ಕರ್ನಾಟಕ ಸಂಘ ಕತಾರ್ : ಬೆಳ್ಳಿಹಬ್ಬ ಮತ್ತು ರಾಜ್ಯೋತ್ಸವ ಸಂಭ್ರಮಾಚರಣೆ

25 ವರ್ಷಗಳ ಸಾರ್ಥಕ ಸಂಭ್ರಮದಲ್ಲಿರುವ ಕರ್ನಾಟಕ ಸಂಘ ಕತಾರ್ 69 ನೇ ಕನ್ನಡ ರಾಜ್ಯೋತ್ಸವ, ರಜತ ಸಂಭ್ರಮವನ್ನು ನವೆಂಬರ್ 15, 2024 ರಂದು ಆಲ್ ವಕ್ರದಲ್ಲಿರುವ ಡಿಪಿಎಸ್ ಆಡಿಟೋರಿಯಂನಲ್ಲಿ ಐತಿಹಾಸಿಕಾಗಿ ಆಯೋಜಿಸಿತು. ಕತಾರ್ ಹಾಗು ಕರುನಾಡಿನ ಗಣ್ಯ ಮಾನ್ಯರು, ಕತಾರ್ ಕನ್ನಡಿಗರ ಉಪಸ್ಥಿಯಲ್ಲಿ, ಕನ್ನಡ ನಾಡು, ನುಡಿ, ಕಲೆ, ಸಂಸ್ಕೃತಿ, ಪರಂಪರೆ, ಪ್ರತಿಷ್ಠೆಯನ್ನು ಬೆಳಗಿಸುವ ರೀತಿಯಲ್ಲಿ ಈ ಕಾರ್ಯಕ್ರಮ ಅದ್ದೂರಿಯಾಗಿ ನಡೆಯಿತು.

ಕರ್ನಾಟಕದ ಶ್ರೀಮಂತ ಜಾನಪದ ಕಲೆ ಹಾಗೂ ಪರಂಪರೆಯನ್ನು ಪ್ರತಿಬಿಂಬಿಸುವಂತಹ ವೈಭವದ ರಜತ ಶೋಭಾಯಾತ್ರೆ, ಅದರಲ್ಲಿ ಯಕ್ಷಗಾನ, ವೀರಗಾಸೆ, ಡೊಳ್ಳು ಕುಣಿತ, ಹುಲಿವೇಷ, ಕೀಲು ಕುದುರೆ, ಜೊತೆಗೆ ವಿವಿಧತೆಯಲ್ಲಿ ಏಕತೆಯ ವಿಶ್ವರೂಪವಾಗಿರುವ ಭಾರತದ ಸಾಂಪ್ರದಾಯಿಕ ಆಚರಣೆಗಳಲ್ಲಿ ಒಂದಾಗಿರುವ ತಮಿಳುನಾಡಿನ ಜಲ್ಲಿಕಟ್ಟು ಎತ್ತಿನ ವೇಷಗಳ ಜೊತೆಗೆ ಮುಖ್ಯ ಅತಿಥಿಗಳಾದ ಕತಾರ್ ನ ಭಾರತೀಯ ರಾಯಭಾರಿ ಎಚ್ ಇ ವಿಪುಲ್, ವಿಶೇಷ ಅತಿಥಿಗಳಾದ ಡಾ. ಗುರುರಾಜ್ ಕರ್ಜಗಿ, ಜನಪ್ರಿಯ ನಟ ರಮೇಶ್ ಅರವಿಂದ್, ಕಾರ್ಗಿಲ್ ಯುದ್ಧ ವೀರ ಕ್ಯಾ.ನವೀನ್ ನಾಗಪ್ಪ ಅವರನ್ನು ಸಂಘದ ಅಧ್ಯಕ್ಷರಾದ ಡಾ|ಮೂಡಂಬೈಲ್ ರವಿ ಶೆಟ್ಟಿ ಮತ್ತು ಪದಾಧಿಕಾರಿಗಳು ವೇದಿಕೆಗೆ ಕರೆತಂದರು. ಸಂಘದ ಉಪಾಧ್ಯಕ್ಷರಾದ ರಮೇಶ್ ಕೆ ಎಸ್ ಅವರು ಎಲ್ಲರನ್ನೂ ಸ್ವಾಗತಿಸಿ ನಿರೂಪಕರನ್ನು ಸಭೆಗೆ ಪರಿಚಯಿಸಿದರು.

