‘ಪೆತ್ತನೊಂಜಿ ಪಿದಾಯಿ ಕೊನೊದು ಮೇಪುಗು ಕಟ್ಟ್’ ಪಂಡೆರ್ ಅಪ್ಪೆ. ಪೆತ್ತದ ಕೆಕ್ಕಿಲ್ ಗ್ ಅಲಸ್ ಬಲ್ಲ್ ಪಾಡ್ದ್ , ಕೊನೊದು ಕಿದೆ ಬಾಕಿಲ್ದ ಬೀಜದ ತಯಿಕ್ ಕಟ್ ದ್, ಪಾರ್ ಬತ್ತ್ ದ್ ಕತೆ ಪುಸ್ತಕ ಪತ್ ದ್ ಕುಲ್ಲಿಯೆ. ಎನ್ನಪ್ಪೆ ಜಾಲ್ ದ ಕೋಡಿಗ್ ಪೋದು ತೂಯಿನಾರ್ “ನಂಕ್ ದತ್ತ್ ಕಯಿ ಪೀಂಕನ್ ಗ್ ಮುಟ್ಟ. ಮೂಜಿ ದಿನೊಡ್ದಿಂಚಿ ಕೊನೊದ್ ಆ ಬೀಜದ ತೈಕ್ ಅಕ್ಕುಡುವ ಅತ್ತಾ, ಅಲ್ಪ ದಾದ ಅವು ಮೂತಾಯಿದ ಮನ್ನ್ ಗರ್ಪುನಾ?” ಪಂದ್, ಪೆತ್ತನ್ ಬುಡ್ದ್ ಅಕರ ಕುಲೆಂಜಿಗ್ ದೇರೊಂದು ಪೋಯೆರ್.
ಒವುಲ ಒಂಜಿ ಸುಲಬೊಡು ಕಯಿಕ್ ತಿಕಿನ ವಸ್ತ್ ಲೆನ್ ಗಲಸುವ ನಮ. ಮುಟ್ಟದ ಅಂಗಡಿಡ್ದ್ ಸಾಮಾನ್ ಕನಪ. ಗಿಲೀಟ್ (ಮದನ ಕಯಿ)ಡ್ ಅತ್ತ್ ಡ ಅಜೆಟ್ ಪಾಡ್ದಿನ (ಮೆಯಿಕ್ ಪಾಡ್ದ್ ಗೆತ್ತ್ ದೀಯಿನ) ಅಂಗಿ ಕುಂಟು ತಿಕ್ಕಾವೊಂಬ. ಇಂಚ ಪೂರಾ ಸುಲಬೊಡು ಬೇಲೆ ಸುದಾರ್ಪೆರೆ ತೂಪ. ಸುಕ ನಾಡುವ. ಉಂದೆನೇ ಅಬ್ಬೇಸ (ಅಭ್ಯಾಸ ಬಲ) ಪನ್ಪಿನಿ. ಅಂಚೆನೆ ಈ ‘ದತ್ತ ಕಯಿ ಪಿಂಕನ್ ಗ್ ಮುಟ್ಟ’ , ದೆಕ್ಕರೆ, ಕಿರ್ಂಬರೆ. ಬಲತ್ತ ಕಯಿಲಾ ಆತೇ ಮುಟ್ಟ ಇಜ್ಜಾ? ಆಂಡ ಪೀಂಕನ್ ಗ್ ತನ್ನಾತೆಗೆ ದತ್ತ ಕಯಿ ಪೋಪುಂಡು. ಈ ಅಬ್ಬೇಸ ನಂಕ್ ಎಲ್ಲಿಡೇ ಕಲ್ಪಾವೆರ್. ಅಂಚಾದ್ ಪೀಂಕನ್ ಗ್ ದತ್ತ ಕಯಿ ಅನೈಚ್ಛಿಕ ಕ್ರಿಯೆದಲ್ಕ ತನ್ನಾತೆಗೆ ಪೋಪುಂಡು.
