ದುಂಬೊರ್ತಿಗ್ ಮೂಜಿ ನಾಲ್ ಪೊನ್ನು ಜೋಕುಲೇ ಇತ್ತಗೆ. ಐಕ್ ಅರ್ತಿ ಪಿರ್ತಿಗ್ ಪಂದ್ ಕಡೆತ ಬಾಲೆಗ್ ಮಾಯನದ ನಿರವು ದಂಡ್ ಮಲ್ತ್ ದ್ ಅಂಟದ್, ಆನ್ ಬಾಲೆ ಪಂದ್ ಅಪ್ಪೆ ಕುಸಿ ಪಡೆವೊಂದು ಇತ್ತೊಲುಗೆ. ಬಾಲೆನ್ ಜೋರ್ ಬೆಚ್ಚ ನೀರ್ ಡ್ ಮೀಪವೊಂದು ಇತುಜೊಲು, ಜೋರು ದೆಂಬುದಗ ಪಿದಾಯಿ ಕಡಪುಡೊಂದು ಇತುಜೊಲು. ಈ ಬಾಲೆ ಒಂಜೈಕ್ ರಡ್ಡೆಕ್ ಅಪ್ಪೆನ್ ಪೊಡಿಗೆ ಕಟ್ಟಾವೊಂದು (blackmail) ಇತುಂಡುಗೆ, “ದೆಂಬುಡು ಕುಲ್ಲುವೆ” ಪಂದ್. ಉಂದು ಮಡಿವಂತೆರೆಗ್ ಒಂತೆ ಬಪ್ಪರ್ (vulgar) ಪಂದ್ ತೋಜು. ಈ ಒಂಜಿ ತುಲುವ ಪಾತೆರ ಪಂಡ್ಂಡ, ಐತ ಪಿರವುದು ಕತೆ, ಭಾವಾರ್ಥ ಜನೊಕುಲೆಗ್ ತೆರಿಯೊಂದು ಇತ್ಂಡ್. ಕೆಲವು ಜೋಕುಲು ಅಪ್ಪ್ಯೆಲ್ಲೆನ್ ಪೋಡಿಗಟ್ಟವುನ ಕೇಂದೆ “ಉಗ್ಗೆಲ್ ಗ್ ಲಾಗಿವೆ”, “ಓಲ್ಲ ಪೋದು ಜೀವ ಕೊರ್ಪೆ” ಇಂಚ. ಉಂದೆನೇ ಇಂಗ್ಲೀಷ್ ಡ್ emotional blackmail (ಭಾವನಾತ್ಮಕ ಬೆದರಿಕೆ) ಪನ್ಪೆರ್. ಅಂಚ ಏರ್ಲಾ ಅಪಗಪಗ ಪೊಡ್ಯಾವೊಂದು (ಧಮ್ಕಿ ಕೊರೊಂದು) ಇತ್ತೆರ್ ಡ ಪನ್ವೆರ್ “ದುಂಬೊಂಜಿ ಬಾಲೆ ಪಂತ್ಂಡ್ ಗೆ… ದೆಂಬುಡು ಕುಲ್ಲುವೆ ಪಂದ್”.
ಅಂಚೆನೆ ಈ ಕುಂಟುದ ನಿರವು ದಂಡ್. ಕನ್ನಡೊಡು ಕಾಗದದ ಹುಲಿ ಪನ್ಪೆರ್. ಅಂಚೆನೆ ಈ ಕುಂಟುದ ನಿರವು ದಂಡ್ ಡ್ದ್ ರಡ್ಡ್ ಬೇಲೆಲಾ ಆಪುಜಿ, ಕಾಲಿ ತೂಪರ್ಕೆಗ್ ಇಪ್ಪುನು. ಅಂಚ ಈ ಸಮಾಜೊಗು ದಾಲ ಉಪಯೋಗ ದಾಂತಿನ ಅತ್ತ್ ಡ ಪೌರುಷ ದಾಂತಿನ (ನಪುಂಸಕ) ನರಮಾನಿಗ್ ಇಂಚ ಪನ್ವೆರ್ ತುಲುವೆರ್ “ಕುಂಟುದ…. ನ್ನೆ”. ದಾಲ ಆರಬಾರ (ಜವಾಬ್ದಾರಿ) ದಾಂತೆ ಬಚ್ಚಾಲಿ ತಿರ್ಗುನಾಯಗ್ “….ನ್ನೆ ಪುಗ್ಗೆಲ್ಡ್ ಪಾಡೊಂದು ತಿರ್ಗುವೆ” ಪನೊಂದು ಇತ್ತೆರ್. “ನೀರ್ ಕಟ್ಟ್ ಪೀಕ್ ಕಲ್ಲ್ ದಕ್ಕರೆ ಬಲ್ಲಿ”. ದಾಯೆಗ್ ಪಂಡ ನಮನ ಮೇಲ್ ಗೇ ರಟ್ಟುಂಡು. ಈ ಪಾತೆರದ ಅಂತರ್ಯ ದಾದ ಪಂಡ, ತೆಟ್ಟ್ ಜನೊಕುಲೆಡ (ಮಾನ ಮರ್ಯಾದಿದ ಗುರ್ತ ದಾಂತಿನಗಲೆಡ) ಉರ್ಡರೆ (ವಾದ ಮಲ್ಪರೆ) ಪೋಂಡ, ನಮನೇ ಎಲ್ಲಿ ಆಪ ಲೋಕದಗಲೆನ ದಿಟ್ಟಿಡ್. ಸೊಂಟದ ತಿರ್ತ್ ದ, ರಂಡೆ ಮುಂಡೆ ಪನ್ಪಿ ಬಾಸೆಡ್ ಪಾತೆರುವೆರ್ ಅಗುಲು. ನಂಕ್ ಅಗಲೆನಾತ್ ತಿರ್ತ್ ಜಪ್ಪರೆ ಆಪುಜಿ. “ಮದಿಮೆದ ಇಲ್ಲಡ್ ಮುಂಡಗ್ ತಮ್ಮನ”, ಪಂಡ ಏರೆನವೋ ಮದಿಮೆಡ್, ನಂಕ್ ಬೋಡಾಪಿನಗಲೆಗ್ ತಮ್ಮನ ಸಮ್ಮನ. ನನ ಒಂಜಿ ಹೋಲಿಗೆ, ನನೊಂಜಿ ಕೈಲ್ ಪರಮಾನ, ನನೊಂತೆ ನೆಯಿ ಇಂಚ ಒತ್ತಾಯ, ತಮ್ಮನ. ನಂಕ್ ಮುಲ್ಪ ಮುಕ್ಕಾಲ್ ಕರ್ಚಿ ಇಜ್ಜಿ. ಅವ್ವೆನೇ ಕನ್ನಡೊಡು “ಯಾರದ್ದೋ ದುಡ್ಡು, ಎಲ್ಲಮ್ಮನ ಜಾತ್ರೆ” ಪನ್ಪೆರ್.