ಆರ್ ಜೆ ಪ್ರಸನ್ನ ನಿರೂಪಣೆಯೊಂದಿಗೆ ದೀಪ ಪ್ರಜ್ವಲನೆಯ ಮೂಲಕ ಆರಂಭವಾದ ಕಾರ್ಯಕ್ರಮದಲ್ಲಿ ಸಂಘದ ಬೆಳ್ಳಿ ಹಬ್ಬದ ವಿಶೇಷವಾಗಿ ಮಾಜಿ ಅಧ್ಯಕ್ಷರಾದ ಹೆಚ್ ಕೆ ಮಧು ರಚಿಸಿ, ಅಶ್ವಿನ್ ಕುಮಾರ್ ಸಂಗೀತ ಸಂಯೋಜಿಸಿದ ರಜತ ಗೀತೆಯ ಲೋಕಾರ್ಪಣೆ ನಡೆಯಿತು. ತದನಂತರ ಸಂಸ್ಥೆ ಬೆಳೆದು ಬಂದ 25 ವರ್ಷಗಳ ಸಾಧನೆಯ ಮೆಲುಕಿನ ಸಾಕ್ಷ್ಯ ಚಿತ್ರ “ರಜತ ಪಥದ ಹೆಜ್ಜೆ ಗುರುತುಗಳು” ಬಿಡುಗಡೆಯಾಯಿತು.

ಇದೇ ಸಂಧರ್ಭದಲ್ಲಿ ಸಂಘವನ್ನು ಯಶಸ್ವಿಯಾಗಿ ಕಟ್ಟಿ ಬೆಳೆಸಿದ ಮಾಜಿ ಅಧ್ಯಕ್ಷರುಗಳಾದ ಅರುಣ್ ಕುಮಾರ್, ವಿ ಯಸ್ ಮನ್ನಂಗಿ, ದೀಪಕ್ ಶೆಟ್ಟಿ ಚುಚ್ಚಿ, ಹೆಚ್ ಕೆ ಮಧು, ಡಾ.ಸಂಜಯ್ ಕುದುರಿ, ಮತ್ತು ಮಹೇಶ್ ಗೌಡ (ಸಲಹಾ ಸಮಿತಿ ಅಧ್ಯಕ್ಷರು ) ಜೊತೆಗೆ ಆಡಳಿತ ಮಂಡಳಿಯ ಮಾಜಿ ಸದಸ್ಯರುಗಳನ್ನು, ಸಂಘಕ್ಕೆ ಅವರು ನೀಡಿದ ಮಹತ್ತರ ಸೇವೆಯನ್ನು ಗುರುತಿಸಿ ಸ್ಮರಣಿಕೆ ಹಾಗೂ ಬೆಳ್ಳಿ ಹಬ್ಬದ ವಿಶೇಷವಾಗಿ ತಯಾರಿಸಿದ ಶಾಲನ್ನು ಹೊದೆಸಿ ಗೌರವಿಸಲಾಯಿತು. ಇದೇ ಸಂಧರ್ಭದಲ್ಲಿ ಸಂಘದ 25 ವರ್ಷಗಳ ಯಶಸ್ಸಿಗೆ ದುಡಿದು ಈಗ ಭಾರತದಲ್ಲಿ ನೆಲೆಸಿರುವ ಮಾಜಿ ಅಧ್ಯಕ್ಷರುಗಳು, ಆಡಳಿತ ಮಂಡಳಿಯ ಮಾಜಿ ಸದಸ್ಯರನ್ನು ಕೃತಜ್ಞತೆಯಿಂದ ಸ್ಮರಿಸಲಾಯಿತು. ಕತಾರ್ ನ ಭಾರತೀಯ ಸಾಂಸ್ಕೃತಿಕ ಸಂಘದ ಮಾಜಿ ಅಧ್ಯಕ್ಷರಾದ ಶ್ರೀಮತಿ ಮಿಲನ್ ಅರುಣ್, ಈಗಿನ ಉಪಾಧ್ಯಕ್ಷರಾದ ಸುಬ್ರಮಣ್ಯ ಹೆಬ್ಬಾಗಿಲು ಅವರನ್ನು ಹೆಮ್ಮೆಯಿಂದ ಸನ್ಮಾನಿಸಲಾಯಿತು.

ಕನ್ನಡದ ಜನಪ್ರಿಯ ನಟ ನಿರ್ದೇಶಕ, ನಿರೂಪಕ ರಮೇಶ್ ಅರವಿಂದ ಈ ಕಾರ್ಯಕ್ರಮದ ಆಕರ್ಷಣೆಯ ಕೇಂದ್ರವಾಗಿದ್ದರು. ತಮ್ಮ ಪತ್ನಿಯೊಂದಿಗೆ ಸನ್ಮಾನವನ್ನು ಸ್ವೀಕರಿಸಿ ಮಾತನಾಡಿದ ರಮೇಶ್ ಅರವಿಂದ್ ಅವರು ಕರ್ನಾಟಕ ಸಂಘವನ್ನು ಮುಕ್ತ ಮನಸ್ಸಿನಿಂದ ಪ್ರಶಂಸಿಸಿದರು. ತಮ್ಮ ಮಾತಿನುದ್ದಕ್ಕೂ ಕನ್ನಡ ಭಾಷೆ ಸಂಸ್ಕೃತಿಯ ಬಗ್ಗೆ ಅಭಿಮಾನದಿಂದ ಮಾತನಾಡಿದ ಅವರು, ವಿದೇಶದ ನೆಲದಲ್ಲಿ ಕನ್ನಡದ ಇಂತಹ ಮಹೋನ್ನತ ಕಾರ್ಯಕ್ರಮವನ್ನು ಆಯೋಜಿಸಿರುವುದು ನಿಜಕ್ಕೂ ನನಗೆ ಹೆಮ್ಮೆ ತಂದಿದೆ ಅಂದರು. ವೀಕೆಂಡ್ ವಿಥ್ ರಮೇಶ್ ಶೈಲಿಯಲ್ಲಿ ಡೈಲಾಗ್ ಹೇಳುವುದರ ಮೂಲಕ ಹಾಗೂ ಸಂಘದ ಸಾಂಸ್ಕೃತಿಕ ಕಾರ್ಯದರ್ಶಿ ಶ್ರೀಮತಿ ಸೌಮ್ಯ ಕೆ ಟಿ ಅವರ ನಿರ್ದೇಶನದಲ್ಲಿ ಮತ್ತು ಶ್ರೀಮತಿ ಭುವನ ಸೂರಜ್ ಹಾಗೂ ಶ್ರೀಮತಿ ಭಾವನ ನವೀನ್ ಅವರ ಸಹಕಾರದೊಂದಿಗೆ ಸಂಘದ ಸದಸ್ಯರು ಪ್ರಸ್ತುತ ಪಡಿಸಿದ ತಮ್ಮದೇ ಸಿನೆಮಾ ಹಾಡುಗಳ ನೃತ್ಯವನ್ನು ಮೆಚ್ಚಿ ತಾವು ಕೂಡ ಸದಸ್ಯರೊಂದಿಗೆ ನೃತ್ಯ ಮಾಡುವುದರ ಮೂಲಕ ಆಡಿಟೋರಿಯಂನಲ್ಲಿ ನೆರೆದ ಜನರ ಸಂಭ್ರಮ ಮುಗಿಲು ಮುಟ್ಟಲು ಕಾರಣರಾದರು.

ಕತಾರ್ ಕರ್ನಾಟಕ ಸಂಘ ನೀಡುವ ಪ್ರತಿಷ್ಠಿತ ಕತಾರ್ ಕನ್ನಡ ಸಮ್ಮಾನ್ ಪ್ರಶಸ್ತಿಯನ್ನು ಶಿಕ್ಷಣ ಹಾಗೂ ಸಾಹಿತ್ಯ ಕ್ಷೇತ್ರದಲ್ಲಿ ಅಪಾರ ಸಾಧನೆಯನ್ನು ಮಾಡಿದ ಖ್ಯಾತ ಶಿಕ್ಷಣ ತಜ್ಞರು, ಸಾಹಿತಿ, ಭಾಷಣಕಾರರಾದ ಡಾ ಗುರುರಾಜ್ ಕರ್ಜಗಿಯವರಿಗೆ ಸಮರ್ಪಿಸಲಾಯಿತು. ಪ್ರಶಸ್ತಿ ಸ್ವೀಕರಿಸಿ ಮಾತನಾಡಿದ ಕರ್ಜಗಿಯವರು ಕನ್ನಡ ನಾಡಿನ ಸಾಹಿತ್ಯ ಮತ್ತು ಸಂಸ್ಕೃತಿಯ ಮಹತ್ವವನ್ನು ಸಾರಿ ಹೇಳುತ್ತಾ, ಸ್ವಾರ್ಥ ರಹಿತವಾದ ಸೇವೆಯ ಬಗ್ಗೆ ಭಾರತೀಯ ಪುರಾಣದಲ್ಲಿ ಹುನುಮಂತನ ಕಥೆಯನ್ನು ಉಲ್ಲೇಖಿಸಿದರು. ಬದುಕಿನ ಬಗ್ಗೆ ಅವರ ಸ್ಪೂರ್ತಿಯ ಮಾತುಗಳು ಕತಾರ್ ಕನ್ನಡಿಗರನ್ನು ಮಂತ್ರಮುಗ್ದಗೊಳಿಸಿದವು.

ನಂತರ ಭಾರತದ ಹೆಮ್ಮೆಯ ಯೋಧರಿಗೆ ಅರ್ಪಿಸಿದ ಒಂದು ನೃತ್ಯರೂಪಕ ನೆರೆದಿದ್ದ ಪ್ರೇಕ್ಷಕರ ಕಣ್ಣಾಲಿಗಳನ್ನು ತೇವಗೊಳಿಸಿತ್ತು. ಕಾರ್ಗಿಲ್ ಯುದ್ಧದ ಸಂಧರ್ಭ ಹೇಗಿತ್ತು ಒಬ್ಬ ಯೋಧ ದೇಶಕ್ಕಾಗಿ ಎಂತಹ ತ್ಯಾಗಕ್ಕೂ ಸಿದ್ಧನಾಗ್ತಾನೆ ಅನ್ನುವುದನ್ನು ಮನ ಮುಟ್ಟುವ ಹಾಗೆ ಕ್ಯಾರೋಲ್ ಅವರ ನೃತ್ಯ ಸಂಯೋಜನೆಯಲ್ಲಿ ಎಂ ಸಿ ಸಿ ಕತಾರ್ ನ ಸದಸ್ಯರು ಪ್ರಸ್ತುತಪಡಿಸಿದರು. ಈ ಪ್ರದರ್ಶನದ ನಂತರ ಕಾರ್ಗಿಲ್ ಯೋಧ ಕ್ಯಾ. ನವೀನ್ ನಾಗಪ್ಪ ಅವರನ್ನು ಸನ್ಮಾನಿಸಲಾಯಿತು. ಸನ್ಮಾನ ಸ್ವೀಕರಿಸಿ ಕ್ಯಾ ನವೀನ್ ನಾಗಪ್ಪ ಕಾರ್ಗಿಲ್ ಯುದ್ಧದ ಆ ಸನ್ನಿವೇಶವನ್ನು ಎಳೆ ಎಳೆಯಾಗಿ ತಮ್ಮ ಮಾತುಗಳ ಮೂಲಕ ತೆರೆದಿಟ್ಟರು. ಎಂತಹ ಕಠಿಣ ಪರಿಸ್ಥಿಯಲ್ಲಿ ಕಾರ್ಗಿಲ್ ಗಿರಿಶಿಖರದಲ್ಲಿ ಭಾರತೀಯ ಸೇನೆ ದೇಶಕ್ಕಾಗಿ ಹೋರಾಡಿತ್ತು ಮಾತ್ರವಲ್ಲ ಕಾರ್ಗಿಲ್ ವಿಜಯದ ಹಿಂದೆ ತಮ್ಮ ಜೀವವನ್ನು ತ್ಯಾಗ ಮಾಡಿದ ಆ ವೀರರು ಅದ್ರಲ್ಲೂ ಪರಮವೀರ ಚಕ್ರ ಪಡೆದ ಕ್ಯಾ ವಿಕ್ರಂ ಬಾತ್ರಾ ತಮ್ಮ ಜೀವವನ್ನು ಲೆಕ್ಕಿಸದೆ ನನ್ನ ಜೀವ ಉಳಿಸಿದ್ರು ಅನ್ನುವುದನ್ನ ಹೇಳಿದಾಗ ಸಭಾಂಗಣದಲ್ಲಿದ್ದ ಬಹುತೇಕರ ಕಣ್ಣಲ್ಲಿ ನೀರಿನ ಹನಿಗಳು ತುಂಬಿತ್ತು.

ನಂತರ ನಡೆದ ಸಭಾ ಕಾರ್ಯಕ್ರಮದಲ್ಲಿ ಸ್ವಾಗತ ಭಾಷಣವನ್ನು ಮಾಡಿದ ಸಂಘದ ಅಧ್ಯಕ್ಷರಾದ ರವಿ ಶೆಟ್ಟಿಯವರು, ತಮ್ಮ ಮಾತಿನಲ್ಲಿ ಕುವೆಂಪು ಹಾಗೂ ಕವಿ ಬಿ ಆರ್ ಲಕ್ಷ್ಮಣ್ ರಾವ್ ಅವರ ಕವನದ ಸಾಲುಗಳನ್ನು ಉಲ್ಲೇಖಿಸುತ್ತಾ, ದೇವರ ಆಶೀರ್ವಾದದಿಂದ ಬೆಳ್ಳಿ ಹಬ್ಬದ ಸಂಧರ್ಭದಲ್ಲೇ ನನಗೆ ಅಧ್ಯಕ್ಷನಾಗುವ ಯೋಗ ಸಿಕ್ಕಿದೆ. ನನಗೆ ಹಾಗೂ ನನ್ನ ಉತ್ಸಾಹಿ ತಂಡಕ್ಕೆ ಬೆಳ್ಳಿ ಹಬ್ಬವನ್ನು ಆಯೋಜಿಸುವ ಅವಕಾಶ ಸಿಕ್ಕಿರುವುದು ಅತೀವ ಸಂತಸವನ್ನು ನೀಡಿದೆ. ಸಂಘದ ಸ್ಥಾಪಕರು ಹಾಗೂ ಸಂಘವನ್ನು ಕಟ್ಟಿ ಬೆಳೆಸಿದ ಎಲ್ಲರಿಗೂ ಅಭಿನಂದನೆಯನ್ನು ತಿಳಿಸಿದ ಅವರು ಸದಸ್ಯರಿಗೆ ಮುಂದಿನ ದಿನಗಳಲ್ಲಿ ಸ್ವಾರ್ಥ ರಹಿತವಾಗಿ ಸಂಘವನ್ನು ಬೆಳೆಸುವ ನಿಟ್ಟಿನಲ್ಲಿ ನಾವೆಲ್ಲರೂ ಒಂದಾಗಬೇಕು ಅನ್ನುವ ಕರೆಯನ್ನು ನೀಡಿದರು. ಸಂಘದ ಒಂದು ವರ್ಷಗಳ ಕಾರ್ಯಚಟುವಟಿಕೆಗಳ ವರದಿಯನ್ನು ಪ್ರಧಾನ ಕಾರ್ಯದರ್ಶಿ ಕುಮಾರ್ ಸ್ವಾಮಿಯವರು, ಎಂದಿನಂತೆ ಆಕರ್ಷವಾದ ರೀತಿಯಲ್ಲಿ ಪ್ರಸ್ತುತ ಪಡಿಸಿದರು.
ಮುಖ್ಯ ಅತಿಥಿಗಳಾಗಿ ಆಗಮಿಸಿದ್ದ ಕತಾರ್ ನ ಭಾರತೀಯ ರಾಯಭಾರಿ ಎಚ್.ಇ ವಿಪುಲ್ ರವರಿಗೆ ಸನ್ಮಾನಿಸಲಾಯಿತು. ರಜತ ಸಂಭ್ರಮದ ವಿಶೇಷ ವಾರ್ಷಿಕ ಸಂಚಿಕೆ “ಶ್ರೀಗಂಧ”ವನ್ನು ಅನಾವರಣಗೊಳಿಸಿ ಮಾತನಾಡಿದ ವಿಪುಲ್ ರವರು ಕನ್ನಡ ನಾಡಿನ ಸಂಸ್ಕೃತಿಯನ್ನು ಕತಾರ್ ನ ನೆಲದಲ್ಲಿ ಪ್ರಚುರ ಪಡಿಸುತ್ತಿರುವ ಸಂಘದ ಕಾರ್ಯ ಚಟುವಟಿಕೆಗಳನ್ನು, ಹಾಗು ಬೆಳ್ಳಿ ಹಬ್ಬದ ಯಶಸ್ಸನ್ನು ಮುಕ್ತ ಕಂಠದಿಂದ ಪ್ರಶಂಶಿಸಿದರು.

ಕಾರ್ಯಕ್ರಮದಲ್ಲಿ ಬೆಳ್ಳಿ ಹಬ್ಬಗಳ ಪ್ರಾಯೋಜಕರಾದ ಲ್ಯಾಂಡ್ ಟ್ರೇಡ್ಸ್ ನ ಮೋಹನ್ ದಾಸ್, ATS ನ ರೋಷನ್ ಶೆಟ್ಟಿ, ಇವೆಂಟ್ ಪ್ರಾಯೋಜಕರಾದ QDC ನ ಸತೀಶ್ ಬಿ ಆರ್ ಅವರನ್ನು ಗೌರವಿಸಲಾಯಿತು. ಅದೇ ರೀತಿ, ಎಲ್ಲಾ ರೀತಿಯಲ್ಲಿ ಸಹಕರಿಸಿ ಕಾರ್ಯಕ್ರಮಕ್ಕೆ ಬೆನ್ನೆಲುಬಾಗಿ ನಿಂತ ಎಲ್ಲಾ ಪ್ರಯೋಜಕರಿಗೂ ಕೃತಜ್ಞತಾ ಪೂರ್ವಕವಾಗಿ ಸ್ಮರಣಿಕೆಯನ್ನು ನೀಡಿ ಗೌರವಿಸಲಾಯಿತು

