ಅಡ್ಪಿಲ್ಲ್ ದ ಬರಿತ ಕೋನೆ ಪಡ್ಸಾಲೆ. ಕನ್ನಡೊಡು ಪಡುಕೋಣೆ. ಆಂಡಾ ಅವು ಪಡ್ಸಾಲೆ ಪಂದ್ ದಾಯೆಗ್ ಪುದರ್? ದುಂಬುದ ನಮ್ಮ ತುಲುವೆರೆನ ಇಲ್ಲುಲು ಕೊಂಟು ಮೂಲೆದ (L shaped) ಚಾವಡಿ ಮೂಡಾಯಿ ದಿಕ್ಕ್, ಅಡ್ಪಿಲ್ ಬಡಕಾಯಿ ದಿಕ್ಕ್ಗ್ ಮೋನೆ ಪಾಡ್ದ್ ಇಪ್ಪುಂಡು. ಅಡ್ಪಿಲ್ಲಡ್ದ್ ಬಡಕಾಯಿ ಮುಕುಡ್ದು ತೂನಗ, ದತ್ತ್ಗ್ ಪಡ್ಸಾಲೆ. ದಾಯೆಗ್ ಪಂಡ, ಅಡ್ಪಿಲ್ಲದ ಪಡ್ಡಾಯಿಡ್ ಇಪ್ಪುನ, ಉನರೆ ಕುಲ್ಲುನ ಕೋನೆ. ಎಚ್ಚಾದ್ ಅಡ್ಪಿಲ್ಲಡ್ದ್ ಪಿದಾಯಿಗ್ ಜಪ್ಪುನ ಬಾಕಿಲ್ ಇಜ್ಜಿ. ಅಡ್ಪಿಲ್ಲ್ ಬೊಕ್ಕ ಪಡಸಾಲೆದ ನಡ್ಡೆ ಒಂಜಿ ಮುಂಡು ಗೋಡೆ. ಅಡ್ಪಿಲ್ಲ್ ದ ಮಿತ್ತ್ ಅಟ್ಟ, ಅಟ್ಟೊಗು ಅರಿತ ಮುಡಿ ನೂಕರೆ (ದೀವರೆ) ಸುರುಕು ಇ ಅಡ್ಡಗೋಡೆದ ಮಿತ್ತ್ ಮುಡಿ ದೀದ್, ಬೊಕ್ಕ ಗೋಡೆದ ಮಿತ್ ಪೋದು ಅಲ್ತ್ಡ್ದ್ ದೆರ್ತ್ದ್ ಮೊರಂಪುಡು ದೀದ್, ಅಟ್ಟೊಗು ನೂಕೊಂದು ಇತ್ತೆರ್, ಅರಿತ ಮುಡಿಕ್ ಲೆನ್. ಅಡ್ಪಿಲ್ಲದ ಅಟ್ಟೊಗು ಕುತ್ಯಟ್ಟ ಪನ್ಪೆರ್. ಇ ಮುಂಡು ಗೋಡೆ ತೆನ್ಕಾಯಿ ಮೆಯಿಟ್ ರಡ್ಡ್ ಅಡಿ ಬುಡ್ದು, ಬಡಕಾಯಿ ಗೋಡೆ ಮುಟ್ಟ, ಸುಮಾರ್ ಒಂಜಿ ಆಲ್ (ಆಜಿ ಅಡಿ)ದ ಪುಗ್ಗೆಲ್ ಮುಟ್ಟ ಎಪ್ಪರ ಇಪ್ಪುಂಡು. ಇ ಮುಂಡು ಗೋಡೆದ ಸರ್ತ ತೆನ್ಕಾಯಿ ಗೋಡೆಡ್ ಗಿಲಿಕಂಡಿ. ಐಟ್ ಚಿಮುನಿ ದೀಂಡ, ಬೊಲ್ಪು ಅಡ್ಪಿಲ್ಲಗ್ ಲಾ, ಪಡ್ಸಾಲೆಗ್ ಲಾ ಬೂರುಂಡು. ಕಂಡಿಡ್ ಪತಿನ ಕರಿ ಅಪಗಪಗ ಗೆತ್ತ್ ದೀದ್, ನೆಲಕ್ ಅಂಬಿ ಪೂಜಿನಗ, ಬಿರಾವೊಂದು ಇತ್ತೆರ್. ಅಡ್ಪಿಲ್ಲದ ಒಂಜಿ ಕೊಂಟುಡು ಕನಕೋಡಿ. ರಡ್ಡ್ ದಿಕ್ಕೆಲ್ದ ಮಿತ್ತ್, ಮದನ ಕಯಿಟ್ ಕುಲ್ಲದಿನ ಪುಗೆ ಪಲಾಯಿ. ರಡ್ಡ್ ದಿಕ್ಕೆಲ್ ಲೆನ ನಡ್ಡೆ ಪಿರ ಮರ್ಗಿಲ್ಡ್ ಒಂಜಿ ಕೋಡಿ ದಿಕ್ಕೆಲ್, ಎಲ್ಯ ಮುಗಾಯಿಡ್ ದಾಲ ಬೆಚ್ಚ ಮಲ್ಪರೆ. ಒಂಜಿ ಕೊಂಟುಡು ಅಡ್ಯರ, ಬೊಕ್ಕೊಂಜಿ ಕೋಡಿಡ್ ತೆರಿಯದ ಮಿತ್ತ್ ದೀತಿನ ಉಪ್ಪುದ ಕರ. ಒಂಜಿ ಬರಿಟ್ ಕಡಂದ ಕಲ್ಲ್, ಬರಿಟ್ ಬಲಾಯಿ. ರಡ್ಡಾಂಡಲಾ ಬಲ, ಐಟೊಂಜಿ ಅಲೆತ ಕುದುಪೆ ಬೊಕ್ಕೊಂಜಿ ಪೇರ ಕುದುಪೆ.
ಪಡ್ ಸಾಲೆಡ್ ಒಂಜಿ ಮೂಲೆಡ್ ದೈವದ ಮನೆಮಂಚಾವು ಅಕ್ಕ್ಡ್ದ್ ದೀಪೆದೆರ್. ಪಡಸಾಲೆದ ತೆನ್ಕಾಯಿ ಗೋಡೆಗ್ ಒಂಜಿ ಪಲಾಯಿ. ಬಡಕಾಯಿ ಗೋಡೆಗ್ ತಾಗ್ದ್ ಒಂಜಿ ಅಜೆ ಕೋಲು, ಪೊಂಜೇವೆನ ಕುಂಟು ಪಾಡರೆ. ಇ ಪಡ್ಸಾಲೆಡೆ ಪೆತ್ತ್ ದ್, ಪೆದ್ಮೆದಿ ಬಾಲೆ ಜೆಸೊಂದು ಇತಿನಿ. ಮೂಲೆ ತೊಟ್ಟಿಲ್ ಕಟೊಂದು ಇತಿನಿ. ಪಡ್ಸಾಲೆ ಬೊಕ್ಕ ಚಾವಡಿದ ಮದ್ಯೊಡು ಒಂಜಿ ಕೋನೆ. ಇ ಕೋನೆದ ಬಾಕಿಲ್ ಚಾವಡಿಗ್ ಜಪ್ಪುನು. ಬಾಕಿಲುಲು ಕೋನೆದ ಉಲಾಯಿಗೆ ಜಪ್ಪುನು, ಬಾಕಿಲ್ ದಾರಂದ ಚಾವಡಿ ಬೊಕ್ಕ ಕೋನೆದ ನಡುತ ಗೋಡೆಡ್ ಇಪ್ಪುನು. ಅಡ್ಪಿಲ್ಲಡ್ ಒಂಜಿ ಕಂಡಿ, ಚಾವಡಿಡ್ ಒಂಜಿ ಕಂಡಿ. ಚಾವಡಿದ ಎದುರು ಮೆಯಿಟ್ ಗೋಡೆ ಇಜ್ಜಿ. ಮರಿಯಾಲೊಗು ಅರಲ್ ಬೀಜಂದಿನಲ್ಕ ಗಿಡ್ಕೆ ಕಟೊಂದು ಇತ್ತೆರ್. ಅರೆಗಾಲೊಡು ಚಾವಡಿದ (ಬೊಕ್ಕ ಪಡ್ಸಾಲೆದ) ಎದುರುಡು ದೊಂಪ ಪಾಡೊಂದು ಇತ್ತೆರ್.
