ತುಳುನಾಡಿನ ಭಾಷೆ, ಸಂಸ್ಕೃತಿ ಮತ್ತು ಸಮುದಾಯ ಸಂಘಟನೆಯಲ್ಲಿ ಸಲ್ಲಿಸಿದ ಮಹತ್ವದ ಸೇವೆಯನ್ನು ಗುರುತಿಸಿ ಅಲಯನ್ಸ್ ಯೂನಿವರ್ಸಿಟಿ ಬೆಂಗಳೂರಿನಲ್ಲಿ ನಡೆದ ರಾಷ್ಟ್ರೀಯ ತುಳು ವಿಚಾರ ಸಂಕಿರಣದಲ್ಲಿ ಮೂಲ್ಕಿ ತುಳುವ ಮಹಾಸಭೆ ಇಂಟರ್ನ್ಯಾಷನಲ್ನ ಸಂಚಾಲಕಿ ಕಕ್ವಗುತ್ತು ಶ್ರೀಮತಿ ಭಾನುಮತಿ ಪ್ರಶಾಂತ್ ಶೆಟ್ಟಿಯವರಿಗೆ ಶ್ರೀ ಸರ್ವೋತ್ತಮ ಶೆಟ್ಟಿ ಹಾಗೂ ಡಾ| ರಾಜೇಶ್ ಆಳ್ವ ಅವರು ‘ತುಳುವರ್ಲ್ಡ್ ಸಮ್ಮಾನ್’ ಪ್ರಶಸ್ತಿ ನೀಡಿ ಗೌರವಿಸಿದರು. ಮೂಲ್ಕಿ ತುಳುವ ಮಹಾಸಭೆ ಇಂಟರ್ನ್ಯಾಷನಲ್ನ ಸಂಚಾಲಕಿಯಾಗಿ ಭಾನುಮತಿ ಶೆಟ್ಟಿಯವರು ತೋರಿದ ನಾಯಕತ್ವ, ಸಂಘಟನಾ ಸಾಮರ್ಥ್ಯ ಮತ್ತು ಸೇವಾ ಮನೋಭಾವವು ತುಳುನಾಡಿನ ಮಹಿಳಾ ಶಕ್ತಿಗೆ ಹೊಸ ದಿಕ್ಕು ನೀಡಿದೆ. ಮೂಲಭೂತ ಮಟ್ಟದಿಂದ ಸಂಘಟನೆಯನ್ನು ಬಲಪಡಿಸುವ ಇವರ ಶೈಲಿ, ಮಹಿಳೆಯರನ್ನು ಮುನ್ನಡೆಗೆ ತರುವ ದೃಷ್ಟಿ ಮತ್ತು ಸಂಸ್ಕೃತಿಯ ಮೇಲಿನ ನಿಷ್ಠೆ ಇವುಗಳೆಲ್ಲವೂ ಈ ಗೌರವಕ್ಕೆ ಸಂಪೂರ್ಣ ಅರ್ಹತೆಯನ್ನು ತಂದುಕೊಟ್ಟಿವೆ. ಈ ಸಮ್ಮಾನ್ ಭಾನುಮತಿ ಶೆಟ್ಟಿಯವರ ಮುಂದಿನ ಸೇವಾ ಪಯಣದಲ್ಲಿ ಇನ್ನಷ್ಟು ಶಕ್ತಿ, ಉತ್ಸಾಹ ಮತ್ತು ಪ್ರೇರಣೆಯನ್ನು ನೀಡಲಿ. ತುಳುನಾಡಿನ ಮಣ್ಣು, ಮಾತು ಮತ್ತು ಮಾನವೀಯತೆಯ ಸೇವೆಯಲ್ಲಿ ನಿಮ್ಮ ಪಾತ್ರ ಇನ್ನಷ್ಟು ಉಜ್ವಲವಾಗಲಿ ಎಂದು ಬಂಟ್ಸ್ ನೌ ಮಾಧ್ಯಮ ಸಂಸ್ಥೆ ಶುಭ ಹಾರೈಸುತ್ತದೆ.