“ಪೀ ಉರ್ಚಿದ್ ಪಿರ ತೂಪೆ” ಪಂಡ ಮಹಾ ಪಿಟ್ಟಾಸಿ (ಜಿಪುಣ). ಬಂಜಿಗ್ ತಿಂದಿನೈಟ್ ಎಚ್ಚ ಪಿದಾಯಿ ಪೋಪುಂಡುಂಡಾ, ಒಂತೆ ಕಡಿಮೆ ತಿನೊಡು ಪಂದ್ ಲೆಕ್ಕ ಪಾಡುನಾಯೆ. “ಅಮ್ಮೆ ಪೀ ತಿಂತೆಡ, ಮಗೆ ಪೀಂಕನ್ ಆಂಡಲಾ ಮೂಸೆ”, ಪಂಡ ಅಮ್ಮಡ್ ಇತಿನ ವಿಶೇಷ ಗುಣ, ಸಾಮರ್ಥಯ್ಯೊಲೆಡ್ ಒಂತೆ ಆಂಡಲಾ ಜೋಕುಲೆಗ್ ಬರು ಪಂದ್. ನಿರವು ದಂಡ್ ಪಂಡ ಸಭ್ಯ ತುಲು ಬಾಸೆಡ್ ಪುರುಷ ಜನನೇಂದ್ರಿಯ. ಸಲೀರ ಪಂಡ ಸ್ತ್ರೀ ಜನಕಾಂಗ. ಋತು ಚಕ್ರೊ (periods) ಗು ಪಿದಾಯಿ ಆಪಿನಿ, ಋತುಸ್ರಾವೊಗು ಮೆಯಿಡ್ದ್ ತಮೆಲುನು, ಯೂರಿನ್ ಗ್ ಮೈನೀರ್, ಮಲ (ಪೀ) ವಿಸರ್ಜನೆಗ್ ಪಿದಾಯಿ ಕುಲ್ಲುನು ಪನ್ಪೆರ್ ಶಿಷ್ಟ ತುಲು ಬಾಸೆಡ್. ಮೈಥುನೊಗು “ಇನೆ ಇಡೆಪುನು”, “ಮೋಳ ಸೆರಪ್ಪುನು” ಪನ್ಪೆರ್ ಪಾಡ್ದನೊಲೆಡ್. ಪಿದಾಯಿ ಆಪಿನಿ ಬೊಕ್ಕ ಪಿದಾಯಿ ಕುಲ್ಲುನು, ನೆಕ್ಕ್ ಲೆನ ಅರ್ತ ಬೇತೆ ಬೇತೆ. ಪಿದಾಯಿ ಆಯಿನಾಲ್ ದುಂಬುಡು ಪಿದಾಯಿ ಕುಲ್ಲೊಂದು ಇತ್ತೊಲು, ಆ ಇಸಯ ಬೇತೆ. ಅಂಚನೆ, ಬಂಜಿಡ್ದ್ ಬತ್ತಿನ ಬೊಕ್ಕ ಬಂಜಿಡ್ದ್ ಪೋಪಿನ ಬೇತೆ ಬೇತೆ. ಬಂಜಿಡ್ದ್ ಬತ್ತಿನವು ನಮ ಪೆತ್ತಿನ ಜೋಕುಲು, ಬಂಜಿಡ್ದ್ ಪೋಪಿನವು ಪೀ. ಇಂಚಿತ್ತಿನ ಏತೋ ಮಾತ ಪಾತೆರೊಲು ಕೋಡಿ ಸೇರ್ದ. ಇತ್ತೆದ ಎಚ್ಚಿನಗಲು ಪಿನಯೆರ್, ಪಿಂದಿನಗುಲಾ ಪನರೆ ದುಂಬು ಪಿರ ತೂಪೆರ್. ಇತ್ತೆದ ಸಭ್ಯ, ಮಡಿವಂತಿಕೆದ ಸಮಾಜ ಅತ್ತೇ?
ಲೇಖನ : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ
