ಇನಿ ಲೋಕೊದ ಅಪ್ಪೆ ಬಾಸೆದ ದಿನಗೆ. ಎನ್ನಪ್ಪೆ ಬಾಸೆ ತುಲು. ಆಂಡಲಾ ಒಂಜಿ ಎಕ್ಕಂದೆಲ್ (dilemma), ಎನ್ನಪ್ಪೆ ದಿನಾ ಪಾತೆರೊಂದು ಇತ್ತಿನ ತುಲು ಬಾಸೆನ್ ನೆಟೆ ಬರೆವೊಡಾ, ಅತ್ತ್ ತುಲುವ ಬಾಸೆದ ಪೆರ್ಮೆ ಗರ್ಮೆ(ಪೇರ್ತೆ)ದ ಬಗೆಟ್ ಬರೆವೊಡಾ? ಎನ್ನಪ್ಪೆನ ನಿಚ್ಚದ ಬಾಸೆದ ಕೆಲವು ಸ್ಯಾಂಪಲ್ ನಿಗಲೆಗ್ ಕೊರೊಂದು ಉಲ್ಲೆ. ಕಾಂಡೆ ಜೋಕುಲೆಗ್ ಇಂಚ ಸುಪ್ರಭಾತ ಪಂಡ್ದ್ ಲಕ್ಕಾವೊಂದು (ಮೆನ್ಪಾವೊಂದು) ಇತ್ತೆರ್, ಹಾಂ, ನನ ಲಕ್ಕೊಲಿ ಹದೊಟು, ಪೀಂಕನ್ಗ್ ದೆಂಬು ದರ್ತೊಂದು ಉಂಡು. ನನ ದಾನೆ ಕರ್ಂಟೊಡಾ? ಬೆನ್ನಿದಪಗದ ಸುಲೇಕ ಒಂತೆ ಬೇತೆ, ಲೋಕೊಡು ನಿಗುಲೇ ಒಂಜಿ ಜೋಕುಲಾ? ಓಲಾ ಆಯನ್ ತೂಲೆ. ಪೊರ್ತು ಮೂಡ್ಡೊಡ್ಡ ದಪ್ಪು ಕಟ್ಟುವೆ. ನಿಗಲೆಗ್ ಪೀಂಕನ್ಗ್ ದೆಂಬು ದರ್ಪಂದೆ ಎಚ್ಚರ ಆಪುಜಿ. ಓದರೆ ಕಾಂಡೆ ಬೇಗ ಲಕ್ಕಾದ್ಜೆರ್ ಪಂದ್ ಜೋಕುಲು ಕಂಪ್ಲೇಂಟ್ ಮಲ್ತೆರ್ಡ ಲಕ್ಕಾವುನ, ನನ ಎಂಚ? ಮುಕ್ಕೊಲು ಮುಕ್ಕೊಲು ಪಿರೆತೆ. ನನ ಬಡಿಗೆ ಪಾಡ್ದ್ ಲಕ್ಕಾವೊಡು ನಿನನ್. ಕಾಂಡೆನೆ ಜೋಕುಲು ಒರಿಯಗೊರಿ ದಾಲ ನೆರೊಂದು, ಪನೊಂದು ಇತ್ತೆರ್ಡ ಪನ್ವೆರ್, ಕಾಂಡೆ ಲಕ್ಕ್ ಲಕ್ಕ್ ದ್ ಉರೆಟರೆ ಸುರು, ಮಂಡೆ ಕಕ್ಕೆದಲ್ಕ. ಕಾಂಡೆ ಒರ, ಬೈಯ್ಯಗೊರ ಉರೆಟ್ಜಿಡ ತಿಂದಿ ನುಪ್ಪು ಮೆಯಿಕ್ ಪತ್ತಂದ್ ನಿಗಲೆಗ್. ವಾ ಗಲಿಗೆಡ್ ಪುಟಿಯರಾ ಮಗಾ? ಆರ್ ಪಂಡಿನ ಬೇಲೆ ಆ ಪೊರ್ತುಡು ಮಲ್ತ್ಜಡ, ದಡ್ಡೆ ದಡ್ಡಿವೊಲು, ಕೇನ್ ಪೀಂಕನೇ ಪಂತಗೆ ಪಂಜಿಗ್, ಐತ ಕುರ್ಲೆಲು. ಅಂಚ ಯಾನ್ ಮಂಡೆ ದಡ್ಯೊಂದೇ ಇಪ್ಪುವೆ, ನಿಗುಲು ಪೀಂಕನ್ ಮಿತ್ತ್ ಪಾಡ್ದ್, ನಿಗಲೆಗ್ ಬೋಡುತ್ತಿನೈವೆನೇ ಮಲ್ಪುವರ್.