ಎಂಕಲ್ನ ಇಲ್ಲಲ್ಪದ ದುಂಬುದ ಪೂರಾ ಮುಲಿತ ಇಲ್ಲುಲು ಇಂಚೆನೇ ಇತಿನಿ. ಅಡ್ಪಿಲ್ಲ್ದ ಬರಿತ ಕೋನೆಗ್ ಇಸೇಸವಾದ್ ಪಡ್ಸಾಲೆ ಪನ್ಪಿನ ಕ್ರಮ ಇತ್ಜಿ. ಉಲಾಯಿ ಇಲ್ಲ್ ಪನೊಂದು ಇತ್ತ. ನಾಲಾಜಿ ಅಂಜೋವು ಇತಿನ ಒಂಜಿ ಇಲ್ಲಡ್ ಚಾವಡಿದ ಬಲತ ಮೆಯಿಟ್ ಕುಡೊಂಜಿ ಕೋನೆ ಇತ್ಂಡ್. ಉದ್ದೊಡು, ಅಗೆಲೊಡು ಒಂತೆ ಎಚ್ಚಿ ಕಮ್ಮಿ ಇಪ್ಪು. ಪತ್ತರೆ ಕೋಲು (ಕೋಲು = ರಡ್ಡ್ ಅಡಿ?) ಉದ್ದ ಎಚ್ಚಿನ ಇಲ್ಲುಲು. ನಾಲರೆ ಕೋಲು ಅಗೆಲ. ಏಲಡಿ ಅಗೆಲದ ಚಾವಡಿ, ರಡ್ಡ್ ಅಡಿ ಅಗೆಲದ ಜಗಲಿ. ಅಡ್ಪಿಲ್ಲ್, ಪಡ್ಸಾಲೆಲಾ ಏಲ್-ಏಲರೆ ಅಡಿ ಅಗೆಲ. ಐಕ್ಲೆನ ಎದುರುದ ಜಗಲಿ ಒಂತೆ ಎಚ್ಚ ಅಗೆಲ (ಬವುಸ ರಡ್ಡರೆ ಅಡಿ). ಅಡ್ಪಿಲ್ಲ್ ದ ಎದುರು ಜಗಲಿದ ಮುಡಾಯಿ ಮೂಲೆಡ್ ಕೋರಿದ ಗೂಡು. ಪಡ್ಸಾಲೆಗ್ ಪೊಗ್ಗುನ ಬಾಕಿಲ್ದ ತಡ್ಯದ ಪಿದಾಯಿ (ಜಗಲಿಡ್) ಎಲ್ಯ ಒಂಜಿ ಮುಟ್ಲು, ಐತ ಸರ್ತ ಜಗಲಿ ಕಡತ್ದ್ ದೊಂಪೊಡು ಒಂಜಿ ಮುಟ್ಟಿ ಕಲ್ಲ್. ಬೊಕ್ಕೊಂಜಿ ಚಾವಡಿಗ್ ಜಗಲಿಗಾದ್ ಮಿತ್ತ್ ಪೋವರೆ ದೊಂಪೊಡು ಕುಡೊಂಜಿ ಮುಟ್ಟಿ ಕಲ್ಲ್. ಚಾವಡಿದ ಅರುಟು, ಜಗಲಿದಲ್ಪ ದತ್ತ್ ಬಲತ್ತ್ಡ್ ರಡ್ಡ್ ಕಂಬ, ಆ ಕಂಬೊಲೆನ ಮೇಲ್ ಡೆ ಚಾವಡಿದ ಬಡಕಾಯಿ ಗೋಡೆಡ್ದ್ ಪಡ್ ಸಾಲೆದ ಬಡಕಾಯಿ ಗೋಡೆ ಮುಟ್ಟ ಪಟ್ಯ. ಇ ಪಟ್ಯಡ್ದ್ ಚಾವಡಿದ ಪಡ್ಡಾಯಿ ಗೋಡೆಗ್ ನಾಲ್ ತೋಲ್. ಇಲ್ಲದ ಕುಬಲ್, ತಂಪು, ತೋಲ್, ಪಟ್ಯ, ಗರು, ತಲಕೆ, ಮುಲಿ, ಕರ್ಮುಲಿ, ಬಾಜಿರ್ದ ಪಲಾಯಿ ದಾದ ಪಂದ್ ಇತ್ತೆದಕುಲು ಪಿಂದ್ ಇಪ್ಪಯೆರ್. ಪತ್ತಸ್, ಕಲೆಂಬಿ, ಕಲಸೆ, ಕಸೆಟ್ಟಿ, ಮನೆ, ಕೈಲ್, ಮಲ್ಲಾಯಿ, ತಟ್ಟಿ, ಕುಡುಪು, ಒಲಿತ ಪಜೆ, ಲಾಂಟನ್ ನೆಕ್ಲೆನ ಪುದರ್ ಕೇಂದ್ ಇಪ್ಪಯ ಇತ್ತೆದ ಜೋಕುಲು. ಇಲ್ಲ ಪಿದಾಯಿದ ಸೊತ್ತುಲಾಯಿನ ನುಗ, ನಾವೇರ್, ಪುಡ್ಪುದ ಬಡು, ಕೊಟ್ರೆ, ಗೋರಿ, ಕೈಗೋರಿ, ದಾಮಾಸ್, ಪೊಲಿಮನೆ, ಬೈತಾಡ್, ತೊಡಂಕ್, ಕಬೆಕೊಲು, ಕನ್ನಡಿ ಪುಡಾಯಿ, ಕುರ್ಕಿಲ್, ಕುತ್ತರಿ, ಮಕ್ಕೆರಿ, ತಡ್ಪೆ, ಸಾರ್ನೆ, ಕಾಂಟ್ಯ (ಕುರುವೆ), ಪುಡಾಯಿ, ಕುರುವೆ, ಮನ್ಪ್ಯು, ನೀರ್ ಒಯಿಪುನ ಬಲ್ಲ್, ಅಲಸ್ ಬಲ್ಲ್, ಜತ್ತಗದ ಬಲ್ಲ್, ಗೊಂಡೆ ಬಲ್ಲ್… ಮುಗ್ಯಂದ್ ಪಟ್ಟಿ.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ.
