ತುಳುನಾಡ್ ನಾಗೆ, ಬಿರ್ಮೆರ್, ದೈವೊ, ದೇಬೆರ್, ಸಿರಿ ಕುಮಾರೆರ್, ಬೀರ ಪುರ್ಸೆರೆ ಕಾರ್ನಿಕೊದ ಬೂಡು. ಮುಲ್ಪ ಕಾಪುನ ದೇವೆರೆನೊಟ್ಟುಗು ಬಗಳೆ ಕಲೆದ್, ಅಪ್ಪೆಯಾದ್ ಆದರಿಪುನ, ತಮ್ಮಲೆಯಾದ್ ಬಾಮ್ಯುನ ಆದೆರ್ಪುದ ದೆಯ್ಯೊಲು ತುಳುವ ಸೀಮೆನ್ ಕಲೆ ಕಾರ್ನಿಕೊಡು ಮೆರೆಪಾವೊಂದುಪ್ಪುನ ಕಣ್ಣ್ ದಾಂತಿನಾಯಗ್ಲಾ ನೆಗತ್ ತೋಜುನ ಸತ್ಯೊ. ನಾಗನಡೆ, ನಾಗನಿಧಿ, ನಾಗಬೀದಿ ಪಂದ್ ನೀರ್ ಪರಿಪುದ ಒಸರ್‌ನ್ ಲೆತ್ತ್ ಬಾಮಿಂಡಲಾ, ಕೂಲಿಡ್ ಇಸೊ ದಿಂಜಾದ್, ಪರಿಪು ಮರಿಕ್ಕ್ ದೇಬೆರೆ ತಾನೊ ಕೊರ್ದ್ ನಾಗದೇವೆರ್ ಪಂದ್ ಬಾಮಿದ್, ತನು ತಂಬಿಲೊ ಸೇವೆ ಸಂದಾದ್ ಅಮುರ್ತೊದ ಸಬಿ ಆಸ್ರಾದೊ ಪಡೆಪುನಕ್ಲ್ ತುಳುವೆರ್. ಮಣೆ, ಮಂಚಾವು, ಕಾಟ್ ಕಲ್ಲ್, ಕಲ್ಲ್, ಬನೊ, ಸಾನೊ, ಮಾಡೊ, ಗುಂಡೊ, ಆಲಡೆ ಪಂದ್ ದೈವೊಗೊಂಜಿ ದೈವನಿಲೆ ಮಲ್ತ್ ಅಯಿಕ್ಕೊಂಜೊಂಜಿ ರೀತಿ, ನೀತಿ ಉಂಡು ಮಲ್ತ್, ಅವೆನ್ನವೇ ನಿಯಮೊ ಬಾಮಿದ್ ಅಯಿನ್ನ ಪಿರ್ಕಾರೊ ನಡಪಾವೊಂದು ಬತ್ತ್ ಕಾಡ ಬರಿಡ್ದ್, ಕಡಲ ಕರೆಮುಟ್ಟ ನ್ಯಾಯ ನೀತಿ, ಸತ್ಯ ನಂಬುಗೆಡ್ ಬದ್ಕ್ ಕರಿತೊಂದುಲ್ಲೆರ್. ಅಪಗ ಉಂದು ಮಾತ ಉಂಡಾಯೆರೆ ಕಾರಣ ದಾದ ಪಂದ್ ಇನಿತ್ತ ಜೋಕುಲೆಗ್ ಚೋದ್ಯೊ ಉದಿಪುನು ಸಾಜೊ. ಅವೆಕ್ಕ್ ಉತ್ತರ ನಾಡೊಂದು ಪೋನಗ ತಿಕುನು ಇಂಚ.
ಆದಿಡ್ ಕಾಡ ನಡುಟು ಉದಿತಿ ಮಾನಿಲ್ ಮಾನೊದ ಮದೆ ದಾಂತೆ ಇತ್ತಿನಕ್ಲ್ ಕಾಡ ಸಪ್ಪುಲೆಡ್ ತನ್ನ ಮೆಯಿ ಅಡೆಂಗಯೆರೆ ತೊಟ್ಟಿಯೆರ್. ತಿಕ್ಕಿನೆನ್ ತಿನೊಂದು ಇತ್ತಿನಕ್ಲ್ ನಿದಾನೊಗು ಒವ್ವು ತಿನೊಲಿ ಒವ್ವು ತಿನೆರೆ ಬಲ್ಲಿ ಪನ್ಪಿ ಗೇನೊ ಉದಿಪಾವೊಂದು, ಕಾಡ ಕಂಡೆ, ಬೂರು, ಬೇರ್, ಕಾಯಿ, ಪರ್ಂದ್‌ಲೆನ್ ಪಜ್ಜಿ ಪಜ್ಜಿ ತಿನ್ಪುನಲ್ತ್, ಕಲ್ಲ್ ಕಲ್ಲ್ ಗುದ್ದ್‌ದ್, ಮರಕ್ಕ್ ಮರನ್ ತಿಕ್ಕ್‌ದ್ ಅಗ್ಗಿ ಅರಲಾದ್, ಮುರ್ಗೊ, ಪಕ್ಕಿಲೆಡ್ದ್ ತೊಟ್ಟ್‌ದ್ ಅರಿ ಬಾರ್ ಬುಲೆದ್ ಬೆಯ್ಪಾದ್ ತಿನ್ಪುನ ಮುಟ್ಟ ದುಂಬು ಬತ್ತೆರ್. ಅಲ್ಪಡ್ದ್ ಎನ್ನ, ತನ್ನ ಪನ್ಪಿ ಗೇನೊಡು ಇಲ್ಲ್, ಬದ್ಕ್, ಸಂಸಾರೊ, ಕುಟುಮೊ, ಕೂಡುಕಟ್ಟ್, ಸಮಾಜ ಪಂದ್ ಬುಲೆಯೆರ್. ಸಪ್ಪುದ ಮದೆ ಬುಡ್ದ್, ಮುರ್ಗೊಲೆ ಚೋಲಿ, ಪಕ್ಕಿಲೆ ಸುಯಿಟ್ ದುತ್ತೈತೊ ಮಲ್ತೊಂದು ದುಂಬು ಬತ್ತಿನಕ್ಲ್ ಕುಂಟು ನೆಯ್ಯೆರೆ ಕಲ್ತೊಂದು