ರಾಜ್ಯ ಸರಕಾರ ಸಾಧಕ ಬಾಧಕದ ಪಟ್ಟಿ ಮಲ್ಪುಲೆ ಪಂಡುದ್ ಇತ್ತೆ ಸಮಿತಿ ಮಲ್ದುಂಡ್, ಅವೆನ್ ನಮ ಯಾಪನೆ ವೀರೇಂದ್ರ ಹೆಗ್ಡೆರೆನ ಒಟ್ಟುಗು ಪೋದು ಪ್ರಧಾನಿಡನೆ ಕೊರ್ತ, ಒಂಜಿ ರಡ್ಡ್ ಸಲ ಅತ್ತ್ ಮೂಜಿ ಮೂಜಿ ಸಲ ಕೊರ್ತ. ನಮ ನಮ್ಮ ಹಕ್ಕ್‍ನ್ ಕೇನುನ ರೀತಿ ಬದಲಾವೊಡು, ನಮ್ಮ ರಾಜಕೀಯದಕುಲು “ಇದನ್ನು ಒಂದು ನೋಡಿ” ಪಂಡುದ್ ಮನವಿ ಕೊರ್ಪೆರ್, ಅವು ಬದಲಾವೊಡು “ಇದನ್ನು ಒಂದು ಮಾಡಿ” ಪನ್ಪಿನ ಸೊರ ಪಿದಾಡೊಡು. ಇಜ್ಜಿಡ ದುಂಬುದ ಸರ್ತಿದ ಓಟುದ ಪೊರ್ತುಗು ನಿಕಲೆನ್ ತೂವೊನುವ ಪನ್ಪಿನ ನಿರ್ಧಾರ ದೆತೊನೊಡು.
ತುಳು ಭಾಷೆದ ವಿಷಯ ಬನ್ನಗ ನಮ್ಮ ನಡುಟು ಆ ಪಕ್ಷದಾಯೆ ಈ ಪಕ್ಷದಾಯೆ ಪನ್ಪಿನ ಬೇಧ ಬರಿಯರೆ ಬಲ್ಲಿ ಒಟ್ಟಾದ್ ತುಳುಕ್ಕು ಬೇಲೆ ಮಲ್ಪೊಡು ಪಂಡುದ್ ಆರ್ ಖಡಕ್ಕ್ ಎಚ್ಚರ್ಮೆ ಲಕ್ಕಾಯೆರ್. ಬೆಂಗಳೂರು ತುಳುವೆರೆ ಚಾವಡಿದ ಪರ್ಬದ ಬೊಳ್ಳಿ ಪರ್ಬದ ಪೊರ್ತುಡು ಪಾತೆರೊಂದು ಆರ್ ಇಂಚ ಪಂಡೆರ್.
ರಾಜಕಾರಣಿಲು ತುಳು ಭಾಷೆದ ಸಭೆಕ್ಕ್ ಬರ್ಪುಜೆರ್, ಬತ್ತಿನಕುಲುಲಾ ರಡ್ಡ್ ಬೆಲ್ಲ ನಕ್ಕಾವುನ ಪಾತೆರ ಪಂಡುದ್ ಪೋಪೆರ್. ನಮ ದಿಲ್ಲಿಡ್ಲಾ ಸೊರ ಲಕ್ಕವೊಡು. ರಡ್ಡ್ ಸಾವಿರ ಜನ ಬಲೆ ನಮ ಪಾರ್ಲಿಮೆಂಟುದಾ ಎದುರುಡು ಕುಲ್ಲುದು ತುಳುತ ಮನಾದಿಗೆ ಕೇನುಗ. ದಾಯೆಗ್ ಆಪುಜಿ ತೂಕ ಯಾನ್ ಐಕ್ ಬೋಡಿತ್ತಿ ಅಟ್ಟನೆ ಮಲ್ಪರೆ ತಯಾರುಲ್ಲೆ, ಮಾತಾ ದೇಶ ವಿದೇಶದ ತುಳುವೆರ್ ಒರ ಒಟ್ಟಾಕ, ಭಾಷೆಗೋಸ್ಕರ ಹಕ್ಕ್‍ಡ್ ಸ್ವರ ಲಕ್ಕಾಗ ಪಂಡುದ್ ಪಂಡೆರ್.
ರಾಜ್ಯ ಸರಕಾರ ತುಳುನಾಡುಗ್ ಬೇತೆ ಬೇತೆ ಭಾಷೆಗ್ ಒಂಜಾತ್ ಅಕಾಡಮಿ ಕೊರುಂಡು, ಮಾತಾ ಅಕಾಡಮಿಲೆಗ್ಲಾ ಐವ್ವ ಅಜಿಪ ಲಕ್ಷ ಅನುದಾನ ಕೊರ್ಪುಂಡು. ಒಂಜಿ ಕೋಟಿ ಜನ ಪಾತೆರುನ ತುಳು ಭಾಷೆಗ್ ಅಜಿಪ ಲಕ್ಷ ಓಡೆಗ್ ಯಾರುಂಡು? ಸರಕಾರ ತುಳು ಭಾಷೆದ ಅಭಿವೃದ್ಧಿಗ್ ಕನಿಷ್ಠ ಪತ್ತ್ ಕೋಟಿ ಅನುದಾನ ಕೊರೊಡು, ಕನ್ನಡ ಪ್ರಾಧಿಕಾರದಲಕ್ಕ ತುಳು ಬುಲೆಚಿಲ್‍ಗ್ಲಾ ಒಂಜಿ ಸಂಸ್ಥೆ ಆವೊಡು. ತುಳು ಅಕಾಡಮಿದ ಅಧ್ಯಕ್ಷರೇಗ್ಲಾ ಸಚಿವ ಸಂಪುಟದ ಸ್ಥಾನಮಾನ ಕೊರೊಡು ಪಂಡುದ್ ಆರ್ ಒತ್ತು ಕೊರ್ದು ಪಾತೆರ್ಯೆರ್.
ತುಳು ಭಾಷೆದ ಪುಗಾರ್ತೆ ಕಾಂತಾರ ಸಿನಿಮಾ ಬತ್ತಿಬೊಕ್ಕ ದೇಶ ವಿದೇಶೊಗು ಮುಟುದುಂಡು. ಐಕ್ಕಾದ್ ನಮ ರಿಷಬ್ ಶೆಟ್ರೆನ್ ನೆನೆತೊನೊಡು. ಸಾಹಿತ್ಯದ ಬುಲೆಚಿಲ್ಗ್ ಇಂಚಪ್ಪ ಐಲೇಸಾ, ತುಳುವೆರೆ ಚಾವಡಿ ಇಂಚಿನ ಸಂಸ್ಥೆಲು ಎಡ್ಡೆ ಬೇಲೆ ಮಲ್ತೊಂದು ಉಲ್ಲ. ಮಾತೆರ್ಲಾ ಇಂಚಿನ ಸಾಹಿತ್ಯದ ಬೇಲೆನ್ ಮಲ್ಪುನ ಪ್ರಯತ್ನ ಮಲ್ಪೊಡು ಪಂಡೆರ್.
