ಎರು ಆರ್ಯೆ ಆಂಡ ಕೊಟ್ಟೆ ಗುದ್ದುನ ಕರ್ಚಿ ಇಜ್ಜಿ. ಈ ಎರ್ಲು ಪರು ಸರ್ಕೆಗ್ ಬತ್ತಿನದಗ ಕೊಟ್ಟೆಗ್ ಕಲ್ಲ್ ಪಾಡೊಡು, ಇಜ್ಜಿಡ ಐಕ್ಲೆನ ಅಬತಾರ ತಡೆವರೆ ತೀರುಜಿ. ಬೊಕ್ಕ ಐಕ್ಲೆನ ನರನಾಡಿ ಬಂದ್ ಆಪುಂಡುಗೆ, ಕಾರ್ ಮರಕಟ್ಟುಂಡುಗೆ. ಪರು ಸರ್ಕೆ ಪನ್ನಗ ಎಡ್ಮ ಪರು (ಕೂಲಿ) ಕದೆಪುನು (ಅಡಿ ದೀಪಿನಿ, ಬರ್ಪಿನಿ). ನಾಲ್ ವರ್ಸ ಪೂರಾ ಆವೊಡು. ಎರು, ಬೋರಿನ್ ನಾಲ್ ಕಾರ್ಗ್ ಬಲ್ಲ್ ಅರ್ಕಲ್ ಪಾಡ್ದ್ ಮುಟ್ಟ ಒಯಿಪುನಗ, ನಾಲ್ ಕಾರ್ ಒಟ್ಟು ಆನಗ ಕೈಕಂಜಿ ಮಗುರುವ. ಸರೀ ತಪ್ಪು ಅಡಿಕ್ ಪಾಡ್ದ್ ಇಪ್ಪೊಡು ಕಿದೆಟ್. ಬೊಕ್ಕ ಅಡಿಟ್ ಮನೆ ದೀದ್, ಮಿತ್ತ್ಡ್ದ ಕೊಟ್ಟೆ ದೀದ್, ಉದ್ದ ಉರುಂಟುದ ಕಲ್ಲ್ಡ್ ಞಂಕ್ಕ ಞಂಕ್ಕ ಗುದ್ದಿಯೆರ್ ಪೊಸಲ್ಲ್ ದೇವು ಪೂಜಾರ್ಲು, ಎರ್ಲೆನ ಕೊಟ್ಟೆನ್. ಬಾರಿ ಜಾಗ್ರತೆ ಬೋಡು, ಪೆಟ್ಟ್ ತತ್ತ್ದ್ ತಾವುದ ಕೋಡಿಗ್ ಬೂರ್ಂಡ, ಕೈಟೆ ಜೀವ ಬುಡುವ ಎರು ಬೋರಿಲು. ಐತ ಮುದೆಲ್ದ ನರಂಬುನು ಗುದ್ದುದ್ದು ನೀರ್ ಮಲ್ಪುನು. ಗುದ್ದುನಗ (ಬವುಸ) ಆತ್ ಬೇನೆ ಆಪುಜಿ. ಗುದ್ದರೆ ಪತ್ತೊಡ್ದುಂಬು, ಕನ್ನ್ಗ್ ಬೊಲ್ ನೆಯಿ ಪೂಜಿವೆರ್. ಗುದ್ದ್ದ್ ಆಯಿ ಬೊಕ್ಕ, ಎನ್ನೆಡ್ ಕಲತ್ದ್ ಪೊನ್ನೆದೆನ್ನೆದ ಕರಿ ಪೂಜುವೆರ್. ವಾರ ಇಡೀ ಕೆಂಪು ಕೆಂಪು ಬಾತ್ ಪೋಪುಂಡು. ಕೆಲವು ಎರ್ಲು ನಾಲ್ ನಾಲ್ ದಿನ ಜೆಪ್ಪುಜ. ಐಕ್ಲೆನ ಕಾರಡಿಗ್ ತೆಗ್ಲೆ ತೆಗ್ಲೆ ತಪ್ಪು ಕುತ್ತ್ದ್, ಕೋಲ್ ಜತ್ತ್ದ್ ಕಂತ್ ಪಾಡುವೆರ್. ಕೊಟ್ಟೆ ಗುದ್ದಿನ ಎರ್ಲೆಗ್ ಒರ್ಂಬ ಪತ್ತ್ ದಿನ ಸನ್ನಾಯ ಪಾಡುವೆರ್, ಪೆದಿಮೆದಿಯಲ್ಲೆಗ್ ಪಾಡಿಲೆಕ್ಕ. ಕುಡು, ಎನ್ನೆ, ಪುರ್ಗ, ತಾರಾಯಿದ ಗಂಜಿ ಇಂಚ ಮಾತ. ಬೊಕ್ಕ ಚಿರ್ಂಟುಂಡು ಪನ್ಕ. ಇತ್ತೆ ಗೋ (Veterinary) ಡಾಕ್ಟರ್ನಗುಲು ಇಕ್ಕುಲಿಡ್ ಕೊಟ್ಟೆ (testicles)ಗ್ ಪೋಪಿನ ನೆತ್ತ್ರ್ದ ನರಂಬುನು ಒತುದು ಞಂಪ್ಪೆ (ಪೊಡಿ) ಮಲ್ಪುವೆರ್. ಏರಾ ಜೋಕುಲು ಉಂದೆನ್ ತೂದು, ಒರಿ ಆನನ್ ಕೈಕಾರ್ ಕಟ್ದ್, ಕಲ್ಲ್ಡ್ ಗುದ್ದುದು ಕೆರ್ದೆ ಬುಡ್ತೆರ್ಗೆ. ತಾವುದ ಕೋಡಿ, ಅಂಜೋವೆನ ವೀಕ್ ಪಾಯಿಂಟ್. ಕ್ರಿಕೆಟ್ಡ್ ಸೆಂಟರ್ ಪ್ಯಾಡ್ ಪಾಡುವೆರ್, ಅಂಜೋವು.
ಬುಡೆದಿ ಗೊಡ್ಡು ಆಂಡ, ಬಾಯಕೆ ಪಾಡೊಡು ಪಂದ್ ಇಜ್ಜಿ. ಸೀರೆ, ಬಂಗಾರ್, ಬಯಕೆದ ಅಡ್ಡೆ, ಊರುಗು ಉನಸ್, ಸನ್ನಾಯ ಪೂರ ಒರಿವುಂಡು. ಅಪ್ಪೆಲ್ಲೆದಕ್ಲೆಗ್ಲಾ ಎಚ್ಚಿ ಕಡಿಮೆ ನಲ್ಪ ದಿನ, ಪೆದ್ಮೆದಿ ತಾಂಕುನ, ಮರ್ದ್ ಅಡ್ಪಿನ, ಬೊಲ್ಲೆ ತಪ್ಪು ಪಾಡ್ದ್ ಬೆಂದ್ರ್ ಕೈಪುನ ಕರ್ಚಿ ಇಜ್ಜಿ. ಕುಡ ಬಾಲೆ ತುವ್ವರೆಗ್ ಬರ್ಪಿನಗಲೆಗ್ ಪೆದ್ಮೆದಿಗ್ ಅಡ್ತಿನ ಮರ್ದ್, ಬಾಜೆಲ್, ಬಚ್ಚಿರೆ ಕೊರೊಡು. ಕೆಲವೆರ್ ಬಾಲೆದ ಕೈಟ್ ದಾಲ ಕೊರ್ಪೆರ್, ಕೆಲವೆರ್ ಪಿರ ಪೋನಗ ತಾದಿಡೆ ಬಾಲೆಗ್ ದಾದಾಂಡಲ ಇಲ್ಲೆ ಪನೊಂದು ಪೋಪೆರ್. ಬಂಜಿ ಬಾಂಪ್ರಿ, ಪಿಂಕನ್ ಪೀಂಪ್ರಿ, ಕನ್ನ್ ಬಿದ್ದ್, ಕಾರ್ ಅಟ್ಟೆ, ಮೂಂಕು ಮೂಜಿ ಮುಲ, ಮಂಡೆ ಗೋಂಟು, ಅಂಗೆಲ್ ಬಾಯಿ, ದುಡಿ ಈತ್ ಉದ್ದ, ಬನ್ನ ಮಜ್ಜಿ ತುಂಡು, ಆನ್ ಬಾಲೆ ಆಂಡ ಗಂಟ್… ಒಂಜಾ ರಡ್ಡಾ ಪುರು ಬಾಲೆಲೆಡ್ ಊರ್ದಗಲೆ ತೋಜುನ ದೋಸೊಲು. ಅಂಚ ಬುಡೆದಿ ಗೊಡ್ಡು ಆಂಡ ಇ ಪೂರಾ ಕರ್ಚಿ, ಮಂಡೆ ಬೆಚ್ಚೊಲು ಇಜ್ಜಿ. ಅಂಚ ದುಂಬೊರಿ ಇಂಚಲಾ ಪಂತೆಗೆ ‘ಅಮ್ಮೆ ರಡ್ಡ್ ಕೊರಿಯೆಡಾ, ತಪ್ಪಾಡ್ದ್ ಪೋಯಿನ ರಡ್ಡ್ ತಿಕಿಯಡ, ಎನ್ನ ಬುದ್ದಿಡ್ ರಡ್ ಮಲ್ತೆಡ, ಮೂಜಿ ಜೋಡು ದಪ್ಪುನ ಅಯ. ಮುಪ್ಪ ಮುಡಿ ಗೇನಿದ ಬೆನ್ನಿ ಬೆನೊಲಿ’. ಇಂಚೆನೇ ಕನ್ನಡೊಡು ಪಂತೆರ್ ಉಂದೆನ್ ‘ಆದರೆ, ಹೋದರೆ, ಹತ್ತಿ ಬೆಳೆದರೆ, ಅಜ್ಜಿಗೊಂದು ಪಟ್ಟೆ ಸೀರೆ’.
ತನ್ನ ಬುಡೆದಿ ಗೊಡ್ಡು ಆವಡ್ ಪಂದ್ ತುಲುವೆರ್ ಬಯಕಯೆರ್. ಅವ್ವೆ ನೂಲ್ ಪಾಡಿನಗುಲು, ಅತ್ತ್ಡ ಉತ್ತರ ಭಾರತದಗಲು ಬುಡೆದಿ ಗೊಡ್ಡು ಪಂದ್ ಕುಡೊಂಜಿ ಮದಿಮೆ ಆವೆರ್. ಚಂದ್ರಶೇಖರ ಕಂಬಾರೆರೆನ ‘ಜೋಕುಮಾರಸ್ವಾಮಿ’ ನಾಟಕ ತೆರಿದುಪ್ಪು ನಿಕಲೆಗ್. ಕೆಲವು ಸರ್ತಿ ಬುಡೆದಿ ಗೊಡ್ಡಾ, ಕಂಡೆನೆ ಆರ್ಯೆನಾ ಪನ್ಪಿನ ಸಂಶಯ ಬರಂದೆ ಇಪ್ಪಂದ್. ಜಾಲ್ ಪಾದೆ ಆಂಡ ಬಾರ್ ಮುಂಗೆ ಬತ್ತ್ದ್ ನೇಜಿ ಕೋಡ್ಯುವಾ? ಬಿತ್ತ್ (ಬಾರ್) ಜಡ್ಡ್ ಆಂಡ, ಮನ್ನ್ದ ಕಲೊಟುಲಾ ಕೊಡ್ಯಂದ್. ಕಡೆಕೊಂಜಿ ಕೊಂಗಿ, ಇತ್ತೆ ಗೊತ್ತಾಂಡ ಆರ್ಯೆರ್ ಏರ್ ಪಂದ್?
ಬರವು : ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ.
