ಪೊದು ಪಂಡ ಕನ್ನಡದ ವಧು (bride)ಕು ಸಂವಾದಿ ಅತ್ತ್, ವೈವಾಹಿಕ ಸಂಬಂಧ ಪಂದ್ ಅರ್ತ. ನಮ ಕನತಿನ (ಮದಿಮೆ ಮಲ್ತ್ದ್) ಪೊನ್ನನ ಇಲ್ಲದಗುಲು, ಅಗಲೆನ ಸಂತಾನದಗುಲು ನಮ್ಮ ಪೊದ್ದೆರ್. ಅಂಚೆನೇ ನಮ, ನಮನ ಸಂತಾನದಗುಲು ಅಗಲೆಗ್, ಅಗಲೆನ ಸಂತಾನದಗಲೆಗ್ ಪೊದ್ದೆರ್. ಆಂಡ ಬುಡೆದಿನ ಇಲ್ಲ್ ಮಾತ್ರ ಕಂಡ್ಯಾನಗ್ ಪೊದ್ದೆರೆ ಇಲ್ಲ್. ಇಲ್ಲಡ್ ಕೋಲ ಆಂಡ, ಸುರುತ ಮರ್ಯಾದಿ ಪರವೂರು (ಪರಮಾಗನೆ)ದಗಲೆಗ್, ಬೊಕ್ಕ ಪೊದ್ದೆರೆಗ್. ಒಂಜಿ ಐವ ಅಜಿಪ ವರ್ಸ ದುಂಬುಡು ಪೊನ್ನು ತೂವರೆ ಪೋಪಿನಗುಲು ಇರ್ವೆರ್ ಅತ್ತ್ಡ ನಾಲ್ವೆರ್ ಅಂಜೋವು ಪೊನ್ನ ಇಲ್ಲಗ್ ಪೋವೊಂದು ಇತ್ತೆರ್. ನಾಯಿಲು ಗುರೆಪುನ ಕೇಂದ್ ನಾಯಿಲೆನ್ ದಡ್ಯೊಂದು, ಏರ್ ದಾದ ಪಂದ್ ಕೇನೊಂದು ಇಲ್ಲದಗುಲು ಜಾಲ್ಗ್ ಜತ್ತೆರ್ಡ, ಪೊನ್ನು ತೂವರೆ ಬಯಿದಿನಗುಲು ಸೀದಾ ಕಿದೆತ ಕಿದನೆಗ್ ಪೊಗ್ಗುವೆರ್. “ನಿಗಲೆ ಇಲ್ಲಡ್ ಎರು ಕೊರ್ಪಿನ (ಮಾರುನ) ಉಂಡು ಪಂದ್ ಸುದ್ದಿ ತಿಕ್ಂಡ್. ಅಂಚ ತೂದು ಪೋಕ ಪಂದ್ ಬತ್ತಿನಿ” ಇಂಚ ಪನುವೆರ್. ಅಪಗ ಆ ಇಲ್ಲದ ಗುರ್ಕಾರಗಾ, ಪೆರಿಯಾಕ್ಲೆಗಾ ಅರ್ತ ಆಪುಂಡು, ಅಗುಲು ಪೊನ್ನು ತೂವರೆ ಬಯಿದಿನಿ ಪಂದ್. ಅಗಲೆನ ಇಲ್ಲಡ್ (ಕಿದೆಟ್) ಮಾರುನ ಎರು ಇಪ್ಪುಜಿ, ಇತ್ಂಡಲಾ ಇನೆ (ಜೋಡಿ) ಕಡ್ತ್ದ್ ಒಂಜಿ ಎರುನು ಮಾರುಜೆರ್. ಬಾರಿ ಪಂಡ ಬಾರಿ ಅಪೂರ್ಪೊಗು ಒಂಜಿ ಎರು ಸೈತ್ದ್ ಒಂಜಿ ಒರಿವುಂಡು. ನಿಜವಾದ್ ಏರು ಬೋರಿ ಗೆತೊನರೆ ಬರ್ಪಿನಗುಲು ಎರ್ಲೆನ್ (ಜೋಡು) ಅತ್ತ್ಡ ಬೋರ್ಲೆನ್ ಕೇನುವೆರ್.
