ರಾಮ ಮಾಮನ ಮಗಲ್ ಸೀತಕ್ಕೆನ್ ತೂವರೆ ಆನ ಕಡೆತಗುಲು ಬತ್ತ್ ಇತ್ತೆರ್. ಇಲ್ಲಡ್ ರಾಮ ಮಾಮ ಒರಿಯೇ ಅಂಜೋವು. ಅರುವದೆ ಎಲ್ಯಾಯೆ. ರಾಮ ಮಾಮನ ಬುಡೆದಿ ತೀರ್ದ್ ಇತ್ತೆರ್. ಅಗಲೆಗ್ ಮೂಜಿ ಪೊನ್ನುಲೆ. ರಾಮ ಮಾಮನ ತಂಗಡಿಗ್ಲಾ ಕಡೀರ್ದ ಪೊನ್ನು. ಅಂಚ ಎನನ್ ಒಂಜಿ ಗಲಿಗೆ ಬರಿಯೆರೆ ಪಂದ್ ಇತ್ತೆರ್. ಆನ ಕಡೆತಗುಲು (ಆನನ ಬಾವೆ ಬೊಕ್ಕ ಒರಿ ಅಗಲೆನ ಸಂಬಂದದಾರ್) ಬತ್ತೆರ್. ಪೊನ್ನು ತೂಯೆರ್. ಪಿರಯ ಏತ್ ಆಂಡ್ ಕೇಂಡೆರ್. ಆ ಕಾಲೊಡು ಪೊನ್ನಗ್ ಇರ್ವ ವರ್ಸ ಕರಿಂಡ ಪೊನ್ನು ಬುಲೆದ್ ಪನೊಂದು ಇತ್ತೆರ್. ಬುಲೆದ್ ಪಂಡ ಪೊನ್ನಗ್ ಪಿರಯ ಆತ್ಂಡ್ ಪಂದ್ ಅರ್ತ. ಆನಗ್ ಏತ್ ಪಿರಯ ಪಂದ್ ಕೇನೊಂದು ಇತ್ತುಜೆರ್. ಪೊನ್ನು ಮಾತ್ರ ಲತ್ತ್ ಲತ್ತ್ ಆವೊಡು. ಅಂಚ ಯಾನ್ ಸೀತಕ್ಕೆನ ಪಿರಯ ಐನ್ ವರ್ಸ ಕಡಿಮೆ ಮಲ್ತ್ ಪಂಡೆ. ಈ ರಾಮ ಮಾಮ ಮನಿಪಂದೆ ಕುಲ್ಲುವೆರಾ? ಆಲೆನ ಜಾತಕ ಉಂಡು ಪಂಡಿನಾರ್, ಪಟ್ಯೊಡು ದೀತಿ ಪೆಟ್ಟಿಗೆ ಜಾವರೆ, ಮಂಚಾವುದ ಮಿತ್ತ್ ಮಿತರಿಯೆರ್. ಎಕ್ಕದ್ ತಗಡ್ದ ಪೆಟ್ಟಿಗೆ ಜಾವರೆ ಪೊರ್ಂಬುನಗ ‘ಜಾತಕ ಮುರಾನಿ ರಂಗ ಭಟ್ರೆಗ್ ತೋಜಪಾವರೆ ಕೊನೊತಿನ ಅವುಲೆ ಒರಿದ್ಂಡ್. ಜಪ್ಪುಲೆ, ಜಪ್ಪುಲೆ ಈರ್’ ಪಂದ್ ಎಚ್ಚಿ ಕಡಿಮೆ ಕಲ್ಕಿಯೆ.
ಎನ್ನ ದೊಂಡೆ ಕೇಂದ್ ಒರ ಒಂತೇ ಪಂಬರ್ಡ್ದ್ ಪೋಯೆರ್. ‘ಏಪ? ಓಲು? ಇಜ್ಜಿಯ ಮೂಲೆ ಉಂಡು’ ಪಂದ್ ಪೆಟ್ಟಿಗೆನ್ ಜಾವರೆ ಪೋಯೆರ್. ‘ಈರೆಗ್ ಅಬ್ಬುದಿಬ್ಬು ಆಂಡ್, ಇಜ್ಜಿ ಮೂಲು. ಪೆಟ್ಟಿಗೆ ತಿರ್ತ್ ದೀದ್ ಜಪ್ಪುಲೆ’ ಪಂಡೆ. ಆನ ಕಡೆತಗುಲು ಪೊನ್ನು ಆವು ಪಂದ್ ಒಪ್ಪಿದ್ ಪೋಯಿಬೊಕ್ಕ, ರಾಮ ಮಾಮ ಎನಡ ಕೇಂಡೆರ್ ‘ಅಂಚ ದಾಯೆಗ್ ಸುಳ್ಳು ಪಂಡಿನಿ?’ ಪಂದ್. ಯಾನ್ ಪಂಡೆ ‘ದಾದೆ ಮಾಮೊ, ವಕೀಲೆರ್ ಆಯಿನ ಈರೆಗೊಂತೆ ಸಾಮನ್ಯ ಗೇನ ಬೊಡ್ಚಾ? ಆರೆನ ಪಿರಯ ಐನ್ ವರ್ಸ ಕಮ್ಮಿ ಮಲ್ತ್ ಪಂತ. ಜಾತಕೊಡು ಪುಟಿದಿನ ಬರೆದ್ ಇಪ್ಪುವೆರ್, ಐಡ್ದ್ ಆರೆನ ನಿಜ ಪಿರಯ ತೆರಿವುಜೇ?’ ಪಾತೆರ ಪಾತೆರೊಗು ಕೋರ್ಟು, ವಕೀಲೆರ್, ಕಾನೂನು ಪಂದ್ ಪನೊಂದಿತ್ತಿನ ರಾಮ ಮಾಮನ್ ಆರೆನ ಪಿರಯದ ನಿರೆಕರೆತಗುಲು ‘ವಕೀಲೆರ್’ ಪನೊಂದು ಇತ್ತೆರ್. ಸಾರ ಸುಳ್ಳು ಪಂದ್ ಒಂಜಿ ಮದಿಮೆ ಮಲ್ಪುನುಗೆ. ಯಾನ್ ರಡ್ಡೇ ರಡ್ಡ್ ಸುಳ್ಳು ಪಂತಿನಿ.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ.