ಕುಂಟಂಗಿ ಪಾಡೊಂದು, ಪರ್ಬೊ ಮೆಲ್ಲಿಲೆನ್ ಮಲ್ತೊಂದು ಬನ್ನಗ ಕಣ್ಣ್‌ಗ್ ತೋಜುನ ದೇಬೆರ್ ಬಾನೊ ತಾದಿಡ್ ಬಲಿತ್, ಪುಡೆಮಿಗ್ ಇರ್ಲ್ ಪಗೆಲ್‌ನ್ ಬಾಮಿಪಿ ಸೂರ್ಯ ಚಂದ್ರೆರೆನ್ ಅಪ್ಪೆಮ್ಮೆ ಪಂದ್ ಆರಾದಿಪುನ ಒಟ್ಟುಡು ನಿಲೆ ಕೊರಿ ಆದೇರ್ಪುದ ಬೂಮಿನ್ ಅಪ್ಪೆ ಪಂದ್ ಮಾನಿತ್, ಬೂಮಿಡ್ ತೋಜುನ ದೈಮರ ಬೂರುಲೆನ್ ಪುಡ್ಡಿದ್ ಬೇಲೆ ತೊಟ್ಟಿಯೆರ್. ಅಲ್ತ್ ದುಂಬು ಪೋವೊಂದು ಮಲೆ ಗರಿತ್ತ್, ಕಾಡ್ ಕಡ್ತ್ ಸಮತಟ್ಟ್ ಮಲ್ತ್, ಬುಲೆ ಬುಲೆವೊಂದು ತನ್ಕುಲೆ ನಿಚ್ಚೊದ ತೆನಸ್ ಉಂಡು ಮಲ್ಪುನಗ ಜಾತಿ, ಜಾತಿಗೊಂಜಿ ನೀತಿ, ನೀತಿದೊಂಜಿ ಕಸುಬು, ಕಸುಬುಗೊಂಜಿ ನಂಬೊಲಿಗೆ, ನಂಬೊಲಿಗೆಗೊಂಜಿ ಇಂಬು ಉದಿತೊಂಡ್. ಕಂಡೊ ಬೈಲ್, ಜಾಗೆ ಇಲ್ಲ್ ಪನ್ಪಿನೊಟ್ಟು ಕಂಡೊಗೊಂಜಿ ಪುಣಿ, ತೋಟೊಗೊಂಜಿ ಬೇಲಿ, ಇಲ್ಲಗೊಂಜಾತ್ ಜಾಗೆ, ಆಸ್ತಿ ಬದ್ಕ್ ಪಂದ್ ಪಾಲಾಂಡ್. ಒಂಜಾತ್ ಕಾಡ ಮುರ್ಗೊಲು ಮಾನ್ಯ ಮರ್ಜಿದ ತಾಂಕನಗ್ ಬೂರ್ಯ. ನನೊಂಜಾತ್ ಪ್ರಕೃತಿ ಸಮತೋಲನದ ಒಟ್ಟುಡು ತೆನಸ್‌ಗಾಯ. ಪಾತೆರೊಗೊಂಜಾತ್ ಬಾಸೆ, ಬಾಸೆಗೊಂಜೊಂಜಿ ದೇಸೊ, ದೇಸೊದುಲಯಿ ಬಗೆಬಗೆ ದಿಸೆ ಉದಿತ್‌ದಾನಗ ತುಳುನಾಡ್ ಪನ್ಪಿನೊಂಜಿ ಪೊರ್ಲ ನಿಲೆತ್ತ ಉದಿಪುಡ್ ಬೊಲ್ಪಾಂಡ್.
ಬೆನ್ನಿ ಸಾಗೋಲಿದ ತುಳುನಾಡ್‌ಡ್ ಕಂಡೊ ಬೈಲ್, ತೋಟೊ ಕುಮೆರ್‌ಡ್ ಬುಲೆ ಬುಲೆವೊಂದು ಪಚ್ಚೆ ಪಜಿರ್‌ಡ್ ಉರ್ಕ್ ಸೊರ್ಕೊಂದು, ಪೆರ್ಚಿದ್ ನೆಗತೊಂದು ಇತ್ತ್ಂಡ್. ಕಂಡೊ ಬರಿ, ತೋಟದ ಕರೆ ತೋಡು, ಅಯಿಡ್ದ್ ಮಿತ್ತ್ ಮಲೆ, ಕಾಡ್ ದಿಂಜಿದ್ ಪೊರ್ಲುಡೆ ಪೊರ್ಲು ತೋಜುನ ತುಳುನಾಡೊರ್ಮೆ ಪಿಲಿ, ಬಲಿಪೆ, ಪಂಜಿ, ಕಾಟಿ, ನಿಗರ್, ಮರಿಕ್ಕ್‌ಲ್, ಪಕ್ಕಿ, ಪರಣೆಲ್ ದಿಂಜಿದ್ ಇತ್ತೊ. ಒಂಜಿ ಬುಲೆ ಹಾಲಾಂಡ ಒಂಜಿ ಒರ್ಸೊನೇ ನೆಲಪತ್ತಿಲೆಕೊ ಪನ್ಪಿ ನಂಬುಗೆದ ತುಳುನಾಡೆನ್ಪಿನಿಲ್ಲಡ್, ಮಲೆ ಜತ್ತ್ ಬತ್ತ್, ಬುಲೆ ತಿಂದ್, ಬದ್ಕ್‌ದ ನಿಲೆ ತಪ್ಪಾವು ಮಯಿರ್, ಮುಯೆರ್, ಕಾಟಿ, ಪಂಜಿ, ಉರೆ, ಬರಿಂಕೆ, ಕಡಮ್ಮ, ಕಾಟ್ ಕೋರಿದಂಚಿ ಮುರ್ಗೊ ಪಕ್ಕಿಲೆಡ್ ಅಂಚನೇ ಇಲ್ಲ ಜಾಲ್ ನಿಲಿಕೆ ಇತ್ತಿ ಕೋರಿ, ಏಡ್, ಕಿದೆ ಕಿಲಾರ್‌ಡಿತ್ತಿ ಪೆತ್ತ ಕೈಕಂಜಿ, ಎರು, ಎರ್ಮೆ, ಪಾರೋಲು ಗೋಣೆರೆನೊಟ್ಟುಡು ನಾಯಿ, ಪುಚ್ಚೆಲೆನ್ಲಾ ಪತ್ತ್ ತಿನ್ಪಿ ಪಿಲಿ, ಚಿಟ್ಟೆಪಿಲಿ, ಚೆನ್ನಾಯಿ, ಆಲ್ಪುಚ್ಚೆ, ಪೆರ್ಮರಿ, ಕಂದೊಡಿ, ಮಂಡೆಲಿ, ಕುದ್ಕೆರೆಡ್ದ್ ಬದ್ಕ್ ಬಡವಾವೊಂದು, ತೆನಸ್ ದಾಂತೆ ಉಪಾಸೊ ಕುಲ್ಲುನ ಪರಿತಿತಿ ಒದಗೊಂದು ಇತ್ತಿ ಪೊರ್ತು, ಈ ಮಾತ ಬಙಡ್ದ್ ಪಿದಯಿ ಬರ್ಪಿ ಆಲೋಚನೆಗ್ ಬೂರ್ಯೆರ್ ಆನಿದ ಪೆರಿಯೆರ್. ತನ್ಕುಲು ಉಪಾಸೊ ಇತ್ತ್ಂಡಲಾ ಮಲ್ಲೆತ್ತ್, ಇಲ್ಲಡ್ ಇಪ್ಪಿ ಪೊಡಿ ಬಾಲೆಲೆ ಬಡವುದ ಬಾಯಿಗ್ ಪುಂಡಿ ನುಪ್ಪುದಾಂತೆ ಬುಲೆಚ್ಚಿಲ್ ಕುಂದುನ ಸರಿಯತ್ತ್ ಪಂದ್ ಈ ಮುರ್ಗೊಲೆ ಅಗ್ಗೊಲಿಪು, ದಟ್ಟಿಪು, ಬುಲೆ ಮೇಪು, ಅಲಾಕ್ ಮಲ್ಪುಲೆಗ್ ಅಡ್ಡ ಬೇಲಿ ಪಾಡೊಡು ಪಂದ್ ಕುಲ್ಲ್‌ನಲ್ಪ ಉಂತ್‌ನಲ್ಪ, ಕನೊ ಮನಸ್‌ಲೆನ್ ಆಲೈಪು, ಪಿನ್ಪುಲೆಗ್ ಒಡ್ಡಿನಕ್ಲೆಗ್ ತೆರಿನ ಸಂಗತಿ ಒಂಜಿ ಬೋಂಟೆ ದೇರುನವಾಂಡಲಾ, ಅವು ಸಾಸಿತೊದ ಪರಿಯಾರೊಲಾ ಅತ್ತ್, ಪಗೆಲ್ ಬೋಂಟೆಡ್ ಪಕ್ಕಿಲೆನ್, ಇರ್ಲ ಬೋಂಟೆಡ್ ಮುರ್ಗೊಲೆನ್ ತಿಂದ್ ಮುಗಿತ್ತ್, ಅರಿಪ್ಪೊಲಿ ಆಂಡ ಮರಿ ಪೆರ್ಮರಿ ಕೆರ್ಪುನ ತಾದಿ ಎಂಚಿನ? ಅತ್ತಂದೆ ಬೋಂಟೆ ದೇರ್‌ದ್ ಅನಪತ್ತ್‌ಡ್ದ್ ಎಚ್ಚ ಕೆರ್ಪುನ ಏತ್ ಸರಿ? ಆತೆ ಅತ್ತಂದೆ ಬೋಂಟೆದ ಪಿರವು ಬೂರ್ದ್ ಬುಲೆ ಬುಲೆಪು ಕಜ್ಜೊ ಮಲ್ಪೆರೆ ಪುರ್ಸೊತು ದಾಂತೆ ಪೋಂಡ ಎಂಚ? ಪನ್ಪಿ ಉಡಲ್‌ಡಿತ್ತಿನಂಚನೇ ಪ್ರಕೃತಿ ಸಮತೋಲನಗಾದ್ ಇಪ್ಪುನ ಮುರ್ಗೊ ಪಕ್ಕಿಲೆನಲಿತ್ ಕುಲ್ಲ್ಂಡ ದುಂಬುದ ಬದ್ಕ್ ಎಂಚ ಪನ್ಪಿ ಸವಾಲ್‌ಲಾ ಅಕ್ಲೆನ ದುಂಬು ನೆಗತೊಂದು, ಉಲ ಉಡಲ್‌ನ್ ಕುತ್ತೊಂದು, ಬದ್ಕ್ ಸಿರ್ಕವೊಂದಿತ್ತ್ಂಡ್.
ಅಂಚಿನೊಂಜಿ ಪೊರ್ತು ನೆಗತಿ ಆಲೈಪು ಒಂಜಿ ಪಂಡವು ತೂ, ತುಡರ್ ಇತ್ತಿನಾಡೆ ಸೋಂಕಂದೆ, ದೂರೊ ಪೋಪಿ ಮುರ್ಗೊಲು ಒಂಜಾತ್ ಆಂಡ ಮಾನ್ಯ ಮೂರಿ ಇತ್ತಿನಾಡೆ ಆಂಜಂದಿನವು ನನೊಂಜಾತ್, ನೀರ್ ಕಡಪಂದಿನವು ಬೊಕ್ಕೊಂಜಾತ್ ಉಲ್ಲೊ. ಅವೆನ್ ಮಾತಾ ಆಲೋಚನೆ ಮಲ್ತಿ ಒಂಜೇ ಮನಸ್, ಒಂಜೇ ಆಲೈಪುದಕ್ಲ್ ಪಾಡಿನೊಂಜಿ ಪಾಯೊ ಇನಿಕ್ಕಾನಗ ಮಲ್ಲ ರೂಪುಡು ನಮನ್ ಮಾತಾ ಕೈ ಮುಗಿದುಂತದಿನಿ ಕಳುವತ್ತ್. ಅಂದ್, ಕಾಡ ಬರಿಟ್ ತೋಡ ಕರೆಟ್ ಬಯ್ಯಗಾನಗ ಒಂಜಿ ಕಲ್ಲ ಮಿತ್ತ್ ತಿಬಿಲೆ, ತುಡರ್, ದೊಂದಿ, ನಿನೆ ದೀದ್ ಬೊಲ್ಪು ತೋಜಾವುನ ಅಟ್ಟಣೆ ಮಲ್ತ್ಂಡ ಎಂಚ ಆವು ಪನ್ಪಿನೊಂಜಿ ಅಲೋಚನೆ ಮಲ್ತೆರ್. ಅಂಚನೇ ನಡಪೆರೆ ಸುರು ಮಲ್ತೆರ್.
ಆಲೋಚನೆ ಆಚರಿಪುಗು ಒಡ್ಡ್ಂಡ್. ಬೆನ್ನಿ ಬುಲೆ ಕೈಕ್ ಬರ್ಪುನ ಮುಟ್ಟ ಪೊರ್ತು ಕಂತಿ ಬೊಕ್ಕ, ಮುರ್ಗೊಲು ಮಲೆ ಜತ್ತ್ ಬರ್ಪಿ ಪೊರ್ತುಡು ತೋಡ ಬರಿ, ಕಾಡ ಕರೆ ಕಾಟ್ ಕಲ್ಲ್ ಪಾಡ್ದ್, ನಿನೆ ದೊಂದಿ ದೀದ್ ಬರೊಂದು ಇತ್ತೆರ್. ಮುರ್ಗೊಲೆ ಬಾದಿಪು ಕಮ್ಮಿ ಆವೊಂದು ಬತ್ತ್‌ದ್ ಬುಲೆಯಿ ಫಸಲ್ ಕೈಕ್ ತಿಕೆರೆ ಸುರುವಾನಗ ಆನಿದ ಸತ್ಯ, ನ್ಯಾಯಡ್ ಬದ್ಕುನ ಮಾನಿನ ಉಡಲುಲಯಿ ಎಲ್ಯ ಒಂಜಿ ಬೇನೆದ ಮುಳ್ಳು ಕಂತೆರೆ ಸುರುವಾಂಡ್. ಮುರ್ಗೊ ಪಕ್ಕಿಲೆನ್ ಗಿಡರ್ದ್, ಅವೆನ್ನ ಬಂಜಿ ಕಟ್ಯತಾ ಪನ್ಪಿ ಬೆಂಗ್ ಉಡಲ್ ನಾಟ್‌ನಗ ಬುಲೆಯಿ ಬುಲೆಟ್ ಒಂಜಿ ಪಾಲ್ ದೈವೊ ದೇಬೆರೆಗ್, ಕುಡೊಂಜಿ ಪಾಲ್ ದಾನೊ ದರ್ಮೊಗು, ನನೊಂಜಿ ಪಾಲ್ ಬಿತ್ತ್ ಬಿತ್ತೆರೆ, ಬೊಕ್ಕೊಂಜಿ ಪಾಲ್ ಜೋಕುಲು ಬಾಲೆಲೆನೊಟ್ಟುಗು ಇಲ್ಲಗ್ ದೀವೊಂದು ಕಡೆಕ್ ಒಂಜಿ ಪಾಲ್ ತಪ್ಪವಂದೆ ಪಕ್ಕಿ ಪರಣೆಲೆಗ್ ಪಂದ್ ದೀಪುನ ಕಟ್ಟ್ ಸುರುವಾಂಡ್. ಕಾಯಿ ಕಜಿಪುದ ಬುಲೆಟ್ ಉರೆಲ್ ಕೊಡಿತ್ತಿನ ಎಲಿ ಪೆರ್ಗುಡೆಲೆನೊಟ್ಟುಗು ಮುರ್ಗೊ ಪಕ್ಕಿಲೆಗೇ ಮುಡಿಪಾಂಡ್.
ಇಂಚನೇ ದುಂಬು ಪೋನಗ ಜೋಕುಲು ಬಾಲೆಲ್ ಕೇನೆರೆ ಸುರು ಮಲ್ತೆರ್ ಕಾಡ ಕರೆತ ಆಚರಣೆದ ಬಗೆಟ್. ದಾಯೆಗಾದ್ ಆ ಕಲ್ಲ್, ಅವ್ವೆಂಚಿನೆಕ್ ತೂ ಪನ್ನಗ, ಹಿರಿಯಕ್ಲ್ ಆ ನೀರಬರಿತ ಕಲ್ಲ್ ನಿಗರ್‌ಗ್, ಅಪೇದ ಕೋಂಟುದ ಪಿಲಿಕ್ಕ್, ಈ ಮೂಲೆದ ಪಂಜಿಗ್, ಅವ್ವೊಂಜಿ ಮರಿಕ್ ಪಂದ್ ಅಕ್ಲೆನ ಇಲ್ಲದ ಬುಲೆಕ್ಕ್ ಬಾದಿಪು ಮುರ್ಗೊಲೆನ ಬರ್ಪು ತಾದಿದ ಜೀಟಿಗೆದ ಪಿರವುದ ಪುರಪು ಪನ್ನಗ ಆ ಬಾಲೆಲ್ ಅವೆನ್ ನಂಬೋಲಿಗೆ ಆದ್ ನಂಬೆರೆ ಸುರು ಮಲ್ತೆರ್.
ಆಚರಣೆ ಬತ್ತ್ ಆರಾಧನೆದ ನಿಲೆಗಟ್ಟಡ್ ಉಂತ್ಂಡ್. ಪೆರಿಯಕ್ಲ್ ಮಲ್ತೊಂದು ಬತ್ತಿ ಆಚರಿಪುನು ಅಕ್ಲೆನ ಇಲ್ಲದ ಜೋಕುಲು ಕಟ್ಟುನಿಟ್ಟಾದ್ ಆಚರಿತ್, ಕಾಡ ಬರಿತ ಕಾಟ್ ಕಲ್ಲ್‌ನ್ ತೋಡ ನೀರ್‌ಡ್ ದೆಕ್ಕ್‌ದ್, ಅಯಿಕ್ಕ್ ಕಾಡ ಪುರ್ಪೊಲೆನ್ ಅಯಿಟ್ಲಾ ನೀರ ಪಸೆ ಇತ್ತಿನಲ್ಪ ಬೇರ್ ಊರಿ ನಿಚ್ಚೊಲಾ ಜೊಂಕಿಲೆ ಜೊಂಕಿಲೆ ಪೂ ಬುಡ್ಪಿ ಕಾಡ ಕೇಪುಲ ಕನತ್ ದೀದ್ ಕಾಲ ಕಾಲೊಗು ಸರಿಯಾದ್ ಪೂಪೂಜನೆ ಮಲ್ತೊಂದು ಬತ್ತೆರ್. ಕಾಟ್ ಕಲ್ಲ್‌ಗ್ ಬಗ್ತಿದ ಅರಿಕೆ, ಮದಿಪು ಸಂದಾಯೆರ್. ಆಡೆಗ್ ಪಾಡಿ ಕಲ್ಲ್‌ಗ್ ಸಗ್ತಿ ದಿಂಜೊಂದು ಬತ್ತ್ಂಡ್. ಮಲ್ತಿ ಅರಿಕೆ ಈಡೇರೊಂದು, ಬುಲೆ ಫಸಲ್ ಎರ್ಕೊಂದು, ಕಾಡ ಮುರ್ಗೊಲೆ ಪುಂಡುದ ಉಪ್ರಾಲಿ ಕಮ್ಮಿಯಾವೊಂದು, ನರಮಾನಿ ನೆಮ್ಮದಿಡ್ ಉನೊಂದು ತಿನೊಂದು ನಿದ್ರೆ ಮಲ್ಪುಲೆಕ ಆಂಡ್.
ನಿಜ ಅರ್ತೊಡು ತೂಂಡ ಕಾಡ ಮುರ್ಗೊಲು ನರಮಾನ್ಯ ಚಾತಿರ್ಪುದ ಬಲೊಕ್ಕು ಮಲೆ ಜಪ್ಪುನ ಕಮ್ಮಿ ಆಂಡ್. ಆಟಿದ ಜಡಿ ಬೊಲ್ಲೊಗು ತೋಡು ಕಡಪೆರೆ ಅವಂದಿ ಮುರ್ಗೊಲು ಆಟಿಡ್ ಮಲೆ ಏರಿಯೊ. ಕೆಡ್ಡಸ, ಪತ್ತನಾಜೆ, ಪರ್ಬೊದ ಬೋಂಟೆಲ್ ಸಂಪ್ರದಾಯದಂಚ ನಡಪುನಗ ಮುರ್ಗೊಲು ಒಂತೆ ಸಮಯ ದೂರೊ ಉಂತ್‌ದ್ ಬುಲೆ ಒರಿಪುದ ನಿರೆಲ್ ಆಂಡ್.
ಆರಾಧನೆ ಕಾಲಿ ಕಾಟ್ ಕಲ್ಲ್‌ಡ್ ಉಂತಂದೆ ಇಲ್ಲ ಬಾಕಿಲ್‌ಗ್ ಮುಟ್ಟ್‌ನಗ ಮದನ ಕೈಟ್ ದೀಯಿ ಪಲಾಯಿ, ಮಣೆ ಮಂಚಾವು, ಸಾನೊಲೆಗ್ ಬತ್ತ್ ಉಂತ್ಂಡ್. ಲೆಕ್ಕೆಸಿರಿ, ಪಂಜುರ್ಲಿ, ಗುಲಿಗೆ, ರಾವು, ಪಿಲ್ಚಂಡಿ ಪನ್ಪಿ ಪುದರ್‌ಲೆಡ್ ಆರಾಧನೆ ಪಡೆವೊಂದು ದುಂಬು ಪೋಂಡು. ಅಗೆಲ್, ತಂಬಿಲೊ, ಪರ್ವೊಲು ಕಾಲೊ ಕಾಲೊಗು ನಡತೊಂದು ಬತ್ತಿಲೆಕೊ ಬೂತೊಲು, ದೈವೊಲು, ಸತ್ಯೊಲು ಪನ್ಪಿ ಪಿನ್ಪು ಪುಟ್ಟೊಂದು, ಅಯಿಕ್ಕಯಿಕ್ಕ್ ಒಂಜೊಂಜಿ ಅತ್ಯಾರ್ ಅತಂಡ ಆಯುದೊಲು ಅರ್ಪಿತೊ ಆಂಡ್. ಆತೆಗೆ ಉಂತಂದಿ ಆರಾಧನೆಡ್ ಇಲ್ಲದ ಕಂಡೊಡು ನುಗೊ ನಾಯೆರ್‌ಗ್ ಪುಗೆಲ್ ಕೊರ್ಪಿ ಎರು ಗೋಣೆರೆನ್ ಬುಡ್ದ್ ಪಾಡ್ಂಡ ಎಂಚ ಪನ್ಪಿ ಉಡಲ ದುನಿಪುಗು ನಂದಿಗೋಣೆಲಾ ಆರಾಧನೆ ಪಡೆಯೆ. ನೀರ ಪಸೆ ತೂದು ನಿಲೆಪಿ ಕೂಲಿಡ್ ಇಸೊ ದಿಂಜವೊಂದು ಪರಪಿ ಮರಿಲಾ ನಾಗೆ ಆದ್, ಸರ್ಪೆ ಆದ್ ತನು ತಂಬಿಲೊ, ಕಾಡನಾಟ್ಯ, ಡಕ್ಕೆಬಲಿ ಸೇವೆ ಪಡೆವೊಂಡೆ.
ಕಾಲೊ ಕರಿಲೆಕೊನೆ ಪ್ರತಿಯೊಂಜಿ ಆರಾಧನೆಲಾ ಪರಿಪೂರ್ಣ ಆಯೆರೆ ಅಯಿಕ್ಕೊಂಜಿ ಮೂರ್ತ ರೂಪು ಬೋಡು ಪಂದ್ ಮನಸ್ ಮಲ್ತಿ ಮಾನಿ ದುಂಬು ಪೋವೊಂದು ಅಲ್ಪಲ್ಪ ನಿದಾನೊಗು ಕೋಲೊ ನೇಮೊಲು ಪುಟ್ಟೊಂಡ್. ಒರ್ಸೊಗೊರೊ ದೈವೊಲೆನ್ ಮಾನ್ಯ ಸರ್ರೊಗು ಆವಾಹನೆ ಮಲ್ತ್ ಅಬಯೊ ನಟ್ಟೆರೆ ತೊಟ್ಟಿಯೆರ್. ಮಾನೆಚ್ಚಿಲ್‌ಡ್ದ್ ಗಗ್ಗರದೆಚ್ಚಿಗ್ ಬನ್ನಗ ಅವೆನ್ನ್ ಕಟ್ಟೆರೆ ಕೆಲವೊಂಜಿ ಜನಾಂಗಲೆನ್ ಗುರ್ತ ಮಲ್ತ್, ಕುಟುಮೊದ ಒತ್ತೊರ್ಮೆಡ್ ಅವೆಕ್ಕೊಂಜೊಂಜಿ ಬಗೆಟ್ ಪಾರು ದನಿ, ಮದಿಪು ಮುಡೆವೊಂದು ಪಾರ್ದನ, ಸಂದಿದ ಉರಲ್, ಬೊಟ್ಟು ತೆಂಬರೆ, ಪನ್ಪಿ ಮದು, ಉರಿಪು ಪುರಲ್‌ದ ಸೊರೊಟು ಕಟ್ಟು ಮಾನಿ ಕಟ್ಟ್‌ಕಟ್ಟಲೆಲೆ ಒಟ್ಟುಡು ದೈವೊ ಆದ್ ಲಕ್ಕ್‌ದುಂತ್‌ನಗ ಕೂಡಿ ಅರಸು ನಿಲೆ, ಗುತ್ತು, ಬಾರಿಕೆದಕ್ಲ್ ಬೆರಿಬಗ್ಗದ್ ಅಬಯೊ ನಟ್ಟೊಂದು ದುಂಬು ಪೋಪಿ ಕಟ್ಟ್ ಸುರುವಾಂಡ್. ಅವೆನೊಟ್ಟುಗು ಚಾಕಿರಿದ ಮಾನಿಲಾದ್ ಒಂಜಾತ್ ಜನೊ ಅಜಪ್ಪವೊಂಡೆರ್. ಮೇಲ್ ಕೀಲ್, ಆ ಜಾತಿ ಈ ಜಾತಿ ಪನ್ಪಿ ಬಾಮೊ ಕೊಡಿಯಡಿಟ್ ಮಾಜಿದ್ ತಿರ್ತ್ ಪನ್ಪವೊನ್ನಾಯೆ ಮಿತ್ತ್, ಮಿತ್ತ್ ಪನ್ಪವೊನ್ನಾಯೆ ಆಯಗ್ ಕೈ ಮುಗಿದ್ ಉಂತುಲೆಕೊ ಮಲ್ತ್ಂಡ್.
ಉಂದು ಮುರ್ಗೊ ಮೂಲೊ ಆಂಡ, ದೇವಮೂಲೊ, ಮಾನ್ಯ ಮೂಲೊದ ದೈವೊಲೆ ಉದಿಪುಲಾ ಆವೊಂದು ಬತ್ತ್ಂಡ್. ದೇವೆರೆ ಗಂಡೊ ಗಣೊಕ್ಕುಲು ಪಂದ್ ಕೆಲವೊಂಜಿ ದೈವೊಲೆನ್ ಮಾನಿತ್, ಅಯಿಕ್ಕ್ ಸರಿಯಾದ್ ಪಾರ್ದನ ಕಟ್ಟಿಯೆರ್. ದುಂಬು ಪೋಯಿನಂಗೆ ಮುರ್ಗೊ ಮೂಲೊದ ದೈವೊಲುಲಾ ಶಿವಗಣೊ, ವಿಷ್ಣು ಕೂಟೊ ಆವೊಂದು ಪೋಯ. ಉಂದು ಒಂಜಿ ಮೆಯಿಟ್ ದೇಬೆರೆ ನಿಲೆಡ್ದ್ ಪಿದಡಿ ದೈವೊಲು ತುಳುನಾಡ್ ಬೆಳಗಿಯೆರ್ ಪನ್ಪಾಂಡಲಾ ಕುಡೊಂಜಿ ಮೆಯಿಟ್ ನಮ್ಮ ದ್ರಾವಿಡ ಆರಾಧನೆದ ಮುದೆಲ್‌ಗ್ ಬೂರಿ ಪರ್ತೆದ ಕುಡರಿ ಪಂಡಲಾ ತಪ್ಪಾವಂದ್. ನಾಡೊರ್ಮೆ ಶೈವ, ವೈಷ್ಣವ, ಶಕ್ತಿ ಆರಾಧನೆ ಪಸರೊಂದು ಪೋಯಿನಂಗೆ ಪಸಂತ್ರದ ಆದರಿಪುಡು ಉದಿತಿ ದ್ರಾವಿಡೆರೆ ಪ್ರಕೃತಿ ಆರಾಧನೆ ಅಲ್ಲೋಲಕಲ್ಲೋಲ ಆಯೆರೆ ಸುರುವಾಂಡ್. ಅಯಿಕ್ಕ್ ಕಾರಣಲಾ ಇಜ್ಜಂದೆ ಇಜ್ಜಿ. ವೇದಾಧ್ಯಯನ ಮಲ್ತ್ ಬತ್ತಿನಕ್ಲ್ ಬರವು, ಸರವುದ ಕದಿಕೆ, ತುಪ್ಪೆಲಾದ್ ಇಪ್ಪುನ ತೂಯಿನ ನಮ್ಮಲ್ಪದ ಬರವು ದಾಂತಿನಕ್ಲ್, ಅಕ್ಲ್ ಪಂದ್ ಕೊರ್ಪಿ ಎಡ್ಡೆಪುದ ತಾದಿಗ್ ಪಜ್ಜೆ ದೀವೊಂದು, ನಮ್ಮ ನೆಲತ್ತ ಆಚರಿಪುಲೆನ್ ಅಕ್ಲೆಗ್ ಕೈದಾರೆ ಮಲ್ತ್ ಕೊರಿಯೆರ್. ಅಕ್ಲೆಗ್ ಕೊಡಿಮುದೆಲ್ ತೆರಿಯಂದಿಪ್ಪುನ ಆಚರಣೆಲೆಗ್ ಅಕ್ಲೆನವ್ವೇ ಆಯಿನ ಬೇತೆನೇ ಒರು, ಪುದರ್ ಕೊರೊಂದು ಬತ್ತ್, ದೈವೊಲೆನ್ ಅಕ್ಲ್ ನಂಬು ದೇಬೆರೆ ನಿಲೆಕ್ಕ್ ಎತ್ತಾದ್, ದೈವೊಲು ದೇಬೆರೆಡ್ದ್ ಏಲ್ ಪಜ್ಜೆ ತಿರ್ತ್ ಪನೊಂದು, ನಮ್ಮ ನಡುಟು ಉಂಡಾಯಿ ದೈವೊಲು ಮಿತ್ತ ಮಿರಿ ಲೋಕೊಡ್ದು ದೇಬೆರೆ ಅಪ್ಪಣೆಡ್ ಲೋಕೊ ಪಾಲಿಪುಗು ಬತ್ತಿನೆನ್ಪಿನ ಪೊಸ ಆಲೈಪುದಂಚಿ ಕೊನೊಯೆರ್.
ಗ್ರಾಮೊದ, ಸೀಮೆದ, ರಾಜ್ಯೊದ, ನಾಡ್‌ದ ಬಳ್ಳ ಆಳುನ ಬಳ್ಳಾಲೆರ್ ಅತಂಡ ಅರಸುಲು ಎಡ್ಡೆಡ್ ರಾಜ್ಯ ಆಲ್ಂಡಲಾ, ಕೆಲವೊರ ಅತ್ರಾಣ ಮಲ್ಪಂದೆ ಬದ್ಕ್ ಕೊನೊಯೆರೆ ನರಮಾನಿ ಆಯಿನಾಯಡ್ದ್ ಸಾಧ್ಯ ಇಜ್ಜಿ. ಅಂಚಿನಲ್ಪ ಅಧಿಕಾರದ ಚುಕ್ಕಾಣಿ ಪತ್ತಿನಕ್ಲ್ ಅತ್ರಾಣ ಮಲ್ಪಂದೆ ಇಪ್ಪೆರಾ? ಅಂಚಿನಕ್ಲೆನ್ ಎದ್ರಿತಿನಕ್ಲೆನ, ಅರಸು ಮಿತ್ತ್ ಬಂಡಾಯ ಲಕ್ಕಿನಕ್ಲೆನ, ಸಮಾಜದ ಓರೆ ಒರ್ದಲೆನ್ ದಟ್ಟಿದ್ ಕೇಂಡಿನಕ್ಲೆನ ಎದ್ರಿಪುದ ಬೆಪ್ಪು ಊರಿಡೀ ಪಸರೊಂದು ಬನ್ನಗ ಸಾಮಾನ್ಯ ಮಾನಿ ಮಂದೆಲ್ ಅರಸುನ ಬಗೆಟ್ ಪಾತೆರೆರೆ ಸುರು ಮಲ್ಪುನಗ, ನನ ಓಲು ತನ್ಕುಲೆ ನಿಲೆ ತಪ್ಪಂಡ ಪನ್ಪಿ ಪೋಡಿಗೆಡ್ ತನ್ಕುಲೆ ತಪ್ಪುಲೆನ್ ಪ್ರಶ್ನೆ ಮಲ್ಪುನಕ್ಲೆನ ಸೊರೊ ಅಡೆಂಗಾಯೆರೆ, ಏರೆಗ್ಲಾ ತೆರಿಯಂದಿಲೆಕೊ ಅಲಿತ್ತ್ ಬುಡ್ದಾನಗ ಅಕ್ಲೆಗ್ ಎದ್‌ರುಂತಿ ಪ್ರಶ್ನೆ, ಬಂಡಾಯಗಾರೆರೆನ್ ದಾದ ಮಲ್ತರ್? ಇನ್ಪಿನವು. ಒಂಜಿ ರಡ್ಡ್ ಕೋಡಿಡ್ದ್ ಪ್ರಶ್ನೆ ಬನ್ನಗ ಜಾಗೃತೆ ಮಲ್ತೊನ್ನಕ್ಲ್ ಜನೊಕ್ಲೆ ಪೋಡಿಗೆಡ್, ಅಂಚನೇ ಕೆಲವೊರ ತನ್ಕುಲೆ ನಿಲೆ ಒರಿಪುಗಾದ್ ಮಲ್ತಿ ತಪ್ಪು ಅಕ್ಲೆನುಲಯಿದ ತಾನ್ ನ್ಯಾಯ, ನೀತಿ, ಸತ್ಯ, ಧರ್ಮ ಮೀರ್ದ್ ನಡತೆನ್ಪಿ ಉಡಲ ಪೋಡಿಗೆಗ್ ಬೋಡಾದ್ ಬಲಿಮ್ಮೆ ಕೇಂದ್, ಆ ಕರಿದ್ ಪೋಯಿನಕ್ಲೆನ್ ಅಕ್ಲ್ ಮಾಯೊದ ಸೇರಿಗೆಡಾಯೆರ್, ದೈವೊಲಾಯೆರ್ ಪಂದ್ ಅಕ್ಲೆಗಾದ್ ಈರೊ ಬೀರೊ ಪನ್ಪಾದ್, ಸಂಧಿ ಪಾರ್ದನ ಕಟ್ಟದ್ ಕೋಲೊ, ನೇಮೊ, ನೆರಿ ಮಲ್ತ್, ದೈವೊಲಾದ್ ಪೂಪೂಜನೆ ಕೊರ್ದ್, ಮಣೆ ಮಂಚಾವುಡು ಆಯುದೊದೊರುಟು ಕುಲ್ಲದ್, ಗಿಂಡೆ ನೀರ್ ದೀದ್, ಪರ್ವೊ, ತಂಬಿಲೊ, ಅಗೆಲ್ ಕೊರ್ದ್ ಕಲೆ ಕಾರ್ನಿಕೊಡು ಮೆರೆಪಾಯೆರ್.
ಈತೇ ಅತ್ತ್, ಊರುಗು ಎಡ್ಡೆ ಮಲ್ತಿನಕ್ಲ್ ಬದ್ಕ್‌ಡೇ ದೇವೆರ್ ಆಯಿನಕ್ಲ್, ದೈವೊಲೆನ್ ಪ್ರಶ್ನೆ ಮಲ್ತ್ ದೈವೊ ಸೇರಿಗೆಡಾಯಿ ಕೆಲವೆರ್, ದೈವೊದ ಮಾಯೊ ಸೇರಿನಕ್ಲ್ ಮಾತ ದೈವೊಲಾದ್ ಪೂ ಪೂಜನೆ ಪಡೆವೊಂದು ತುಳುನಾಡೊರ್ಮೆ ಪೆರ್ಮೆ ಪಸರೊಂದು, ಒತ್ತು ದೈವೊಲಾದ್, ಪರಿವಾರ ದೈವೊಲಾದ್, ಅರಸು ನಿಲೆಟ್ ಇತ್ತೊಂದು ಅಕ್ಲೆನ್, ಅಕ್ಲೆನ ಅರಸೊತ್ತಿಗೆ ಕಾತೊಂದು ಬೆಳಗಿ ದೈವೊಲು ಅರಸು ದೈವೊಲಾದ್ ತುಳುನಾಡ ಕಲೆ ಕಾರ್ನಿಕೊ ಮೆರೆಯೆರ್. ಆನಿ ಕಾಲೊಡ್ದು, ಇನಿ ಮುಟ್ಟಲ ನಂಬಿನಕ್ಲೆನ್ ಇಂಬುಡು ಕಾತೊಂದು, ತಾಂಕನೊಗು ಅಪ್ಪೆ ಆದ್, ತಮೆರಿಗ್ ತಮ್ಮಲೆ ಆದ್, ಪೊಣ್ಣ ನೆರಿ ಆನ ತರೆ ಕಾತೊಂದು ಬತ್ತ್ ಇಡೀ ಲೋಕೊ ತುಳುನಾಡ್‌ನೊರ ತಿರ್ಗ್ ತೂಪುಲೆಕೊ ಮಲ್ತೊಂದು ಬೈದೆರ್.
