ಒರ ಜಡ್ಡ್ ದ ಕಂಡೊಲೆನ ಬರಿತ ತೋಡುಡು ಕುಂಟು ಅರ್ದೊಂದು ಇತ್ತೆರ್ ಎನ್ನಪ್ಪೆ. ಯಾನ್ ದಂಡೆಡ್ ಕುದೊಂದು ಪೊಲ್ಲೆ ಪಾತೆರೊಂದು ಇತ್ತೆ. ಅಪಗ ಮರಟೊಂಜಿ ಮಂಗೆ (ದಿ) ಬಂಜಿಗ್ ಅಮತ್ ಪತೊಂದಿ ಕಿನ್ನಿದೊಟ್ಟುಗು ಎಂಕಲೆನ್ ತೂದು ಕುಲ್ಯಾಟ್ಟದ್ ‘ಟೆರ್ರೆಂಕ್’ ಪಂಡ್. ಅಪಗ ಎನ್ನಪ್ಪೆಗ್ ಒಂಜಿ ಕತೆ ನಿನೆಪಾಂಡ್‌. ಸೀತೆ, ಅವ್ವೆ ನಮ್ಮ ರಾಮನ ಕೈ ಪತಿನ ಬುಡೆದಿ. ಏರಾ ಮಡ್ಡೆಲೆ ದಾದನ ಪಂಡೆಗೆ, ಇಂಬೆ ತನ್ನ ಕಾರಡಿಯೇ ತನ್ಕ್ ತೋಜಂದಿನ, ಪೊರ್ತಿಂಗೊಲ್ದ ಬುಡೆದಿನಿ ಮಲ್ಲ ಕಾಡ್ ಡ್ ಬುಡಿಯೆ ಮೆಲ್ಲ, ಮಲ್ಲ ಮುರ್ಗೊಲೆನ ಬಾಯಿಗ್ ಬೂರಡ್ ಪಂದಾ ದಾನ್ಯ. ಆಲೆಗೊಂತೆ ಐಸ ಇತ್ಂಡ್, ವಾಲ್ ಮುಕಿ ರುಸಿಕುಲು ತೂದು, ಆರೆನ ಗುಡ್ಚಿಲ್ ಗ್ ಲೆಸೊಂದು ಪೋಯೆರ್‌. ದಿನ ದಿಂಜಿದ್, ಒರ್ಂಬ ತಿಂಗೊಲು ಪತ್ತ್ ದಿನ ಕರಿನಗ ಆನ್ ಬಾಲೆ ಪೆತ್ತೊಲು. ಬಾಲೆಗ್ ಲವೆ ಪಂದ್ ಪುದರ್ ದೀಯೆರ್. ಪೆತ್ತಿ ಪದಿನಾಜನೆ ಅಮೆ ಕಲೆವರೆ, ಸೀತೆ ಬಾಲೆದ ಮಡೆಕುಂಟು, ಪಜೆ ಪತೊಂದು ತೋಡುಗು ಪೋಯೊಲು, ಅರ್ದರೆ. ಕುಂಟು ಅರ್ದೊಂದು ಇಪ್ಪುನಗ, ಆಲ್ ಲಾ ತುಯ್ಯೊಲು, ತನ್ನ ಕಿನ್ನಿನ್ ಉಡಲ್ ಗ್ ತರ್ಕ್ ದ್ ತಾಂಗ್ ದ್ ಪತೊಂದಿನ ಮಂಗನ್. ‘ಬಾಯಿ ಬರಂದಿ ಒಂಜಿ ಕಾಡ ಮುರ್ಗಲಾ ಒಂಜಿ ಗಲಿಗೆ ತನ್ನ ಬಂಜಿಡ್ದ್ ಬತ್ತಿ ಬಾಲೆನ್ ಬುಡ್ದು ಕುಲ್ಲುಜಿ. ರಾವರೆ ರೆಂಕೆ, ಕೊಡಪರೆ ಕೋಕಾಯಿ ಆನ ಮುಟ್ಟ ಪಕ್ಕಿಲಾ ತನ್ನ ಕಿನ್ನಿನ್ ಪಟ್ಟ್ ಡ್ ದೀವೊಂದು, ನುಪ್ಪು ನಾಡುಂಡು. ಚೇ, ತಾನೆಂಚಿ ದುಸ್ಟೆ, ಪದ್ ನಾಜಿ ದಿನತ ಪುರು ಬಾಲೆನ್ ತೊಟ್ಟಿಲ್ ಡ್ ಬುಡ್ದ್ ಬೈದಿನಾಲ್?’ ಇಂಚ ಎನ್ನಿನ ಸೀತೆ, ಪಾರೊಂದು ಪೋದು, ತೊಟ್ಟಿಲ್ದ ಬಾಲೆನ್ ತಕ್ಕನದೊಟ್ಟುಗು ದೆರ್ತ್ ಕಂತ್ ದ್ ಕಲ್ಲ ಮುದೆಲ್ ಡ್ ದೀದ್, ಕುಂಟು ಅರ್ದುನ ಮುಂದರಿತೊಲು.
