ಅಕ್ಬರ್ ಬೊಕ್ಕ ಬೀರ್ ಬಲ್ಲ್ ಮೊಕಲೆನ ಅರ್ತಿಕುಸಲ್ ದ ಬಗೆಟ್ ಕೇಂದ್ ಇಪ್ಪರ್. ಅಂಚ ಒಂಜಿ ದಿನ ಅರಸು ಚಾವಡಿಡ್ ಅಕ್ಬರೆ ಪನ್ಪೆ “ಕೋಡೆ ರಾತ್ರೆಡ್ ಎಂಕ್ ಒಂಜಿ ಕನ ಕಟಿನಿ. ಯಾನ್ಲಾ ಬೀರ್ ಬಲ್ಲೆಲಾ ಇರ್ವೆರೇ ಕಾಡ ತಾದಿಡೆ ನಡತೊಂದು ಪೋವೊಂದು ಇತ್ತ. ಅಪಗ ಬಲ್ಲೆಡ್ದ್ ಒಂಜಿ ಪಿಲಿ ಲಕ್ ದ್ ಎಂಕಲೆನ್ ಗಿಡ್ತೊಂದು ಬತ್ತ್ಂಡ್. ಜೀವ ಕಯಿಟ್ ಪತೊಂದು ಬಲಿಪುನ ರಬಸೊಡು, ತೂಪ ತೂಪ ಬೀರಬಲ್ಲೆ ಪೋದು ಪೀತ ಗುರಿಕ್ ಬೂರಿಯೆ. ಯಾನ್ ಪೋದು ತಿಗತ ಗುರಿಕ್ ಬೂರಿಯೆ”. ಉಂದೆನ್ ಕೇಂಡಿನೇ ಆ ರಾಜ ಸಬೆಟ್, ಬೀರಬಲ್ಲನ ಮಿತ್ತ್ ನಂಜಿ ಕಾರೊಂದಿತ್ತಿನ ಮಸ್ತ್ ಜನ ಅಡ್ಡಡ್ಡ ಬೂರ್ದು ತೆಲಿಪರೆ ಪತಿಯೆರ್. ಅಪಗ ಬೀರಬಲ್ಲೆ ಅರಸುಡ ಕೇನುವೆ “ಬೊಕ್ಕ ದಾದಂಡ್?” ಐಕ್ ಅರಸು ಪನ್ಪೆ “ಬೊಕ್ಕ ಎಂಕ್ ಎಚ್ಚರ್ಗೆ ಆಂಡ್”. ಅಪಗ ಬೀರಬಲ್ಲೆ ಪನ್ಪೆ “ಎಂಕ್ ಲಾ ಅವ್ವೇ ಕನ ಕಟ್ ದ್ಂಡ್. ಐಡ್ದ್ ಬೊಕ್ಕ ಇರ್ವೆರಪ್ಪ ಗುರಿಡ್ದ್ ಮಿತ್ತ್ ಬತ್ತ. ಮೀಕ ಪಂದ್ ಸುತ್ತಾ ನೀರ್ ನಾಡಿಯ, ಅಲ್ಪ ಒಲ್ಪಲಾ ನೀರೇ ಇತ್ತುಜಿ”. ಅಕ್ಬರೆ ಬೊಕ್ಕ? ಬೊಕ್ಕ? ಪಂದ್ ಬಕ್ಕನ್ಪುವೆ. ಬೀರಬಲ್ಲೆ ನಿದಾನೊಗು ಪಂಡೆ, ಬೊಕ್ಕ ದಾದ ಮಲ್ಪುನು, ಇರೆ ಮೆಯಿನ್ ಯಾನ್ ನಕ್ಕ್ ದ್ ಗೆತ್ತಿನಿ, ಎನ್ನ ಮೆಯಿನ್ ಈರ್ ನಕ್ಕ್ ದ್ ಗೆತ್ತಿನಿ.
ಅಂಚ ಬೊಕ್ಕೊರ ಇರ್ವೆರಪ್ಪ ಕುಕ್ಕು ಕುತ್ತುದು ತಿಂದ್ ದ್ ಕುರಂಟ್ ಜುಂಬಿಯೆರ್. ಅಕ್ಬರೆ ಜುಂಬಿನ ಕುರಂಟ್ ಲೆನ್ ಪೂರ ಬೀರಬಲ್ಲನ ಬಟ್ಟಲ್ ಗ್ ಪಾಡಿಯೆ. ಕುಕ್ಕುಲು ಪುರಾ ಮುಗ್ಗಿನಗ, ಅಕ್ಬರೆ “ಇ ಆವೊಲಿ ಮಾರಾಯ, ಪೂರಾ ಕುಕ್ಕುಲಾ ಇ ಒರಿಯೇ ತಿಂದಿನ?” ಕೇಂಡೆ. ಬೀರ್ ಬಲ್ಲೆ ಪಂಡೆ, ಕುಕ್ಕು ತಿನ್ಪಿನಗಲೆನ್ ತೂತೆ, ಆಂಡ ಕುರಂಟ್ ಲಾ ತಿನ್ಪಿನಾರೆನ್ ಇನಿ ಸುರು ತೂಯಿನಿ!!!!.
ಬರವು : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ
