ಎಂಕುಲು ಎಲ್ಯ ಉಪ್ಪುನಗ ಅಮ್ಮ ಯಾಪಾಲ ಪನೊಂದು ಇತ್ತೆರ್, ನಮ್ಮ ಬಾಯಿಡ್ ಎಪಲ ಎಡ್ಡೆ ಪಾತೆರ ಪನೊಂದ್ ಉಪ್ಪುಡುಗೆ. ಅವುಲ ಪೋಸಗ್ ಬಾಯಿರ್ದ್ ಬೊರ್ಚಾಂದಿನ ಪಾತೆರ ಬರ್ರೆ ಬಲ್ಲಿಗೆ. ದಾಯೆಗ್ ಪಂಡ ದೇವೆರ್ ಗೆ ಯಾಪಾಲ ತಥಾಸ್ತು ತಥಾಸ್ತು ಪಂದ್ ಪನೊಂದ್ ಉಪ್ಪುವೆರ್ ಗೆ. ಅಪಗ ನಮ್ಮ ಬಾಯಿರ್ದ್ ಬೊರ್ಚಾಂದಿನ ಪಾತೆರ ಬತ್ತ್ಂಡ ಅವು ಅಂಚೆನೆ ಅಪುಂಡ್ಗೆ. ಆ ಪೋರ್ತ್ ಗ್ ದೇವೆರೆನ ನಾಮಸ್ಮರಣೆ ಮಲ್ಪೊಡ್ ಗೆ. ಆಯ್ಕಾದ್ ಬಯ್ಯದ ಪೋರ್ತುಗ್ ಭಜನೆ ಪನೊಂದ್ ಇತ್ತ. ಅಂಚನೆ ನಮ ಯಾಪಾಲ ಲಾಯಿಕ್ ದ ಪಾತೆರ ಪನೊಂದ್ ಉಪ್ಪೋಡ್ ಪಂದ್ ನಮ್ಮ ಅಮ್ಮಾ ಪನೊಂದ್ ಇತ್ತೆರ್. ಅದಗ ಯಂಕ್ ಉಂದೆತ ಮಿತ್ತ್ ಸಂಶಯ ಬರೋಂದ್ ಇತ್ತ್ಂಡ್. ಉಂದ್ ಸತ್ಯ ಉಪ್ಪುವ? ದೇವೆರ್ನ ತಥಾಸ್ತು ನಂಕ್ ಎಂಚ ತಾಗ್ ನು ಪಂದ್. ಆಂಡಲ ‘ಅಮ್ಮ ಪಂಡಿನ ವೇದ ವಾಕ್ಯ’ದಂಚ ನಂಬೊಂದ್ ಇತ್ತ. ಬೊಕ್ಕ ಯಾನ್ ಕಾಲೇಜುಡ್ ಭೌತಶಾಸ್ತ್ರ ಕಲ್ತೊಂದು ಉಪ್ಪುನಗ, ಅವುಲ್ ಫಿಸಿಕ್ಸ್ ದ ಸುರುತ ಸಿದ್ಧಾಂತನೇ “ಎನರ್ಜಿ ಕ್ಯಾನ್ ನೀಥರ್ ಬಿ ಕ್ರಿಯೇಟೇಡ್ ನಾರ್ ಡಿಸ್ಟ್ರಾಯ್ಡ್ ” ಪಂದ್ ಕಲ್ಪರೆ ಇತ್ತ್ಶಂಡ್. ಅಂಚ ಪಂಡ ಶಕ್ತಿ ಪಂದ್ ಪನ್ಪಿನೆನ್ ರಚಿಸರೆಲ ಆಪುಜಿ ಬೊಕ್ಕ ನಾಶ ಮಲ್ಪೆರೆಲಾ ಆಪೂಜಿಗೆ. ಅವು ಒಂಜಿ ರೂಪರ್ದ್ ಬುಕ್ಕುಂಜಿ ರೂಪಗ್ ಬದಲಾಪುಂಡ್ ಗೆ. ಉಂದೆಕ್ ಫಿಸಿಕ್ಸ್ ಡ್ “ಲಾ ಆಫ್ ಕನ್ಸರ್ವೇಷನ್ ಆಫ್ ಎನರ್ಜಿ” ಪಂದ್ ಪನ್ಪೆರ್. ಶಕ್ತಿದ ಸಂರಕ್ಷಣೆ ನಿಯಮದ ಪ್ರಕಾರ “ಶಕ್ತಿ’ ಏಪಲ ಸ್ಥಿರ. ವಿಜ್ಞಾನಿನಕಲೆಗ್ ಶಕ್ತಿದ ಮೂಲ ಒಲ್ತ್ರ್ ದ್ ಪಂದ್ ನನಲ ಗೊತ್ತಿಜ್ಜಿ. ಅಕುಲು ನನಲ ಆಯ್ತ ಬಗ್ಗೆ ಅನ್ವೇಷಣೆ ಮಲ್ತೊಂದ್ ಉಲ್ಲೆರಿಗೆ. ಉಂದುವೇ ಆದಿ ಅಂತ್ಯ ಇಜ್ಜಂದಿನ ಶಕ್ತಿ. ಐನೇ ನಮ ದೇವರ್ ಪಂದು ಪನ್ಪ ಅತೆ!
“ಸೌಂಡ್ ಇಸ್ ಅ ಫಾಮ್ ಆಫ್ ಎನರ್ಜಿ’ ಪಂಡ “ಶಬ್ದ”ಲಾ ಒಂಜಿ ಶಕ್ತಿದ ರೂಪಾಗೆ. ಅವು ಕಂಪನದ ಮೂಲಕ ತರಂಗದ ಲೆಕ್ಕ ಪೋದ್ ನಮ್ಮ ಕೆಬಿಕ್ ಕೆನುಂಡ್ ಗೆ. ಹಿಂದೂ ತತ್ವಶಾಸ್ತ್ರದ ಪ್ರಕಾರ “ಓಂ” ಪನ್ಪಿನ ಶಬ್ದ ಬ್ರಹ್ಮಾಂಡದ ಆದಿ ಸ್ವರೂಪದ ಧ್ವನಿಗೆ. ಮಾತಾ ಸೃಷ್ಟಿದ ಮೂಲ ಬೊಕ್ಕ ಜೀವಿಲೇನ್ ಒಂಜೆಕ್ಕೊಂಜಿ ಸೇರಾವುನ ಕಂಪನ ಪಂದ್ ಪನ್ಪೆರ್. ಉಂದ್ ಬ್ರಹ್ಮಾಂಡದ ಅಡಿಪಾಯಗೆ. ಅಂಚಾದ್ ನಮ ಪಾತೆರುನ ಶಬ್ದ ನಮ್ಮ ಸುತ್ತಮುತ್ತದ ಪ್ರಪಂಚಡ್ ಸಕಾರಾತ್ಮಕ ಬದಲಾವಣೆ ಕನಯೆರೆ ಸಾಧ್ಯ ಉಂಡು. ಶಬ್ದಲು ಶಕ್ತಿದ ರೂಪ. ಶಕ್ತಿ ಎಂಚ ನಷ್ಟ ಅಪುಜೋ ಅಂಚನೇ, ನಮ ಪಾತೆರ್ ನ ಶಬ್ದಲು ನಷ್ಟ ಅಪುಜಿ. ನಮ್ಮ ಬಾಯಿರ್ದ್ ಬರ್ಪಿನ ಶಬ್ದಲೆಗ್ ಲಾ ಒಂಜಿ ಶಕ್ತಿ ಉಪ್ಪುಂಡು. ನಮ ದಾದ ಪಾತೆರುವ ಅವುಲ ಒಂಜಿ ಶಕ್ತಿದ ರೂಪ. ಎಡ್ಡೆ ಪಾತೆರ್ಂಡ ಎಡ್ಡೆ, ಪಡಿಕೆ ಪಾತೆರಂಡ ಪಡಿಕೆ. ಶಬ್ದಗ್ ಏತ್ ಶಕ್ತಿ ಉಂದು ಪಂದ್ ವಿಜ್ಞಾನಿನಕುಲು ಒಂಜಿ ಪ್ರಯೋಗ ಮಲ್ತ್ ತೂಯೆರಿಗೆ. ರಡ್ಡ್ ಬೇತೆ ಬೇತೆ ತೈಕುಲೆನ್ ಗೆತೊಂಡೆರಿಗೆ. ಒಂಜಿ ತೈತ ಕೈತಲ್ ದಿನಾಲಾ ನೆರೊಂದಿತ್ತೆರಿಗೆ, ಬೋರ್ಚಂದಿನ ಪಾತೆರ ಪನ್ನೊಂದು ಇತ್ತೆರಿಗೆ. ಬುಕ್ಕೊಂಜಿ ತೈತ ಕೈತಲ್
ಎಡ್ಡೆ ಉತ್ಸಾಹ ಕೊರ್ಪಿನ ಪಾತೆರ ಪನೊಂದು ಇತ್ತೆರ್ ಗೆ. ಒಂತೆ ದಿನರ್ದ ಬೊಕ್ಕ ಬೊರ್ಚಾಂದಿನ ಪಾತೆರ ಕೆನೊಂದ್ ಇತ್ತಿನ ತೈ ತೈತಂಡ್ ಗೆ. ಬೊಕ್ಕ ಎಡ್ಡೆ ಪಾತೆರ ಕೇನೊಂದು ಇತ್ತಿನ ತೈ ಸೋಕುಡ್ ಮಲ್ಲಾಂಡ್ ಗೆ. ನೆರ್ಡ್ ನಂಕ್ ಗೊತ್ತಾಪುಂಡು ಒಂಜಿ ಎಡ್ಡೆ ಶಬ್ದ ಬೊಕ್ಕ ಕೆಟ್ಟ ಶಬ್ದ ಏತು ಪರಿಣಾಮ ಕೊರ್ರೆ ಸಾಧ್ಯ ಉಂಡು ಪಂದ್. ಅಂಚೆನೇ ನಮ ಜೋಕುಲೆಡ ಎಡ್ಡೆ ಎಡ್ಡೆ ಶಬ್ದ ಪಾತೆರ್ದ್, ಅಕಲೆನ್ ಉತ್ಸಾಹ ಕೋರ್ಪಿನಂಚಿನ ಪಾತೆರಾಂಡ ಅಕುಲ್ ಎಡ್ಡೆ ಆಡ್ ಮಲ್ಲ ಆಪಿನ ಅವಕಾಶ ಉಂಡು. ಖಾಲಿ ಜೋಕುಲೆ ಅತ್ತಂದೆ ನಮ ಮತೆರ್ಡಲ ಎಡ್ಡೆ ನೇ ಪಾತೆರೊಡು . ಎಡ್ಡೆ ಪಾತೆರ ಜನಕಲೆನ್ ಎಡ್ಡೆ ಕೆಲಸ ಮಲ್ಪರೆ ಒಯ್ಪುಂಡು ಅತೆ .ಅಯ್ಕೇ ಅಮ್ಮ ಪನೊಂದ್ ಇತ್ತಿನಿ ನಮ್ಮ ಬಾಯಿಡ್ ಎಡ್ಡೆ ಪಾತೆರೆ ಬರೊಂದ್ ಉಪ್ಪೊಡ್ ಪಂದ್!
ಅಂಚೆನೆ ನಮ ಮಂತ್ರ, ಜಪ, ಭಜನೆ ಪನೊಂದು ಇತ್ತಂಡ ನಮ್ಮ ಮನಸ್ಸ್ ದ ಆರೋಗ್ಯಗ್ ಲ ಎಡ್ಡೆ. ಆಧ್ಯಾತ್ಮಿಕ ರೀತಿಡ್ ಲ ಎಡ್ಡೆ ಪ್ರಯೋಜನ ಉಂಡು. ಮನಸ್ಸದ ಒತ್ತಡ ಕಮ್ಮಿ ಮಲ್ಪುಂಡು. ಮನಸ್ಸದ ಬೇನೆ , ಕೋಪ ದೂರ ಮಲ್ತ್ ದ್ ಶಾಂತಿ, ನೆಮ್ಮದಿ ಕೊರ್ಪುಂಡು. ಮನಸ್ಸ್ ದ ಬೊಕ್ಕ ಜೀವದ ಸೀಕ್ ಲ, ಬೇನೆಲ ಕಮ್ಮಿ ಅಪುಂಡು. ಉಂದೆತ ಈತ್ ಮಾತ ಪ್ರಯೋಜನ ನಮ್ಮ ಹಿರಿಯಕುಲು ದುಂಬೆ ತೆರಿದಿತ್ತೆರ್. ಅಮ್ಮ ಸೈನ್ಸ್ ಕಲ್ದಿಜೆರ್ಡಲ ಪಿರಾಕ್ ದಕುಲು ಪಂತಿನ ಪಾತರ ಮದದಿಜೆರ್. ನಮ್ಮ ಹಿರಿಯಾಕುಲು ಪಂತಿನ ಪಾತೆರ ಎಪಲ ತಪ್ಪಾವಂದ್. ವೈಜ್ಞಾನಿಕ ರೂಪಡ್ ಆಕಲೆಗ್ ಪನರೆ ತೆರಿಜಿಡಲಾ, ಅಯ್ಕ್ ಒಂಜಿ ಕಾರಣ ಇತ್ತ್ಂಡ್ . ಹಿರಿಯಾಕಲ್ ನ ಪಾತೆರ ನಮ ಎದುರು ದೀದ್ ದುಂಬು ದುಂಬು ಪೋಯಿ ಅತೆ.!
ಬರವು : ಅಶ್ವಿತಾ ಶೆಟ್ಟಿ ಇನೋಳಿ (ಮುಂಬೈ)
