇತ್ತ. ಕಾಲಿ ಸಾಗೊಳಿದ ಬೇಲೆನಾ, ಬೀಡಿ ಕಟ್ಟ್ದಾ ಐತ ಒಟ್ಟಿಗೆ ಗೊಬ್ಬರ ತುಂಬುದಾ, ಪೆತ್ತ ಮೇತಾ, ತೋಟೊಗು ನೀರ್ ಬುರ್ದಾ, ಪಜಿರ್ ಪೆರೆದಾ, ಕೊಟ್ಟಾಯಿ ಕಲೆದಾ, ಇಂಚ ನಾನಾ ನಮುನೆದ ಕೆಲಸ ಮುಗಿತ್ತ್ ಕಿ.ಮೀ ಗಟ್ಟಲೆ ನಡತ್ತೇ ಶಾಲೆಗ್ ಪೋದು ಅಪ್ಪೆ ಅಮ್ಮಗ್ ಸಾಧ್ಯ ಆಯಿನಾತ್ ಬರವು ಕಲ್ಪಾಯೆರ್, ನಮ ಕಲ್ತ. ಅಪಗ ಇಲ್ಲಡ್ಲಾ ಬೆರಿಕ್ ಗುಡ್ದಾಮ್ (ಪೆಟ್ಟ್) ಬೂರೊಂತುಂಡು ಅವ್ವೇ ರೀತಿ ಶಾಲೆಡ್ಲಾ ಟೀಚರ್ ಮಾಸ್ಟ್ರ್ ಕೈಕ್, ಬೆರಿಕ್ ಹಾಕೊಂತೆರ್. ಕೆಬಿ ಪೀಂಟಾದ್, ಬೆಂಚಿದ ಮಿತ್ತ್ ಲಾ ಕುಲ್ಲಾವೊಂತೆರ್. ಬೊಕ್ಕೊರಿಯನ ಎದುರು ಅಪಮಾನ, ಎಲ್ಯ ಮಲ್ಪು ವಿಚಾರೊಲ್ಲಾ ಬೋಡಾಯಿನಾತ್ ನಡತೊಂತ. ಇಂದೆನ್ ಮಾತಾ ಅನುಭವಿತ್ ದ್ಲಾ ನಮ ಬದ್ಕ್ ಡ್ ದಾದೆನಾಂಡಲಾ ಸಾಧಿಸಾವೊಂತ. ಅಂಚೆನೇ ಆನಿದ ಅಪ್ಪೆ ಅಮ್ಮನ್ ಆವಡ್, ಶಾಲೆದ ಗುರುಕುಲ್ನಕ್ಲೆನ್ ಆವಡ್ ದ್ವೇಷ ಮಲ್ಜ. ದಾಯೆ ಪಂಡ ಅಕುಲು ಅಂಚ ಮಲ್ತಿನೆರ್ದಾವರ ನಮ ಇನಿ ಓಲಾಂಡಲಾ ಎಂಚಾಂಡಲಾ ಮರ್ಯಾದಿಡ್ ಬದ್ಕೊಂದುಲ್ಲ ಪನ್ಪಿ ಸತ್ಯ ತೆರಿದ. ಬೊಕ್ಕ ಅಪಗಲಾ ಪೊಣ್ಣುಲು ಆಣುಲು ಒಟ್ಟಿಗೆನೇ ಇತ್ತ. ಆಂಡ ಈತ್ ಚರ್ಬಿ ಇತ್ತ್ ಜಿ. ಏರೆನಾಂಡಲಾ ಪೋಡಿಗೆ, ಸಮಾಜೊಡು ಮಾತೆರೆ ಎದುರು ಮರ್ಯಾದಿ ಬೋಡು ಪನ್ಪಿ ನಗೆ ನಾಚಿಕೆದ ಬೆಪ್ಪು ನಂಕ್ ಇತ್ತ್ಂಡ್. ಅಂಚಾದ್ ಈ “ಲವ್ವ್” ಪನ್ಪಿನವು ಈತ್ ಪನ್ನಿಬೆನ್ನಿ ದಾಂತೆ ಇಜ್ಜಾಂಡ್. ಒಂಜಿ ರೀತಿದ ಶಿಸ್ತ್ ಸಮಾಜೊಡು ಇತ್ತ್ಂಡ್. ಆಂಡ ಇನಿತ ಬದ್ಕ್ ದ ರೀತಿ ಜನೊಕ್ಲೆಗ್ ಒಯಿಕ್ಲಾ ಪೋಡ್ಯೋಡು ಪಂದ್ ಇಜ್ಜಿ ಪನ್ಪಿಲೆಕ್ಕ ಆತ್ತ್ಂಡ್. ಈತಾದ್ಲಾ ಇಂಚ ಲವ್ ಮಲ್ತ್ ದಾದ ಮಾತಾ ಮಲ್ತ್ ಮದಿಮೆಲಾ ಆದ್ ಎಡ್ಡೆಡ್ ಉಲ್ಲೆರಾ ಕೇಂಡ ಬಾರೀ ಕಮ್ಮಿ ಜವನೆರ್ ಮದಿಮೆ ಆದ್ ಒಟ್ಟಿಗೆ ಉಪ್ಪುನು!. ಇಂಚಪ್ಪದನೇ ಏತ್ ಜವನೆರ್ ಕೆಲವಾತ್ ವರ್ಷ ಲವ್ ಮಲ್ತ್ ಒಟ್ಟಿಗೆ ಓಲೋಲು ತಿರ್ಗ್ ದ್ ಪೂರಾ ಆಯಿಬೊಕ್ಕ ಬ್ಯಾಚುಲರ್ ಪಾರ್ಟಿ, ಫ್ರೀ ವೆಡ್ಡಿಂಗ್ ಶೂಟ್, ಮೆಹಂದಿ, ಹಲ್ದಿ, ಮದಿಮೆ, ರಿಸೆಪ್ಶನ್ ಇಂಚ ಐನಾಜಿ ಸರ್ತಿ ಪಾರ್ಟಿ ಪಂದ್ ಪರ್ದ್, ನಲ್ತ್, ನಕೆರ್ದ್ ಮದಿಮೆರ್ದ್ ಬೊಕ್ಕ ಕೆಲವೇ ದಿನೊಟು ಕಂಡನಿ ಬೊಡೆದಿ ಬೇತೆ ಬಲ್ದಿನ ಏತ್ ಕತೆಕ್ಲು ಬೋಡು!?. ದುಡ್ಡುಗು ಬೋಡಾದ್ ಒರಿಯನೊರಿ ಮಾನ್ಯ ಕೆರ್ಪಾದಿ ಕತೆಕುಲೇತ್? ಅಂಚಾಂಡ ನಮ ಓಲು ತತ್ತೊಂದು ಉಲ್ಲ?.
ನಮ ಬದ್ಕ್ ನ್ ಕಾಲಿ ಜ್ವಾಲಿ ಆದೇ ದೆತೊಂದ. ಈ ಜ್ವಾಲಿ ಪನ್ಪಿನವು ಕಾಲೀ ದುಡ್ಡುಡು ಬೊಕ್ಕ ದೈಹಿಕವಾಯಿನ ಸಂಬಂಧೊಡು ಮಾತ್ರ ತಿಕ್ಕುನು ಪಂದ್ ಎನ್ನಿದ. ಆಂಡ ಅವು ಸರಿಯತ್ತ್. ಸಾಂಸಾರಿಕವಾಯಿನ ಬದ್ಕ್ ದ ಶಾಶ್ವತ ನೆಮ್ಮದಿ ಉಪ್ಪುನು ಒರಿಯಕ್ಕೊರಿ ಸರಿಯಾದ್ ತೆರಿದ್ ಇತ್ತಿನೆನ್ ಬತ್ತಿನೆನ್ ಅತ್ಲಾಸೆ ಮಲ್ಪಂದೆ ಮನಸ್ಸ್ ನ್ ನೆಮ್ಮದಿಡ್ ದೋವೊಂದು ನಡಪುನವ್ಲು ಮಾತ್ರ. ಕಾಲೀ ನಮ್ಮ ಸುತ್ತಮುತ್ತದ ಜನೊಕ್ಲೆ ಕೆಲವು ದಿನತ ಮಲ್ಲಾದಿಗೆನ್ ನಮಲಾ ತೂದು ನಮಲಾ ಅಂಚೆನೇ ಜೀವನಪೂರ್ತಿ ಉಪ್ಪೊಡು ಪಂದ್ ಎನ್ಯುವ. ಅವು ತಪ್ಪು ಪಂದ್ ಅತ್ತ್. ಆಂಡ ಈ ಭೂಮಿದ ಮಿತ್ತ್ ದ ಒವ್ವೇ ಮನುಷ್ಯನ ಕೈತ ಬಿರಲ್ದ ಎಬ್ಬೆಟ್ಟೇ ಒಂಜೇ ಲೆಕ್ಕ ದೇವೆರ್ ಕೊರ್ತುಜೆರ್. ಅಂಚ ಉಪ್ಪುನಗ ನಮ್ಮ ಬದ್ಕ್ ಎಂಚ ಒಂಜೇ ಲೆಕ್ಕ ಉಪ್ಪೆರೆ ಸಾಧ್ಯ?. ಉಂದೆನ್ ತೆರಿದ್ ತಿರ್ನ್ಯಾತ್ ಪ್ರಯತ್ನ ಮಲ್ತ್ ನಮ ಒರಿಯಲೆಕ್ಕ ಸುಖೊಟು ಉಪ್ಪೆರೆ ಪ್ರಯತ್ನ ಮಲ್ಪೊಡೇ ಅತ್ತಾಂದೆ. ಆ ಪ್ರಯತ್ನದ ಪ್ರತಿಫಲ ನಮ ಪಂಡಿಲೆಕ್ಕನೇ ಉಪ್ಪೊಡು ಪಂಡ್ದ್ ಎನ್ಯುನವು ಸರಿಯತ್ತ್. ತೆರಿನಕುಲು ಪಂಡಿ ಪಾತೆರ ನಮ ಏಪಲಾ “ಪ್ರಯತ್ನ ಮಲ್ತ್ ಲಾ ತಿಕ್ಕಂದಿ ಸೊತ್ತುಗು ಕೊರಗೆರೆ ಬಲ್ಲಿಗೆ, ಅಂಚೆನೇ ನಮ ಸಾಧನೆ ಮಲ್ತ್ ಗಳಿಸಾಯಿ ಸೊತ್ತುದ ಬಗೆಟ್ ಅಹಂಕಾರ ಮಲ್ಪೆರೆಲಾ ಬಲ್ಲಿಗೆ”. ಇಂಚ ಇತ್ತಂಡ ನಮ ಒಯಿಕ್ಲಾ ಮಂಡೆಹಾಲ್ ಮಲ್ತೊನಿ ಪ್ರಮೇಯನೇ ಇಜ್ಜಿ. ಪುಟುನಗನೇ ದೇವೆರ್ ನಿಘಂಟ್ ಮಲ್ತಿ ಅಣೆಬರೊನು ಛಲತ ಸಾಧನೆದ ಮುಖಾಂತರ ಬದಲ್ ಮಲ್ಪೆರೆ ಸಾಧ್ಯಗೇ? ಅವು ಬುಡ್ದು ಪ್ರಯತ್ನನೇ ಮಲ್ಪಂದೆ ಬತ್ತಿ ಎಲ್ಯೆಲ್ಲ ಕಷ್ಟೊಗುಲಾ ಜೀವದೆತ್ತೊನ್ನವು ಮನುಷ್ಯನ ಸೊಭಾವ ಅತ್ತ್. ಸಾಧನ ಮಲ್ತ್ ಆಯುಷ್ಯ ಮುಗಿದ್ ಸೈತ್ಂಡ ಮಾತ್ರ ದೇವೆರೆ ಪಾದ ತಿಕ್ಕು. ಇಜ್ಹಿಂಡ ಕುಡ ಪುಟುದು ನಮ್ಮ ಪ್ರಾರಾಬ್ಧ ಕರ್ಮ ಅನುಭವಿಸಾವೊಡೇ ಉಂದು ನಿಘಂಟ್. ಕಷ್ಟ ನಷ್ಟ ಸುಖ ದುಃಖ ರಾತ್ರೆ ಪಗೆಲ್ದ ಲೆಕ್ಕ ಬರೊಂದೇ ಉಪ್ಪುಂಡು ಪೋವೊಂದೇ ಉಪ್ಪುಂಡು. ಮನುಷ್ಯೆ ಆದ್ ಈ ಭೂಮಿದ ಮಿತ್ತ್ ಪುಟ್ಟಿಬೊಕ್ಕ ಬದ್ಕೆರೆ ಒದ್ದಾಟ ಮಲ್ಪೊಡೇ ಅತ್ತಾಂದೆ ಸೈತ್ ದಾದೆನ್ ಸಾಧಿಸಾಯೆರೆ ಸಾಧ್ಯ ಪನಿ?.
ಬರವು : ಶರತ್ ಶೆಟ್ಟಿ ಪಡುಪಳ್ಳಿ
