ಅರ

ಮರ ಸಪಾಯಿ ಮಲ್ಪರೆ ಕಿಸುಲಿ ಇತ್ತಿಲೆಕ್ಕ, ಚೆಂಬು (metal) ನ್ ನಯಿಮನೆ ಮಲ್ಪರೆ ಅರ ಪಾಡುವೆರ್. ಹದ ಪಜ್ಜಿ ನೆಲ ‘ಅರೆ’ ದ್ ಸಪಾಯಿ ಮಲ್ಪುವ. ಅರೆಪುನ ಸಾಧನ (tool) ಅರ (file), ಕನ್ನಡೊಡುಲಾ ಅರ. ಕರ್ಬ, ಮಿಲಾವು (steel) ದ ಕತ್ತಿ, ಬಿಸತ್ತಿ, ಕತ್ತೆರಿಲೆನ ಬಾಯಿ (ಅಲಗು) ಪರ್ತೆ ಮಲ್ಪರೆ ಅರ ಪಾಡುವೆರ್ ಅತ್ತ್ ಡ ಅರೊಟು ತಿಕ್ಕುವೆರ್. ಅಂಚೆನೇ ಅಡ್ಡಮುರಿ, ಗರ್ಗಸ್ ಲೆಗ್ ಲಾ ಅರ ಪಾಡೊಂದು ಇಪ್ಪೊಡು. ಇಜ್ಜಿಡ ಐಕ್ಲೆನ ಕೂಲಿ ಬಡ್ಡ್ ಕಟ್ಟುಂಡು.

ಮಿಲಾವು ಪಂಡ steel, ಕರ್ಬೊಗು ಅಂಗಾರ (carbon, ಕರಿ) ಬಿರಾದ್ ಮಲ್ಪುನು. ತುಲುತ ಸ್ಟೀಲ್ ಅವು ಮನ್ನ್ ಪತ್ತಂದಿನ ಮಿಲಾವು (Stainless Steel). ಕರ್ಬೊಗು ಒಂತೆ ಕ್ರೋಮಿಯಂ (11%,) ಬೊಕ್ಕ ಬಜೀ ಒಂತೆ ನಿಕ್ಕೆಲ್ ಪನ್ಪಿ ಮೂಲ ಧಾತು (element) ಲೆನ್ ಸೇರಾದ್, ತುಲುತ ಸ್ಟೀಲ್ ಮಲ್ಪುವೆರ್‌.
ಬೆನ್ನಿದ ಬೇಲೆಗ್ ಗಲಸುನ ಕತ್ತಿನ್ ನಮ ಒಚ್ಚಿದ ಮರಟ್ ಕೂಟುವ. ಪಂಡ ಬೊರ್ಗಲ್ಲ್ ದ ಪೊಡಿ ಪಾಡ್ದ್, ಕತ್ತಿದ ಬಾಯಿದ ರಡ್ಡ್ ಮೆಯಿನ್ ಲಾ ಒಚ್ಚು (ತಿಕ್ಕು)ವ. ಅಪಗ ಕರ್ಬ ತರೆದ್, ಬಾಯಿ ಪರ್ತೆ (sharp) ಆಪುಂಡು. ಕೋರಿದ ಬಾಲ್ (ಉದ್ದ ಪುಡಿತ ಎಲ್ಯ ಕಡ್ಸಲೆ) ನ್ ಸಾನೆಕಲ್ಲ್ ಡ್ ಒಚ್ಚಿದ್ ಪರ್ತೆ ಮಲ್ಪುವೆರ್.

