ಒಂಜಾನೊಂಜಿ ನಕರೆ. ಆ ನಕರೆಡ್ ಒರಿ ಕಂಡು ಕಲುವೆ. ಒವ್ವಾ ಜಲ್ಮದ ಕರ್ಮ ಅರ್ದೆರೆ ಬೈದೆ. ಆ ನಕರೊಗು ಪರವೂರು, ಪರದೇಸೊಡ್ಡ್ ನಾಲ್ ಜನ ಬೇರದಗುಲು ಬತ್ತೆರ್. ಊರ್ದ ಉಲಾಯಿದ ಮಾರುನ ವಸ್ತುಲೆನ್ ಕಮ್ಮಿ ಬಿಲೆಕ್ ಗೆತೊಂದು, ದಾಸ್ತಾನ್ ಮಲ್ತ್ದ್, ಬಿಲೆ ಏರಿಗಿನ ಅತ್ತ್ಡ ಏರಾದ್ ಮಾರುನು. ಆಂತೂ ಅಗಲೆನ ಬೇರದ ಚಾತುರ್ಪಾಯೊಡು ಲಾಯಿಕ್ ಸಂಪಾದನೆ ಮಲ್ತೊಂದು ಇತ್ತೆರ್. ಉಂದೆನ್ ಆ ಕಲ್ವೆ ತೂಯೆ. ಎಂಚಂಡಲಾ ಮಲ್ತ್ದ್ ಆಗಲೆಗ್ ನಂಬೊಲಿಕೆ ಪುಟ್ಟಾದ್, ಅಗಲೆನ ಒಟ್ಟುಗೇ ಇತ್ದ್ ಅಗಲೆನ ಗಂಟ್ ಪಿಸ್ಕಾವೊಡು ಪಂದ್ ಕುಂದುಕುಸೆಲ್ ಮಲ್ತೆ. ಅಗಲೆಡ ಬಗ್ಗು ಕೋಮಟಿಗೆ ಪಾತೆರೊಂದು, ಬುಟ್ಟಿಚಾಕರಿ ಮಲ್ತೊಂದು ಅಗಲೆನ ಒಟ್ಟುಗೇ ಕುದ್ದು ಲಕ್ಕರೆ ಸುರು ಮಲ್ತೆ. ಹಾದರಗಿತ್ತಿಗ್ ನಾಸಿಗೆ ಜಾಸ್ತಿಗೆ, ಕಡಲ್ದ ಉಪ್ಪು ನೀರ್ ತಂಪುಗೆ, ಕವುಡು ಮಂಗಲೆರ್ ಬುದ್ಯಂತೆರ್ಗೆ, ಅಂಚೆನೆ ದುಷ್ಟೆರ್ ಮೋನೆದಕ್ಕ ತೀಪೆ ತೀಪೆ ಪಾತೆರ ಪಾತೆರುವೆರ್ಗೆ. ಇಂಚೆನೆ ಆ ಕಲ್ವೆ ಅಗಲೆನ ಚಾಕರಿ ಮಲ್ತೊಂದು, ದೊಡ್ಡು ಬಂಗಾರ್ ಲಕ್ಕಾವರೆ ಸರಿಸಮತ ಪೊರ್ತು ಗೊತ್ತುನು ಕಾತೊಂದು ಇತಿಲಕ್ಕನೇ ವರ್ಸ ರಡ್ಡ್ ವರ್ಸ ಕರಿಂಡ್. ಬೇರದಗಲೆಡ ಮಸ್ತ್ ಸಂಪೊತ್ತು ಒಟ್ಟ್ ಆಂಡ್. ಆಂಡ ದರಿದರಿ ಇಲ್ಲ್ ಎನ್ನರೆ ಪಸ್ಂಡ್. ಪಿರ ಪೋಪಿನಿ ಪಂದ್ ನಿಗದಿ ಮಲ್ತೆರ್. ಅಲ್ತ್ ಅಕಲೆನ ಊರುಗು ಪೋಪಿನ ತಾದಿ ಕಾಡ್ ಗುಡ್ಡೆ ಕಡತ್ ಪೋಪಿನ ದೂರದ ತಾದಿ, ಕಲ್ವೆರ್ ಕಾಕೆರ್ ತಾದ್ಯೆ ಪೋಪಿನಗಲೆನ ತರೆ ಮಂಡೆ ದರ್ತ್ ದೊಡ್ಡು ಬಂಗಾರ್ ಕಂಡುನ ಕಾಲ. ಅಂಚ ಅಗುಲು ಅಗಲೆಡ ಇತ್ತಿನ ಮಾತ ಆಸ್ತಿ ಬದ್ಕ್ ಮಾರ್ದ್, ಬಂಗಾರ್, ಪದ್ದೆಯಿ ಪನವು ಕೊರ್ದು ಒಂಜೊಂಜಿ ಎಡ್ಡೆ ವಜಿರ ಗೆತೊಂಬೆರ್. ಅವ್ವೆನ್ ದಿಂಗ್ದ್ ಊರುಗು ಪಿದಾಡಿಯೆರ್, ನಾಲ್ವೆರ್ಲಾ. ಉಂದೇನ್ ತೂದು ಕಲ್ವಗ್ ಬಾರಿ ಅಕಿಲಾಸ ಆಂಡ್. ಎನ್ನಿನ ಮನ್ನಾಂಡ್, ಪೆದ್ದಿನ ಪೊನ್ನಾಂಡ್ ಪನ್ಪಿ ಗಾದೆದಲೆಕ್ಕ ಆಂಡ್ ಕಲ್ವನ ಕೊಂತು ಕುಸೆಲ್. “ಗಂಟ್ ಲಕ್ಕಾವರೆ ಆಯಿಜಿ, ನನ ಮೊಗಲೆನ ಬೆರಿಯ ಪೋದು, ಒರಿಯೊರ್ಯಗ್ ಇಸ ಕೊರ್ದ್ ಕೆರ್ದ್, ಬಂಜಿ ಸಿಗಿತ್ದ್ ವಜ್ರ ಕಂಡುವೆ” ಇಂಚ ಅಲಾಚನೆ ಮಲ್ತ್ದ್ ಕಲ್ವೆ ಬೇರ ದಗಲೆಡ “ಈತ್ ದಿನ ಒಂಜಪ್ಪೆ ಬಾಲೆಲೆಕ್ಕ ಇತ್ತ ನಮ. ನಿಗಲೆನ್ ಬುಡ್ದ್ ಬದುಕುನ ಅಬ್ಬೆಸನೇ ತತ್ತ್ ಪೋತುಂಡು. ಇತ್ತೆ ಎನನ್ ಬುಡ್ದ್ ಪೋಯರಾಂಡ, ನಡು ನೀರ್ಡ್ ಕಯಿ ಬುಡಿಲೆಕ್ಕ ಆವು. ಓ ಎನ್ನ ಜೀವದ ಜೋಸ್ತಿಲೆ, ಎನನ್ಲಾ ನಿಗಲೊಟ್ಟುಗು ಲೆಸೊಂದು ಪೋಲೆ” ಪಂದ್ ಬುಲಿತೆ. ಕಲ್ವನ ಪಾತೆರ ಸತ್ಯ ಪಂದ್ ನಂಬಿನ ಆ ಬೇರದಗಲೆಗ್ ಪಾಪ ಪುನ್ಯ ತೋಜಿಂಡ್. ಬೇಲೆಗ್ಲಾ ಒಂಜಿ ಜನ ಆಪುಂಡು ಪಂದ್ ಆಯನ್ಲಾ ಒಟ್ಟುಗು ಲೆಸೊಂದು ಪೋಯೆರ್.
