ತೆನ್ಕಾಯಿದಗುಲು “ಎಂಕು ಪನಂಬೂರುಗು ಪೋಯಿಲೆಕ್ಕ” ಪಂಡೆರ್ ಡ, ಬಡಕಾಯಿದಗುಲು “ಕುಟ್ಟಿ ಕುಂದಾಪುರೊಗು ಪೋಯಿಲೆಕ್ಕ” ಪನ್ಪೆರ್. ಎಂಕುಲು ಅಂಚಿಲಾತ್ತ್, ಇಂಚಿಲಾತ್ತ್, ಮದ್ಯದಗುಲು. ಅಂಚಾದ್ ಅಂಚಿ ಎಂಕುನುಲಾ ಇಂಚಿ ಕುಟ್ಟಿನ್ ಲಾ ಪತೊಂದ. ಅಂಡ ಇ ಮದ್ಯೊಡು ಬೊಗ್ರೆ ಒಲ್ತು ಬತ್ತೆ? ನಿಗಲೆಗ್ ಎಚ್ಚಿನಗಲೆಗ್ ಎಂಕುನ ಕತೆ ಗೊತ್ತಿಪ್ಪು. ಒಂಜಿ ದಿನ ರಾತ್ರೆಡ್ ಉನಸ್ ಆದ್ ಜೆಪ್ಪರೆ ಪಜೆ ಬುಡ್ಪಾನಗ ಇಲ್ಲ ಗುರ್ಕಾರಗ್ ಪನಂಬೂರುಡು ದಾದನ ಜಂಬರದ ನಿನೆಪು ಆಂಡ್. ಬುಡೆದಿಡ ಪಂಡೆಗೆ “ಅಂದದೆ, ಎಲ್ಲೆ ಎಂಕುನು ಪನಂಬೂರುಗು ಕಡಪುಡೊಡು”. ಉಂದೆನ್ ಬೇಲೆದ ಎಂಕು ಓಂಗೆರ್ಯೆ (ಕೇಂಡೆ). ಮನದಾನಿ ಎಂಕು ನೆಲಪುಲ್ಯೊಕ್ಕೆಲ್ ಗ್ ಲಕ್ ದ್, ಕೂಲಿ ಮೋನೆ ದೆಕ್ ದ್, ತುತ್ತೈತ ಪಾಡೊಂದು ಪನಂಬೂರುಗು ಪಿದಾಡಿಯೆ. ಗುರ್ಕಾರೆ ಕಾಂಡೆ ಲಕ್ ದ್ ತೂನಗ, ಪಜೆಟ್ ಎಂಕು ಇಜ್ಜೆ. ಪೊರ್ತು ಪಡ್ಡಾಯಿ ದಂಗ್ ನಗ (ಮದ್ಯಾನ್ನ ಕಡತ್ ದ್) ಡಿಂಗ್ ಡಿಂಗ್ಂದ್ ಬತ್ತೆ ಇಲ್ಲಗ್ ಎಂಕು. “ಅಂದಂಬೆ ಎಂಕೊ, ದೂರ ಪೋದ್ ಬತ್ತಿನ್ಯುಂಬೆ?” ಕೇಂಡೆ ಗುರ್ಕಾರೆ. “ಯಾನ್ ಪನಂಬೂರು ಮುಟ್ಟ ಪೋದು ಬತ್ತಿನಿ, ಈರ್ ಕೋಡೆ ರಾತ್ರೆಡ್ ಪಂತಿನಿ ಅತೇ?” ಪನ್ಪೆ ಎಂಕು, ಮಲ್ಲ ದಂಡ್ ಸಾದಿನ ಕುಸಿಟ್. ದಾದ ಬೇಲೆ ಉಂಡು ಪನಂಬೂರುಡು, ದಾದ ಕೊನೊವೊರೆ ಅತ್ತ್ ಡ ಕನವರೆ ಉಂಡು, ಉಂದು ದಾಲ ಪಿಂದೊಂದುಜಿ ಎಂಕು. ಪೋಯೆ ಬತ್ತೆ.
ಅಂಚ ಏರ್ಲಾ ಬಜಾಡ್ಗೆ ಓಡೆಗ್ ಲಾ ಪೋದು, ಬಜಿ ಕಯಿಟ್ ಬತ್ತೆರ್ ಡ ಇಂಚ ಪನ್ಪ. ದಾಲ ಪೆರೆಜನ (ಉದ್ದೇಶ) ದಾಂತೆ ಓಡೆಗ್ ಲಾ ಪೋದು ಬರ್ಪಿನೈಕ್ ಇಂಚ ಪನ್ಪ. ಬವುಸ ಕುಟ್ಟಿಲಾ ಇಂಚೆನೆ ಬಜಿ ಪೊಕ್ಕಡೆ ಕುಂದಾಪುರೊಗು ಪೋದು ಬತ್ತಿಪ್ಪೆ. ಆಂಡ, ಬೊಗ್ರನ ಕತೆ ಬೇತೆ. ಬೊಗ್ರೆ ಎಂಕು, ಕುಟ್ಟಿಲೆಕ್ಕ ನರಮಾನಿ ಅತ್ತ್, ಆನ್ ನಾಯಿ. ದುಂಬು ದೂರದ ಕಾಸಿ(ಶಿ), ತಿರುಪತಿಗ್ ನಡತೊಂದು ಇರ್ಂಗ್ (ಯಾತ್ರೆ) ಮಲ್ತೊಂದು ಇತ್ತೆರ್. ಕಾಸಿ ನಮ್ಮೂರುಡ್ದ್ ಸಾರತ್ತ ಇರ್ನೂದು ಮೈಲ್ ದೂರ ಉಂಡು. ನಡತೊಂದು ಪೋವರೆನೆ ಒಂಜಿ ತಿಂಗೊಲು, ಬರಿಯೆರೆ ಬೊಕ್ಕೊಂಜಿ ತಿಂಗೊಲು. ದುಂಬುಡು ಕಾಸಿ, ತಿರುಪತಿಗ್ ಯಾತ್ರೆ ಪೋಪಿನಗಲೆನ ಬೊಜ್ಜ ಮಲ್ತ್ ದೆ ಪೋವೊಂದು ಇತ್ತೆರ್ ಗೆ. ಅಗುಲು ಪಿರ ಬರ್ಪಿನ ನಿಗಂಟ್ ಇತುಜಿ, ತಾದಿಡ್ ಓಲ್ಲಾ ತೀರಿಯೆರ್ಡ, ಬೊಜ್ದ ಮಲ್ತಜೆರ್ ಡ ಬೆರ್ಮ ರಕ್ಕಸೆ ಆದ್ ಗೋಲಿದ ಮರಟ್ ನೇಲೊಡು ಆಪುಂಡು ಅತೇ? ಇಪ್ಪಡ್, ಆತ್ ದೂರದ ಕಾಸಿಗ್, ಬೊಗ್ರೆ ತಾಂಕಿನಾಯನ ಬೆರಿಯೆ ಪೋದು ಬತ್ತೆ. ಮುಲ್ಪ, ಬೊಗ್ರೆ ಆತ್ ದೂರ ಪೋದು ಬತ್ತಿನವು ದಾಲ ಪಿರೆಜನ ದಾಂತಿನ ಬೇಲೆ ಪಂದ್ ನರಮಾನಿ ಪನ್ಪಿನಿ. ಬೊಕ್ಕ ಅಪಗ ನರಮಾನಿ? ನರಮಾನಿ ದೇವೆರೆನ ದರ್ಸನ ಮಲ್ತ್ ದ್, ಬಗ್ ತಿಡ್ ಅಡ್ಡ ಬೂರುದು, ಮುಗ್ ತಿ (ಮುಕ್ತಿ) ನ್ ನಟೊಂಬೆ. ಅಲ್ಪ ವಾ ದೇವೆರ್ ಇಪ್ಪುನು ಪಂದ್ ಲಾ, ನೂದು ವರ್ಸ ದುಂಬುದ ನಮ್ಮಗಲೆಗ್ ಗೊತ್ತು ಇತುಜಿ. ನರಮಾನಿ ಮಹಾ ಕಾರ್ನಿಕದ ಆ ದೇವೆರೆನ್ ತೂದು ಅಡ್ಡ ಬೂರ್ದ್ ಕಾನಿಕೆ ಪಾಡ್ ಗಿನ ಆಯಗ್ ಪುನ್ಯ ಸಂಪಾದನೆ ಆಪುಂಡು, ಗಂಗೆಡ್ ಮುರ್ಕುದು ಮೀಕಿನ ಇ ಜಲ್ಮೊಡು, ಕರಿನ ಜಲ್ಮೊಲೆಡ್ ಮಲ್ದಿನ ಪಾಪ ಪರಿಹಾರ ಆಪುಂಡು, ಕೆಲವೆರೆಗ್ ಮುಕ್ತಿ ತಿಕ್ಕುಂಡು, ಕೆಲವೆರೆಗ್ ಬರ್ಪಿ ಜನ್ಮ ಸುಕತ ಆದ್ ಇಪ್ಪುಂಡು. ನಾಯಿಗ್? ಆ ದೇವೆರ್ ಇ ಲೋಕದ ಪ್ರತೀ ನಡಪುನ ನಡಪಂದಿನ (ಚರಾಚರ) ಜೀವಿಲೆಗ್ ಲಾ ಎಡ್ಡೆ ಮಲ್ಪುನ ದೇವೆರ್ ಅತೇ? ಆಂಡ ನರಮಾನಿ ತೆರಿಯೊಂದಿನಿ, ಇ ಲೋಕ ಇಪ್ಪುನು ನರಮಾನಿಗಸ್ರದ್ ಮಾತ್ರ ಪಂದ್. ಅಂಚಾದ್, ಬೊಗ್ರನ ಆತ್ ದೂರದ ಯಾತ್ರೆ ದಂಡ (ನಿಷ್ಫಲ). ಅಂಚ ಪುಟುಂಡು ತುಲುವ ಪಾತೆರ “ಬೊಗ್ರೆ ಕಾಸಿಗ್ ಪೋಯಿಲೆಕ್ಕ”. ಪಂಡ ಇಹ ಪರ (ಈ ಲೋಕ, ಪರಲೋಕ)ಟ್ ದಾಲ ಉಪಯೋಗೊಗು ಬರಂದಿನ ಬೇಲೆ ಪಂದ್ ಅರ್ತ.
ಬರಹ : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ.