ಅಡ್ಡಮುರಿ ಪಂಡ ಇರ್ವೆರಪ್ಪ ಮರತ ಕುದೆ (ಬೊಡ್ಡೆ) ಕ್ ಲೆನ್ ಅಡ್ಡೊಗು ಕುದುಪರೆ ಇತಿನ ಗರ್ಗಸ್. ಅಡ್ಡ’ಮು’ರಿನ್ ಅಡ್ಡ’ಮೂ’ರಿ ಪನಡೆ, ಅರ್ತ ಬೇತೆನೇ ಆಪುಂಡು. ಅಡ್ಡಮುರಿತ ಅಗೆಲ ಒಂಜೇ ಲೆಕ್ಕ್ ಇತ್ ದ್, ರಡ್ಡ್ ಕಡೆಟ್ ಲಾ, ರಡ್ಡ್ ಮರ್ಗಿಲ್ ಡ್ ಲಾ ಪುಡಿ (handle) ಇಪ್ಪುಂಡು. ಅಡ್ಡಮುರಿ, ಗರ್ಗಸ್ ಡ್ ಕುದುಪುನೈಕ್ ‘ಒಯಿಪುನು’ ಪನ್ಪೆರ್. ಚಿತ್ರೊಡ್ ಇಪ್ಪುನವು ಕಯಿ ಗರ್ಗಸ್. ಮರ (ಕುದೆ) ಸಿಗಿಪರೆ ಇಂಚಿನವೇ ಮಲ್ಲ, ಉದ್ದದ ಗರ್ಗಸ್ ಗಲಸುವೆರ್. ಆಂಡ್ಡ ರಡ್ಡ್ ಕಡೆಟ್ ಲಾ ಗುಂಟ ಇಪ್ಪುಂಡು. ಸಪೂರದ ಕಡೆತ‌ ಗುಂಟ ಗೆಪ್ಪರೆ ಆಪುಂಡು. ಮರತ ಚೆಕ್ಕೆದ ಕುಟ್ಟಿ ಕೊರ್ದು ಆ ಪುಡಿನ್ ಜಾರಂದಿಲೆಕ್ಕ ಗರ್ಗಸ್ ಗ್ ಕುಲ್ಲಾವರೆ. ಕುದುಪುನ ಮರನ್ ದಡೆಕ್ ಪಾಡುವೆರ್. ಮುಲ್ಪ ‘ದಡೆ’ ಪಂಡ ಒಂಜಾಲ್ ಮಿಕ್ಕ್ ದ್ ಎಪ್ಪರದ ಕಂಬೊಲೆನ ಮಿತ್ತ್ ದ ಚೌಕಟ್ಟ್. ಎಚ್ಚಾದ್ ಒಂಜಿ ಬರಿಟ್ ಜರೆ ಇಪ್ಪುಂಡು, ಬೊಕ್ಕೊಂಜಿ ಬರಿಟ್ ರಡ್ಡ್ ಕಂಬ, ಐಕ್ಲೆನ ಮಿತ್ತ್ ಮರತ ತೊಲೆಕ್ ಲೆನ್ ಉದ್ದೊಗು, ಅಡ್ಡೊಗು ದೀಪೆರ್. ಜರೆಡ್ದ್ ದಡೆಕ್ ಮರ ನೂಕರೆ ಸುಲಬ ಆಪುಂಡು. ಕಾಲಂಗ್ (ಸನ್ನೆ ಕೋಲು ) ಪಾಡ್ದ್ ಮಲ್ಲ ಮಲ್ಲ ಮರತ ಕುದೆಕ್ ಲೆನ್ ಇರ್ವೆರೆ ನೂಕುವೆರ್, ದಡೆಕ್. ಒರಿ ಮರತ ಕುದೆತ ಮಿತ್ತ್ ಉಂತೊಂದು, ಬೊಕ್ಕೊರಿ ಕುದೆತ ಅಡಿಟ್ ಉಂತೊಂದು ಮರ ಸಿಗಿಪುನು. ಕುದೆತ ಮಿತ್ತ್ ಮೆಯಿಕ್ ‘ನೂಲ ಬಲ್ಲ್’ ಪತ್ತುವೆರ್. ಪಂಡ ನೂಲುನು ಕಲದಿನ ಕರಿಕ್ ಮುರ್ಕದ್, ಆ ಕಡೆಟ್ ಒರಿ, ಈ ಕಡೆಟ್ ಒರಿ ಪತ್ತ್ ದ್ ಮಿತ್ತ್ ಒಯಿತ್ ಬುಡ್ಂಡ, ಸರ್ತ ಉದ್ದೊಗು ಅಡಿಕೋಲುಡು ಗೆರೆತಾಯಿ ಪಾಡಿ ಲೆಕ್ಕ ಕಪ್ಪು ಗೆರೆತಾಯಿ ಬೂರುಂಡು. ಬ್ಯಾಟರಿ ಸೆಲ್ಲ್ ನ್ ದರ್ತ್ ದ್ ಐತ ಉಲಾಯಿದ ಕರಿನ್ ಬಜಿ ಕಯಿಟ್ ಕಲತ್ ದ್ ಗಲಸೊಂದು ಇತ್ತೆರ್ ದುಂಬು. ಅವು ಕಾಯಂ (permanent) ಶಾಯಿ, ಅಂಡ ಮಹಾ ಇಸ. ಕಯಿಕ್ ಪತಿನ ಶಾಯಿ ವಾರಗಟ್ಲೆ ಬುಡೊಂದು ಇತ್ ಜಿ. ಉನ್ನಗ ತಿನ್ನಗ ಒಂತೊಂತೆನೇ ಬಂಜಿ ಸೇರೊಂದು ಇತ್ಂಡ್.

ಇಪ್ಪಡ್, ಅರತ ಬಗೆಟ್ ಒಂತೆ ಇಸಯ ಅರಗ (ಒಟ್ಟು ಮಲ್ಪುಗ). ಅರ ಪಂಡ ದರ್ಗ್ ದ (rough) ಮಿಲಾವುದ ತುಂಡು. ಆ ತುಂಡುದ ಮಿತ್ತ್ ಅಡ್ಡೊಗು, ಉದ್ದೊಗು, ಕೊಂಟು (ಮೂಲೆ)ಡ್ದ್ ಕೊಂಟುಗು ಗೆರೆತಾಯಿ ಕುರೆದ್ ಇಪ್ಪುಂಡು. ಅವ್ವೆನ್ ಕರ್ಬ ಅತ್ತ್ ಡ ವಾ ವಸ್ತ್ ಗ್ ತಿಕ್ಕ್ಂಡಲಾ, ಆ ವಸ್ತ್ ತರೆವುಂಡು. ಅರಟ್ ತಿಕ್ಕುನೈವೆನ್ ಉರ್ದುನು ಪಂದ್ ಪನ್ಪೆರ್.

ಕತ್ತೆರಿಗ್ ಸಾನೆ ಪಾಡುನು ಪಂಡಲಾ, ಅರ ಪಾಡುನೆ. ಕತ್ತೆರಿ ರಡ್ಡ್ ಬಿಸತ್ತಿಲೆನ್ ಒಟ್ಟುಗು ಸೇರಾದಿನ ಉಪಕರಣ. ಐಕ್ ಲೆನ ರಡ್ಡ್ ಬಾಯಿಲೆನ್ ಸುಲಬೊಡು ಅರಪರೆ, ಮಡಿಪರೆ ಆಪುಂಡು. ಮಡಿಪುನಗ ರಡ್ಡ್ ಬಾಯಿಲು ಸೇರುನಲ್ಪ ಅರುವೆ, ಕಾಕಜಿಲೆನ್ ಸಿಗಿಪುಂಡು. ಕತ್ತೆರಿದ ಬಾಯಿ (ಧಾರೆ, blade) ಲೆನ್, 45° ಡ್ ಉರೆತ್ (ತರೆತ್) ದ್ ಪರ್ತೆ ಮಲ್ತ್ ಇಪ್ಪುವೆರ್. ಸಾನೆ ಕೊರ್ಪಿನಿ ಪಂಡ, ತಿರ್ಗುನ ಚಕ್ರದಲ್ಕದ ಅರೊಕು ಪತ್ತುನು. ಇಲ್ಲದ ಬಿಸತ್ತಿಲೆಗ್ ಲಾ ಅರ ಪಾಡುವೆರ್.

ಅಡ್ಡಮುರಿ, ಗರ್ಗಸ್ಲೆಗ್ ಕೂಲಿ ಇಪ್ಪುಂಡು. ಕೊಡಿ ದೂಂಚಿ (ಚೂಂಪು) ಇಪ್ಪುನ ಈ ಕೂಲಿಲು, ಒಂಜಿ ಒಂತೆ ದತ್ತ್ ಗ್, ಬೊಕ್ಕೊಂಜಿ ಒಂತೆ ಬಲತ್ತ್ ಒರ್ದುದು ಇಪ್ಪುವ. ಆ ಪ್ರತಿ ಒಂಜಿ ಕೂಲಿದ ರಡ್ಡ್ ಮೆಯಿನ್ ಲಾ ಅರೊಟು ಉರ್ದೊಡು, ಗರ್ಗಸ್ ನ್ ಪರ್ತೆ ಮಲ್ಪರೆ. ಕೆಯಿ ಕೊಯ್ಯರೆ ಪರ್ಕತ್ತಿ ಆವೊಡು. ಪುದರೇ ಪಂಡಿಲೆಕ್ಕ, ಪರು (ಕೂಲಿ) ಇತಿನ ಕತ್ತಿ ಪರ್ ಕತ್ತಿ. ಬಯಿ ಕತ್ತಿ (ಸಾಮಾನ್ಯ ತಪ್ಪು ಕುದುಪುನ ಕತ್ತಿ) ಗ್ ಅರ ಪಾಡ್ದ್ ಕೂಲಿ ಮಲ್ಪವೆರ್, ಕೊಡಪಟ್ಯಡ್ (ಕರ್ಬದ ಬೇಲೆದ ಆಚಾರಿಲು). ಅರ ಪಾಡ್ದ್ ಕರ್ಬದಂಚಿನ ಲೋಹನ್ ತರೆಪುನು ಅತೇ? ನೆಲ ಕಲ್ಲ್ ಡ್ ಅರೆಪುನು ಪಂಡ, ದರ್ಗ್ ದ ಮೆಯಿನ್ ತರೆತ್ ದ್ ಸಪಾಯಿ ಮಲ್ಪುನು ಅತೇ? ಅಪಗಾಂಡ ಗಂಧದ ಕುದಡ್ ಕಲ್ಲ್ ದ ಮಿತ್ತ್ ಅರೆಪುನಾ ಅತ್ತ್ ಗಂಧೊನು ತರೆಪುನಾ? ಅರೆಪುನು ಪಂಡ ತಿಕ್ಕುನು (rub), ಗಂಧ ಅರೆಪುನು ಸರಿ. ಅರೆತಿನೈಡ್ದಾವರ ಗಂಧದ ಕುದಡ್ ತರೆವುನು.

ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