ಆಂಡ ಈ ದತ್ತ ಕಯಿತ ಸಿದ್ಧಾಂತ (theory) ದಾದವು? ಗರಕೆನೆ (ನೈರ್ಮಲ್ಯ)ದ ಉದ್ದೇಸನೇ ಈ ದತ್ತ ಕಯಿಟೇ ಪೀಂಕನ್ ದೆಕ್ಕೊಡು ಪನ್ಪಿನ ಅಬ್ಬೇಸೊಗು ಕಾರಣ. ಉನ್ಪಿ ತಿನ್ಪಿ ತಿನಸ್ ಲೆನ್, ದತ್ತ ಕಯಿಟ್ ಮುಟ್ಟರೆ ಬಲ್ಲಿ, ದಾಯೆಗ್ ಪಂಡ ಆ ದತ್ತ ಕಯಿ ‘ಮಲ’ ಮುಟ್ಟುಂಡು. ಅಂಚ ಆದ್ ನಿರ್ಮಲ ಅತ್ತ್. ನಿರ್+ಮಲ = ನಿರ್ಮಲ. ನನ ತಪ್ಪು ತೆರಿಯೊನಡೆ, ನೀರ್ ಕಟ್ಟ್ ಪಿ ಪಂದ್. ಉಂದು ಕನ್ನಡ (ಸಂಸ್ಕೃತ) ಸವುದ. ನಿರ್ ಪಂಡ ‘ಪಿದಾಯಿ’ ‘ಇಜ್ಜಿ’ ಪಂದ್ ಅರ್ತ ಕೊರ್ಪಿನ ನಿಷೇಧಾರ್ಥಕ ಉಪಸರ್ಗ. ನಿರ್ಲಜ್ಜ, ನಿರ್ವಿಘ್ನ, ಇಂಚ ಮಾತ. ಮಲ ಪಂಡ ‘ಪಿ’ ಮಾತ್ರ ಅತ್ತ್, ಕುರ್ತೆಲ್, ನರಕ, ದೂಲು, ಬೆಗರ್, ಕಫ ಪಂದ್ ಲಾ ಕನ್ನಡೊಡು ಅರ್ತ ಉಂಡು. ‘ಮಲ’ ನೆಡ್ದ್ ಪುಟುಂಡು ಮಲೀನ, ಮಾಲಿನ್ಯ.
ದತ್ತ ಕಯಿಟ್ ದಾಯೆಗ್ ಬಂಜಿಗ್ ಗೆತೊಂಬಿ ವಸ್ತುಲೆನ್ ಮುಟ್ಟರೆ ಬಲ್ಲಿ? ಒಂಜಿ ಗ್ರಾಂ ಪೀಟ್ ಒಂಜಿ ಕೋಟಿ ಬ್ಯಾಕ್ಟೀರಿಯಾ ಇಪ್ಪುಂಡುಗೆ, ಐಟ್ ಅರ್ದೊಗು ಅರ್ದ ಜೀವದ ಬ್ಯಾಕ್ಟೀರಿಯಾಲು. ಐಕ್ಲೆಡ್ ಇ. ಕೋಲಿ (Escherichia coli) ಪುದರ್ ದ ಬ್ಯಾಕ್ಟೀರಿಯಾದ ಕೆಲವು strains ಪಿರ ಬಂಜಿಗ್ ಸೇರಿಯಡ, ಬಂಜಿ ಹಾಲ್ ಮಲ್ಪುವ. ಜೋರ್ ಬಂಜಿ ಬೇನೆ, ಜಿಲಾಬು, ಜೊರ, ಮರ್ಕ ಸಂಕಡ, ಕಕ್ಕುನು ಉಂದು ಮಾತ ಆವು. ಅಂಚ ನಂಕ್ ಎಲ್ಲಿಡೆ ಕಲ್ಪಾವೆರ್, ಪೀ ಪಂಡ ನರಕ (ಕುರ್ತೆಲ್) ಪಂದ್. ಯಾನ್ ತೆರಿನ ಮಟ್ಟ್ ಗ್ ನಮ್ಮ ದೇಸದ ಕೊಡೀ ಕಡೆ, ನೀರ್ ಡ್ ದತ್ತ ಕಯಿಟ್ ಪೀಂಕನ್ (ಗುದ ದ್ವಾರ) ದೆಕ್ಕುನು. ಗರಕ್ಕೆನದ ವಿಚಾರೊಡು ಉಂದು ಸರಿ, ದತ್ತ ಕಯಿಕ್ ನಿಷೇಧ, ತಿನಸ್ ಲೆನ್ ಮುಟ್ಟರೆ. ಆಂಡ ನಮ ದತ್ತ್ ಕಯಿಟ್ ಏರೆಗ್ಲಾ ದಾಲ ಕೊರ್ಪುಜ, ಅತ್ತ್ ಡ ಗೆತೊಂಬುಜ. ಅವ್ವು ಒಂಜಿ ಶಿಷ್ಟಾಚಾರ ಆತೆ, ದಾಲ ವೈಜ್ಞಾನಿಕ ಕಾರಣ ಇಜ್ಜಿ.
