ಕವರ್ ಪನ್ನಗ ಸುರುಕು ನಮನ ತರೆಕ್ ಬರ್ಪಿನಿ ಮದಿಮೆಗ್ ಮುಯ್ಯಿ ದೀಪಿನ ಕವರ್. ಐಡ್ದ್ ಬೊಕ್ಕ ಪೋಸ್ಟ್ ಕವರ್, ತಲೆಂಬುದ ಕವರ್, ಇಂಚಪ ಮೊಬೈಲ್ ದ ಕವರ್. ಉಂದು ಪೂರಾ ಪೊದಿಕೆ (ಕನ್ನಡ ಹೊದಿಕೆ)ಲು, ಇಂಗ್ಲೀಷ್ ದ ಕವರುಲು (Cover), ಯಾನ್ ಪನರೆ ಪಿದಾಡ್ದ್ ದಿನಿ ತುಲುತ ಬೊಕ್ಕೊಂಜಿ ಕವರ್ ದ ಬಗೆಟ್. ದುಂಬು “ಕಂಚಿ” ಲೆತ್ತೊಂದು ಇತ್ತೆರ್ಗೆ. ಮದಿಮಾಯೆ/ಲ್ ಎದುರುಡು ಅರಿವಾನೊಡು ಅರಿ ದೀವೊಂದು ಇತ್ತೆರ್. ತರೆಕ್ ರಡ್ಡ್ ಅರಿ ಪಾಡುನು ಪಂಡ ಸೇಸೆ (ಕನ್ನಡದ ಅಕ್ಷತೆ ಕಾಳು) ಪಾಡುನು. ಪಂಡ ಪೆರಿಯಾಕ್ಲು ಆಶೀರ್ವಾದ ಮಲ್ಪುನು. “ಮುತ್ತುಡು ಸೇಸೆ ಪಾಡಿಯೆರ್ ಪಕಲೊಡು ಆರತಿ ಮಲ್ತೆರ್” ಪಂದ್ ಪಾಡ್ದನೊಡು ಪನ್ಪುಂಡು. (ಕನ್ನಡೊಡು ಮುತ್ತಿನಾರತಿ). ಅಂಚೆನೆ ಆ ಅರಿತ ತಬುಕು (ಅರಿವಾನ)ದ ಬರಿಟ್ ಕಾಲಿ ಅರಿವಾನ ದೀವೊಂದು ಇತ್ತೆರ್ ಗೆ, ಐಕ್ ಕಂಚಿ ಪನ್ಪಿನಿ. ಆ ಅರಿವಾನೊಗು ಉಡುಗಿರೆ (ಎಚ್ಚಾದ್ ದೊಡ್ಡು) ಪಾಡುವೆರ್, ಮದಿಮೆಗ್ ಬತ್ತಿನಗುಲು. ಅವ್ವೆನ್ ಸಬೆಟ್ ಲೆತ್ತ್ ಪನ್ಪೆರ್, ಏರ್ ಏತ್, ದಾದ ಕೊರಿಯೆರ್ ಪಂದ್, ಬೊಕ್ಕ ಒಂಜಿ ಬೂಕುಡು ಬರೆದ್ ದೀವೊಂದು ಇತ್ತೆರ್. ಮುಯ್ಯಿಕ್ ಮುಯ್ಯಿ ಬೂಟೊಡೇ? ಬಾರ ಪನ್ಪಿನ ಕ್ರಮಲಾ ಇತ್ಂಡ್ ಗೆ. ಬೊಕ್ಕ ಈ ಕವರ್ (ಲಕೋಟೆ) ಬತ್ತ್ಂಡ್. ಪಾಪದಾಯನ ಮರ್ಯಾದಿನ್ ಕವರ್ (conceal, ದೆಂಗಾವುನು) ಮಲ್ತ್ಂಡ್. ಇಜ್ಜಿಡ “ಕೌಡೂರು ನಾರಾಯಣ ಶೆಟ್ರು ರಡ್ಡ್ ರುಪಾಯಿ ಮುಯ್ಯಿ ದೀಯೆರ್” ಪಂದ್ ಸೇರ್ದಿ ಸಬೆಕ್ ಲೆತ್ತ್ ಪಂಡೆರ್ ಡ, ಐನ್ ಪತ್ತ್ ಮುಯ್ಯಿ ದೀತಿನಗಲೆನ ನಡ್ಡೆ ನಾಲೇಸಿ (insult) ಅತೇ? ಬವುಸ 1965ಡ್, ಕಲ್ಲೊಟ್ಟು ಜಗ್ಗು ಮಾಮನ ಮದಿಮೆಗ್ ಕಟೀಲ್ ಗ್ ಪೋದು ಆತೇ ಮುಯ್ಯಿ ದೀತಿನಿ. ಮೂಜಿ ವರ್ಸ ದುಂಬು ಎನ್ನ ತಮ್ಮಲೆನ ಮದಿಮೆಗ್ ಅಗುಲು ಅತೇ ಮುಯ್ಯಿ ದೀತಿನಿ. ಇಸಯ ಪಂಡಾ, ಕಟೀಲ್ ಗ್ ಪೋಪಿನ ಬರ್ಪಿನ ಬಸ್ಸ್ ಮಲ್ತ್ ದ್ ಇತ್ತೆರ್, ಕಂಡಲ್ಕೆಡ್ದ್‌. ಅದಗ ಆ ದೇವಸ್ಥಾನೊಡು ಜಗ್ಗು ಮಾಮನ ಆಪಿನ ಬುಡೆದಿನ ತಮ್ಮಲೆ ಕೊರ್ತಿನ ಆನೆ ಇತ್ಂಡ್. ಮದಿಮೆದ ಇಲ್ಲದಗುಲೆ ಕಾಲಿ ಕವರ್ ಕೇಂಡಿನಗಲೆಗ್ ಕೊರೊಂದು ಇತ್ತೆರ್.
ಅಗುಲು ಒಂಜೇ ಸಂತಾನ, ಕವರ್ ಬೇತೆ ಬೇತೆ ಪಂಡೆರ್ ಒರ ಎನ್ನ ಪಿಜ್ಜಿ. ಎಲಾ! ಪಿಜ್ಜಿಲಾ ಇಂಗ್ಲೀಷ್ ಪಾತೆರುವೆರಾ? ಪಂದ್ ಎನ್ನಿಯೆ. ನಮ, ಎಡ್ಮೇರ್ ದಗುಲು, ಬೊಲ್ಜಾಂಲೆ (ಬೆಳಿಂಜೆ) ಬೊಕ್ಕ ಅಂಜಾರ್ ದಗುಲು ಮುಟ್ಟದ ಸಂತಾನ, ಕವರ್ ಬೇತೆ ಬೇತೆ, ಮಾತಾ (ಪಡ್ಡೆದ್ರ) ಕೆರಮ ಪಾದ್ಯೊಟ್ಟುದಗುಲು ಪಂದ್ ಪಂತೆರ್ ಎನ್ನ ಪಿಜ್ಜಿ ಅಕ್ಕಮಕ್ಕೆ (ರಡ್ಡ್ ಮೂಜಿ ಸರ್ತಿ). ಮಸ್ತ್ ವರ್ಸೊಡ್ದ್ ಬೊಕ್ಕ ಗೋಚರ ಆಂಡ್, ಕವರ್ ಪಂಡ ಕಬರ್ (branch). ಪರ ತುಲುಟು ಅವ್ವು ಕಬರ್ ಪನೊಂದು ಇತ್ತಿನ “ವ” >”ಬ” ಟ್ ಪಲ್ಲಟ ಆದ್ ಕಬರ್ ಆಂಡ್. “ವಂಗ” (ದೇಶ) ಬಂಗ (ಲಾ) ಆಯಿಲೆಕ್ಕ. ಅಂಚಾದ್ “ಕವರ್” ಸುದ್ಧ ಪರತುಲು. ತುಲುತ “ಕಬೆ” ಕೋಲು, ಕನ್ನಡೊಡು ಇನಿಕ್ ಲಾ “ಕವೆ” ಕೋಲು. ಪಿಜ್ಜಿ ಪಂತಿನಿ “ಸಂತಾನ (family tree ಮರ) ಒಂಜೇ, ಕವರ್ ಪಂಡ ಗೆಲ್ಲುಲು (ಎಗ್ಗೆಲು) ಬೇತೆ ಬೇತೆ”. ಒಂಜೇ ಮರತ ಪರ್ಂದ್ (ಫಲ)ಲೆನ ಗುನ ಒಂಜೇ ಲೆಕ್ಕ ಇಪ್ಪೊಡು. ಆಂಡ ಎಂಕಲೆನ ಒಂಜಿ ಹೆರ್ದ್ ದ ತುಲ್ಲೆ ಉಂಡು, ಮರಟ್ ಆಯಿನ ಪೆಲಕಾಯಿ ಎಡ್ಡೆ, ಗೆಲ್ಲ್ ದ ಕೆಲವು ಕಸ್ಕಾಯಿ. ಅಪಗಾಂಡ ಇಂಗ್ಲೀಷ್ ದ ಕವರ್ (cover) ಗ್ ತುಲುಟು ದಾದ ಪನ್ಪೆರ್? ಪೊದಿಕೆ (ಕನ್ನಡೋಡು ಹೊದಿಕೆ) ಪನ್ಪೆರ್. ಮಾನವ ಮೂಳೆ ಮಾಂಸದ ಹೊದಿಕೆ…. ಭಕ್ತ ಕುಂಬಾರದ ಪದ. ಮಂದಿರಿ ಒಂಜಿ ಪೊದಿಕೆ ಆತೇ? ಅಪಗಾಂಡ ಈ ಕನ್ನಡದ “ಬುತ್ತಿಗ್” ದಾಯೆ ಪೊದಿಕೆ ಪನ್ಪೆರ್? ದೂರ ನಡತ್ ಪೋಪಿನಗುಲು ಉನಸ್ ತಿನಸ್ ಬಾರೆದಿರೆ ಬಾಡದ್ ಐಟ್ ಪೊದ್ದಿದ್ ಕುಂಟುಡು ಕಟ್ಟ್ ದ್ ಕೊನೊವೊಂದು ಇತ್ತೆರ್, ತಾದಿಡ್ ತಿನರೆ. “ಪೊದಿಕೆ ಕಟ್ಟ್ ದ್ ಕೊರ್ಪಿನಿ” ಪನ್ಪೆರ್. ಗಾದೆ ಕೇಂದ್ ಜರಾ “ಪಂಡ್ ಕೊರಿ ಪಾತೆರಲ ಕಟ್ಟ್ ಕೊರಿ ಪೊದಿಕೆಲ ಏತ್ ಮುಟ್ಟ ಬರು”.
ಒಡು (ಉಡ) ತೆರಿದುಪ್ಪು ನಿಗಲೆಗ್. ಶಿವಾಜಿ ಐತ ನಡುಕು ಬಲ್ಲ್ ಕಟ್ ದ್ ಮಲ್ಲ ಮಲ್ಲ ಕೋಟೆದ ಮಿತ್ತ್ ಬಡತೊಂದು (ಮಿತಾವೊಂದು) ಇತ್ತಿನ ವಿಷಯ ಪರತಿರಿ (ಚರಿತ್ರೆ)ಡ್ ಉಂಡು. ಊಂದೊಂಜಿ ಅನಿಷ್ಟದ ಮುರ್ಗ, ಅವು ಇಲ್ಲ್ ಪೊಗ್ಗುಂಡ ಇಲ್ಲಗ್ ಜದ್ರ ಬರ್ಪುಂಡು ಪಂದ್ ತುಲುವೆರೆ ನಂಬೊಲಿಗೆ. ಓಡೆ ಮುಟ್ಟ ಪಂಡ, ಇಲ್ಲದ ಉಲಾಯೀಡ್ “ಒಡು” ಪನ್ಪುಜೆರ್. ಕಬರ್ ನಾಲಾಯಿದ ಪನ್ಪೆರ್. ಅಂದ್ ಐತ ನಾಲಾಯಿ (ಬವುಸ ಉಚ್ಚುಲೆಲೆಕ್ಕ) ಕೊಡಿಟ್ ಕಬರ್ (ರಡ್ಡ್ ಸೀಲ್). ಕಬರ್ ಗ್ “ಒಂಜಿ ಬಾಯಿ” (ತುತ್ತು), “ತೊಡು” (ಬಾಯಿ ಚಪಲ) ಪಂದ್ ಲಾ ಅರ್ತ ಉಂಡು. “ಅಸರ್ ಗ್ ಬೊಂಡ, ಕಬರ್ ಗ್ ಕಾಯಿ (ಬಜ್ಜೆಯಿ ಪೂಲು)”
ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