ಎಚ್ಚಾದ್ ಸುರುಕು ಬತ್ತಿನ ಪೊದು ಬುಡ್ಪುಜೆರ್. ಒಂಜಿ ಏಲ್ಯೊಗು ಅಗಲೆನ ಪೊನ್ನಗ್ ಮೊಗುಲು ಬರೊಡ್ದುಂಬೇ ಬೇತೆ ಪೊದು ಬತ್ತ್ ಇತ್ಂಡ, ಪೊನ್ನ ಇಲ್ಲದಗುಲು ಪನ್ಪೆರ್ “ಇಜ್ಜಿಯೇ, ಇನೆ ಕಡ್ತ್ ಎರು ಮಾರುಜ” ಪಂದ್. ಪೋದು ಪಾತೆರ್ರೆ (proposal) ಇತ್ಂಡ, “ಒಯಿಕ್ ಲಾ ಕುದ್ದು (ಕುಲುದು) ಪಾತೆರ್ಗ, ಬಲೆ ಉಲಾಯಿ ಇಲ್ಲಗ್” ಪಂದ್, ಚೆಂಬುಡು ನೀರ್ ಕೊರ್ಪೆರ್ ಕಯಿಕಾರ್ ದೆಕ್ಕರೆ. ಪಜೆ ಬುಡ್ಪಾದ್ ಕುಲ್ಲರೆ ಪನ್ಪೆರ್. ಬೊಕ್ಕ ಏರ್ ಎಯಿನ ಪಂದ್ ಪಾತೆರ ಕತೆ ಆಪುಂಡು. ಪೊನ್ನು ತಪ್ಪು ಕನಕ್ಗ್ ಪಿದಾಯಿ ಪೋದು ಇತ್ಂಡ, ಅಗಲೆನ ಎದುರುಡೆನೆ ಇಲ್ಲ್ (ಪಡ್ಸಾಲೆ, ಉಲ್ಲಯಿ ಇಲ್ಲ್) ಪೊಗ್ಗುಂಡು. ಎಚ್ಚಿನ ಇಲ್ಲಲೆಡ್ ಕುರು ಬಾಕಿಲ್ ಇತ್ತುಜಿ. ಮಯಿತಿದಿ, ಪಲ್ದಿಯಲ್ಲು ಇಜ್ಜೆರ್ಡ, ಜೋಕುಲೆನ್ ಕಡಪುಡ್ದು ನಿರೆಕರೆತ ಪೊಂಜೇವೆನ್ ಬರ್ಪದ್ ಪೊನ್ನಗ್ ಐತ ಮಲ್ಪಾವೆರ್. ದುಂಬುದ ಐತ ಪಂಡ, ತರೆ ಬರ್ಚಿದ್, ಪುಚ್ಚೆ ನೆಯಿದ್, ಸರಿಟ್ ಸೀರೆ ತುತ್ತಾದ್, ಮೋನೆಗೊಂತೆ ಪವುಡರ್ (talcum) ಮೆತ್ತಾವುನು. ಮುಂಡೊಗು ಒಂಜಿ ಕುಂಕುಮದ ಬೊಟ್ಟ ಆಯಿನಾತ್ ಉರುಂಟು ಮಲ್ತ್ ದೀಪಿನಿ. ಪೊನ್ನನ್ ಮುತ್ತೇಸಿ ಪೊಂಜೋವು (ಅಪ್ಪೆ ಅತ್ತ್, ಪಲ್ದಿ, ಮೈತಿದಿ, ಮಾಮಿ ಅತ್ತ್ಡ ನಿರೆಕರೆತ ಮಾಮಿ) ಪಿದಾಯಿ ಲೆಸೊಂದು ಬರ್ಪೆರ್. “ಮೋಲು ಎಂಕಲ್ನ ನೀರಜ” ಇಂಚ ಪಂದ್ ಇಲ್ಲದ ಅಂಜೋವು ಪೊನ್ನನ್ ತೋಜಾವೆರ್. ಕೆಲವೆರ್ ಪೊನ್ನು ತೂವರೆ ಬತ್ತಿನಗುಲು ಪೊನ್ನಡ ಉಗ್ಗೆಲ್ಡ್ದ್ ಒಂಜಿ ಕಡ್ಯ ನೀರ್ ಕನವರೆ ಪನೊಂದು ಇತ್ತೆರ್ಗೆ. ಕಯಿ ಕಾರ್ ಉನೆ (ಊನ) ಆದ್ ಇತ್ಂಡ ಗೊತ್ತು ಆಪುಂಡತೇ? ಪೊದು ಪಾತೆರ್ರೆ ಬತ್ತಿನಗುಲು ಸುರೂಕು ಕಿದೆ ಪೊಗ್ಗುನು. ದಾಯೆಗ್ ಪಂಡ, ಪೊದು ಸಮಸರ್ಕೆದಗಲೆಡ ಆವೊಂದು ಇತಿನಿ. ಕಿದೆಕ್ ಪೊಗ್ಗಿಯರ್ಡ ಗೊತ್ತು ಆಪುಂಡು, ಏತ್ ಜೋಡು ದಪ್ಪುನ ಉಲ್ಲ ಪಂದ್. ಐತ ಮಿತ್ತ್ಡ್ದ್ ಏತ್ ಮಲ್ಲ ಬೆನ್ನಿ ಬೆನೊಂದು ಉಲ್ಲೆರ್ ಪಂದ್ ಗೊತ್ತಾಪುಂಡು. ಒಂಜಿ ಜತೆ ಬೊರ್ಲು/ಎರ್ಲು ಆಂಡ ಒಂತೆ ಬೆನ್ನಿ, ಮುಪ್ಪ ಮುಪ್ಪತ್ತೈನ್ ಆಲ್ದ ಕಂಡೊಲು. ರಡ್ಡ್ ಜತೆ (ಎಚ್ಚಾದ್ ಒಂಜಿ ಜತೆ ಎರ್ಲು, ಬೊಕ್ಕೊಂಜಿ ಜತೆ ಬೊರ್ಲು) ಇತ್ಂಡ ಐತ ರಡ್ಡ್ ಪಾಲ್ ಬೆನ್ನಿ. ಎಚ್ಚಿನಗುಲು ನಾಲೆರುತ (ರಡ್ಡ್ ಜೋಡಿ) ಬೆನ್ನಿದಗುಲು. ಕೆಲವೆರೆನ ಕಿದೆಟ್ ಮೂಜಿ ಜತೆ ದಪ್ಪುನ ಇತ್ಂಡ, ಅಗಲೆನ ಮಲ್ಲ ಬೆನ್ನಿ, ಸಾಮಾನ್ಯವಾದ್ ರಡ್ಡ್ ಇಲ್ಲ ಅಡಿ. ಮುಲ್ಪ ಬೊಟ್ಟು, ಬೈಲ್, ಮಜಲ್, ಕೊಲಕೆದಲಾ ಲೆಕ್ಕಾಚಾರ ಇಪ್ಪುಂಡು. ಆತ್ ಮಾತ್ರ ಅತ್ತ್, ಕಿದೆಟ್ ಬೊರಿಪುನ ಎರ್ಮೆ, ಪೆತ್ತೊಲು ಏತ್ ಉಲ್ಲ, ಐತ ಮಿತ್ತ್ಲಾ ಆ ಇಲ್ಲದ ಮಲ್ಲಾತಿಕೆ ಉಂತುದು ಇಪ್ಪುಂಡು. ಮಹಾಭಾರತ ಕಾಲೊಡುಲಾ ಒಂಜಿ ದೇಸದ ಸಂಪತ್ತ್ನ್ ಆ ದೇಸದ ಪಶು (ಕಯಿಕಂಜಿ)ತ್ತ ಸಂಕೆಡ್ದ್ ಲತ್ತೊಂದು ಇತಿನಿ.
