ನಮ್ಮ ತುಲುವಾ ನಾಡ್ ಡ್ (ಅವಿಭಜಿತ ದಕ್ಷಿಣ ಕನ್ನಡೊಡು) ಪುಂಡಿ, ನೀರ್ ದೋಸೆ, ಗಟ್ಟಿಗ್ ಸಮದಂಡಿದ ಬೊಕ್ಕೊಂಜಿ ಅಡ್ಡೆನೇ ಕಪ್ಪರುಟ್ಟಿ. ಮುಪ್ಪ ನಲ್ಪ ವರ್ಸ ದುಂಬುಡು ದೋಸೆ, ಇಡ್ಲಿ, ಅಪ್ಪದಡ್ಡೆದ ಎದುರುಡು ಈ ಅಡ್ಡೆಗ್ ಒಂತೆ ಮರ್ಯೆದಿ ಕಮ್ಮಿ. ಎಂಕಲೆಗ್ ಇನಿ ಚಾತ ಬಾಯಿಗ್ “ಕಪ್ಪರುಟ್ಟಿ” ಪಂದ್ ಜಾಕಿನೊಡ್, ನಾಸಿಗೆಡ್ ಪನೊಂದಿತ್ತಿನ ಕಾಲ ಇತ್ಂಡ್. “ಬಲ್ಲವರೆ ಬಲ್ಲರು ಬೆಲ್ಲದ ಸವಿಯ” ಪಂಡಿಲೆಕ್ಕ, ತಿಂದಿನಾಯಗೇ ಗೊತ್ತು ಕಪ್ಪರುಟ್ಟಿದ ರುಚಿ (ಸಜ್ಜಿ). ಕಪ್ಪಲ್+ ರುಟ್ಟಿ = ಕಪ್ಪರುಟ್ಟಿ, ಲೋಪ ಸಂಧಿ. ಪಂಡಾ, ದರಿದಿನ ಮನ್ನ ಗುರ್ಕೆ (ಮಂಡೆ)ದ, ಅಗೋಲಿ, ಮಲ್ಲ ಕರತ ಓಡುಡು ಆರಿತ ಬಂದ ಮಯಿತ್ ಕಾಯವುನ ಅಡ್ಡೆ. ಉಂದೆನ್ ಪುತ್ತೂರು ದಂಚಿದಗುಲು “ಓಡ್ ಪಾಲೆ” ಪನ್ಪೆರ್, ಅಗಲೆಡ್ದ್ ಒಂತೆ ಬಡಕಾಯಿ ದಗುಲು ಓಡುದ ಅಡ್ಡೆ ಪನ್ಪೆರ್. ಅಂದ್ ಕಪ್ಪಲ್ ಪಂಡ ಓಡು. ಕಪ್ಪಲ್ ಪಂದ್ ಪಡವುಗು (ಹಡಗು, ಶಿಪ್) ಲಾ ಪನ್ಪೆರ್. “ಕಪ್ಪಲ್ ದಿಂಜಾವರೆ ಪೋತಿನಾಯೆ (ಪಿರ) ಬೈದೆಗೆ, ಬಂಜಿ ದಿಂಜಾವರೆ ಪೋತಿನಾಯೆ ಬೈದುಜುಗೆ” ಪಂದ್ ಗಾದೆನೇ ಉಂಡತ್ತಾ? ಅಂಚಿತ್ತಿನ ತುಲುವೆರೆ ಪೆರ್ಮೆದ ಕಪ್ಪರುಟ್ಟಿ ತಿನಂದಿನಗುಲು ಬಾರಿ ಕಡಿಮೆ ಪಂದೇ ಪನೊಲಿ, ಆಂಡಾ ಏತ್ ಜನೊಕು ಈ ಅಡ್ಡೆ ಮಲ್ಪರೆ ಬರ್ಪುಂಡು? ಇತ್ತೆ ದರಿದಿನ ಮನ್ನ ಕರತ ಓಡು ಓಲು ತಿಕ್ಕುಂಡು? ನಮ್ಮ ಪುಗಾರ್ತೆದ ಅಟ್ಟಿಲ್ ದ ಶೈಲಜಾ ಶೆಟ್ಟಿ ಮೇರ್ ಎಂಚ ಮಲ್ಪುನು ಪಂದ್ ಪ್ರಾತ್ಯಕ್ಷಿಕೆ ಕೊರಿಯೆರ್. ಅವು ಇಂಚ: ರಾತ್ರೆ ಜೆಪ್ಪರೆ ಪೋವೊಡ್ದು ದುಂಬು ಒಂಜಿ ಸೇರ್ ಎಡ್ಡಂತಿನ ಬೊಲಂತರಿ ನೀರ್ ಡ್ ಪಾಡ್ದ್ (ಬೊದುಲರೆ) ದೀಲೆ. ಮುಗಿನೊಲ್ದು (ಬೊಲಂತೆ), ಗುಡ್ಡೊಲ್ದು, ಕಾಯಮೆ ಈ ಬಿದೆಕ್ ಲೆನ ಬೊಲಂತರಿ ಊಚಿ ಕಪ್ಪರುಟ್ಟಿಗ್. ಉಂದು ಒವುಲಾ ತಿಕ್ಕುಜಿ ಇನಿತ ಕಾಲೊಡು, ಕೊಲಮ್ ಆವು. ಆಂಡಾ ಬಾಸ್ಮತಿ, ಗಂಧಸಾಲೆ ಈ ಬೊಲಂತರಿಕುಲು ಆಪುಜಿ. ಕಾಂಡೆ ಕಡಂದ ಕಲ್ಲ್ ಡ್ ಕಡೆನಗ, ರಡ್ಡ್ ತಲ ಉರ್ಪೆಲರಿತ ನುಪ್ಪು (ಮುಗುಲರಿ ಎಡ್ಡೆ) ಪಾಡ್ದ್, ಬಂದ ಜರಿ ಜರಿ ಆನಗ ಹದ ಮಲ್ಲ ಒಂಜಿ ತಾರಾಯಿದ ಜೊಟ್ಟು ಗೆತ್ತ್ ದ್, ತಿಪ್ಪಿದ ಮೇಲ್ ದ ಕೂರು ಎಡ್ಡೆ ಪಿರೆಸ್ ದ್ ಗೆಪ್ಪುಲೆ. ದಾರೊಗು ನೋಟ ದೀದ್, ಕತ್ತೆ(ತ್ತಿ)ಡ್ ತಾರಾಯಿ ದರ್ಪುಲೆ. ಪೆರದಾನೆಡ್ ರಡ್ಡ್ ಗಡಿಲಾ ಪಿರೆಲೆ, ಕಾವು ಪಿರೆವಡೆ. ಅಂಚ ಪಿರೆಯಿನ ತಾರಾಯಿದ ಪೂನು ಕಲ್ಲ್ ಗ್ ಪಾಡ್ದ್, ಬಂದೊನು ಸನ್ನ (ಮಯಿತಲ್ಕ) ಕಡೆದ್, ಒಂಜಿ ಒಂಜರೆ ಗಂಟೆ ದೀವೋಡು. ರುಚಿಗ್ ಬೋಡಾಪಿನಾತ್ ಉಪ್ಪು ಪಾಡರೆ ಮದಪಡೆ.
ಕಪ್ಪಲ್ (ಕರತ ಓಡು) ಸರೀ ಬೆಚ್ಚ ಆವೊಡು. ಕಪ್ಪಲ್ ಎಡ್ಡೇನೆ ಕಾಯಿಗಿನ, ಒಂಜಿ ಕೈಲ್ ಬಂದ ಚುಂಯ್ಕ ಮಯಿಪೊಡು. ತೂ ಧಗ ಧಗ ಅರ್ಲೊಡು. (ಗ್ಯಾಸ್ ಡ್ ಅಡ್ಡೆ ಮಲ್ಪುನಗುಲು, ಹೈ ಫ್ಲೇಮ್ ಡ್ ದೀವೊಡು). ಕಪ್ಪರ್ ರುಟ್ಟಿ ಸರಿ ಬೆಯ್ತ್ ದ್ ಮಿತ್ತ್ ದ ಬಂದದ ಬೊಲ್ದು ಮಾಜೊಡು. ಅಪಗ ಚೌಂಟುಡು ಅಡಿಲಕ್ಕದ್ ಗೆತ್ತ್ ದ್ ಕುಡುಪುಡು ಪಾಡ್ಲೆ. ನನ ದೋಸೆದಲ್ಕ ಮಗತ್ ಪಾಡಡೆ. ಕಾಟ್ ಪೆತ್ತದ ಎಡ್ಡೆ ಬೊಲ್ ನೆಯಿ ಒಂಜಿ ಎಲ್ಯ ಮುದ್ದೆ ಬೆಚ್ಚ ಕಪ್ಪರುಟ್ಟಿಗ್ ಪಾಡ್ದ್ ತಿಂದರ್ ಡಾ, ಸೊರ್ಗಕ್ಕೆ ಕಿಚ್ಚು ಹಚ್ಚೆಂದ ನಾರಾಯಣ. ಕೆಲವೆರ್ ಕಪ್ಪರುಟ್ಟಿ ಅರೆಪುಡು ಪಾಡುವೆರ್, ಅವು ಎಂಕಾತ್ ಇಸ್ಟ ಅತ್ತ್. ತಾರಾಯಿದ ಕೆಂಪು ಬಜ್ಜಿ (ಚಟ್ನಿ) ಜೋಡು ಆಪುಂಡು ಕಪ್ಪರುಟ್ಟಿಗ್. ಬೊಲಂತರಿ, ಬೊಲ್ ನೆಯಿ ಮಲ್ಪುನ ವಿಧಿ ವಿಧಾನ ಅಂಚೆನೆ ಕೆಂಪು ಚಟ್ನಿದ ರೆಸಿಪಿ ನನೊರ ಪನ್ಪೆ. ಅದ ಮುಟ್ಟ, ಮುಟ್ಟದ ಅಂಗಡಿಡ್ದ್ ಬೊಲಂತರಿ, ತಾರಾಯಿ ಕಂತ್ ಮಲ್ಪಿ ಕಪ್ಪರುಟ್ಟಿ. ಅಂಚೆನೆ ತಿನಿ (ಚಟ್ನಿ, ಬೊಲ್ ನೆಯಿ ದಾಂತೆ) ಚಾತ ಒಟ್ಟುಗು.
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
