“ಕೋರಿಡ ಕೇಂದ್ ಸಾಂಬಾರ್ ಕಡೆವೆರಾ” ಪಂದ್ ಒಂಜಿ ಗಾದೆ ಉಂಡು. ಅಂಚ ನಂಕ್ ನರಮಾನಿಗ್ ಬೋಡಾಯಿನದಗ ಕೋರಿದ ನಾಲಿ ಪಿಜೆಂಕುನು. ಅಂಚ ಇಪ್ಪುನಗ ಈ ಕೋರಿಗ್ ಪಂಚಾಂಗ ತೂದು ಜಾತಕ ಮಲ್ಪುವನಾ? ಪಾಪ, ಕೋರಿಲಾ ಭೀಷ್ಮಲೆಕ್ಕ ಇಚ್ಚಾ ಮರಣಿ ಆವೊಡು ಪಂದ್ ಕಠಿಣ ತಪಸ್ಸ್ ಮಲ್ತ್ಂಡ್ ಗೆ. ದೇವೆರ್ ಜೋಗೊಗು ಬತ್ತ್ ದ್ (ಪ್ರತ್ಯಕ್ಷ ಆದ್) ದಾದ ಒರ (ವರ) ಬೋಡು ಪಂದ್ ಕೇಂಡೆರ್. ಕೋರಿ ಪಂಡ್ “ಎಂಕ್ ಎನ್ನಿನದಗ ಮರಣ ಬರೊಡು”. ದೇವೆರ್ ಅಂಚೆನೆ ಆವಡ್ (ತಥಾಸ್ತು) ಪಂಡೆರ್. ಅಂಚ ಇತ್ತೆ ಕೋರ್ಲೆಗ್, ನರಮಾನಿ ಕೋರಿ ಅಡ್ಕ (ಕೈಪು ಮಲ್ಪುಗ) ಪಂದ್ ಎನ್ನಿನದಗ ಮರಣ. ಪಾಪದ ಕೋರಿ, “ಎಂಕ್ ‘ಯಾನ್’ ಎನ್ನಿನದಗ ಮರನ ಬರಡ್” ಪನರೆ ತತ್ತ್ ದ್ ಪೋಂಡು.
ಇಪ್ಪಡ್, ಅಂಚ ಇಪ್ಪುನಗ ಕೋರಿ (ಕುಕ್ಕುಟ) ದಲಾ ಪಂಚಾಂಗ ಉಂಡಾ ಪಂದ್ ಕೇನರ್. ಅಂದ್ ಒಂಜಿ ನಲ್ಪ ವರ್ಸ ದುಂಬು, ಮಗ್ಗಿ ಪುಸ್ತಕದಾತೇ ಮಲ್ಲ ಕುಕ್ಕುಟ ಪಂಚಾಂಗ ಬೀಡದ ಅಂಗಡಿಡ್ ಲಾ ತಿಕೊಂದು ಇತ್ಂಡ್. ಈ ರಡ್ಡ್ ಮಸ್ತಿರೆ (ಬೂಕು, ಪುಸ್ತಕ) ಕ್ ಲೆಡ್ ಲಾ ಬಾರಿ ಲೆಕ್ಕಚಾರ ಇತ್ಂಡ್. ಮಗ್ಗಿ ಪುಸ್ತಕೊಡು ಇಪ್ಪತ್ ಇಪ್ಪೊತ್ಲಿ (20 x 20 = 400) ಮುಟ್ಟದ ಮಗ್ಗಿ (table) ಮಾತ್ರ ಅತ್ತಾವಂದೆ ವಾರದ ದಿನೊಕುಲೆನ, ಇರ್ವತ್ತೇಲ್ ವರ್ಸದ ನಕ್ಷತ್ರೊಲೆನ, ಅಜಿಪ ಸಂವತ್ಸೊರೆಲೆನ ಪುದರ್ ಇಂಚಿತ್ತಿನ ಮಾಹಿತಿ ಇತ್ಂಡ್. ಎಂಕಲೆಗ್ ಕೊಲೇಜ್ ಡ್ ಲಾ ಮಗ್ಗಿ ಪುಸ್ತಕ ಇತ್ಂಡ್. ಐಕ್ “ಕ್ಲರ್ಕ್ ಸ್ ಟೇಬಲ್” ಪನೊಂದು ಇತ್ತೆರ್. ಅಯಿಟ್ ಮುಖ್ಯವಾದ್ ಲೋಗೊರಿತಮ್, ಯ್ಯಾಂಟಿ ಲೊಗೊರಿತಮ್ ಇತ್ಂಡ್. ಬೇತೆ ಬೇತೆ ಮಾನದಂಡೊಲೆನ (units) conversion (ಪರಿವರ್ತನೆ), ಕೆಲವು ವೈಜ್ಞಾನಿಕ ಮಾಹಿತಿಲುಲಾ ಐಟ್ ಇತ್ತ.