ಅಂಚ ಪೊದು ಸಮಸರ್ಕೆದಗಲೆಡ ಆಪಿನಿ. ವಿವಾಹ, ವಿನೋದ, ವಿವಾದ ಸಮಾನೆರೆಡ ಮಲ್ಪೊಡು ಪಂದ್ ಸಾಸ್ತ್ರನೇ ಉಂಡತ್ತೇ? ರಡ್ಡ್ ಎರುತಾಯಗ್ ನಾಲ್ ಎರುತಾಯೆ ಪೊನ್ನು ಕೊರಯೆ. “ಮುಟ್ಟಲೆದಾಯಗ್ ಕೊರಯೆ, ಮುಂಡಾಸ್ ದಾಯೆ ಬರ್ಪುಜೆ” ಪಂದ್ ಪೊನ್ನು ಒರಿ ಪೋತುಂಡುಗೆ, ಮದಿಮೆ ಆವಂದೆ. ಕುಡ ಐಟ್ ಬೊಕ್ಕಲಾ ಒಂಜಿ ಪಾತೆರ ಉಂಡು, “ತುದೆಡ್ದ್ ಗೆತ್ತ್ ತೋಡುಗು ಪಾಡರೆ ಬಲ್ಲಿ”. ಪಂಡ ಮಲ್ಲ ತುದೆಟ್ (ಸುಕೊಟು) ನಿಂದೊಂದು ಇತಿನ ಮೀನ್ನ್ ಎಲ್ಯ ತೋಡುಗು (ಬಂಗೊಗು) ಪಾಡರೆ ಬಲ್ಲಿ. ಪಾತೆರದ ಸಾರ, ಪೊನ್ನನ್ ಮಿತ್ತ ಇಲ್ಲಗ್ ಕೊರೊಡು, ತಿರ್ತ ಇಲ್ಲಡ್ದ್ ಕನವೊಡು. ಮುಲ್ಪ ಮಿತ್ತ ಇಲ್ಲ್ ಪಂಡ ನಮಡ್ದ್ ಮಿತ್ತ ಮಟ್ಟ (level) ದಗಲು, ತಿರ್ತ ಇಲ್ಲ್ ಪಂಡ ನಮಡ್ದ್ ಒಂತೆ ಬಂಙದಗುಲು. ಆನ್ ಆವಾಡ್, ಪೊನ್ನ್ ಆವಡ್ ಏತ್ ಬರವು ಸರವು ಕಲ್ದೆರ್, ಬುದ್ದಿ, ಗುನ ಎಂಚ ಉಂದು ಮಾತಾ ಕೇನುನ ಪಂಚಾತಿಕೆನೆ ಇತುಜಿ. ದುಂಬು ಪೊನ್ನನ್ ತೂಪಿನ ಕ್ರಮ ಇತ್ಂಡೇ, ಆಂಡ ಆನನ್ ತೂಪಿನ ಕ್ರಮ ಇತುಜಿ (ಇನಿಕ್ಲಾ ಆನಡ ಪಾತೆರ್ರೆ ಪೋಪಿನಿ ಪನ್ಪೆರತ್ತಾವಂದೆ, ಆನ್ ತೂವರೆ ಪೋಪಿನಿ ಪನ್ಪುಜೆರ್). ಪೊನ್ನನ್ ತೂವರೆ ಆನ್ ಪೋಪಿನಲಾ ಅನಿವಾರ್ಯ ಅತ್ತ್. ಎನ್ನ ಪೊನ್ನು ಕೊರಿ ತಮ್ಮಲೆಗ್ ಪೊನ್ನು (ಎನ್ನ ಮಾಮಿನ್) ತೂತಿನಿ ಆರೆನ ಮೆಗ್ಯೆ. ಮಾಮಲಾ ಮಾಮಿಲಾ ಒರಿಯನೊರಿ ತೂತಿನಿ ದಾರೆದ ಮನೇಟೆ. ಎನ್ನ ರಾತ್ರಿ ಸಾಲೆದ ಪಾಸಾಡಿ (ಮಾಸ್ಟ್ರು, ಫ್ರೆಂಡ್) ಪದ್ಮನಾಭ ಅರಿಗೆರ್, ಆರೆನ ಬುಡೆದಿನ ಪಲ್ದಿನ್ ತೂದು ಪೊನ್ನು ಆವು ಪಂದ್ (ಪಾಸ್ ಮಲ್ದಿನಿ) ಒಪ್ಪಿದಿನಿ. ತಮ್ಮಲಲ್ಲೇ ಎಚ್ಚಾದ್ ಪೊನ್ನು ತೂವೊಂದು ಇತಿನಿ ಅರುವದಲ್ಲೆಗ್. “ಪೊನ್ನು ಪೊರ್ಲು ದಾಯೆಗ್, ನಲಿಪಾವರೆ ಕೊನೊವರೆ ಉಂಡಾ?” ಇಂಚ, ಇಂಚಪ ಮುಟ್ಟ ಪನೊಂದು ಇತ್ತೆರ್. ಇಂಚಂಪ ಒಂಜಿ ಇರ್ವ ಮುಪ್ಪ ವರ್ಸ ದುಂಬು, ಪೊನ್ನಗ್ ಆನ್ ಒಪ್ಪಿಗೆನಾ ಪಂದ್ ಕೇನುನ ಕ್ರಮನೇ ಇತ್ತುಜಿ. ಎನ್ನ ತಂಗಡಿನ ಮೈತ್ನಗ ಪೊನ್ನು ತೂಪಿನ ಏರ್ಪಾಟ್ ಬೊಂಬಾಯಿದ ಮಹಾಲಕ್ಷ್ಮೀ ದೇವಲ್ಯಡ್ ಮಲ್ತ. ಎಂಕುಲು (ಆನ್, ಯಾನ್, ಎನ್ನ ಬುಡೆದಿ, ಎನ್ನ ಬಾವೆ, ಎನ್ನ ಮೆಗ್ಯೆ) ಮಾತ್ರ ಪೊನ್ನನ್ ತೂಯಿನಿ ಅತ್ತ್, ಪೊನ್ನುಲಾ, ಪೊನ್ನ ಕಡೆತಗುಲುಲಾ ಆನನ್ ಸರೀ ತೂತೆರ್. ಆಂಡ ಇನಿಕ್ಲಾ ಪೊನ್ನು ತೂಪಿನಿ ಪಂದೇ ಪನ್ಪಿನಿ. ಆನಗ್ ಪೊನ್ನು, ಪೊನ್ನಗ್ ಆನ್ ಆವು ಪಂದಾಂಡ್, ಅಂಚ ಬೊಕ್ಕ ರಡ್ಡ್ ಕಡೆಲಾ ಒಟ್ಟಾದ್ ಬರಿತ ಶೋಭಾ ಹೋಟೆಲ್ಡ್ ಚಾ ಪರಿಯ. ಅಂಚ ಬೊಕ್ಕ ಪೊನ್ನ ಕಡೆ ಎಂಕಲೆಗ್ ಪಟ್ಲ್ಕೋಡ್ ಸಂಬಂದನೇ. ಬಾರಿ ದುಂಬುಡು ತಮ್ಮಲೆ, ಮದಿಮೆಗ್ ತಯಾರಾತಿನ ತನ್ನ ಮಗಲೆನ್ ಮದಿಮೆ ಆಪನ ಪಂದ್, ಮದಿಮೆ ಆಪಿನ ಪ್ರಾಯದ ಅರುವದೆ ಇತ್ತೆಡ ಕೇಂಡ್ದ್, ಆಯೆ ಬೊಡ್ಚಿ ಪಂಡೆಡ ಮಾತ್ರ ಬೇತೆ ಪೊದು ತೂವೊಂದು ಇತ್ತಿನಿಗೆ. ತಮ್ಮಲೆ ಮಗಲ್ ಹಕ್ಕ್ದ, ಅಮ್ಮ ಮರ್ಮಲ್ ಬೊಕ್ಕದ. ಪಂಡ ಅಮ್ಮೆರೆನ ಮರ್ಮಲ್ (ಪಲ್ದಿನ, ಮೆಗ್ದಿನ ಮಗಲ್) second choice. ಇನಿಕ್ಲಾ ಒಂಜೇ ಇಲ್ಲಗ್ ಕಂಡನೆ ಅಡ್ತಿನ ಅಪ್ಪೆ ಮಗಲ್ ಏತೋ ಉಲ್ಲೆರ್. (ತಮ್ಮಲೆ ಮಗಲೆನ್ ಮದಿಮೆ ಆತಿನಿ). ಇನಿಕಾನಗ ಕೂಡು ಕುಟುಂಬ ಇಜ್ಜಿಂದೇ ಪನೊಲಿ, ಬೆಕ್ಕಿನ ಬಿಡಾರ ಬೇರೆ.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