ಇಂಚಿಡ್ದ್ ವಾಲ್ ಮುಕಿ ರುಸಿಕುಲು, ದ್ಯಾನೊಡ್ದ್ ಲಕಿನಾರ್, ತೊಟ್ಟಿಲ್ ದ ಬಾಲೆನೊರ ತೂಕ ಪಂದ್ ಬರ್ಪೆರೆ, ಬಾಲೆ ತೋಜುಜಿ! ತಿಗಲೆಗೊರ ದಸಕ್ಕ ಬಿಸತ್ತಿ ಪಾಡಿ ಲೆಕ್ಕ ಆಂಡ್. ಬರತ ಕಂಡದ ಸಾಮ್ರಾಜ್ಞಿ ಆದ್ ಮೆರೆವೊಡಾಯಿನ ಸೀತೆನ ಬದ್ ಕ್ ಡ್ ಏತೋ ಕಷ್ಟ ನಷ್ಟ ಬತ್ತ್ಂಡ್. ‘ಪೊನ್ನ ಜಲ್ಮನೇ ಇಯಾವು, ಎನನ್ ತೂದು ಮದಪುಲೆ’ ಪಂದ್ ಅರ್ ದ್ ಮುರೆಡಿನ ಸೀತೆನ ಕತೆ ನಿಗಲೆ ತೆರಿದುಪ್ಪು. ಧರ್ಮ, ಅರ್ಥ, ಕಾಮ, ಮೋಕ್ಷ, ಇ ನಾಲ್ ಪುರುಷಾರ್ಥೊದ ಸಾಧನೆಗ್ ನಿನ್ನೊಟ್ಟುಗೇ ಇಪ್ಪುವೆ ಪಂದ್ ಅಗ್ನಿನ ಎದುರು ಪಿರ್ಮಾನ ಮಲ್ತ್ ದ್ ಕಯಿ ಪತಿನ ಕಂಡನೆನೇ ಕಯಿ ಬುಡ್ದ್, ಕಾಡ್ ಡ್ ಕೋನೊ ಬುಡಿಯೆ. ಬಂಜಿಡಿತ್ತಿ ಬಾಲೆಗಸ್ರ ತನ್ನ ಎಕ್ಕ್ ಒರಿತೊಂದಿನ ಸೀತೆ, ಬಾಲೆ ಇಜ್ಜಿಂದ್ ಆಂಡ, ದಾದ ಮಲ್ಪೊಲು? ರುಸಿಕ್ ಲೆಗ್ ಎನ್ನರೆನೇ ಸಾದ್ಯ ಆಯಿಜಿ. ದುಂಬು ಪಿರ ಎನ್ನಂದೆ, ತನ್ನ ತಪಃ ಶಕ್ತಿದ ಬಲೊಟು, ಬಾಲೆನೊಂಜಿ ಸಿಸ್ಟಿ ಮಲ್ತ್ ದ್ ತೊಟ್ಟಿಲ್ ಡ್ ಪಾಡ್ದ್ ತೂಂಕೊಂದು ಇತ್ತೆರ್. ಅಪಗ ಬರ್ಪೊಲು, ದತ್ತ ಕಯಿಟ್ ಅರ್ದ್ ದಿನ ಬಾಲೆದ ಚಂಡಿ ಮಡೆಕುಂಟು, ಬಲತ್ತ ಕಯಿಟ್ ಉಡಲ್ ಗ್ ತಕ್ಕನದೊಟ್ಟಗು ಅಮತ್ ಪತೊಂದಿನ ಬಾಲೆ, ಲವೆ. ಬತ್ತ್ ತೂಪೊಲೆ ಸೀತೆ, ಲವನ ಪಸಿರೂಪು ತೊಟ್ಟಿಲ್ ಡ್. ಅಂಚ ಕುಸಾಲ್ ಡ್ ಪುಟಿ ಬಾಲೆಗ್ ರುಸಿಕುಲು ‘ಕುಸೆ’ ಪಂದ್ ಪುದರ್ ದೀಯೆರ್. ಅಂಚ ಲವ-ಕುಸೆ, ಅಮರ್ ಜೋಕುಲೆನ ತುಲುವ ಕತೆ.
ಯಾನ್ ಲಾ ಮಸ್ತ್ ಒರ್ಸ, ಲವೆನೇ ಮಲ್ಲೆ ಪಂದ್ ಎನ್ನ್ ದಿತ್ತೆ. ಎನ್ನ ಮಾಮನ ಮೈತಿದಿ ಜೋಕುಲು ಲವ ಕುಶೆ. ಶತ್ರುಘ್ನ ಸಿಂಹನ ಜೋಕುಲೆನ ಪುದರ್ ಲಾ ಅಂಚೆನೆ. ಆಂಡ, ವಿದ್ಯುನ್ಮತಿ ಕಲ್ಯಾಣ ಆಟ ಗೊಬ್ಬುನ ಮುಟ್ಟ, ಕುಶೆ ಮಲ್ಲೆ ಪಂದ್ ಪಿಂದ್ ಇತ್ ಜಿ. ಎನಲೆಕ್ಕನೇ, ರಾಮಾಯಣ ಸರಿ ತೆರಿಯಂದಿನ ತುಲುವೆ ಕಟ್ ದಿನ ಪೊರ್ಲುದ ಕತೆ. ಮೂಲೊಡು ಇ ಕತೆ, ವಾ ರಾಮಾಯೊನೊಡು ಉಂಡು ಪಂದ್ ಪಿನಯೆ.
ಪಂತಿನಾರ್ : ಉಮಾವತಿ ಶೆಟ್ಟಿ, ಉಮಾಸದನ ಕೌಡೂರು
ಕೌಡೂರು ನಾರಾಯಣ ಶೆಟ್ಟಿ ಇಟೆಲಿ