ಇಂಚ ಆ ಐವೆರ್ ನಾಲ್ ನಕರೆ, ಕೋಟೆ, ಪೇಂಟೆ, ಊರು ಕೇರಿ, ಬೊಟ್ಟು ಬೈಲ್, ಪಾಡಿ ಗುಡ್ಡೆ ಕಡತೊಂದು ಪೋದು ಒಂಜಿ ಕಾಡ ಅರುಕು ಬತ್ತೆರ್. ಅಲ್ಪ ಬೋಂಟೆದ ಮಂದೆಲು ಇತ್ತೆರ್. ಅಗುಲು ಕಾಡ ಮುರ್ಗೊಲೆನ ಬೋಂಟೆ ದೇರುನು ಕಮ್ಮಿ, ಆ ತಾದ್ಯೆ ಪೋಪಿನಗಲೆನ್ ಸೂರೆ ಮಲ್ಪುನೇ ಜಾಸ್ತಿ. ಅಗಲೆನ ಒಂಜಿ ಪಕ್ಕಿ ಏರ್ಲಾ ಪೊಸಬೆರ್ ಆ ತಾದಿಡೆ ಬತ್ತೆರ್ಡ ಅಗಲೆಡ ದಾದ ಸಂಪೊತ್ತು ಉಂಡು ಪಂದ್ ಲೆತ್ತ್ ಪನ್ಪುಂಡು. ಅಂಚೆನೆ ಇ ಐವೆರೆ ತೆಪ್ಪ ತೂದು ಪಕ್ಕಿ ಕರೆವುಂಡು “ಅಲಾ ಬತ್ತೆರ್, ಲಚ್ಚ ಲಚ್ಚದ ಸಿರಿ ಸಂಪೊತ್ತುದ ಜನೊಕುಲು, ಪತ್ತಿ, ಮಂಡೆ ದರ್ಪಿ”. ಕಾಡ ಕಲ್ವೆರ್ ಮೊಕಲೆನ್ ತಡೆತ್ ಉಂತಾಯೆರ್, ಮೈಟ್ ಕೈಟ್, ಪಾಡಿ ಅಂಗಿ ಕುಂಟುಡು, ಕುಂಟುದ ಗಂಟ್ಡ್, ನುಪ್ಪುದ ಪೊದಿಕೆಡ್ ಕೊಡಿ ಕಡೆ ನಾಡಿಯೆರ್. ಅಂಗಿ ಕುಂಟು ಪೂರಾ ಮಾಪದ್, ಬಜಿ ಮೈಟ್ ಉಂತಾಯೆರ್. ಲಚ್ಚ ಬುಡಿ, ಒಂಜಿ ಲಚ್ಮನ ಟಂಕೆಲಾ ತಿಕ್ಜಿ. “ಎಂಕಲೆನ ಪಕ್ಕಿ ಇನಿ ಮುಟ್ಟ ಪಂತಿ ಪಾತೆರ ಸುಲ್ಲಾತ್ಜಿ. ಓಲು ದೆಂಗ ದೀತರ್ ಪನಿ. ಎಡ್ಡೆ ಪಾತೆರೊಡು ಪಂಡ್ಜರ್ಡಾ ಬಂಜಿ ಸೀಗ್ತ್ದ್, ಚರ್ಮ ಜಾರದ್ ನಾಡುವ” ಪಂದ್ ಬಿಸತ್ತಿಡ್ ಬಂಜಿಗ್ ಗೀರುನ ಪಗ್ರ್ ಮಲ್ತೆ ಬೋಂಟ್ರೆ. ಅಪಗ ಬೇರದಗಲೆನ ಒಟ್ಟುಡು ಇತಿನ ಕಲ್ವೆ ಎನ್ನಿಯೆ “ಇತ್ತೆ ಮೊಗಲೆಡ್ ಒರಿಯನ ಬಂಜಿ ಸಿಗಿತ್ದ ವಜಿರ ತಿಕ್ಂಡ, ಬಾಕಿ ನಾಲ್ ಜನತಲಾ ಬಂಜಿ ಸಿಗಿಪುವೆರ್. ಯಾನ್ಲಾ ಸೈಪಿನಿ ನಿಗಂಟ್. ಒಂಜಿ ಏಲ್ಯ ಎನ್ನ ಬಂಜಿ ಸಿಗಿತ್ದ್ ದಾಲ ತಿಕ್ಜಿಡ, ಬಾಕಿದಗಲೆನ ಜೀವ ಬುಡುವೆರ್”. ಇ ಕಲ್ವೆ ಆ ಬೊಂಟ್ರಡ ಪಂಡೆ “ಅಯ್ಯಾ ಮಾರಾಯ, ಎಂಕುಲು ಪುಟ್ ಬಲತಿನ ಊರುಡು ಬಂಜಿ ದಿಂಜಾವಾರೆ ಬಂಙ ಆದ್, ಕುಜರ್ಮೆಗ್ ಪರವೂರು ಪೋವೊಂದುಲ್ಲ. ಎಂಕಲೆಡ ದೊಡ್ಡು ದುಗ್ಗಾನಿ ಇಜ್ಜಿ, ಮೆಯ್ಯ ಕಯ್ಯ ಪಿದಾಡ್ದಿನಿ. ನಿಗಲೆನ ಪಕ್ಕಿ ಸುಲ್ಲು ಪನೊಂದು ಉಂಡು. ನಂಬೊಲಿಗೆ ಬರ್ಪುಜಿಡ ಎನ್ನ ಬಂಜಿನ್ ಸಿಗಿತ್ ತೂಲ”.