ಅಂಚ ಮೂಲ್ ಇಟಾಲಿಯನ್ ಇಷ್ಟೆರ್ (friends) ಉನಸ್ ಗ್ ಬರ್ಪೆರ್ ಇಲ್ಲಗ್. ಉನಸ್ ಗ್ ಲಕ್ಕ್ ಲೆ, ಕಯಿ ದೆಕ್ಕ್ ಲೆ ಪಂಡ, ಕಯಿ ದೆಕ್ ದ ಪಂದ್ ಉನಸ್ ಗ್ ಕುಲ್ಲುವೆರ್. ಚಪಾತಿನ್ ರಡ್ಡ್ ಕಯಿಟ್ ಪತೊಂದು ಪರ್ಪರೆ ತೂನಗ, ದತ್ತ ಕಯಿಟ್ ಮುಟ್ಟುಜೆರ್, ಭಾರತೀಯೆರ್ ಪಂದ್ ಪನ್ಪ. ಒಂಜೆ ಕಯಿಟ್ ಎಂಚ ನೀರ್ದೊಸೆ, ಚಪಾತಿ ತುಂಡು ಮಲ್ಪುನು ಪಂದ್ ಮಲ್ತ್ ತೋಜಾಪಾವ. ಎನ್ನ ಚಂಞಾಯಿ ಜೊರ್ಜಿಯೋ ಗು ಪಂಡೆ, ಎನ್ನ ದೇಸೊಗು ಬತ್ತಡ ದತ್ತ ಕಯಿಟ್ ತಿಂಡಿ ತಿನಸ್ ಮುಟ್ಟಡ. ದತ್ತ ಕಯಿಟ್ ಏರೆಗ್ಲಾ ದಾಲ ಕೊರಡ, ಅತ್ತ್ ಡ ದತ್ತ ಕಯಿ ನೀಡ್ದ್ ಏರೆಡಲಾ ದಾಲ ಗೆತೊನಡ, ಪಂಡೆ. “ಅವು ದಾಯೆಗ್, ರಡ್ಡಲಾ ಕಯಿ ಎನ್ನವೇ ಅತಾ?” ಪಂಡೆ. ಐಕ್ ನನ ಒಂತೆ ಬುಡ್ಪಾದ್ ಪನ್ಕ ಪಂದ್ “ಇ ವಾ ಕಯಿಟ್ ಪುಕುಲಿ ಸುದ್ದ ಮಲ್ಪುನು?” ಪಂದ್ ಕೇಂಡೆ. “ಒವ್ವು ಆಂಡಾ ಅವ್ವು. ದತ್ತ್ ಬಲತ್ತ್ ಪಂದ್ ಬೇಧ ಇಜ್ಜಿ“ ಪಂಡೆ. ಎಂಕ್ ಕೇಂಡ್ ದ್ ಒರ ಸೋದ್ಯ ಆಂಡ್. “ಎಂಕಲ್ನ ದೇಸೊಡು ದತ್ತ ಕಯಿ ದಾಯೆಗ್ ಬಾಕಿ ಕೆಲಸೊಗು ದೂರ? ದಾಯೆಗ್ ಪಂಡ ದತ್ತ ಕಯಿ ಪೀಂಕನ್ ಗ್ ಮುಟ್ಟ. ಪೀಂಕನ್ ಮುಟಿನ ಕಯಿಟ್ ಬಂಜಿಗ್ ಗೆತೊಂಬಿನ ತಿನಸ್, ಉನಸ್ ಮುಟ್ಟುಜ. ನನೊರಿಯಗ್ ಆ ಅಸುದ್ದ ಕಯಿಟ್ ಮುಟುದು ದಾಲ ಕೊರ್ಪುಜ” ಇಂಚ ದತ್ತ ಕಯಿತ ಮಯಿಮೆನ್ ಪಂಡೆ. ಅದಗ ಆಯನ ಮಂಡೆಗ್ ಇಸಯ ಪೊಗ್ಗುಂಡು ಪಂದ್ ಮಂಡೆ ಆಡಯೆ. ಆಂಡ ಐರೋಪ್ಯೆರೆಗ್ ದತ್ತ, ಬಲತ್ತ ಕಯಿತ ಏತುವಾಸಿಯೇ ಇಜ್ಜಿ ಪಂದ್ ನಂಬರೆ ಆಯಿಜಿ. ಈತಾದ್ ಮೂಲು ಇಟೆಲಿಡ್, ಇಲ್ಲಲೆಡ್ ಕಮೊಡ್ ದ ಬರಿಟ್, ಕಮೊಡ್ದ್ ಒಂತೆ ತಗ್ಗ್ ದ ಬೇಸಿನ್ ಇಪ್ಪುಂಡು. ಐಕ್ ‘ಬಿದೆ (bidet)’ ಪನ್ಪೆರ್ ಇಟಾಲಿಯನ್ ಡ್, ಅವು ದೆಕ್ಕರೆ ಇಪ್ಪುನು. ಆಫೀಸ್ ಲೆಡ್, ಹೋಟೆಲ್ ಲೆಡ್ ಇಪ್ಪುಜಿ, ಬಿದೆ. ಯುರೋಪ್ ದ ಬಾಕಿ ದೇಸೊಲೆಡ್ ಲಾ ಇಜ್ಜಿ. ಆಂಡ ಇತ್ತೆತ್ತೆ ಭಾರತೊಡು ಇತಿಲೆಕ್ಕ, ನೀರ್ ಡ್ ದೆಕ್ಕರೆ bidet spray gun ದೀಯೊಂದು ಉಲ್ಲೆರ್. ನಂಕ್ ತುಲುವೆರೆಗ್ ‘ನೀರ್ ಮುಟ್ಟು’ಜಿಡ ಗರಕೆನ (clean) ಆಪುಜಿದೇ?
ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ.
