ಕಂಡ ದತ್ತಿ ಬೊಕ್ಕ ಗೆಟ್ಟಿ ಪೊಡಿ ಮಲ್ಪರೆ (ಪೊಡಿ ಕಂಡ ಆಂಡ), ಅತ್ತ್ ಡ ಗೆಟ್ಟಿ ನೀರ್ ಮಲ್ಪರೆ (ನೀರ ಕಂಡ ಆಂಡ) ಗೋರಿ ಅತ್ತ್ ಡ ಪಲಾಯಿ ‘ಮುಟ್ಟುವ’. ಮುಲ್ಪ ‘ಮುಟ್ಟು’ನು ಪಂಡ ದತ್ತಿನ ಕಂಡೊನು, ಎರ್ಲೆನ (ಅತ್ತ್ ಡ ಬೊರ್ಲೆನ) ನುಗೊಕು ಪಲಾಯಿದ “ಮುನೆ”ನ್ ಕಟ್ ದ್, ಪಲಾಯಿದ ಮಿತ್ತ್ ನರಮಾನಿ ಉಂತುದು, ಎರ್ಲೆಡ ಒಯಿಪಾವುನು. ಅದಗ ಕಂಡದ ಮನ್ನ್ ಸರಿಕೆ ಆವೊಂದು ಪೋಪುಂಡು. ಅವ್ವೇ, ದತ್ತಿನ ಕಂಡದ ಮನ್ನ್ ಸರಿಕೆ (ಸಮಮಟ್ಟ, level) ಮಲ್ಪರೆ ಗಲಸುನ ಆ ಪಲಾಯಿಗ್ ಗೋರಿಪಲಾಯಿ ಪಂದ್ ಪನ್ಪೆರ್. ಆಂಡ ಎಚ್ಚಾದ್ ಬಜೀ ಗೋರಿ ಅತ್ತ್ ಡ ಬಜೀ ಪಲಾಯಿ ಪನ್ಪ. ಆ ಪಲಾಯಿಗ್ ಗೋರಿ ದಾಯೆಗ್ ಪನ್ಪೆರ್? ಕಂಡೊನು ಸರಿಕೆ (ಸಮತಟ್ಟ್) ಮಲ್ಪುನೈಕ್ ಕಂಡ ‘ಗೋರು’ನು ಪನ್ಪೆರ್. ಅಂಚಾದ್, ಗೋರಿಯರೆ ಇತಿನ ಪಲಾಯಿ ಗೋರಿಪಲಾಯಿ. ಕೊಲಕೆದ ಕಂಡ ಗೋರುನು ಬೊಕ್ಕ ಪುಂಡಿ ಬಿತ್ತ್ ಪಾಡುನು. ಪಂಡ ಕೊಳಕೆದ ಕಂಡೊನು ನೀರ್ ಗ್ ದತ್ತ್ ದ್, ಸರೀ ಮುಟ್ಟುದು (ಪಲಾಯಿಡ್ ಸರಿಕೆ ಮಲ್ತ್ ದ್), ಬಿತ್ತ್ (ಬಾರ್) ಮುದರ್ (ಕಿದೆ ಗೊಬ್ಬರದ ಪೊಡಿ)ಡ್ ಬಿರಾದ್, ಪುಂಡಿ ಪುಂಡಿ ಕಂಡೊಗು ಪಾಡೊಂದು ಪೋಪಿನಿ. ಕೊಲಕೆ ಬಿತ್ತುನು (ನಡ್ಪಿನಿ ಅತ್ತ್). ಸುಗ್ಗಿ ನಡ್ಪಿನಿ, ಕಾರ್ತಿಲಾ ಎಚ್ಚಾದ್ ನಡ್ಪಿನಿ. ಮತ್ತಾವುಲೆನ್ (ಎಪ್ಪರೊಡು ಇಪ್ಪುನ ಕಂಡೊಲು) ಬಿತ್ತುವೆರ್ ಕೆಲವೆರ್‌ ಕಾರ್ತಿ ಬಿತ್ತುನು ಪಂಡ, ಅಂಬಿನೀರ್ ಡ್ ಮುರೆತ್ ದೀದ್ ಮುಂಗೆ ಬರ್ಪಯಿನ ಬಿತ್ತ್ (ಬಾರ್)ನ್ ಪಂಡಿಡ್ ಬೀತ್ ದ್ ದಕ್ಕುನು, ಕಂಡದ ಕೊಡಿಕಡೆ ಪಸೆರ್ತ್ ದ್. ಸುಗ್ಗಿದ ಆಜನೀರ್, ಕಾರ್ತಿದ ತರೆನೀರ್, ಕೊಲಕೆದ ಅಡಿನೀರ್. ಪಂಡ ಕೊಲಕೆದ ಕಂಡೊಲೆಗ್ ಎಚ್ಚಾದ್ ಉಗ್ಗೆಲ್ ಡ್ದ್ ಪನೆಟ್ ಮಾತಿನ (ಮರಾಯಿಡ್ ಗೆತ್ತ್ ಮಯಿತಿನ) ನೀರ್. ಬಾರಿ ಪಿರಿಯದ ಬೊಕ್ಕ ಬಂಙದ ನೀರ್. ಅಂಚಾದ್ ಕಂಡೊನು ಸರೀ ಪಲಾಯಿ ಪಾಡ್ದ್ ಮುಟ್ಟೊಡು (ಸರಿಕೆ ಮಲ್ಪೋಡು). ಅಪಗ ಬಾವೆ ಕುಲ್ಲುಂಡು. ಉಂದು ‘ಬಾವೆ’ ಪಂಡ ಪೇರ್ ದ, ಬೊಂಡದ ಬಾವೆದಲ್ಕನೇ, ಸನ್ನ (ನುಣ್ಣನೆಯ) ಮನ್ನ್ ದ ತೆಲುಪುದ ಪರೆ (film). ಅಪಗ ಕಂಡದ ಮನ್ನ್ ನೀರ್ ಕಮ್ಮಿ ಒಯಿತೊನುಂಡು. ಕೆಯಿತ ಬುಲೆಕ್ ಮಸ್ತ್ ನೀರ್ ಬೋಡು, ಕೆಯಿತ ಮುದೆಲ್ ಡ್ ನೀರ್ ಉಂತೊಡು.
ರುಂದನೊಗುಲಾ ಕೆಲವು ಕಡೆಟ್ ಗೋರಿ (ಸಮಾಧಿ, tomb) ಪನ್ಪೆರ್. ನುಪ್ಪು ಬಲಸುನ ತಟ್ಟುಗ (ಸಟ್ಟುಗ) ನೆಕ್ಕ್ ಲಾ ಗೋರಿ (ಗೋರಿಗೆ) ಪನ್ಪೆರ್. ಬಾರ್ ಒಟ್ಟು ಮಲ್ಪುನ ಕೊಟ್ರೆದಲ್ಕದ ಒಂತೆ ಅಗೆಲದ ಮರತ ಪಲಾಯಿಗ್ ಕೈಗೋರಿ ಪನ್ಪೆರ್ ಎಂಕಲಂಚಿ. ಕೆಲವು ಕಡೆಟ್ ನೆಕ್ಕ್ ಕೈಪುಲು ಪನ್ಪೆರ್. ಅಂಚೆನೆ ನಡಪರೆ ಕಲ್ಪುನ ಜೋಕುಲೆಗ್ ಮೂಜಿ ಚಕ್ರದ ‘ಬಂಡಿಗೋರಿ’ (ಚಿತ್ರ ತೂಲೆ) ಕಯಿಟ್ ಕೊರೊಂದು ಇತ್ತೆರ್ ದುಂಬು. ಒಂತೆ ಸಪೂರದ ಗೋರಿಪಲಾಯಿಗ್ ದತ್ತ್ ಬಲತ್ ಗ್ ಚಕ್ರ ತಿಕ್ಕದ್ ಗೋರಿಬಂಡಿ ಮಲ್ತ್ ದ್, ಮುಂಡುಲೆನ ನುಗೊಕು ಕಟ್ ದ್ ಜವನೆರ್ ಗೊಬ್ಬೊಂದು ಇತ್ತೆರ್ ಗೆ ದುಂಬು. ಲಚ್ಚಿಲ್ ಲೆಡ್, ರಸ್ತೆಲೆಡ್ ಗೋರಿಬಂಡಿಡ್ಡ್ ಉಂತೊಂದು ಬೋರ್ಲೆನ ಗಿಡಾವೊಂದು ಇತ್ತೆರ್ ಗೆ. ಆ ಕಾಲದ ಮಲ್ಲ ಗೊಬ್ಬು ಜವನೆರೆಗ್, ಇತ್ತೆ ಬೈಕ್ ರೇಸ್, ಕಾರ್ ರೇಸ್ ಇತಿಲೆಕ್ಕ. ಇತ್ತೆದಕುಲು “ಗೋರಿಬಂಡಿ” ಪಂಡ “ಬಂಡಿಗೋರಿ” ಪಂದೇ ತೆರಿದೆರ್. “ಗೋರಿ ತೇರಾ ಗಾಂವು ಬಡಾ ಪ್ಯಾರ…”, ಆ ಗೋರಿ ತುಲುವ ಬೊಲ್ಲಿ (ಬೊಲ್ಲನೆದಾಲ್). ಅಂಚ ಕೋಡೆ ಗೋರಿದ ಪಟ ಪಾಡ್ದ್, ಈ ಪದ “ಗೋರಿ ತೇರಾ…” ಪಾಡಿಯೆ. ಆ ಪಲಾಯಿಗ್ ಗೋರಿ ಪನ್ಪೆರ್ ಪಂದ್ ತೆರಿಯಂದಿನಗಲೆಗ್ ಕುಸಾಲ್ ಅರ್ತ ಆದ್ ಇಪ್ಪಂದ್.
ಬರವು : ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ.
