ಮೈಸೂರು ಯುನಿಟಿ ಮೂವೀಸ್ ನಿರ್ಮಾಣದ, ಶರತ್ ಬಿಳಿನೆಲೆ ನಿರ್ದೇಶನದ ಫೈಜೂ ಮತ್ತು ಹುಂಜಾ ಪನ್ಪಿ ಜೋಕುಲೆನ ಕನ್ನಡ ಸಿನೆಮಾ ವಿಶ್ವವಿಖ್ಯಾತ ಮೈಸೂರು ದಸರಾ ಚಲನಚಿತ್ರೋತ್ಸವಡ್ ತೀರ್ಪುಗಾರೆರೆ ಪುಗರ್ತೆ ಪಡೆದ್ ದಸರಾ ಸಿನೆಮಾ ಪರ್ಬಗ್ ಆಯ್ಕೆ ಆದ್, ಮೈಸೂರು ಝೂ ಕೈತಲ್ದ ಮಾಲ್ ಆಫ್ ಮೈಸೂರುದ ಐನಾಕ್ಸ್ ಚಿತ್ರಮಂದಿರಡ್ ತೂಪರಿಕೆ ಆಪುನ ಒರುಟು ಊರ ಪರವೂರ ಜನಮಂದೆಲೆ ಮನಸ್ ಗೆಂದ್ಂಡ್. ಆತೇ ಅತ್ತಂದೆ ಮಂಡ್ಯ ಜಿಲ್ಲೆದ ಶ್ರೀರಂಗಪಟ್ಟಣದ ಜೋಕುಲೆ ದಸರಾದ ಚಲನಚಿತ್ರೋತ್ಸವಗ್ ಫೈಜೂ ಮತ್ತು ಹುಂಜಾ ಸಿನೆಮಾ ಆಯ್ಕೆ ಆದ್, ಶ್ರೀರಂಗಪಟ್ಟಣ ಗಂಜಾಂ ರೋಡ್‌ದ ಶ್ರೀದೇವಿ ಚಿತ್ರಮಂದಿರಡ್ ಬೊಕ್ಕ ಅರಕೆರೆ ಮಂಜುನಾಥ ಚಿತ್ರಮಂದಿರಡ್ ರಡ್ಡ್ ದಿನ ಪ್ರದರ್ಶನ ಆದ್ 7 ಶಾಲೆಲೆನ ಜೋಕುಲು, ಕಲ್ಪಾದಿಲ್ ಸೇರಿನಂಚ ಮಸ್ತ್ ಜೋಕುಲು, ಮಲ್ಲಕ್ಲ್ ತೂದು ಮೆಚ್ಚಿಯೆರ್. ಅವೆನ್ನ ಒಟ್ಟುಡು ಪ್ರಸ್ತುತ ಫೈಜೂ ಮತ್ತು ಹುಂಜಾ ಸಿನೆಮಾ ತೆಲುಗು ಬೊಕ್ಕ ಹಿಂದಿ ಬಾಸೆಲೆಗ್ ಡಬ್ಬಿಂಗ್ ಆವೊಂದುಪ್ಪುನವು ಪೆರ್ಮೆದ ವಿಚಾರ.
ಫೈಜೂ ಮತ್ತು ಹುಂಜಾ ಸಿನೆಮಾ ನಿರ್ದೇಶಕೆರ್ ಆದುಪ್ಪುನ ಶರತ್ ಬಿಳಿನೆಲೆ ತುಳು ಸಾಹಿತಿ ಬೊಕ್ಕ ಲೇಖಕೆ, ಈ ಸಿನೆಮಾಡ್ ತುಳು ಲಿಪಿ ಕಲ್ಪಾದಿ ಆದುಪ್ಪುನ ಶ್ರೀಶಾವಾಸವಿ ತುಳುನಾಡ್ ಸಾಹಿತ್ಯ ಬರೆದ್, ಕಲ್ಪಾದಿನ ಪಾತ್ರಡ್ ಪೋಷಕ ನಟಿಯಾದ್ ನಟನೆ ಮಲ್ಪುನ ಒಟ್ಟುಡು ಸಹನಿರ್ದೇಶನ ಮಲ್ದೆರ್. ಅತ್ತಂದೆ ಆರ್ನ ಮಗೆ ಧೃತೀಜ್ ತುಳುನಾಡ್ ತನ್ನ ನಟನೆದ ಒರುಟು ಕನ್ನಡ ಸಿನೆಮಾರಂಗದ ಬಾಲನಟೆ ಆದ್ ಮೂಡ್ದ್ ಬೈದೆರ್. ಸರಕಾರಿ ಶಾಲೆದ ಮಹತ್ವ, ಸಾಮಾಜಿಕ ಸಾಮರಸ್ಯದ ತಿರ್ಲ್ ಪತೊಂದು ಮೂಡ್ದ್ ಬೈದಿ ಉಮರ್ ಖಾನ್ ನಿರ್ಮಾಣದ ಈ ಸಿನೆಮಾದ ಕತೆನ್ ಬೆಳಗೊಳ ಬಾಬು ಪುಗರ್ತೆದ ಸಾಹಿತಿ, ಕಲ್ಪಾದಿ ಆದುಪ್ಪುನ ಸೈಯದ್ ಖಾನ್ ಬೆಳಗೊಳ ಬರೆದ್, ಮುಖ್ಯ ಭೂಮಿಕೆಡ್ ನೆಗತ್ ಬರ್ಪೆರ್. ನಾಯಕಿನ ಪಾತ್ರಡ್ ವರ್ಷಿಣಿ, ಬಾಲ ನಾಯಕನ ಪಾತ್ರಡ್ ಮಹಮ್ಮದ್ ಫೈಜಾನ್ ತನ್ನ ಅಭಿನಯ ಚಾತುರ್ಯ ತೋಜಾದೆರ್. ಮೂಗು ಸುರೇಶ್, ಸುಂಟರಗಾಳಿ ಲಲಿತಮ್ಮ, ಮಿಮಿಕ್ರಿ ದಯಾನಂದ್, ರಮೇಶ್ ಪಂಡಿತ್, ಆನಂದ್ ಮೈಸೂರು, ಹರವು ಲೋಕೇಶ್, ಪ್ರಸನ್ನ ಕಲ್ಲೂರು, ಕನ್ನಡಮನೆ ಶಿವನಂಜು, ಶೈಲೇಶ್ ಕದ್ರಿ, ಪುಟ್ಟಸ್ವಾಮಿ, ನಂಜುಸಿದ್ದಪ್ಪ, ಡಾ ಮುರಳೀಧರ್, ನಾರಾಯಣ ಮೂರ್ತಿ, ಸಮೀಉಲ್ಲಾ, ಆಯೂಬ್ ಖಾನ್, ಸೇರಿನಂಚ ಮಸ್ತ್ ಕಿರುತೆರೆ, ಸಿನೆಮಾ, ರಂಗಭೂಮಿ ಬೊಕ್ಕ ಪೊಸ ಕಲಾವಿದೆರ್ ಅಂಚನೇ ಶಾಲೆದ ಜೋಕುಲು ನಟನೆ ಮಲ್ದೆರ್. ಶ್ರೀಶಾವಾಸವಿ ಬರೆಯಿನ ಸಾಹಿತ್ಯಗ್ ತುಳುನಾಡ ಮೂಲದ ಜೋಸ್ಟಿನ್ ಮಾರ್ಕ್ ಡಿಸೋಜ ಸಂಗೀತ ನಿರ್ದೇಶನ ಬೊಕ್ಕ ಹಿನ್ನಲೆ ಸಂಗೀತ ಮಲ್ದೆರ್. ಶರತ್ ಬಿಳಿನೆಲೆ ಬೊಕ್ಕ ಜೋಸ್ಟಿನ್ ಮಾರ್ಕ್ ಡಿಸೋಜ ಪದೊ ಪನ್ತೆರ್. ಸಂದೀಪ್ ಹೊನ್ನಾಳಿ ಛಾಯಾಗ್ರಹಣಡ್ ಮೂಡ್ದ್ ಬೈದಿ ಈ ಸಿನೆಮಾನ್ ಶಿವಕುಮಾರ್ ಬೆಂಗಳೂರು ಸಂಕಲನ ಮಲ್ದೆರ್. ನಿರ್ಮಾಣ ನಿರ್ವಹಣೆ ಸುನಿಲ್ ಡಿಸೋಜಾ ಮಲ್ದೆರ್. ಸಮಾಜಗ್ ಎಡ್ಡೆ ಸಂದೇಶ ಕೊರ್ಪುನ ಈ ಜೋಕುಲೆ ಸಿನೆಮಾ ಲೋಕೊರ್ಮೆ ಗೆಲ್ಮೆದ ಬೊಲ್ಪು ತೂವಡ್ ಪಂದ್ ಎಡ್ಡೆಪುದ ಮದಿಪುಲೆನ್ ಬಾಮ್ಯುವೊ.