ನನ ಕೋರಿ (ಕುಕ್ಕುಟ) ಪಂಚಾಂಗದ ಬಗ್ಗೆ ಪನರೆ ಪೋಂಡ ಮಸ್ತ್ ಉಂಡು. ಅಂಗಿದ ಎದುರುದ ಕಿಸೆಟ್ ಕುಲ್ಲುನಾತ್ ಮಲ್ಲ ಮಸ್ತಿರೆ (ಬೂಕು), ಕನ್ನಡೊಡು ಅಚ್ಚ್ ಆತಿನ ತಿಕೊಂದು ಇತ್ಂಡ್. ಉರಿಯನ್ ಬುದಾರ ಕಟ್ಟರೆ ಬಲ್ಲಿಗೆ, ಅಂಗಾರೆ ಎಡ್ಡೆಗೆ. ಕೋರ್ಲೆನ ಮೆಯಿತ ರಂಗ್ (ತುಯಿತ ಬನ್ನ) ಬೊಕ್ಕ ನಡಪುನ ತಿಥಿ ಹೊಂದೊಂದು, ಈ ಕುಕ್ಕುಟ ಪಂಚಾಂಗ. ಅಮಾಸೆಡ್ದ್ ಪುನ್ನಮೆ ಮುಟ್ಟ ಶುದ್ಧ ಅತ್ತ್ ಡ ಶುಕ್ಲ ಪಕ್ಷ, ಐಟ್ ಪದಿನೈನ್ ತಿಥಿ. ಪುನ್ನಮೆಡ್ದ್ ಅಮಾಸೆ ಮುಟ್ಟ ಬಹುಳ ಅತ್ತ್ ಡ ಕೃಷ್ಣ ಪಕ್ಷ. ಐಟ್ ಪದಿನೈನ್ ತಿಥಿ. ಇಂಚ ತಿಂಗೊಲುಡು ಮುಪ್ಪ ತಿಥಿ. ರಡ್ಡ್ ಪುನ್ನಮೆಲೆ ಮದ್ಯ 29 ದಿನ, 12 ಗಂಟೆ, 43 ನಿಮಿಷ, 12 ಸೆಕೆಂಡ್. ಹಿಂದೂ ದಿನತ ಲೆಕ್ಕ ಸೂರ್ಯೆ ಮೂಡ್ದ್ ಮನದಾನಿ ಮೂಡುನ ಮುಟ್ಟ. ಗ್ರೆಗೋರಿಯನ್ ಕ್ಯಾಲೆಂಡರ್ ದಲ್ಕ ನಡೀರ್ ಗ್ ದಿನ ಬದಲಾಪುಜಿ. ಒಂಜಿ ದಿನೊನು 60 ಗಲಿಗೆಲೆಡ್ ಭಾಗ ಮಲ್ದೆರ್, ಹಿಂದೂ ಪಂಚಾಂಗೊಡು. ಅಂಚ ಪೊರ್ತು ಮೂಡುನಗ ವಾ ತಿಥಿ ಉಂಡಾ, ಅವು ಆ ದಿನತ ತಿಥಿ. ಒಂಜಿ ತಿಥಿ ಕಡಿಮೆಡ್ದ್ ಕಡಿಮೆ 49 ಘಳಿಗೆ 23 ನಿಮಿಸ, ಎಚ್ಚೊಡ್ದು ಎಚ್ಚ 66 ಘಳಿಗೆ 23 ನಿಮಿಸ ಇಪ್ಪುಂಡು. ಅಂಚಾದ್ ಕೆಲವು ದಿನ ಒಂಜಿ ತಿಥಿ ಪೂರ ಇಪ್ಪುಜಿ. ಒಂಜೆ ದಿನೊಟ್ಟು ರಡ್ಡ್ ತಿಥಿಕುಲು ಬರ್ಪ. ಕೆಲವು ತಿಥಿ ಮೂಜಿ ದಿನ ಇಪ್ಪುನ ಸಂಭಾವ್ಯ ಲಾ ಉಂಡು. ಮುಲ್ಪ ಪನರೆ ಪಿದಾಡ್ದಿನ ಇಸಯ ಈತೇ, ತಿಥಿ ಪಗರ್ಂಡ, ಒಂಜಿ ರಂಗ್ ದ ಕೋರಿ ಕುಡೊಂಜಿ ರಂಗ್ ದ ಕೋರಿನ್ ಕಾದುನ ಅವುಕಾಸ (chance) ಲಾ ಬದಲಾಪುಂಡು ಪಂದ್ ಕುಕ್ಕುಟ ಪಂಚಾಂಗ ಪನ್ಪುಂಡು. ಉದಾರ್ಮೆಗ್ ಅಷ್ಟೆಮಿದಾನಿ ಕಕ್ಕೆ (ಕಪ್ಪು ಕೋರಿ) ಕೊರ್ಂಗ (ಬೊಲ್ದು ಕೋರಿ)ನ್ ಬುಡ್ದು ಬಾಕಿ ಪೂರಾ ರಂಗ್ ದ ಕೋರ್ಲೆನ್ ಕಾದುಂಡುಗೆ. ಆನಿ ಅಷ್ಟೆಮಿ 30 ಘಳಿಗೆನೆ ಇತ್ಂಡ, ಪೊರ್ತು ಕಂತಿ ಬೊಕ್ಕ ತಿಥಿ ಪಗರುಂಡು. ಕಕ್ಕೆ ಮಂಜೆಲೆಡ ಕಾದಂದ್ (ಸೋಪು).
ಈ ಕುಕ್ಕುಟ ಪಂಚಾಂಗದ ಪಿರ್ ಕಾರ ಕೋರಿಲೆಗ್ ಪತಿ ಮಲ್ತ್ ದ್, ಕಡೆಕ್ ಕೋರಿ ಪೋತಿನ ಏತೋ ಉದಾರ್ಮೆಲು ಉಲ್ಲ. ಅಗಲೆನ್ ನಂಬುದು ಕೋರಿಡ್ ದೂದು ಕೊರ್ದು, ಮುರ್ಕುದಿನಗಲು (ಸೋದಿನಗುಲು) ಏತೋ ಉಲ್ಲೆರ್. ರಡ್ಡ್ ಕೋರ್ಲೆಡ್ ಒವ್ವು ಕೋರಿ ತೊರ್ಪುನೈಟ್ ಚಲಾಕ್, ಒವ್ವು ಕೋರಿ ತ್ರಾಣದ, ಅಂಚೆನೆ ಕೋರಿ ದೀಪಿನಾಯೆ ಏತ್ ಉಸಾರ್ ಈ ಅಂಸೊಲೆನ್ ಹೊಂದೊಂದು ಒಂಜಿ ಕೋರಿ ಕಾದುಂಡು (ಗೆಂದುಂಡು). ಕೋರ್ಲು ಮುಟ್ಟೊನುನಗ, ತೂಪಿನ ಜನ (ಅಂಜೋವು) ಬೊಕ್ಕ ದೂದು ಕಟ್ ದಿನಗುಲು ಕಲ ಕಟ್ ದ್ ಪಂಡ ಸುತ್ತ circle ಡ್ ಉಂತುವೆರ್. ದೂದು ಕಟಿನಗುಲು, ತನ್ಕ್ ಲೆನ ಕೋರಿ ಅಡಿಕ್ ಮಿನಿ ಬೂರ್ಂಡ, “ಅಡೆ ಪತ್ತಿ ಮೈಪನ್, ಅಡೆ ಪತ್ತಿ ಸುಂದರಣ್ಣ” ಪಂದ್ ಕಲ್ಕುನ ಬೊಬ್ಬೆ, ಇನಿಕ್ ಫುಟ್ ಬಾಲ್ ವರ್ಲ್ಡ್ ಕಪ್ ಡ್ ಗೋಲ್ ಆನಗ ಜನ ಕಲ್ಕಿಲೆಕ್ಕ ಇಪ್ಪುಂಡು. ಅಂಚ ಪಂದ್ ಸುಂದರಣ್ಣೆ (ಕೋರಿ ದೀಪಿನಾರ್) ಅಂಬರಪ್ಪುಡು ಎದುರುದ ಕೋರಿನ್ ಮುಟಿಯೆರ್ ಡಾ ಫೌಲ್. ಮೇರೆನ ಕೋರಿ ಬಾಲ್ ಬುಡ್ದು ಎದುರ್ದಗಲೆಗ್ ಕೊರೊಡು.
ಪಂಡ ನಂಬಯರ್, ಒಂಜಿ ಕೋರಿ ಪೋಂಡ, ಕ್ರಿಕೆಟ್ ಮ್ಯಾಚ್ ಸೋತುಂಡ ಎಂಚ ಪೋಸ್ಟ್ ಮ್ಯಾಚ್ (ಮಾರ್ಟಂ) ಅನಾಲಿಸ್ ಆವೊಂದು ಉಂಡಾ, ಅಂಚೆನೆ ಆವೊಂದು ಇತ್ಂಡ್. ಆ ಎದುರುದ ಕೋರಿದ ತಿಗಲೆಡ್‌ ರಡ್ಡ್ ಬೊಲ್ದು ರೋಮ ಇತ್ಂಡ್, ರೆಂಕೆ ಸರಿ ಬುಡ್ಪದ್ ತೂತುಜರ್, ಉಲಾಯಿಡ್ ಕಪ್ಪು ತುಯಿ ಇತ್ಂಡ್, ಆಜರೆ ಗಂಟೆಗ್ ತಿಥಿ ತಿರ್ ಗರೆಗೆ, ಐಕ್ ಕಾತೊಂದು ಇತಿನಿ ಬೇ… ಆ ಎದುರುದ ಕೋರಿ ದೀಪಿನಾಯೆ, ಬಾಲ್ ಒಂತೆ ಕಂತನೆ ಆಂಡ್, ಬಾಲ್ ಒಂತೆ ಎಲ್ಲಿ ಆಂಡ್, ಸುರುತ ಪರ್ತೆಡ್ ಮೇರ್ (ಜಾಕಿ) ಕೋರಿ ಎಡ್ಡೆ ದೊಂಕೊಂದು ಇಪ್ಪುನಗ ಪತಿಯೆರ್, ಕಡೆತ ಪರ್ತೆಡ್ ಪತ್ತ್ ನಗ ಕಡೆಸ್ಂಡ್, ಇನಿ ಸಾಬ್ಲೊಟ್ಟು ಮಾಬಲನ್ನೆ ನಮ ಕೋರಿ ದೀಪೆರ್ ಡ ಪೋತಂದ್.
ಕೌಡೂರು ನಾರಾಯಣ ಶೆಟ್ಟಿ, ಇಟೆಲಿ.