ಇಂಚ ಬತ್ತಿ ದೈವಾರಾಧನೆ ನಿದಾನೊಗು ಆಡಂಬರದಂಚಿ ಮಾಲ್ನವು ಮಾನ್ಯನ ಪಣವು, ಗೇನೊ, ಕಲ್ಪೊಲು ದಿಂಜಿದ್ ಎರ್ಕ್‌ನ ಪುರಪುಲಾ ಅಂದ್. ಆನಿದ ಕಾಲೊಡು ಬಂಗಾರ್ ಮನಸ್‌ದ ಮಾನ್ಯನ ಉಡಲ ಬಗ್ತಿಗ್ ತಾರೆದ ತಿರಿ, ಕಾಡ ಪುರ್ಪೊ, ಗಿಂಡೆ ನೀರ್, ಕಂಗ್‌ದ ಪಾಲೆದ ಅನಿ, ದುತ್ತೈತೊದೊಟ್ಟುಗು ಪಾಲೆದ ಮುಗೊಟು ಪೊತ್ತು ಸೂತಂಚ, ಪಂಡಿ ನಾಲಾಯಿ ದೊಂಡೆಡಾಯೆರೆ ದುಂಬೆ ಕಾರ್ನಿಕೊ ಬೂಮಿ ಜತ್ತ್, ಉಡಲ್ ತಲ್ಮೆನೊ ಮಲ್ತೊಂದು ಇತ್ತಿನವು, ಇನಿಕ್ಕಾನಗ ಬೊಲ್ಲಿ ಬಂಗಾರ ಮುಚ್ಚಿಗೆ, ಪೇಂಟೆದ ಲಚ್ಚಗಟ್ಟಲೆ ಪಣವುದ ಪೂವುಡು ಬಗ್ತಿದಾಂತಿ ಉಡಲ್ ಸೇರ್ನಗ ಕಾರ್ನಿಕೊ ನಿಲೆ ಪತ್ತೆರೆ ಕಡೆಸವೊಂದು ಬತ್ತ್ಂಡ್. ಆಂಡಲಾ ದೈವೊಲೆ ಬಿರ್ದ್, ಮೈಮೆ ಅಡಿ ಪತ್ತಂದೆ ಒರಿಯೆರೆ ನಮ್ಮ ಪೆರಿಯೆರ್ ಪಾಡ್ದ್ ಕೊರಿ ಚೌಕಟ್ಟ್ ಬೊಕ್ಕ ಗಟ್ಟಿದ ಪಾಯೊನೇ ಕಾರಣ ಪಂದ್ ಲೋಕೊ ಒತ್ತೊಂದಿ ಸತ್ಯ. ಆತೇ ಅತ್ತಂದೆ ಆನಿದ ಕಾಲೊಡು ಸೂರ್ಯಚಂದ್ರೆರ್ ಇಪ್ಪು ಕಾಲೊ ಮುಟ್ಟ ಈ ತುಳುನಾಡ್‌ಗ್, ನಂಬಿ ಕುಟುಮೊಗು ಕುಂದು ಬರಂದಿಲೆಕೊ ಕಾಪುವೆ ಪನ್ಪಿ ಸತ್ಯೊಲು ಕೊರಿ ನುಡಿಕ್ಕ್ ಸರಿಯಾದ್ ಇತ್ತೆಲಾ ಕಾತೊಂದು ಬರ್ಪಿ ದೈವೊದ ಅಭಯೋ ಪಂಡ ಕಳು ಆವಂದ್.
ಕಡೆಕ್ಕಾದ್ ಪನ್ಪುನುಂದಾಂಡ ದೈವೊಲೆನ್ ಮತ್ತರ್ಮೆಡ್ದ್ ಮಿತ್ತರ್ಮೆಗ್ ಕನತ್ ಆರಾಧನೆನ್ ಕಲೆ ಪನ್ಪಿ ಪುರಪುಡು, ಅವೆನ್ನ ಕಲೆ ಕಾರ್ನಿಕೊ ತೆರಿಯಂದಿನಕ್ಲೆನ ಕೈಟ್ ಅತ್ರಾಣ ಮಲ್ಪಿ ಬದಲ್ ತುಳುನಾಡ ಪೊರ್ಲುದ ಪುರಪು ಆದ್ ಒರಿತೊಂದು ಬರ್ಪಿ ಜಬದರಿ ನಮ್ಮ ಸರ್ವೆರೆ ಜಬದರಿ ಆದ್ ಪುಗೆಲ ಮೇಲ್‌ಡುಂಡು. ತರೆತ್ತ ತರೆತ್ರ, ಪುಗೆಲ ಮೇಲ್ ವಸ್ತ್ರೊ ನಮ್ಮ ಮಾನ ಕಾಪುಲೆಕೊ ದೈವಾರಾಧನೆನ್ ನಮ್ಮ ಬದ್ಕ ಮೇಲ್ ಮಾನೊ ಪಂದ್ ಕಾಪುನ ಬೇಲೆ ತುಳುವ ಮಣ್ಣ ಒರಿಪುದ ದುಂಬುದ ಬಿದೆಕ್ಲಾಯಿ ನಮ್ಮ ಸರ್ವೆರೆ ಮಿತ್ತ್ ಉಂಡು. ಆನಿ ಉದಿತಿನೊಂಜಿ ಅಲೈಪು ಒಂಜಿ ನಾಗರೀಕತೆನೇ ಪುಟ್ಟು ಪಾಡಿಲೆಕೊ ಇನಿ ನಮಡ ಉದಿಪುನೊಂಜಿ ಅಲೈಪು ದೈವಾರಾಧನೆನ್ ಪರಪುರಪು ಒರಿತೊಂದು ದುಂಬು ಪೋಯೆರೆ ಅನುವು ಮಲ್ತ್ ಅವೆನ್ನ್ ಒರಿತ್ ಕೊಡಿಯಡಿತ್ತ ದೈವೊಲೆನ್ ಕೊಡಿಯಡಿಟೆ ಒರಿತ್ ಕಾಪುಗ..
– ಶ್ರೀಶಾವಾಸವಿ ತುಳುನಾಡ್