ಜೋಕುಲು ಜೋರ್ ಜೋರ್ಡ್ ಕಲ್ಕೊಂದು ಲಡಾಯಿ ಪುಡಾಯಿ ಮಲ್ಪುನಗ, ಅಪ್ಪೆನ ಮೋಹನಾಸ್ತ್ರ ಎನ್ನ ಅಜ್ಜಿ ಪಿಜ್ಜಿನ ಪುನ್ಯ, ಗುಡ್ಡೆದ ಬರಿಟ್ ಒಂಜೇ ಒಕ್ಕೆಲ್, ಬೇತೆ ಇಲ್ಲ್ ಇಜ್ಜಿ ಮುಟ್ಟೊಡು. ಇಜ್ಜಿಡ ಊರು ತೆಲ್ಪುಲಕ್ಕ ಆತು, ನಿಗಲೆನ ಬಿರ್ದಾವಲಿ ಕೇಂದ್. ಒರಿ ರಚ್ಚೊಡು ಬುಡಯೆ, ಬೊಕ್ಕೊರಿ ಗೂಂಜಿಡ್ ಬುಡಯೆ. ಅಂಚ ಒರೊರ ಜೋಕುಲೆನ ವೊಡ್ಡುವರಂಟ್ ಜೋರಾಂಡ, ಅಕ್ಲಾಸೋಡು ಪನ್ವೆರ್ ‘ಕಾಜಿ ಕನ್ನ್ ದಾಯನ ಕಾಟನೇ, ನೋರ್ ಕನ್ನ್ ದಾಯನ ನೋಟನೇ, ಎನ್ನ ಬಾಲೆಲೆ ಸೀಲನೇ’ ಪಂದ್ ಪಂತ್ಡ್ಗೆ ಎಲಿ ತನ್ನ ಕಿನ್ನಿಲ್ಲೆಗ್. ಅಂಚೆನೇ ಎನ್ನ ಜೋಕುಲು. ಊರ್ದಗಲು ಪನ್ಪಿನೈಕ್ಲಾ, ನಿಗುಲು ಮಲ್ಪುನೈಕ್ಲಾ ಸಮಾ ಸಮ ಮಗ. ಜೋಕುಲು ಸಾಲೆಡ್ದ್ ಬನ್ನಗ ತಡ ಆಂಡ್ಡ ಬೇಲಿ ಬೇಲಿ ಕೇರೆದಲ್ಕ ಬೈಯೆಲಿ ಪೋದು ಆಂಡಾ? ನನ ದಾಲ ಒಂತೆ ಇಲ್ಲದ ಬೇಲೆ ಮಲ್ಪುನ ಅಂದಾಜಿ ಮಲ್ತನ? ರಡ್ಡ್ ರಡ್ಡ್ ಕೇಕದ ಮರಕಾಲ್ದಿಯಲ್ಲು ಇತ್ತೆರ್. ಆಂಡ ಬೊಕ್ಕ ಬೊಕ್ಕ ಅಗುಲು ಬರ್ಪಿನ ಕಮ್ಮಿ ಕಮ್ಮಿ ಆಂಡ್. ಅಂಚ ಏಪಲೊರ ಮೆಗ್ಯಲ್ಲೆನ್ ಮಾರ್ನೇಬೈಲ್ಗ್ ಮೀನ್ ಕನವರೆ ಕಡಪುಡೊಂದು ಇತ್ತೆರ್. ಬಜಿ ಕಯಿಟ್ ಬತ್ತೆರ್ಡ ಉಂಬೆ ಒರಿ ಮಂಗಲ ಪೂಜಾರಿ, ಸಂತೆಗ್ ಪೋಯೆಡ ಮೀನೇ ಇಜ್ಜಿ. ಜೋಕುಲೆನ ಕಯಿಡ್ದ್ ದಾಲ ಹಾಲೇಕನ (waste) ಆಂಡ್ಡ ಪನೊಂದು ಇತ್ತೆರ್ ಅರಿ ಆಪಿನ ಮರ ಒವ್ವು ಪಂದ್ ಕೇಂದೆರ್ಗೆ ಬೆದ್ರದ ಪೊಂಜೋವು. ಅಂಚ ನಂಕ್ ಅರಿ ಆಪಿನ ಮರತ ಗುರ್ತ ಇಜ್ಜಿ. ಜೋಕುಲು ಮಲ್ತಿನ ಬೇಲೆ ಸರಿ ಆಯಿಜಿಡ, ಆರೆಗ್ ಸಲ್ಮಂತ ಆಯಿಜಿಡ ನನ ಎಂಚ ಬೆಂದ್ ತಿಂದ್ ಇಪ್ಪರಾ? ದಪ್ಪುಗುಲಾ ಏರ್ಲಾ ದೀವೊನಾಯೆರ್. ಎಲ್ಯ ಮಲ್ಲ ತಪ್ಪುಲೆಗ್ ಸಾಮಾನ್ಯ ಮುಕ್ತಾಫಲೊಕುಲು ಕಸ್ ರಾಬಿಲು, ತೆಟ್ಟ್ ಬಡಿಗೆಲು. ಮಾತೆರ್ ಮರಿ ನಲ್ಪವೆರ್ ಪಂದ್, ಯಾನ್ ಲಾ ಕೇರೆ ನಲ್ಪಾವುನಿ. ಇಂಚಲಾ ಒರೊರ ಟಾಂಗ್ ಕೊರಿಯೆರೆ (ಕುಹಕ) ಉಂಡು ಪಾತೆರ ಪಾತೆರೊಗು, ಕಾಡ್ ಮುಡಾಯಿ ಆಂಡ್, ತೋಡ್ ಪಡ್ಡಾಯಿ ಆಂಡ್ ಪಂದ್ ಬೊರು ಗುದ್ದುನನೇ ಆಂಡ್. ಮುಕ್ಕಾಲ್ ಮೂಜಿ ಕಾಸ್ದ ಪಿರೆಜನ ಇಜ್ಜಿ.
ಜೋಕುಲು ಒಂತೆ ಮಲ್ಲೆ ಆಕಿನ ಅಗಲೆಗ್ ನೆರ್ಪಿನ ಶೈಲಿ ಬೋಲೆ ಮಟ್ಟೆಲ್ಡ್ ಕಟ್ಟೊಲಿ, ಪೆಲ ಮಟ್ಟೆಲ್ಡ್ ಕಟ್ಟೊಲಿಯಾ? ರಾವರೆ ರೆಂಕೆ ಆಂಡ್, ಕೊಡಪರೆ ಕೊಕಾಯಿ ಅಂಡ್. ನನ ದಾದ ಹಂಗ್ ನಿಗಲೆಗ್ ಏರೆನಲಾ? ಬೇಲೆ ಮಲ್ಪರೆ ಉದಾಸೀನ ಮಲ್ತಡ, ಮಲ್ಪುಜ ಪಂದ್ ಲಡಾಯಿ ಮಲ್ತಡ: ನಂಕ್ ತಿಗಲೆಗ್ ಕೊಲ್ಪರೆ ಬಲ್ಲಿ. ಗುಂಡಿಸಾಲೆ ಬೆಯಿತ್ ದ್ ಬಂಡಿಸಾಲೆ ಪುದರ್ ಪೋವೊಡು. ಆರ್ ಪಾಡಿನ ಅತ್ತ್ಡ ಎಂಕುಲು ಪಾಡೊಂಡಿನ ಉನಸ್ ಪೂರಾ ಉಂಡುದು, ಬಟ್ಟಲ್ (ಒರೊರ ಒಟ್ಟುಗು ಕುಪ್ಪಿ) ದೆಕ್ದ್ ದೀವೊಡು. ಇಜ್ಜಿಡ ಅವು ಏರೆಗ್ ಮೂಂಕುಡೆ ಬತ್ತಿನಿ, ಅರ್ದ ತಿಂದ್ ಪತ್ತಾ ದೀತಿನಿ? ಕೆಕ್ಕಿದ ಗುರಿ ಮುಟ್ಟ ಗೆಂಯ್ಗವುನು ದಾಯೆಗ್, ಒಂತೆ ಕಮ್ಮಿ ಪಾಡೊನೊಡು. ಆರೆನ ಬಗೆಟ್ ಪಿರವುಡ್ದು ಮಾಮಿ ಮಯಿತಿದಿಯಲ್ಲು ಪನೊಂದು ಇತಿನಯಿಕ್ ಆರೆನ ಸಂದಾಯ: ಎನ್ನ ದೊಂಡೆಗ್ ಮುರೆಡುವೆರ್ “ಮರತಾಂಡ ಬಿಚ್ಚಿದ್ ಪೋವು, ಮನ್ನ್ ದಾಂಡ ದರಿದ್ ಪೋವು” ಪಂದ್. ಅಗಲೆನ ಗೊತ್ತು ಇಜ್ಜಿ, ದುಂಬೊರ್ತಿ ಪಂಡಿ ಲೆಕ್ಕ “ಬಡ ಬಡತಾಲೆನ ಬಾಯಿ ಗಡ್ಸ್, ಮುನು ಮುನುತಾಲೆನ ದಾದನ ಗಡ್ಸ್” ಗೆ. ತರೆ ಬಾಡಿನನೇ ಗೊತ್ತು, ಮುದೆಲ್ ಕುತ್ತಿನ ಗೊತ್ತು ಇಜ್ಜಿ. ಜೋಕುಲೆನ ಎಲ್ಲೆದ ಬಗೆಟ್ ಆರೆಗ್ ಏಪಲಾ ಯೇಚನೆ ಆಡುವವರ ಮಕ್ಕಳು ಆಡ್ ಬೇಕು, ಬೇಡುವವರ ಮಕ್ಕಳು ಬೇಡ್ ಬೇಕು. ನಟ್ಟು ಪರ್ದೇಸಿಲು, ಬೇಡ್ದ್ ತಿನೊಡು ನಿಗುಲು. ಬೆಂದ್ ತಿನಯರ್. ತನ್ನ ಮಾತ್ರ ಅತ್ತ್, ತನ್ನಗಲೆನ ಮಾತಾ ಜೋಕುಲೆಗ್ ಒಂಜಿ ಹಾರೈಕೆ ಏತ್ ಉದ್ದ ನೀರ್ಡ್ ಉಲ್ಲರಾ, ಆ ದೇವೆರ್ ಮಂಡೆ ದಕ್ದ್ ಪೋವಡ್ ಮಗಾ. ದೇವೆರ್ ಎಡ್ಡೆ ಮಲ್ಪಡ್. ಜೋಕುಲು ಬಾಲೆಲು ಮಲ್ಲೆ ಆಯೆರ್, ಒರಿಯೊರಿಯೆ ಇಲ್ಲ್ ಪಿದಾಡ್ದ್ ದೂರ ಪೋನಗ ಪೋಯಿನಲ್ತ್ ಬತ್ತಿನಡೆ ಮುಟ್ಟ ಮಂಡೆಗೊಂಜಿ ಮುಂಚಿ ಕಲ್ಲ್ ಆವಂದಿಲೆಕ್ಕ ಕಾತ್ ಕೊರು (ದೈವಡ ಪಂಡ್ ಪುಡಾಡುನು). ಈತ್ ಮಾತ ನೆರ್ಪನೆ, ಬುದ್ಧಿದ ಪಾತೆರದ ಪಿರಾವುದ ಆರೆನ ಉದ್ದೇಸ: ಮಾತೆರ್ ಲೆಕ್ಕ ಮನ್ಸ ರೂಪೊಗು ಬತ್ದ್, ಬೆಂದ್ ತಿಂದ್ ಮರ್ಯಾದಿಡ್ ಬದ್ಕಿಯರ್ಡ್ ಇಯಾವು. ಆಸ್ತಿ ಬದ್ಕ್ ಮಲ್ತ್ ಜರ್ಡ ಮಲ್ಲೆಜ್ಜಿ. ದಾನೆ ಪೋನಗ ಕೊನೊಪೊನಾ, ಆಸ್ತಿ ಬದ್ಕ್? ಕೊನೊಪಿನಿ ಎಡ್ಡೆ ಪಡ್ಕೆನ್ ಮಾತ್ರ. ಎನ್ನಪ್ಪೆ ದಿನಾಲ ಇಂಚ ನೆರೊಂದು ಇತ್ತೆರ್ ಪಂದ್ ಗಿರೆಪಡೆ, ಮಾತೆನ್ ಒಟ್ಟು ಮಲ್ತ್ ದ್ ಕಟ್ಟ್ ಕಟಿನಿ. ಅಪ್ಪೆ ಬಾಸೆದ ಬಗೆಟ್ ಪನರೆ ಪಿದಾಡ್ದ್, ಕಡೆಕ್ ತಾರೆದ ಮರಕ್ಕ್ ಪೆತ್ತ ಕಟಿನ ಕತೆ ಆಂಡ್. ಅಪ್ಪೆಡ್ ಎನ್ನ ಪೆತ್ಯಪ್ಪೆ, ಬಾಸೆಡ್ ಎನ್ನಪ್ಪೆ ಬಾಸೆ ತುಲು, ಸಜ್ಜಿಡ್ ಎಂಕಲ್ನ ತುಲುವೆ ಪೆಲಕಾಯಿಗ್ ಪರಿಪಾಡರೆ ಸಾದ್ಯ ಇಜ್ಜಿ.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