ಬೆಳ್ಳಿ ಹಬ್ಬದ ಬೇರೆ ಬೇರೆ ಕಾರ್ಯಕ್ರಮಗಳ ಪ್ರಯೋಜಕರುಗಳಾದ, ಅಲ್ಮಾ ಅಲ್ಯೂಮಿನಿಯಂ, ರೊನಾಲ್ಡ್ ಕುಲಾಸೋ ಅವರು ಅನಿವಾರ್ಯ ಕಾರಣಗಳಿಂದ ಕಾರ್ಯಕ್ರಮಕ್ಕೆ ಆಗಮಿಸದ ಕಾರಣ ಅವರ ಕೊಡುಗೆಯನ್ನು ಕೃತಜ್ಞತಾ ಪೂರ್ವಕವಾಗಿ ಸ್ಮರಿಸಲಾಯಿತು. ಕಾರ್ಯಕ್ರಮಕ್ಕೆ ಆಗಮಿಸಿದ್ದ ಕರ್ನಾಟಕ ಸಂಘ ಅಭುದಾಭಿಯ ಅಧ್ಯಕ್ಷರಾದ ಸರ್ವೋತ್ತಮ್ ಶೆಟ್ಟಿ ಹಾಗೂ ಮಸ್ಕತ್ ಕನ್ನಡ ಸಂಘದ ಅಧ್ಯಕ್ಷರಾದ ಪ್ರಸಾದ್, ನಾವಿಕ ಕನ್ನಡ ಕೂಟಗಳ ಪರವಾಗಿ ಆಗಮಿಸಿದ್ದ ಬೆಂಕಿ ಬಸಣ್ಣ ಮುಂತಾದ ಗಣ್ಯರ ಸೇವೆಯನ್ನು ಗುರುತಿಸಿ ಗೌರವಿಸಲಾಯಿತು.

ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪಡೆದ ಅಬ್ದುಲ್ಲಾ ಮೋನು ಮತ್ತು ಆರ್ಯಭಟ ಪ್ರಶಸ್ತಿ ಪುರಸ್ಕೃತರಾದ ಅನಿಲ್ ಬಾಸಗಿಯವರನ್ನು ಸನ್ಮಾನಿಸಲಾಯಿತು. ಆಡಳಿತ ಮಂಡಳಿಯ ಸದಸ್ಯರುಗಳಾದ ಪ್ರದೀಪ್ ಸಭಾ ಕಾರ್ಯಕ್ರಮದ ನಿರೂಪಣೆಯ ಜವಾಬ್ದಾರಿಯನ್ನು ವಹಿಸಿದರು ಮತ್ತು ಶ್ರೀ ಶಶಿಧರ ಹೆಚ್.ಬಿ. ಧನ್ಯವಾದವನ್ನು ಸಮರ್ಪಿಸಿದರು.

ಮನೋರಂಜನಾ ಕಾರ್ಯಕ್ರಮದಲ್ಲಿ ಇಂಡಿಯಾಸ್ ಗಾಟ್ ಟ್ಯಾಲೆಂಟ್ ಖ್ಯಾತಿಯ ಕುದ್ರೋಳಿ ಗಣೇಶ್ ನಡೆಸಿಕೊಟ್ಟ ಜಾದೂ ಪ್ರದರ್ಶನ ಪ್ರೇಕ್ಷಕರನ್ನು ಕುತೂಹಲದ ಕಡಲಲ್ಲಿ ತೇಲಾಡುವ ಹಾಗೆ ಮಾಡಿತ್ತು. ಡಾ. ರಾಧಾ ಶ್ರೀಧರ್ ಅವರ ವೆಂಕಟೇಶ ನೃತ್ಯ ಮಂದಿರದ ಕಲಾವಿದರ ಅದ್ಭುತವಾದ ಭರತನಾಟ್ಯ ಪ್ರದರ್ಶನ, ತುಳು ಕೂಟ ಕತಾರ್ ದಿವ್ಯ ಅವರ ನಿರ್ದೇಶನದಲ್ಲಿ ಪ್ರಸ್ತುತ ಪಡಿಸಿದ ಸೊಗಸಾದ ವೀರಗಾಸೆ ನೃತ್ಯ, ಕರ್ನಾಟಕ ಸಂಘದ ಸದಸ್ಯರುಗಳು ಮತ್ತು ಮಕ್ಕಳ ರಮೇಶ್ ಅರವಿಂದ ಮೆಡ್ಲೆ ಹಾಗು ನುಡಿ ನಮನ ಪ್ರೇಕ್ಷಕರಿಗೆ ಅವಿಸ್ಮರಣೀಯ ಕ್ಷಣಗಳನ್ನು ನೀಡಿತ್ತು. ಕಲಾವಿದರುಗಳ ಕಲಾ ಪ್ರದರ್ಶನ ರಜತ ಸಂಭ್ರಮಕ್ಕೆ ಚಿನ್ನದ ಮೆರುಗನ್ನು ನೀಡಿತ್ತು. ರೇಡಿಯೋ ಜಾಕಿ ಆರ್ ಜೆ ಪ್ರಸನ್ನ ಅವರ ಆಕರ್ಷಕ ಧ್ವನಿ ಮತ್ತು ಸುಂದರವಾದ ಕನ್ನಡ ನುಡಿಯಲ್ಲಿ ನ ನಿರೂಪಣೆ ಪ್ರೇಕ್ಷಕರ ಮನಸೆಳೆದಿತ್ತು. ಅತಿಥಿ ಕಲಾವಿದರು, ಆಡಳಿತ ಮಂಡಳಿಯ ಸದಸ್ಯರು, ಸ್ವಯಂ ಸೇವಕರ ಸ್ವಾರ್ಥವಿಲ್ಲದ ಸೇವೆ ಮತ್ತು ಶ್ರಮವನ್ನು ಸ್ಮರಣಿಕೆಯ ಮೂಲಕ ಗೌರವಿಸಲಾಯಿತು.

ಸಂಘದ ಆಡಳಿತ ಮಂಡಳಿ, ಸಲಹಾ ಮಂಡಳಿ, ಸದಸ್ಯರುಗಳು, ಸ್ವಯಂ ಸೇವಕರ ಹಲವಾರು ತಿಂಗಳುಗಳ ಬೆಲೆಕಟ್ಟಲಾಗದ ಪರಿಶ್ರಮ, ಪ್ರಾಯೋಜಕರ ಬೆಂಬಲದಿಂದಾಗಿ ಕಾರ್ಯಕ್ರಮ ಐತಿಹಾಸಿಕ ಯಶಸ್ಸನ್ನು ಕಂಡು ಇತಿಹಾಸದ ಪುಟಗಳಲ್ಲಿ ದಾಖಲಾಯಿತು. 69 ನೇ ಕರ್ನಾಟಕ ರಾಜ್ಯೋತ್ಸವ ಮತ್ತು ರಜತ ಮಹೋತ್ಸವ ಆಚರಣೆಯು ಕತಾರ್‌ನಲ್ಲಿರುವ ಕರ್ನಾಟಕ ಮೂಲದವರನ್ನೆಲ್ಲ ಒಂದುಗೂಡಿಸಿ ,ಅವರು ಬೆಳೆದು ಬಂದ ಸಂಸ್ಕೃತಿ ಸಂಸ್ಕಾರ ಪರಂಪರೆಗಳ ಹೆಮ್ಮೆಯ ಸಂಭ್ರಮಾಚರಣೆಗೆ ಸಾಕ್ಷಿಯಾಗುವುದರ ಮೂಲಕ ಕನ್ನಡದ ಬಾವುಟ ಕತಾರ್ ನ ನೆಲದಲ್ಲಿ ಗರಿ ಬಿಚ್ಚಿ ಹಾರಾಡಿತು.