ಆ ಕಾಡ ಕಲ್ವೆರೆಗ್ಲಾ ಎಕ್ಕಂದೆಲ್ ಪುಟುಂಡು. ಆಜಿ ಮೂಜಿ ಎನ್ನ್ದ್ ಆಯನ ಬಂಜಿ ಬಿಚ್ಚಾದ್ ನಾಡಿಯೆರ್. ದಾಲಾ ಇಜ್ಜಿ, ಕರ್ಲ್ ಕಪ್ಪಡೆ ಬುಂಡ. ತರೆ ಮಂಡೆ ದರ್ಪುನ ಕಲ್ವೆರೇ ಆಂಡಲಾ ದಾಲಾ ಲಾಬದಾಂತೆ ಮಾನ್ಯ ಕೆರ್ಪಿನ ಕಲೆಪಾಡಿನ, ಗರ್ಗುಡೆರ್ ಅಗುಲತ್ತ್. ಬಾಕಿದ ನಾಲ್ ಜನೊನು ಬುಡ್ದ್ ಬುಡಿಯೆರ್. ಬದ್ಕಿನ ಆ ನಾಲ್ ದಿನ, ಬದ್ಹಕರೆಗಸ್ರ ನಾಲ್ ಜನತ ಬದ್ಕ್ದ ಸಂಪಾದನೆ ಕಂಡ್ದ್ ಪಾಪ ಸಂಪಾದನೆ ಮಲ್ತಿತಿನ ಕಲ್ವೆ, ಸೈತ್ದ ನಾಲ್ ಜನತ ಜೀವ ಒರ್ತ್ದ್ ಪುನ್ಯ ಕಟೊಂಡೆ. ಜೀವೊಗು ಜೀವ ಕೊರ್ದು, ‘ಜೀವದ ಜೋಸ್ತಿ’ ಪಂದ್ ಪಂತಿನ ಸುಲ್ಲುನು ನಿಜ ಮಲ್ತೆ. ಆಯನ ಬಲಿದಾನ ನಿನೆತ್ದ್, ಕನ್ನ್ ನನೆಂಡ್ ಆ ನಾಲ್ವೆರೆಗ್, ನಾಲ್ ಪನಿ ಕನ್ನ ನೀರ್ ತಿರ್ತ ನೆಲಕ್ಕ್ ಬೂರ್ಂಡ್. ಮಿತ್ತ ಬಾನೊಗು ಕಯಿ ಮುಗಿದ್ ಆಯನ ಆತ್ಮೊಗು ಸದ್ಗತಿ ಬಯಕ್ದ್, ತಿರ್ತ್ ನೆಲ ತೂವೊಂದು ಪಜ್ಜ ದುಂಬು ದೀಯರೆ. ಚದಿತಾಯೆ ಚಂಙಾಯಿ ಅತ್ತ್, ಚಪ್ಪುಡಿಕಳಿತಾಯೆ ಬೇಲೆಗತ್ತ್ಗೆ. ಆಂಡ ಕೆರಪೆ ಚಂಙಾಯಿಡ್ದ್, ವಿವೇಕಿ ಪಗೆಮಾನಿ ಬೇಸ್.
ಬರವು : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ
