ಓಲೆಡ್ ಇತ್ತಿನ ಇಸಯೊನು ಇಂದ್ರೆ ಕೇಂದ್ ಪಿಂದೊಂಡೆ. ಅರ್ಜುನೆ ಓಲೆಡ್ ಬರೆತಿನ ನಮೂನಿ (ರೀತಿ)ನ್ ಕೇಂದ್, ಇಂದ್ರಗ್ ಕಾಲರುದ್ರಡ್ದ್ ಲಾ ಎಚ್ಚಿನ ಗರ್ವ ಬತ್ತ್ಂಡ್. ಆಯೆ “ಅರ್ಜುನೆ ಮಿತ್ತ್ ಗ್ ದಾದ ಆವು ಪಂದ್ ತೆರಿಯೊನಂದೆ, ಬಜಿ ಪೊಕ್ಕಡೆ ಅಂಮ್ಸನಿ ಕೊಚ್ಚೊಂದೆ, ದಂಡ್ ಸಾದನೆಡ್ ದೇವತೆಲೆಗ್ ನರಮಾನಿಲು ಸರಿ ಸಮನಾ?” ಪಂಡೆ. ಓಲೆಡ್ ಇತ್ತಿನ ಗಡ್ಸ್ ದ ಬೇಡಿಕೆನ್ ಕೇಂದ್, ಒರ ಇಂದ್ರೆ “ದಾದ ಉಂದು, ಕಾಲದ ಮಯಿಮೆನ, ಇಸರಂಡ ದೇವೆರೆ ಇಚ್ಛೆನ, ದೇವತೆಲೆಗ್ ಸೋಲ್ ಆಪಿನ ಸೂಚನೆನಾ ದಾದ ಪಂದ್ ತೆರಿವುಜಿ, ನರಮಾನಿಲು ದೇವಲೋಕೊಗು ಓಲೆ ಬರೆದ್, ಸೊರ್ಗಲೋಕದ ಅಪ್ಸರೆಯರ್ ಬೊಕ್ಕ ಬಾಕಿದ ವಸ್ತ್ ಲೆನ್ ಕಡಪುಡ್ದು ಕೊರು ಪಂದ್ ಕೇನುನು, ಉಂದೆನ್ ಇಸರಂಡ ದೇವೆರೆ ಪಿಂಬೆರ್” ಪಂದ್ ದೇವೇಂದ್ರೆ ಪಂಡೆ. ಪಾರ್ತೆ ಕಡಪುಡ್ದಿನ ಓಲೆ ಓದುದು ಗರ್ವ ಬತ್ತಿನ ಇಂದ್ರೆ, ಜೋರುಡೆ ಗುರೆತೆ, “ಲೆಪ್ಪುಲೆ ಬರ್ಸ ಒಡ್ಡಾವುನ ದಾರಗೆಲೆನ್, ಅಗುಲು ಅರ್ಜುನ ಪಟ್ನ ಹಸ್ತಿನಾಪುರೊಟು ಜೋರಾದ್ ಏಲ್ ರಾತ್ರೆ, ಏಲ್ ಪಗೆಲ್ ಆನೆದ ಸೂಂಡಿಲ್ ದಾತ್ ತೋರದ ದಾರೆ ಕಟ್ ದ ಬರ್ಸ ಬರ್ಪಾವಡ್, ಅರ್ಜುನನ ನಕರ ಬೊಲ್ಲೊಡು ಪೋವಡ್, ನೀರ್ ಡ್ ಮುರ್ಕಡ್, ಆಯನ ಯೋಗಿತೆ ಅಪಗ ತೆರಿದ್ ಬರು”.
ಇಂದ್ರನ ಗೂರಾಟಿಕೆನ್ ಕೇಂದ್ ಅಲ್ಪ ನಾಲ್ ಮೆಯಿಟ್ ನಿರೆದಿನ ದೇವತೆಲೆನ ನಡ್ಡೆ ಇತಿನ ನಾರದೆರ್ ತೆಲಿತೊಂದು ತೆಲಿತೊಂದು ನುಡ್ಡಿಯೆರ್ “ಇಂದ್ರಾ, ಅರ್ಜುನೆ ಕಂಬೊಗೇ ನಾಟಡ್ ಪಂದ್ ಪಗರಿ ಬುಡುದು ನಿನ್ನ ಜೀವ ಒರ್ತೆ, ಆಯೆ ನಿಕ್ಕೇ ನಾಟಡ್ ಪಂದ್ ಪಗರಿ ಬುಡ್ತುವೆಡಾ, ಆ ಕನೆ ನಿಕ್ಕ್ ಪೋಡಿದ್, ನಿಕ್ಕ್ ಕಂತದೆ ಇತುದುವಾ? ಇಂದ್ರಾ, ನಿನ್ನ ಗರ್ವ ಅಂಚಿ ಇಪ್ಪಡ್, ಅರ್ಜುನೆ ದಾದ ಮಾತ ಕೇಂದೆನಾ, ಅವ್ವೆನ್ ಮಾತ ಕೊರ್ದು ಕಡಪುಡು”. ನಾರದೆರೆ ಮದಿಪು ಕೇಂಡಿ ಇಂದ್ರೆ, “ಉಂದು ದಾದೆ ನಾರದೆರೇ, ನರಮಾನಿ ಪಾತೆರೊಗ್ ಪೋಡಿದ್ ದೇವತೆಲು ನರಮಾನಿಗ್ ಕಾನಿಕೆ ಕೊರ್ತಿನೈವ್ವೆನ್ ಈರ್ ಓಲಾಂಡಲಾ ಕೇಂದರೆ? ನಾರದೆರೆ ಉಂದೆನ್ ಪನ್ಲೆ ನಾರದರೆ ಪನ್ಲೆ” ಪನ್ನಗ, ನಾರದೆರ್ “ದೇವತೆಲೆಡ್, ರಕ್ಕಸೆರೆಡ್, ನರಮಾನಿಲೆಡ್ ಅರ್ಜುನಗ್ ಪರಿಪಾಡುನ ಬೀರೆರ್ ಏರ್ ಲಾ ಇಜ್ಜೆರ್, ಆಯನ ಪಗರಿಲೆನ ಸಾಮರ್ತ್ಯ ದಾದ ಪಂದ್ ಪನ್ಪೆ, ಕೇನ್” ಪಂದ್ ನಾರದೆರ್ ಪನ್ಪೆರ್.
ನಾರದೆರ್ “ಅರ್ಜುನಗ್ ಓಲೆ ಬರೆದ್ ಕಡಪುಡು, ಆಯನ ತಂಕಬಿಂಕದ ಸಜ್ಜಿ ತೂದು, ಬೊಕ್ಕ ಸೊರ್ಗದ ವಸ್ತುಲೆನ್ ಕಡಪುಡು” ಪಂದ್ ಇಂದ್ರಡ ಪಂಡೆರ್. ಅಪಗ ಇಂದ್ರೆ ಎಚ್ಚ ದಾಲ ಪಾತೆರಂದೆ ನಾರದೆರೆ ಮದಿಪುನು ಒತ್ತೊಂದು, ಆಯನ ಮಾನಿನ್ ಲೆತ್ತಿಗಿನ ಪ್ರಜಂಗೆ ಪನ್ಪಿನಾಯೆ ಬತ್ತೆ. ಪ್ರಜಂಗೆ ಇಂದ್ರನ ದುಂಬು ದಿಕ್ಕ್ ಗ್ ಬತ್ತ್ ದ್, ಪುಡಾಡ್ದ್, ಪೋಡಿದ್ ಉಂತುದು ಇಂದ್ರಡ ದಾದ ಪಂದ್ ಕೇಂಡಿಗಿನ, ಇಂದ್ರೆ ಪಗೆಲ ತೆಲಿಕೆಡ್ “ನಂಕೊರ ಅಂಧಾಕಾಸುರೆ ಪೋಡಿಗೆ ಪುಟ್ಟಾದ್ ಇತ್ತೆ, ಆಯೆ ಸೈತಿ ಬೊಕ್ಕ ನಂಕ್ ವಾ ಪೋಡಿಗೆಲಾ ಇತುಜಿ, ಇತ್ತೆ ಈ ಅರ್ಜುನನ ದೆಸೆಡ್ದ್ ನಂಕ್ ಕುಡೊರ ಪೋಡಿಗೆ ಪುಟಿನೈಡ್ದಾವರ ನಿನನ್ ಲೆಪುಡಾಯಿನಿ” ಪಂಡೆ. ಇಂದ್ರೆ ಅರ್ಜುನಗ್ ಓಲೆ ಬರೆಪಾದ್ ಪ್ರಜಂಗನ ಕಯಿಟ್ ಕೊರ್ದು, “ಈ ಹಸ್ತಿನಾಪುರೊಕ್ಕು ಪೋದು, ಅಲ್ಪ ಅರ್ಜುನಗ್ ಈ ಓಲೆ ಕೊರು” ಪಂಡೆ. ಪ್ರಜಂಗೆ ಅಂಚೆನೇ ಮಿತ್ತ ಮೇಗಿನ ಲೋಕೊಡ್ದು ಜತ್ತ್ ದ್, ತಿರ್ತ ಸಿರಿಬಾರಿ ಲೋಕೊಗು ಬತ್ತ್ ದ್ ಅರ್ಜುನಗ್ ಓಲೆ ಕೊರ್ಕಿನ, ಅರ್ಜುನೆ ಅವ್ವೆನ್ ಸೇನಯೆರೆಗ್ ಆ ಓಲೆನ್ ಕೊರ್ದು, “ಐಟ್ ದಾದ ಉಂಡು ಪಂದ್ ಓದುದು ಪನ್ಲೆ” ಪಂದ್ ಪನ್ಪೆ.
ನಾರದೆರೆ ಪಾತೆರದಲ್ಕನೆ ಇಂದ್ರೆ ಅರ್ಜುನಗ್ ಆಯೆ ಕೇಂದ್ ಚ್ಚಿತ್ತಿನ ವಸ್ತುಲೆನ್ ಕೊರಿಯೆರೆ ಒಪ್ಪಿದ್, ಒಂಜಿ ಓಲೆ ಬರೆದ್ ಅರ್ಜುನಗ್ ಕೊರಿಯೆರೆ ಪ್ರಜಂಗನ್ ಕಡಪುಡ್ದಿನಿ. ಆ ಓಲೆಡ್ “ಊಚಿದಾಯೆ, ದೇವತೆಲೆನ ಗುರ್ಕಾರೆ, ಬಿರ್ಸೆ, ಪಗೆಮಾನಿಲಿನ್ಪಿನ ಆನೆಲೆಗ್ ಸಿಮ್ಮದಲ್ಕ ಇಪ್ಪುನ, ರಕ್ಕಸೆರೆನ ಕಲಿಕನ ಆದಿಪ್ಪುನ ಇಂದ್ರೆ ತನ್ನ ಮೋಕೆದ ಮಗಕ್ ಮೋಕೆಡ್ ಸಂದಾಯದ ಓಲೆ ಬರೆವೊಂದುಲ್ಲೆ. ಈ ಬಯಕಿನ ವಸ್ತುಲೆನ್ ಯಾನ್ ನಿಕ್ಕ್ ಕೊರಿಯೆರೆ ತಯಾರ್ ಉಲ್ಲೆ, ಆಂಡಾ ಬೂಮಿಗ್ ಸೊರ್ಗೊಡ್ದ್ ಐಕ್ಲೆನ್ ಸಾಗಾವರೆ ಬೋಡಾಪಿನ ತಾದಿ ಈ ಮಲ್ಪೊಡು” ಪಂದ್ ಬರೆದಿತ್ತೆ. ಇಂದ್ರನ ಓಲೆನ್ ಸೇನಯೆರ್ ಓದಿಯೆರ್, ಅರ್ಜುನೆ ಆ ಓಲೆದ ಇಸಯೊನು ಕೇಂದ್ ಕುಸಿಟ್ ಬಂಜರ ತೆಲಿತ್ ದ್, “ಸೊರ್ಗೊಗುಲಾ ಬೂಮಿಗ್ ಲಾ ತಾದಿ ಮಲ್ಪುನವ್ವು ವಾ ಮಲ್ಲ ಕಜ್ಜ, ಉಂದೆನ್ ಯಾನೇ ಮಲ್ಪುವೆ, ಹರಿ ಬೆರ್ಮೆರ್ ಪಗರಿ ಬುಡುಪಿನೈಟ್ ತೋಜಾವುನ ಬಿರ್ಸಾತಿಕೆ ತೋಜಾವೆ” ಪಂಡೆ. ಇಂದ್ರಡ್ದ್ ಇಸಯೊನು ಕನತಿನ ಪ್ರಜಂಗನ್ ಲೆತ್ತ್ ದ್ “ಪ್ರಜಂಗ, ಈ ಸೊರ್ಗೊಕು ಪೋದು ದೇವೇಂದ್ರಗ್, ಆಯನ ರಾನಿ ಶಚಿದೇವಿಗ್, ಎನ್ನ ಅಪ್ಪೆಲ್ಲು ಆಯಿನ ರಂಬೆ, ಉರ್ವಸಿ ಇಂಚಿತಿನ ಸರ್ವ ದೇವತೆಲೆಗ್ ಎನ್ನ ಸೊಲ್ಮೆಲೆನ್ ತೆರಿಪಾಲ. ಅಂಚ ಅಗಲೆನ ಸುಕ ಕಷ್ಟ ಕೇಂಡಂಡ ಈಯೇ ಎಂಕ್ ಮಲ್ಲ ಬಂಧು ಆಪ” ಪಂದ್ ಪಂಡ್ ದ್ ಪ್ರಜಂಗನ್ ಸೊರ್ಗೊಗು ಕಡಪುಡುವೆ.
ಪ್ರಜಂಗೆ ಅರ್ಜುನನ ಮದಿಪುನು ಇಂದ್ರಗ್ ಮುಟ್ಟಯೆ. “ಅರ್ಜುನೆ ಎಂಕ್ ಎಡ್ಡೆ ರೀತಿಡ್ ಆಯನ ಅಸ್ತಾನೊಡು ತಮ್ಮನ ಬೊಲ್ಮನ ಮಲ್ತ್ ದ್ ಪಾತೆರ್ಪಾಯೆ, ಇಂದ್ರಾ, ಅರ್ಜುನೆ ವಿಷ್ಣುವೇ ಅತ್ತಾವಂದೆ ಬೇತೆ ನರಮಾನಿ ಅತ್ತ್, ಅಂಚಾದ್ ಸಂಸಯ ಬುಡ್ದು ಆಯೆ ಕೇಂಡಿನ ಮಾತಾ ವಸ್ತುಲೆನ್ ಕಡಪುಡು” ಪಂದ್ ಪ್ರಜಂಗೆ ಇಂದ್ರಗ್ ಪಂಡೆ. ಅರಸು ಜನಮೇಜಯ ಕೇನ್, ಇಂದ್ರೆ ಸೊರ್ಗೊಗು ಬೊಕ್ಕ ಬೂಮಿಗ್ ತಾದಿ ಮಲ್ತ್ಂಡ ಸೊರ್ಗದ ವಸ್ತುಲೆನ್ ಮಾತಾ ಕಡಪುಡ್ದು ಕೊರ್ಪೆ ಪಂದ್ ಪಂತಿನ ಪಾತೆರ ಮಾತಾ ದಿಕ್ಕ್ ಗ್ ಲಾ ಪರಡ್ಂಡ್, ಈ ಇಸಯ ತೆರಿನ ಮಾತಾ ದಿಕ್ಕ್ ದ ಅರಸುಲು ಐರಾವತ, ಕಾಮಧೇನುನು ತೂವರೆ ಸಾದರ್ನದ ನರಮಾನಿಲೆಗ್ ಸಾದ್ಯ ಇಜ್ಜಿ, ಇತ್ತೆ ತೂಪಿನ ಅವುಕಾಸ ತಿಕ್ ದ್ಂಡ್” ಪಂದ್ ತೆರಿದ್ ಇಡೀ ಬೂಮಂಡಲದ ಅರಸುನಗುಲು ಮಾತಾ ಹಸ್ತಿನಾ ನಕರಂದೊಗು ಬತ್ತೆರ್.
ಪರಸುರಾಮೆರ್, ವಸಿಸ್ಟೆರ್, ಗೌತಮೆರ್, ಬರದ್ವಾಜೆರ್, ಅತ್ರಿ ಮೇರ್, ಇಸ್ವಾಮಿತ್ರೆರ್ ಇಂಚಿತ್ತಿನ ಮಾತ ರುಸಿಕುಲು ಹಸ್ತಿನೊಗು ಬತ್ತ್ ಗಿನ, ಬೀಸ್ಮೆರ್ ವಿದುರೆರ್, ಕೃಪೆರ್, ದ್ರೋನಾಚಾರ್ಯೆರ್ ಮೊಗಲೆನ ಒಟ್ಟುಗು ಸಂತೋಸೊಡು ಎದ್ಕೊನರೆ ಬತ್ತೆರ್. ಜನಮೇಜಯ ಕೇನ್, ಬೀಸ್ಮೆರ್ ಮೊಗುಲು ಮಾತ ಬತ್ತಿ ರುಸಿಕ್ ಲೆನ್ ಮಾತೆರೆನ್ಲಾ ಪೀಟೊಲೆಡ್ ಕುಲ್ಲದ್ ಕಾರ್ ದೆಕ್ ದ್ ತೀರ್ತ ಗೆತೊಂಡೆರ್. ಗಂದ, ಸೇಸೆ ಪಾಡ್ದ್ ಸತ್ಕಾರ ಮಲ್ತ್ ದ್, ರಸಾಯನ ಕೊರ್ದು ಮುನಿಕ್ ಲೆಕ್ ತಮ್ಮನ ಮಲ್ತೆರ್. ಮಾತೆರ್ಲಾ ಗಜಪುರಿಕ್ ಬತ್ತಿನೈವ್ವೆನ್ ತೂದು ಅರ್ಜುನೆ ನನ ಕಡೆಸ ಮಲ್ಪರೆ ಬಲ್ಲಿ ಪಂದ್ ಪಿಂದೊಂದು ಮುಂಡದ ನಿಸಲ್ ದ ಎಪ್ಪರೊಗು ಕಯಿಕ್ ಲೆನ್ ದೆರ್ತ್ ದಿಕ್ಕ್ ಕಾಪುನಗಲೆಗ್ ಸೊಲ್ಮೆ ಸಂದೈತ ಮಲ್ತ್ ದ್, ಬಿರುತ ಎರುಬು (ಹೆದೆ)ನು ಊಂಕೊಗು ಏರಾದ್, ಅಕ್ಷಯ ಅಸ್ತ್ರೊನು ಜೋಡ್ಯಾದ್ ಪಿರ ಒಯಿತ್ ದ್ ಬುಡಿಯೆ.
ಬರಹ : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
